انجیلِ لوقا 3
3
پیغام یحیی
1رومه امپراطور تیبِریوسِ پونزدَهمین سالِ سَلطَنَتَ، خدا کلام بیابانَ دَ یحیی زکریا زا را، نازل ببه. پُنتیوس پیلاتُس، یهودیه منطقه فرماندار به، هیرودیس جلیله منطقه حاکم و چو برا فیلیپُس ایتوریَه و تِراخونیتیسِ منطقه حاکم بِه، و لیسانیوس آبیلینی منطقه حاکم بِه، و 2اَ زمون حَنّا و قیافا معبده پیله کاهن بِندِه، 3یحیی تمومه نواحی اُردن رووار دویر و وَر شی اَی و مردمه را اعلامِش کَردَی که اِشتن گناهون بخشسنه را توبه بِکَرندِه و تعمیدَ غسل بِگیرندِه. 4درباره اَم اِشَعیای پیغمبر کتابَ نیویشته بیاسه که:
«مردکی بیابانَ دَ جِیکیلییَم واتشَی
”خداوند راه، چو را آماده بِکَراه!
چو راهون دوز بکرا!
5همه ی دَرَه مَشت و همه ی کوه و تپه هموار ببینده؛
کَجَ راهون، راست ، و چالهَ چوله راهه، هموار ببینده.
6اُخُری همَّه ی مردم، خدا نجاته وینندِه.“»
7یحیی به اَ جماعتی که اومَینده چُو وَر غسل تعمید بیگیرنده واتشَی: «ای اَفعی زاده هون، که شَماش هشدار بِدا تا اَ غضبیَ که آ دِوَزا؟ 8اِشتنییَم موایو که: ”چما جَد ابراهیم پیغمبره.“ شَما را وام که، خدا قادره ام سِگونَ دَ ابراهیم را نسلی وجود بایره. پس توبه بِکراه و اَعمالی انجام بِدیا که نشون بدی توبه رون کَرده. 9حتی هَنِنه تِبَرِ، دارون بِن ناینده و هر داری که چاک میوه مَدییَه، ایبِرِنده و آتش دَلَ فر دینده.»
10مردم یحیی کودَ آپَرسسشون: «پس اَما چِه بکروم؟» 11یحیی چون جواوش بدا: «اَ کسی که دِ خلاوُن داره، ایو بیدی اَوی که خلاو نِداره، و اَ کسی که غذا داره نی هِمنَه گَوَن بِکَره.» 12خراجگیره بومِندِ تا تعمید غسل بگیرنده. چو کودَ آپرسسنده: «استاد، اَما چِه بکروم؟» 13یحیی اَجون بِوات: «از اَ اندازَه ای که تعیینشون کرده ویشتر خراج مَگیرا.» 14سربازه چو کودَ آپَرسِسِشون: «اَما چِه بکروم؟» یحیی اَجون بوا: «زور و تهدیدییَم هیچ کسیه دَ پول مَگیرا و هیچ کسه تُیمت مَزنا و شَما مِزدِ را راضی بِبا.»
15مردم منتظر بِنده و اِشتنَییَم فِکرشون کردَی که بی یحیی هه مسیح موعود بیبی؟ 16یحیی چون جواوِش هِمنه بِدا: «اَز شَماهون آوییَم تعمید دیم، امّا کسی آ که چِمِنَ قویتره و اَز لیاقت نِدارم چُو پای جارِ بَنده آکَرم. اَو شَماهون خدا مقدسه روح و آتشییَم تعمید دی. 17اَو اِشتَن چَنگه اشتن دستَ دَ داره تا اِشتن خَرمنگاه تمیز بکَره: و گَندِمه اشتن انبار ذخیره کره، اما سِمَرِ اَ آتَشیییَم که اینِمَره سوجونه.»
18یحیی علایده نصیحتونییَم ام چاک خبرِ مردمِش بدا. 19اما یحیی، هیرودیس حاکمش سَرَ زون بِکَه چون اشتن بِرا زَنِگش هیرودیاش بردَ به و پر خلافش کرده به. 20هیرودیس یحییاش دِراینت زندان و همنه علایده خطایی، اشتن خطاهونِش ایضافه بکه.
21همُّن تعمید ایگَتَنه پَش، عیسی نی تعمیدش بِگَت و دُعاش کردَی که آسمان آبه 22و روح القدوس، کوتَر شارین چُو سر نازل ببِه، آسمونَ دَ صَصی بومه «تَه چمن عزیزه زایش، از اِشتَ دَ پِر راضیم.»
عیسی شجره نومه
23عیسی تقریبا سی سالَه به، که اِشتن خدمتش شروع بِکَه. مردمه هِمنَه زونِسَینده که عیسی یوسف زاعه، یوسف، هِلی زا، 24هِلی، مَتّات زا، مَتّات، لاوی زا، لاوی، مِلْکی زا، مِلْکی، یَنّا زا، یَنّا، یوسف زا، 25یوسف، مَتّاتیا زا، مَتّاتیا، عاموس زا، عاموس، ناحوم زا، ناحوم، حِسْلی زا، حِسْلی، نَجّی زا، 26نَجّی، مَئَت زا، مَئَت، مَتّاتیا زا، مَتّاتیا، سِمِعین زا، سِمِعین یُسِک زا، یُسِک، یهودا زا، یهودا، 27یوحَنان زا، یوحَنان، ریسا زا، ریسا، زِروبابِل زا، زِروبابِل، شِئَلتیئیل زا، شِئَلتیئیل، نیری زا، 28نیری، مِلکی زا، مِلکی، اَدّی زا، اَدّی قوصام زا، قوصام اِلمادام زا، اِلمادام، عیر زا، 29عیر، یوشَع زا، یوشَع، اِلعازار زا، اِلعازار، یوریم زا، یوریم، مَتّات زا، مَتّات، لاوی زا، 30لاوی، شَمعون زا، شَمعون، یهودا زا، یهودا، یوسف زا، یوسف، یونام زا، یونام، اِلیاقیم زا، 31اِلیاقیم، مِلیا زا، مِلیا مِنّا زا، مِنّا، مَتّاتا زا، مَتّاتا، ناتان زا، ناتان، داوود پاتشاه زا، 32داوود پاتشاه، یَسا زا، یَسا عوبید زا، عوبید، بوعَز زا، بوعَز، سَلمون زا، سَلمون، نَحْشون زا، 33نَحْشون، عَمّیناداب زا، عَمّیناداب، رام زا، رام، حِصْرون زا، حِصْرون، فِرِص زا، فِرِص، یهودا زا، 34یهودا، یعقوب زا، یعقوب، اسحاق زا، اسحاق، ابراهیم زا، ابراهیم، تارَح زا، تارَح، ناحور زا، 35ناحور، سِروج زا، سِروج، رِعو زا، رِعو، فِلِج زا، فِلِج، عِبِر زا، عِبِر، شِلَخ زا، 36شِلَخ، قینان زا، قینان، اَرْفَکْشاد زا، اَرْفَکْشاد، سام زا، سام، نوح زا، نوح، لَمِک زا، 37لَمِک، مَتوشالَح زا، مَتوشالَح، خَنوخ زا، خَنوخ، یارِد زا، یارِد، مَهَلَلئیل زا، مَهَلَلئیل، قینان زا، 38قینان، اَنوش زا، اَنوش، شِیث زا، شِیث، آدم زا و آدم، خدا زا به.
ที่ได้เลือกล่าสุด:
انجیلِ لوقا 3: KTT
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
@ 2024 Korpu Company