انجیلِ لوقا 8
8
زَنَکُونی که عیسی همراه بِنده
1اُخُری عیسی شهر به شهر و دِه به دِه گَردِسَی و خدا پاتشاهی شاده خَوَرِش اعلام کردی. اَ دونزه شاگرد چو خمنا بنده، 2بعضی زَنَکُونی که پلیدَ ارواح و مریضیونَ دَ شفاشون گَتَه به اومییَه بِنده: مریمِ که اجو مَجْدَلیّه واتشون که چو دَ هفت پلیده روح اَبَر شیه به، 3یوآنّا خوزا زَنِگ، که خوزا هیرودیس مباشر به، سوسن و علایدَه زنکُون. اَم زَنکُون اِشتن دارایییَم عیسی و چُو شاگردونِشون کمک کردَی.
کشاورز مَثل
4وختی مردم همه ی شهرونَ دَ عیسی وینتَه را اومییَه بنده و پِر جماعتی جمع ببنده، عیسی اَم مَثلِش بِزِه و بِوات: 5«ای روز ای کشاورزی دانَه اوشونتنه را بشه وختی دانِش اوشونتَی بعضی راه دِلَه ایکَتِنده و بِولیندشون و پَرندهون بومِندِ اَجوشون بُخه. 6بعضیون سِگیَ زمینون دَلَ ایکَتِنده و وختی پیله آبنده خشک ببنده، چون که اَ زمینِ خاک رطوبت نِدَ. 7بعضی دانَه هون نی خارِ دِلَه ایکَتِنده و بِرَ نی خارون رشد بکه و دانِه هونِشون خفه بکه. 8امّا بعضی دانه هون چاکه خاک دَلَ ایکَتِنده و پیله آبنده و صد برابر بارشان بایرد.» اُخُری عیسی بِلندَ صَصییم بوات: «هر که گوش اَشنوسن داره، بَشنوه!»
9عیسی شاگرده اَم مَثلِ معناشون چو کودَ آپرسسنده. 10عیسی بوات: «خدا پاتشاهی اَسرارِ درکِ شماشون داعه اما مردمییَم گَوَن مثالونییَم لاوه بکرم، تا :
«”دِدِسِنده، امّا مَویننده؛
بَشنَونده، امّا مَزوننده.“
11«ام مثله معنا اَمِ: دانَه، خدا کلامه. 12دانه عونی که راه دَ ایکَتِنده اَوی اِسنده که خدا کلام اَشنونده، امّا اُخُری ابلیس آ و کلامه چون دِلَ دَ دِزه، تا مَتوننده ایمان بایرنده و نجات پیدا بکرنده. 13دانه عونی که سگیه زمین دلَ ایکَتِندِه اَوِنده که وختی خدا کلام اَشنونده، اَجو شادی ییَم قبول کرنده، امّا کلام چون را ریشه نِزَنه. اَمِ چند وقت ایمان دارنده، امّا وختی امتحانِ موقعه آرسه اِشتن ایمان از دس دینده. 14دانه هونی که خارِ دَلَ ایکَتِنده اَوِنده که خدا کلامه اَشنونده، امّا دنیا نگرانی و مال و ثروت و دنیا لذت، اَ کلامه خفه کره و بار نایره. 15امّا دانه هونی که چاکَه زمینِ سر ایکَتِنده اَوی اِسنده که خدا کلامه اَشنونده، و اَ کلامه چاک و صدق دِلییَم اشنونده و نیا دارنده، و صبورییَم ثمر آیرنده.
چراو مثَل
16«هیچکه چراوِ اونِگیره تا چو سَر سَر پوش اُنیه یا تخت بِن بنییه! بلکم چراوِ چراودانه سر نی تا هر کسی دِله بِشی، چُو نورِ بِوینِه. 17چون هیچ مخفیه چی نی که آشکار مبی و هیچ مخفی چی نی که معلوم مَبی. 18پس ویراجون ببا که چِمن لاوه چه طره اَشنوا، چون اَ کسی که داره، اَجو ویشتر آدایه بی و اَ کسی که نِداره، اَ چی ای که فکر کره داره نی، چو کودَ ایگته بی.»
عیسی ما و برا
19هه لَحظه، عیسی ما و چو بِراعه بومِندِ تا عیسی بویننده، امّا چون جماعت پِر به نتونسشون عیسی نزدیک ببینده. 20پس عیسیاشون بوات: «اِشته ما و اِشته براعه بَرَ دَ وِندَردِندِه و گَوِندِ اَتَه بویننده.» 21عیسی جواو بدا: «چِمن ما و چمن بِرایه اَوِنده که خدا کلام اَشنونده و اَجو انجام دینده.»
عیسی طوفانه آرام کره
22ای روز عیسی اِشتن شاگردانش بوات: «دریاچَه اَ دیم بِشوم.» پس قایقِ دِلَ بِنِشتِنده. 23وختی شینده عیسی خواو بشه. ای دَفَه دریا دَ تِندَ بادی بِوَزِس هَنده تِند به که قایق آوییَم مَشت ببه و چون جان خطر دِکَت. 24شاگرده بِشنده عیسی وَر و اَجوشون خواوَ دَ اوپاب بکه و بواتشون: «ای استاد، ای استاد، چیزی نِمَنتَه که غرق ببوم!» عیسی اوپاب ببه و باد و کولاک و موجون را غیضِش بِکَه. توفان تمام ببه و همه یقا آرام ببه. 25عیسی اَجون بِوات: «شَما ایمان کاره» شاگرده بترسِسنده و تعجبییَم هَمدیگرِ کودَ آپرسِسِنده: «ام کیه که حتی باد و آوِ فرمان دی و اَوه چو کودَ فرمان بَرنده.»
ای دَلویی شفا
26اوُن آرسسنده جَدَریان ناحیه که دریاچه اَ دیم، جلیله منطقه وَرَ به. 27وختی عیسی ساحلش قدم بنا، ای مردکی یَم که دیو زده به و اَ شهره آدَمانَ دَ به، دیمادیم ببه که خیلی وقت بِه خلاوش دِنِکرده به و کییه دَ زندگیش نِکردَی، بَلکم قبرستونونَ دَ زندگیش کردَی. 28وختی عیسیش بوینت نارَش بِکَه و چو دست و پا دِکَت و بِلنده صَصییَم بوات: «ای عیسی، خدای متعال زا، تَه اَمِن چه کار داری؟ اَته مندَت کَرم اَمِن عذاب مَده!» 29چون عیسی پلید روحش دستور دایه بِه که اَ مردکَ دَ اَبَر با. اَ روح چند را اَوِش گَتِش به و با ام که چو دست و پاشون قُل و زنجیرییَم دِوسته بنده و چو ویراجون بِنده، زنجیرش پارَه کردَی و دیو اَ مَردکش بردَی بیابان 30عیسی چو کودَ آپرسس: «اِشته نوم چیه؟» جواوش بدا: «قُشونِ،» چون خیلی دیوِه چو دِله شییه بِنده. 31دیوه مِندتییَم عیسی کودَ بِگَوِسِنده که اَجون دستور مَدی که آگردنده جهندمه دله.
32اَ نزدیکی خوعه رَمه ای به که تَپه سَر غذا شون خردَی. دیوِ عیساشون مِندت بِکَه که اجازه بدی خوعون دِلَه بِشینده، و عیسی اجازش بدا. 33چو پش، دیوه اَ مردکَ دَ اَبَر بِشنده و بِشنده خوعون دِلَ و خوعه اَ تپه دَ گِلون آبه دریاچه دِله و غرق ببنده.
34وختی خوعِه چوپونه امشون بِوینت دِوَشتنده و بِشنده شهر و روستا. همُّن را ام قضیه شون بوات. 35مردم اَبَر بِشنده تا اَ چه که اتفاق دکَته به بویننده، وختی عیسی وَر آرسسنده و بیوینتشون که اَ مردک که دیوُن چو دَ اَبَر شییه بنده، عسیی لنگون وَر نِشتاسه، بِتَرسسنده. اَ مردک خَلاوش دِکرده به و عقلمند به. 36اوُنی که اَم ماجرا شون اِشتن چَشمونییَم وینته بنده، بواتِندِ که اَ دیوزده مردک چه طَرَه شفاش گَته. 37پس همه ی مردمِه جَدَریان منطقه عیسی کودَ بِگَوِسِنده که اَجون ترک بِکره، چون ترسِسَه بِنده. پس عیسی قایقَ دَ بِنِشتشه و بِشه. 38اَ مردکی که دیوه چودَ اَبَر شییه بنده، عیسیش مِندت بِکَه که چو خمنا بیشی، اما عیسی اَوِش بخرسا و بِوات: 39«آگرد اِشته کیَه و اَ چی که خدا اِشرا کردِشه، همُّنِ را بوا.» پس اَ مردک بِشه و سراسر شهرش اعلام بِکَه که عیسی چُو را چِه کردشه.
ای زَنَکی شفا و یایروس کِلِگِ زنده آکردن
40وختی عیسی آگَردِس، مردم چُو پیش بِشنده، چون همه چُو منتظر بِنده. 41اُخُری مَردکی که چو نوم یایروس به، و یهودیان عبادتگاه رئیس بهِ، بومه و عیسی دست و پا دِکَت و مِندتش بِکه که بیشی چُو کیه. 42چون چو کِلِگ که دُونزده ساله به کورو مَردَی.
وختی که عیسی راه دَ به، جمعیت هر طرفَ اجو هجوم آیردِنده. 43مردمه دلَ ای زَنَکی بِه که دُونزده سال به خون ریزیش دَ و با ام که تمام اشتن دارایی طبیبون را خرجِش کرده به، هیچ کس نتونسَی اَجو علاج بکره. 44اَ زَنَک پِشت دَ عیسی نزدیک ببه و چو اَبا لبِش دس بزه. و البَحل چُو خونریزی بند بومه. 45عیسی آپرسس: «کی اَمَنِش دَس بِزه؟» وختی همُّن هاشاشون بِکه، پِطرُس بوات: «ای اُستاد، مردم هر طرف اِشته دویره جمع آبینده و اَته هجوم آیرنده!» 46امّا عیسی بوات: «ای نفره اَمِنِش دَس بِزِه! چون بزونِسِمه که قُوتی چِمِنَ دَ اَبَر بشه!» 47اَ زَنَک وختی بوینتشه که نتونه اشتن جا بیدی، ترس و لرز ییَم بومه پیش و عیسی دس و پا دِکَت و همُّن چشمون پیش بوات که چرا عیسیش دس بزِه و چه طَرَه البحل شفاش بِگت. 48عیسی اجو بوات: «کلگ اِشته ایمان اَتِش شفا داعه. ساق و سلامت بِشه.»
49عیسی لاوِش کردَی که ای نفر یایروس، یهودیان عبادتگاه رئیسِ کییه دَ بومه و بوات:«اِشته کینه بمه دِ استادِ زحمت مَده.» 50عیسی وختی اَمِش بَشنَوِس، یایروسِش بوات: «مترس! فقط ایمان بدا! اِشته کلگ سلامت بیی» 51وختی که آرَسِس یایروس کییه، عیسی ناشتِش کسی جز پِطرُس و یوحنا و یعقوب و اَ کِلِگِ په و ما چو خمنا کییه دِلهَ بِشی. 52همه ی مردم اَ کِلِگِ خونین بِرَمِسَینده و زاریشون کردَی. عیسی بوات: «دِ مَورَما چون اَ کِلِگ نِمَرده بلکَم خوتاسه.» 53اَون عیسیاشون مسخره بکه چون که زونِسَینده که اَ کِلِگ مَرداسه. 54امّا عیسی اَ کِلِگِ دَسش بِگَت و بوات: «کینه اوپاب ببه!» 55اَ کِلِگ زنده ببه و هه لحظه اِشتَن یقا دَ اوپاب ببه. عیسی بوات که اَجو غذا بدینده. 56اَ کِلِگِ پِه و ما تعجبییَم مات بیه بِنده، اما عیسی اَجون بِوات که ام ماجرا کسی را موانده.
ที่ได้เลือกล่าสุด:
انجیلِ لوقا 8: KTT
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
@ 2024 Korpu Company