انجیلِ مرقس 7
7
رسم و رسومات و حکمان،
1فَریسی فرقه علما، بعضی توارات معلمین خمنا که اورشلیم شهر دَ اومیه بنده، عیسی دویر جمع آبنده. 2و بیوینتشونه بعضی عیسی شاگرده نجس دسونییَم، ینی نِشورده دسونییَم، غذا خورِنده. 3چون که فریسیه و همه یهودیه، شیخون رسم و رسوم شارین، تا اِشتن دسه چاک مشورنده، غذا نُخَرنده. 4وختی بازارَ دَ آینده، تا بشور آشور مَکَرِنده چیزی نُخَرنده. و پر عَلایده رسم و رسوماته نی انجام دینده. قَدارون، فگوردانان، مسی قابون و صندلیون شوردَنه شارین. 5فریسیه و تورات معلمین عیسی کود آپرسسشونه: «چرا اِشته شاگرده شیخون رسم و رسوم شارین رفتار نکرِنده، و نجس دسونییَم غذا خُرِنده؟» 6عیسی جواو بدا: «اِشَعیای پیغمبره شَما دِ دیمون دربارَه چه چاکش پیشگویی بِکَه! همنه که نویشتشونه،
«”اَم قوم اِشتن گَرییَم اَمِن احترام نینده،
امّا چون دل چِمِنَ دوره.
7اَون بیخودی اَمِن پرستش کرنده،
و بشریه حکمون، خدا احکامه جا مردمه یاد دینده.“
8شَما خدا احکامرون ول کرده و آچِکِسَیو انسانیه رسم و رسومات.»
9اُخُری عیسی اجون بِوات: «شَما زیرَکونَه، خدا حکمه رد کرا تا شَما رسم و رسومه انجام بدییا! 10چون موسی پیغمبر بوات” اِشته پِه و ماعه احترام اونه “و ”هر که اِشتن پِه یا ما دِشمون بیدی، گَوَن کوشته بیبی.“ 11امّا شَما وایو آدم تونه اِشتن پِه یا ما بواعه: ”هر کمکی که بی یَی از شَما بکرم، خدا را اسه و خدا را وقفِم کرده “ 12و هِمنَه شَما نارزا که اَو، اِشتن پِه یا ما را هیچ کاری بکره. 13هِمنَه شَما، شَما رسم و رسوماتییَم که اَجون، علایده آدمونَ نی یاد دییا، خدا کلامه باطل کرا و هِمنَه کارون پِر انجام دییا.»
14عیسی هنی مردمش وُنگ بِکَه اِشتن وَر و اَجونِش بِوات: «شَما همَه اَمِن گوش بکرا و اجِمِ بزونو: 15هیچ چی بیرونِ آدمه نی که بتونه چو دله بِشی و اَجو نجس بکره، بلکم اَ چی که آدمه وجودَ دَ اَبر آ، اَجو نجس کره. 16هر که گوش اَشنوسن داره، بَشنوه!
17وختی عیسی مردمِش ترک بِکَه و بِشه کییه، چو شاگرده اَم مَثَله معنی شون چو کودَ آپرسسنده. 18عیسی بِوات: «شَمانی درک نکرا؟ مگم نِزونا که هر چه که بیرونَ د آدمه دله بِشی، نِتونه اَجو نجس بکره؟ 19چون چو دِلِ دلَ نیشی، بلکم چو ترنه دله شی و اُخُری دفع بی.» عیسی اِشتن ام لاوَعییم، همهی خُردنی چَکچیش پاک اعلام بکه. 20و عیسی بِوات: «اَ چی که آدمه وجودَ اَبَر آ، اَوه که آدمه نجس کره. 21چون اَ چیونی که آدمه وجودَ دَ و آدمه دِلَ دَ اَبَر آینده، ام اِسنده: پلیده افکار، بیعفتی، دزّی، قتل، زنا، 22طمع، شرارت، حیله، هرزه بین، حسادت، تیمت، غرور و احمق بییَن. 23همهی اَم بده چیه آدمه وجودَ دَ اَبَر آینده و اَجو نجس کرنده.»
غیریهودیه زَنکی ایمان
24عیسی اَ مکانَ دَ اَبَر بومه و بِشه صور و صیدون منطقه. عیسی بِشه ای کییه ای دِلَه؛ و نِگَوسِشه کسی خَوَردار بِبی که بِر اِسَه. امّا هنی نِتونسِشه اِشتن جا بیدی. 25ای زَنکی که چو ولِگ کِلِگ پلید روحِش دَ، وختی دربارَه عیسی بشنوسشه، البحل بومه و عیسی پا دکَت. 26اَ زَنَک غیر یهودی بِه و سوریه فینیقیۀ منطقه مردمَ دَ به، عیسیاش مندت بِکَه که دیوه چُو کِلِگَ دَ اَبَر بِکَره. 27عیسی اَجو بوات: «بارز اوّل خُوردگون سیر ببنده، چون دِرِست نی خوردگون نانه اوگوری و سِبه هون پیش ایکَری.» 28امّا اَ زَنک جواو بدا: «آها، آقا، امّا حتی سِبه نی از اَ خوردَه تیکه هونی که خوردگون سِفره سر ایبی خُورنده.» 29عیسی اَجو بِوات: «اِشته ام لاوه خونین، بِشه که دیو اِشته گلک دَ اَبَر بومه!» 30اَ زَنک بِشه کییه، بیوینتِشه که چو کِلِگ اشتن یقا دَ درازش کَشِسِه و دیو چو دَ اَبَر شیاسه.
عیسی ای کره مردکه شفا دی
31اُخُری عیسی صور منطقه دَ آگردس و صیدونه راه دَ بِشه جلیله دریاچه طرف، دِکاپولیس منطقه دَ آوردَی. 32بِر، مردکِیشون بایرد چو ور که هم کَر بِه و هم نتونِسِشَی چاک لاوَ بِکَره. اَون عیسیشون مندت بِکَه اِشتن دس چو سر اونیه. 33عیسی، اَ مردکش جماعت دلَ اَبَرِش بایرد، و ببردشه کنار گوشَه ای و اِشتن انگوشتِش اونا چو گوشون دلَ. اُخُری لَش آوش ایکَه و اَ مردکه زونش دس بزه. 34اَ لحظَه آسمونش دِدِشت و آهیش بکَشِس و اَ مردکش بِوات: «اِفتَح!» - ینی «آبه!» 35هه لحظَه اَ مردکه گوشِه آبنده و بتونِسِشه چاک لاوَ بکره. 36عیسی اَجونش قدغن بکه که اَم موضوع هیچ کَسِ را موانده. ولی هر چه ویشتر اَجونش قدغن کَردَی اَون ویشتر دربارَه اَم ماجرا لاوِشون کردَی. 37مردم مات و مبهوت ببنده، بواتشون: «اَو، هر کاریش که بکه، چاکه؛ حتی کَرون گوشِ و لالون زونه آکره!»
ที่ได้เลือกล่าสุด:
انجیلِ مرقس 7: KTT
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
@ 2024 Korpu Company