2. Korinta 2
2
Truarich, un wuawäajen truarich
1Ekj haud mie väajenomen, daut ekj junt nich noch eemol wudd truarich moaken, wan ekj no junt kjeem. #1Kor 4,21; 2Kor 12,21 2Wiels wan ekj junt truarich moak, wäa es dan jebläwen, om mie froo to moaken? Daut wudd doch wada jie sennen, dee ekj truarich jemoakt haud. 3Ekj haud junt soo jeschräwen, ekj wull biem näakjsten mol junt besieekjen nich truarich sennen motten äwa dee, äwa dee ekj mie freien sull. Ekj haud dit vetruen en junt aula, daut jie junt met mie metfreien wudden. 4Ekj wia bedrekjt un schreef junt met Angst em Hoat un met väl Tronen; daut wia nich daut ekj junt truarich moaken wull, oba daut jie weeten sullen, woo goot ekj junt sie.
Däm bestroften Maun vezeien
5Wan irjentwäa Trua veuasoakt haft, dan haft hee daut nich mau mie aunjedonen, oba, om nich too väl to sajen, junt aula. 6Oba dise Strof, dee hee von de Meaheit jekjräajen haft, es fa dän Maun jenuach. 7Nu vejäft un treest am, daut sien truarich sennen am nich too sea doldrekjt. 8Doawäajen froag ekj junt, am wada leeftolich auntonämen. 9Ekj schreef junt uk, om junt oppe Proow to stalen un to seenen, auf jie en aules jehuarsom wieren. 10Wäm jie vejäwen, däm vejäw ekj uk. Un waut ekj vejäft hab, wan doa waut to vejäwen wia, daut hab ekj en de Jäajenwuat von Christus jedonen, fa junt toom gooden. #Joh 20,23 11Dit es, daut Soton ons nich en siene Macht kjricht. Wiels wie weeten goot, waut de Soton em Senn haft. #Luk 22,31; 1Pet 5,8
Paulus luat opp Norecht
12Aus ekj no Troas reisd, toom doa daut Evangelium von Christus to prädjen, funk ekj ut, daut de Har doa eene Däa fa mie opjemoakt haud. #Apost 14,27; 1Kor 16,9 13Oba ekj haud ennalich nich Fräd, wiels ekj funk mienen Brooda Titus nich. Soo neem ekj doa Aufscheet un reisd no Mazedonien. #Apost 20,1; 2Kor 7,6
Paulus aus Apostel em Deenst fa Christus
14Wie danken Gott, dee ons en Christus emma siejen lat. Un soo aus sikj een scheenet Jeroch vespreet, soo brukt Gott ons, aulawäajen Christus bekaunt to moaken. 15Wie sent fa Gott de scheenrikjende Bootschoft von Jesus Christus mank dee, dee jerat woaren, un uk mank dee, dee veloaren gonen. #1Kor 1,18 16Fa dee, dee veloaren gonen, es daut een Doodesjeroch toom Doot. Un fa dee, dee jerat woaren, es daut een Läwensjeroch toom Läwen. Oba wäa es emstaunt, daut to doonen? #Luk 2,34; 2Kor 3,5 17Wie sent nich soo aus väle, dee met Gott sien Wuat Schacha driewen un doamet waut vedeenen wellen. Soo aus von Gott jeschekjte, sent wie iernst bie de Sach un räden en siene Jäajenwuat aus Christus siene Deena. #2Kor 1,12; 4,2; 1Pet 4,11
ที่ได้เลือกล่าสุด:
2. Korinta 2: PB
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Plautdietsch Bible © 2003 Kindred Productions and United Bible Societies Association, Inc.