Matie 2
2
Owrú-kán-bɔ̀ cüìcüì hɔ̀n hɔ́n nyan Zhezü
1Ye bî Zhezü Bɛtlehɛmɛ̀n anmàn, Zhüde kpɔsɔ wú, ɛnvra léyi Herɔdɛ̀n dú govràn nɔn. N'ebî vra mɛẅi lɔ, ɛwrú-kán-bɔ̀ cüìcüì hɔ̀n léyi nyri okùcànkrò mɛ̀n ankà nɔn, dú ɛmɛẅiemɛ̀n vá Zherüzalɛmɛ̀n anmàn.
2Yɔ yrɛ le: “Tɛyri de ɛnẅì léyi ye bî, hɩ ke le dú Zhüifɛ̀n-bɔ̀ nɛ̀ncüì nɔn ndù nɛ́n? Bɔ̀ kán n'okùcànkrò srɔ ɛmɛẅiemɛ̀n, hɩ kruhú de bɔ́ và, ô bɔ̀ cüe nɛ̀n ankɔ̀rɛ̀ ezìwúɛ nɔn.” 3Ɛnvra léyi Herɔdɛ̀n yá ankà ndɔ lɔ nɔn, nɛ̀n dú gbɔ̀gbɔ̀ mɛ̀n, nɛ́n mán Zherüzalɛmɛ̀n anmàn-bɔ̀ mɛhi. 4Nɛ̀n borɛ Ɔwɔ-cice-bɔ̀ cüìcüì mán ɛnyànmàn-gbànvri-ankà-yé-bɔ̀ léyi dú nɛ́n fɛcüè lɔ mɛ̀n nɔn ɛkru, kɩ ne yrɛ yɔ ɛyri léyi ye le bî Ebɩdie-wrɔn lɔ nɔn. 5Yɔ mrɛ́n nɛ̀n ɔmùan le: “Bɛtlehɛmɛ̀n anmàn, Zhüde kpɔsɔ wú. Ɔmuhi nyàn ankà léyi Ɔwɔ-mùanwú-ankà-dɔ́-wrɔn merɛ́n nɔn:
6‘Vɛ́n Bɛtlehɛmɛ̀n, Zhüde ɛnhi wú anmàn,
è sɩ̀ dù Zhüde kpɔsɔ wú lɔ, anmàn léyi kè sɩ̀ ẅɛ̀n vɔ̀nshɛ́ nɔn;
ɔmuhi v'ebɩ́ lɔ mɛ̀n de ke le dù kɛ̀ srɔ ɛnhi-nɛ́n-zi léyi kɛ lɛ nyrɔn Izraɛlɛ̀n fɛcüè lɔ nɔn.’ ”
7Zɛtɛn Herɔdɛ̀n bi owrú-kán-bɔ̀ cüìcüì hɔ̀n lɔ ɛshremɛ̀n kɩ ke yrɛ yɔ ɛnvra lɔ mɛ̀n cehɛ́n léyi okùcànkrò lɔ srɔ nɔn. 8Zɛtɛn nɛ̀n wá yɔ ɔkɔ̀hɔ̀n Bɛtlehɛmɛ̀n anmàn kɩ nɛ dɔ́ yɔ le: “Nyɛ́n hɔ̀n ô nyɛ́n ji ɛnẅì lɔ anvrɛnvrɛn; kɩ ɛnvra léyi nyɛ cɔ́ nɛ̀n nɔn, nyɛ́n tán mɛ̀n mɛ̀n nyrì, ô mɛ̀n mán mɛ̀n hɔ̀n mɛ̀n cüe nɛ̀n ankɔ̀rɛ̀ ezìwúɛ.”
9Ɛnvra léyi ɛnnɛ̀ncüì Herɔdɛ̀n tán yɔ ɛnyànmàn trɔ nɔn, yɔ hɔ̀n. Zɛtɛn yɔ kán okùcànkrò léyi dú ɛmɛẅiemɛ̀n srɔ: okùcànkrò lɔ dú yɔ ezì, tɛ́n ɛnvra léyi nɛ̀n cɔ́ ɛyri léyi ɛnẅì lɔ dù nɔn, nɛ́n sannyɔn. 10Yɔ dú pɔ̀püɛ̀ vri mɛ̀n ɛnvra léyi yɔ kán nɛ̀n nanvrɛn lɔ nɔn. 11Yɔ bru anwɔn mɛ̀n kɩ yɔ kán ɛnẅì lɔ mán nɛ́n muan Mari mɛhi. Yɔ shran annankruemɛ̀n kɩ yɔ cüe ɛnẅì lɔ ankɔ̀rɛ̀ ezìwúɛ; zɛtɛn, yɔ gbrɔ y'ɛnlowrú lɔ kɩ yɔ ce nɛ̀n ɛci: ansɩ̀kɛ, anjɔsàn mán ɛnzhì bánbán. 12Zɛtɛn, ndà mɛ̀n lɔ Ɔwɔ kɛ dɔ́ yɔ, yɔ bɩ́ vru ɛmɛẅi yɔ hɔ́n Herɔdɛ̀n yri; yɔ bɩ́ ɛnlevri nyàntɛn yɔ hɔ́n y'anmàn ɛnhi wú.
Zhozɛfɛ̀n bɩ́ ɛnẅì lɔ mán nɛ́n muan srɛ́ hɔ́n Ezhiptɛ̀n ɛnhi wú anmàn
13Ɛnvra léyi owrú-kán-bɔ̀ cüìcüì hɔ̀n lɔ vru ɛmɛẅi hɔ́n y'anmàn nɔn, Ɛẅɛnwrɔn kùyüre-wrɔn tɔ̀n ci Zhozɛfɛ̀n ndà mɛ̀n kɩ dɔ́ nɛ̀n le: “Tɔhú, bɩ ɛnẅì lɔ mán nɛ́n muan mɛhi, ɛ̀ srɛ́ ɛ̀ hɔ́n Ezhiptɛ̀n ɛnhi wú anmàn; ɛ̀ yɛ́ nanvrɛn lɔ hàn kɩ kɛ cɔ́ ɛnvra léyi mɛ lɛ wá tán mɛ́n è vru ɛmɛẅi ɛ̀ và nɔn. Ɔmuhi Herɔdɛ̀n ke le ji ɛnẅì lɔ, ô kɛ̀ hán ye wri nɛ̀n nɔn.” 14Zhozɛfɛ̀n tɔhú ɛnnyran lɔ, bɩ́ ɛnẅì lɔ mán nɛ́n muan kɩ hɔ́n Ezhiptɛ̀n ɛnhi wú anmàn. 15Nɛ̀n yɛ́ nanvrɛn lɔ hàn kɩ cɔ́ Herɔdɛ̀n wú vra. Eci ndɔ lɔ wɔɛ̀n ô ankà léyi Ɛẅɛnwrɔn ci Ɔwɔ-mùanwú-ankà-dɔ́-wrɔn mùan mɛ̀n ndɔ̀ nɔn kɛ̀ sá nmù: “Mɛ́n bi m'ɛnẅì kè dú Ezhiptɛ̀n anmàn kɛ̀ srɔ ɛntrɛ.”
Ɛẅì hɔ̀n wrì
16Ɛnvra léyi Herɔdɛ̀n nyri ɔmu le ɛwrú-kán-bɔ̀ cüìcüì hɔ̀n lɔ wɔrɔ nɛ̀n ankora nɔn, nɛ̀n bɩ́ ɛmɛ̀nhyì sevri. Nɛ̀n wá tán ye wri wúcɔ̀-ẅì hɔ̀n lɔ fɛn léyi ẅɛn ɛnnànwàn kru anhyrɛ̀ mán yɔ hɔ̀n léyi dú ɛnnànwàn zri mán ɛcá mɛ̀n, hɩ dú Bɛtlehɛmɛ̀n ɛnhi wú anmàn mán anmàn ndɔ hɔ̀n léyi dú ɛtɛ̀sɛ̀n nɔn. Ankà hɔ̀n léyi Herɔdɛ̀n cɔ́ yá owrú-kán-bɔ̀ cüìcüì hɔ̀n lɔ tɛ̀sɛ̀n nɔn, hɩ wú lɔ de nɛ́n cì nɛ̀n hán eci ndɔ lɔ nɔn. 17Zɛtɛn Ɔwɔ-mùanwú-ankà-dɔ́-wrɔn Zheremi ankà-dɔ̀ lɔ sá nmù:
18“Yɛ yá Rama anmàn lɔ, anẅìɛ̀-vra tɔ̀n,
eyú wù mán obòtò vri ankà.
Rashɛlɛ̀n de ke wú eyú ku n'ɛẅì hɔ̀n ɛwú,
kɩ nɛ́n sɩ́ ji le ye bi ɛnbɔrɛ yɛ wá nɛ̀n, ɔmuhi ɛẅì hɔ̀n lɔ nwù nɔn.”
Ezhiptɛ̀n dù srɔ vra
19Ɛnvra léyi Herɔdɛ̀n nwù nɔn, Ɛẅɛnwrɔn kùyüre-wrɔn tɔ̀n ci Zhozɛfɛ̀n ndà mɛ̀n Ezhiptɛ̀n ɛnhi wú anmàn 20kɩ kɛ dɔ̀ nɛ̀n le: “Tɔhú bɩ ɛnẅì cɛ lɔ mán nɛ́n muan mɛhi, ô è vru ɛmɛẅi ɛ̀ hɔ́n Izraɛlɛ̀n ɛnhi wú anmàn, ɔmuhi anwrɔn hɔ̀n léyi ke ji kɛ̀ hán ɛnẅì cɛ lɔ kè wù nɔn, yɔ wùɛ.” 21Zhozɛfɛ̀n tɔhú, bɩ́ ɛnẅì lɔ mán nɛ́n muan mɛhi kɩ vru ɛmɛẅi hɔ́n Izraɛlɛ̀n ɛnhi wú anmàn. 22Tɛ́n nɛ̀n yá le Herɔdɛ̀n ẅì Arshelahüsɛ̀n bɩ́ nɛ́n zi yri lɔ, dú Zhüde kpɔsɔ wú nɛ̀ncüì; zɛtɛn ɛnjansù bru nɛ̀n, nɛ̀n sɩ̀ yɛ̀ ɔkpɔsɔ ndɔ lɔ wú. Ndà mɛ̀n, ɛnvra léyi nɛ̀n cɔ́ Ɛẅɛnwrɔn mɛẅi ankà nɛ̀n yá nɔn, nɛ̀n hɔ́n Galile kpɔsɔ wú. 23Kɩ nɛ́n hɔ̀n yɛ́ anmàn léyi ye bi Nazarɛtɛ̀n nɔn. Ɔmu lɔ de ndù nɔn, ô Ɔwɔ-mùanwú-ankà-dɔ́-bɔ̀ ankà lɔ kɛ̀ sá nmù: “Ye le bi nɛ̀n Nazarɛtɛ̀n-anmàn-wrɔn.”
Zhan Batisì Wɔ ankà léyi ndɔ nɔn
(Nyɛ́n nyan Markɛ̀n 1:1-8; Lükɛ̀n 3:1-18; mán Zhan 1:19-28 wrú lɔ mɛ̀n)
Kasalukuyang Napili:
Matie 2: ƐAA03
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.