Mateo 6
6
So Jesús dapaxaguenataxanec da lataxac da qai'ot ca ÿaÿamaqchiguiñi
1Sa ishit qome da qanachaxañiita da huo'otaq qau'ochi da qad'amqajnataxanaxaqui, da yaqto' qami' ÿauaachiguilo na shiÿaxauapi. Cha'ayi da nachi qoñiitec de'eda, nachi ñi qadta'ai mayi neta'ague da piguem, ñimayi sa ishit da ÿauo'o ca qanshiitenaguiiqui. 2Qaq ÿoqo'oyi da ivita da qautauañi cam huo'o da lhuenaxanaxa, qalaq sa ishit da ÿaÿajna'a't qanqashiñi 'enauac na shiÿaxauapi da qoñiita'am da 'eetec nam saq ÿataxalec da lataxac da nachaxaata da huetaigui ana laponaxaquipi na judiopi qataq na nqa'aicpi. Qaq 'eetec de'eda namayipi, cha'ayi chochi nshitaique da no'on da n'aqtaguec. Qalaxayi aÿim shinapec, da de'eda i'ot, damayi naigui da sogote da huo'o da nshiitenaguec. 3Qalaxayi 'am da ivita da huo'o ca 'ai'ami' cam huo'o da lhuenaxanaxa, qalaq sa ishit da ivida'a da 'auaÿajnaxanaxanec cam 'adÿa mayi 'anauochaxaua. 4Chaqdata da 'oxotchiguiñi de'eda 'au'ot. Qaq ñim 'adta'a mayi ÿaÿaten cam saq cha'a, ñimayi ÿauo'o ca 'anshiitenaguec.
So Jesús dapaxaguenataxanec da atamnaxac
(Lucas 11.2-4)
5Qaq da ivita da qanatamñi, qalaq sa ishit qome da qoñiita'am nam chochi nachaxanaxaicpi da natamen mayi nqopita da nachatchiguiñi da huaigui anam laponaxaquipi na judiopi huo'otaq acam lamaxa ca nqa'aic da 'enauac na shiÿaxauapi ÿataqta ilochigui. Qaq aÿim qami' shinapegalo da namayipi sogote huo'o da nshiitenaguec. 6Qalaxayi 'am da ivita da 'anatamen, qalaq 'aunoxonoigui ca 'adma'. Nachi 'auapogui ca lasom. Ime, qaq 'anqouagaxaunot ñim 'adta'a mayi saq cha'a, ñim 'am hueta'aguet. Nachi ñimayi mayi ÿaÿaten cam saq cha'a mayi 'au'ottac, ishit da ÿauo'o ca 'anshiitenaguec.
7Qaq da 'anatamen, nachi sa ishit da 'avi'iguelaxattalec ca 'ad'aqtac mayi qaica ca naigui, da qoneta'am nam sa ishit da ÿauatton ñi Dios, mayi ipi'itaxaatega da qai'axaÿa, cha'ayi ÿataqta sa ÿala'ac da ltaxaÿaxac. 8Qaq sa ishit qome da qau'enaxachi namayipi. Cha'ayi ñi qadta'a Dios, ñimayi ÿaÿaten cam qami' qaviñiitaique da huo'otaq saxanaxa da qauÿaxañiÿot. 9Qaq ÿoqo'oyi da qanqouagaxauñi, qalaq qoñiita':
'Am qadta'a Dios mayi qoneto'ot na piguem,
'enauac da qaÿi'oxoden da 'ad'enaxat.
10Ña 'anamaxaño' qome da 'ad'onataxanaxac,
yaqto' i'ot ca qonetapeguec 'enauac nam huetalecna,
'eeta'am nam hueto'ot na piguem.
11Ña qomi' 'anañanema na na'a'q ca sachiguenaq mayi souenaqtac.
12'Auapalaxat qome da qadasouaxashit,
'eeta'ama qomi' da mashi sapalaxataq cam qomi' qai'oteque sa ÿaÿamaxañi.
13Sa ishit qome da qomi' 'auashingueta ca qañi'iguenataguec,
chaqdata da qomi' 'antelaqna'agueta ca sa ÿaÿamaxañi.
Cha'ayi da 'ad'onataxanaxac,
qataq da 'ad'añaxac,
qataq da 'ayi'oxoyic
nachi 'eetai' da qaica ca loga't.
Aja', nachi 'eetec.
14Cha'ayi da qami' qauchoxoyiñi cam sa ÿaÿamaxañi mayi qami' i'oteque cam qadÿai, nachi ishit da qami' ichoxode'n nataq'en ñi qadta'ai mayi neta'ague da piguem. 15Qalaxayi qami' da sa ishit da qauchoxoyiñi ca qadÿai, nachi ñim qadta'ai Dios nataq'en sa ishit da qami' ichoxode'n da ÿapalaxat ca qadasouaxashichi.
So Jesús dapaxaguenataxanec da lataxac ca shiÿaxaua da nqouaqchit
16Qaq da ivita da qami' qanqouaqchichi, qalaq sa ishit qome da yi'oqta da daquico da qadashiguiÿaxaqui, da qoñiita'am nam shiÿaxauapi mayi chochi nachaxaata. Cha'ayi namayipi 'eetec de'eda, cha'ayi nshitaique da qaÿaÿaten da nqouaqchitta. Qaq aÿim qami' shinapegalo da namayipi sogote huo'o da nshiitenaguec. 17Qalaxayi 'am, da ivita da 'anqouaqchit, qalaq 'am 'anapilotta, qataq 'antacchiguiñi na 'adaue, 18yaqto' na shiÿaxauapi sa ishit da ÿaÿaten da 'am 'anqouaqchittapeguela't. Qaq chaqñita ñi 'adta'a Dios mayi 'am hueta'aguet, ñimayi 'am ÿaÿaten. Nachi ñimayi ÿauo'o ca 'anshiitenaguec.
Da nsallaxa mayi hueta'ague da piguem
(Lucas 12.33-34)
19Sa ishit qome da ÿapacteec qalota da qadsallaqai qanqashiñi ana 'alhua, nam huaña da ishit da chic ca lalaxat, huo'otaq da chochi ltotañi ca camachaqca nogoxoshit, qataq ishit da decachiÿa ca cachaxaic. 20Chaqdato' da qauauo'oi ca qadsallaqai hua'ague da piguem mayi sa ishit da inoxoneu'a ca lalaxat da chic, huo'otaq da chochi ltotañi ca camachaqca nogoxoshit, qataq sa ishit da inoxoneu'a ca cachaxaic da decachiÿa. 21Cha'ayi qami' cam hueta'ague ca qadsallaqai, nachi nataq'en hueta'ague da qadquiyaqteÿaxaqui.
Aca ncoÿadaxanaxaqui mayi icoÿadelec ca shiÿaxaua
(Lucas 11.34-36)
22Naua 'ad'ai'te, naamayi 'eeta'ama aca coÿadaxanaxaqui mayi icoÿadelec da 'ad'oquiaxac. Qaq naamayi da huo'otaq ÿaÿamaqte', qaq nataq'en 'enauac da 'ad'oquiaxac huetaigui na yi'oqchiguiñi. 23Qalaxayi naua 'ad'ai'te, da huo'otaq sa ÿaÿama'q, nachi 'enauac da 'ad'oquiaxac huetaigui na napalaxa. Qaq ÿoqo'oyi na yi'oqchiguiñi mayi 'am hueto'ot, da huo'otaq napalaxa, nachi ¡ÿataqta ÿapacteec na napalaxa mayi qouetaigui!
Ñi Dios huo'otaq aca plata
(Lucas 16.13)
24Qaica ca ishit da dos naq'en caua n'aco'yi. Cha'ayi ishit da ÿaÿimec ca lÿa, qataq ÿauotec ca lÿa, huo'otaq da ÿataqta ÿalaxaguet ca 'oonolec, qaq ca lÿa qalaq ÿataqta i'otan. Qaq nachi 'eetec da sa ishit da qai'onataxanot ñi Dios qataq acam yi'oqchigui plata.
Ñi Dios huetapegue' nam llalaqpi
(Lucas 12.22-31)
25Qaq ÿoqo'oyi nagui qami' shinapegalo da sa ishit qome da qami' ÿaquicoqchitta'pe cam qolliqui qataq cam qanÿomiigui mayi qaviñiitac, qataq cam qodogoxochi. Cha'ayi da achaalataxac sa ishit da 'eeta'am cam qanallic, qataq da n'oquiaxac sa ishit da 'eeta'am cam nogoxot. 26Ña qaumijñi na maÿo mayi huaÿotapeguelec na pa'ashiguem, da namayipi sa ishit da danaxan, qataq sa daqataxan, qataq sa ishit da chochi ÿaÿamaxat na ala ca languishic. Qalaxayi ñim qadta'ai mayi neta'ague da piguem, ñimayi ÿanem da lqui'axac namayipi. Qaq ¿qami' sa ishito' da qanapaquiÿalec nam maÿopi? 27Cha'ayi ¿négue't ca 'oonolec da qoñiita da huo'otaq ÿapacteec da lhuogoqchic, nachi ishit da nquigaxatshiguem da lalogaxa?
28Qaq ¿tá'ainco' qone' yi qami' ÿaquicoqchi't cam qodogoxochi? Qaq ña qaumijñiÿo' anam huoue mayi huetalec na n'onaxa da anamayi sa ishit da do'onataxan qataq sa ishit da daqalejnaxan. 29Qaq qami' shinapegalo da so nta'a Salomón co'ollaxa qaica ca 'en'am lyac na n'otaxatpi, qalaq sa ishit da 'en'am da n'otaxac anamayipi. 30Qaq ñi Dios da nachi 'eetec de'eda, da n'otaxanaxan anam huoue mayi huetauga nagui na n'onaxa, qamaq ca lÿa na'a'q nachi qaÿasaxangui ca nodec, qaq ¿sa ishito' da nachi 'eetec naq'en de'eda da qoñiita, qami' mayi saq 'amaqtaq da qadpi'iÿaxaqui? 31Qaq ÿoqo'oyi sa ishit qome da qami' ÿaquicoqchi't da qoñiita': “¿Chaq negue'to' ca sachiguenaq, huo'otaq cam ñiÿomaxagui? qataq ¿chaq negue'to' cam ñapoxoña?” 32Cha'ayi na shiÿaxauapi nachi lhuennataxat 'enauac ne'enapi. Qalaxayi qami' huo'o ñim qadta'ai mayi neta'ague da piguem, ñimayi ÿaÿaten da qami' qaviñiitac 'enauac ne'enapi. 33Qaq ÿoqo'oyi qami' ÿataqta ÿacteec qome da qadqochoqoi dam l'onataxanaxac ñi Dios da ilo'ogue 'enauacna, qataq da qau'ochi cam 'eetapeguec ñimayi, nachi ishit da qauacoñiiguet nataq'en 'enauac ne'enapi. 34Qaq sa ishit qome da qami' ÿaquicoqchi't cam huaigui ca lÿa na'a'q. Cha'ayi ca lÿa na'a'q ÿataqteguet cam huaigui lqalaic. Qaq ñi 'oonolec na'a'q mashi 'eeso'oya' cam huaigui lqalaic.
Kasalukuyang Napili:
Mateo 6: TBSNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.