wandījo 3
3
Munhū kūgwa mu shibi
1Gwike ī nzoka yalī masala sala kūjiheeba pyī ī shiinū ja mu matogolo ī jingī, ījo walī wajibeeja ū SEEBA Mulungu. Yūmūja ū nkīma gīkī, “Angū ng'hana gete ū Mulungu wahaya, ‘Mutizūlya matwajo ga ntī gose gose ū mu ngūnda?’” 2Nang'hwe ū nkīma wīwīla ī nzoka gīkī, “A matwajo ga mitī ya mu ngūnda tūdūgije ū kūgalya. 3Alīyo ū Mulungu wahaya gīkī, ‘Yaya ū kūlya a matwajo ga ntī ūyo gūlī ha gatī ya ngūnda; yaya nūūlū kūgakuumya, nguno mukūcha!’” 4Ī nzoka yūnshokeja ū nkīma gīkī, “Ndūhū gete, mutūcha! 5Ū Mulungu amanile dūhū gīkī ūlū ng'ūlya, a miso ging'we gakūkundūlīlwa, mubize gīt'umo alī ū Mulungu, ning'we mukwīmana ī misoga nī mibi.” 6Ū nkīma aho wabona gīkī a matwajo ga ntī gwenūyo gawiza ū kūshilīwa, nū mu miso galībeela, nīyo gashikile kūng'winha munhū masala, ūtonola ūlya. Nū ngoshi, nū ng'wene ūng'winha ūlya. 7Hūna a bose būbīlī wabo a miso gabo gūkundūlīlwa, bideeba gīkī balī dūūhū; būtunganīja madūūtū ganti ntiini, gīkī bibeegeje shizwalo. 8Kwimanīla mu makanza ga līīmi lyaheeha, ū Adamu nū nke būliigwa ī lilaka lya ng'wa SEEBA Mulungu akūyeelaga ū mu ngūnda. Ū Adamu nū nke būng'wibisa ū SEEBA Mulungu, mu mitī ya mu ngūnda. 9Alīyo ū SEEBA Mulungu ūng'witana ū Adamu gīkī, “Ūlī halī?” 10Nang'hwe ūhaya, “Naaliigwa ī lilaka lyako ū mu ngūnda nogoha nibisa, nguno nalī dūūhū!” 11Ū SEEBA Mulungu ūng'wīla, “Nani ūyo wakūwīlaga gīkī ūlī dūūhū? Wagalyaga a matwajo ga ntī ayo nakakūlemeja kūgalya?” 12Ū Adamu ūhaya, “Ū nkīma ūyo waninhile gīkī ikale hamò naane, h'ūyo walī waninha nūlya!” 13Hūna ū SEEBA Mulungu ūng'wīla ū nkīma gīkī, “Bebe mhayo kī ū gwenūyū wagwītaga?” Nang'hwe ū nkīma ūhaya, “Lyalī lyanilemba ī liyoka nūlya!”
Kūzung'wa Kwa Nzoka
14Ū SEEBA Mulungu wīwīla ī nzoka gīkī,
“Ū bebe īkī wītaga mhayo gūlī gīko,
wazumagwa kūtinda pyī ī ndimu,
na kūtinda shiinū jose ja mu matogolo!
Ūkūyūsholomela nda,
hama ī shilīwa shako shabizaga lūbuubu
pyī ī shikū ja būlamu wako.
15Nīyo nakūtūūla wanishi a ha
gatī yako nū nkīma,
na a ha gatī ya myalwa wako
nū wakwe.
Ū myalwa wakwe akūgūtobagūla
Ū ntwe gwako,
nang'ho ūkūngulaaja ishiigina lyakwe.”
Kūzung'wa kwa banhū
16Ū Mulungu ūng'wīla ū nkīma gīkī,
“Nakūbongeja ū būsaatu wa būsūngū
wako ū ng'wikanza lya kūbyala baana,
ūkūyūbyala mu kūsaatwa kūtaale no.
Hama ū kwikūmva kwako kūkūbiza
kūlī ngoshi wako;
nīyo akūkūsuga ū bebe.”
17Lelo ū Adamu ū ng'wene ūng'wīla,
“Īkī walī waliigwa ī lilaka lya nke wako
ūzunya kūlya ū ntī ūyo nakakūlemeja
nūkūlagīla gīkī, ‘Yaya ū kūgūlya;’
ī sī yazumagwa kūlwa nguno yako,
pyī ī shikū ja būlamu wako ūkūyūkoyakoya
hū wapandīka ī shilīwa.
18Ī sī īkūkūzwisīja ming'hwa
na magwaata,
nīyo ūkūyūlya sha kūzwa
mu matogolo.
Mu Lūyīlo lwa būshū bako, ūkūyūlya
19Ūkūyūyīla tame hū wapandīka
Ī shilīwa shako.
Kūshisha ūkūshoka ha sī,
nguno h'aho ūfumile.
Ū bebe ūlī malongo,
na lūūlū ūkūshoka mu malongo!”
Munhū kūpeejiwa mu ngūnda
20Ū Adamu ūng'wilīka ū nke wakwe lina lya Eva, nūlūgīkī, Hawa, nguno h'uyo akabiza nina wa bapanga bose. 21Hūna ū SEEBA Mulungu ūbabeegeja shizwalo sha makūnza ū Adamu nū nke, ūbazwīka. 22Hanuma ū SEEBA Mulungu ūhaya gīkī, “Ī haha ū munhū wabizaga gītī ūmò wise, wīmanaga ī misoga nī mibi. Na lūūlū ītigeleelilwe agasole na a matwajo ga ntī gwa būpanga agalye, abize mpanga welelo bose.” 23Hūna lūūlū ū SEEBA Mulungu ūmpeeja ū mu ngūnda gwa Edeni; ūūkabiza nīmi wayo ī sī īyo akabeejiwa kūfuma muyo. 24Aho wampeeja ūtūūla bamalaika Balang'hani akakitanagwa makelubi#3:24 Makelubi: Nūūlū, bamalaika balang'hani. ū kū kīya ya ngūnda gwa Edeni, na līlūshū lya moto lya kwikala līkūgalūkaga hose hose būlī kwene, kwīlang'hana ī nzīla ya kūja ha ntī gwa būpanga.
Kasalukuyang Napili:
wandījo 3: SUKBI15
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Sukuma Bible © Bible Society of Tanzania, 2019.