Génesis 7
7
Ja komtuu
1Ënät yë Tios jatëkok t'ënëmaay yë Noé: Jënu'un tyam yë naaxwiinyëtë ja'ay jyuuky'atën, mijtsyë jëtu'un atu'uk mjuuky'ajtp ijxtëmës ntsokyën. Paaty ënät tyam tëkë jap ma kepy nëëwinye'epyën mëët tu'kë'ëyë m'u'unk mto'oxytyëjk. 2Yajwë'ëm niwëxtujkjaty yë jëyujk, yä'äypyë ets to'oxypyë mëti'ipë wa'atsëtyën. E mëti'ipë ka'ap wya'atsëtyën je'eyë tu'ukjaty xyajwë'ëmëty jëtu'un yë yä'äypyë ets to'oxypyë. 3Yajwë'ëm näjyëtu'un niwëxtujkjaty yë joon, yä'äypyë ets to'oxypyë. Ets jëtu'un yë jyot nyini'kxëty y'ijtëwtëty yaa naaxwiiny naaxkëjxy. 4Jä'ä ko ja wëxtujk xëëwës yë nyajmina'any. Etsës nyajtu'uja'any wëxtyikxy xyëëw wëxtyikxy tsyu'um. Nyajkutëkooytya'ajäämpyës tu'kë'ëyë winë jënu'un jyuuky'atën naaxwiiny. Jënu'unës të nyajkojy të npëjktä'äkyën. 5Yë Noé ojts jëtu'un tjantytyuny, ijxtëm ënäty ja Tios të tyuk'ëne'emyën.
6Ko ja komtuu tyajnikoompäjtaay ja naaxwiinyëtë, yë Noé jä'ä ënäty yë jyëmëjt tëtujk mëko'px. 7Ko ojts yë xëëw jëmëjt tpatnë yë Noé ojts tyëjkënë jap ma kepy nëëwinye'epyën mëët ja y'u'unk y'ëna'k, y'u'unk tyo'oxytyëjk ets ja y'u'unk y'ëna'k ja tyo'oxytyëjk, këtiipë nyëëji'kxtëty. 8Näyjyëtu'un ojts tyëkëtë jëyujk wa'atsëtypë ets ka'apë wya'atsëtyën jap ma ja kepy nëëwinye'epyën, mëti'ipë kääkëtijtëpën ets mëti'ipë naaxwin'a'tstëpën. 9Yë Noé nimäjtskjaty yë jëyujk tyajtëjkëy jap ma kepy nëëwinye'epyën, yä'äypyë, to'oxypyë. Ijxtëm ënäty ja Tios të tyuk'ëne'emyën.
10Kom wëxtujk xëëw ojts myiinë yë komtuu. Ets tyajtsa'amëtyääy ja naaxwiinyëtë. 11Majkmokx mäjtsk ënäty yë po'o y'äny yë mëmäjtskpë. Noé jä'ä ënäty yë jyëmëjt tëtujk mëko'px. Jä'ä xëëw jä'ä jëmëjt ojts y'ëwa'atstë mëjëtypë jut, jap naaxpa'tkë'pë ma ja maykyomnëë pyëtsimyën. Ets näjyëtu'un jam tsajpwinm ojts kyupëjy yë komtuu. 12Wëxtyikxy xëëw wëxtyikxy tsyu'um ojts tyu'uy tax'awitsy naaxwiiny. 13Jä'ä xëëw ojts yë Noé tyëjkënë kepy nëëwinye'epyëjoty mëët yë y'u'unk y'ëna'k mëti'ipë xyëëwajtëpën Sem, Cam ets Jafed ets yë'ëjëty mëët yë tyo'oxytyëjk ets ja tsyu'utëjkëty. 14Ojts näjyëtu'un tyëkëtë jap ma ja kepy nëëwinye'epyën yë jëyujkëty ëwa'anëtypë ets yujyëtypë mëti'ipë ja'ay yajtsënääpyën ma jyëën ma tyëjkën. Näyjyëtu'un yë joonëty jëyujkëty ets tsa'anyëty. 15Tëkokyë yë jëyujkëty nimäjtskjaty ojts tyëkëtë jap ma kepy nëëwinye'epyën mëët yë Noé. 16Tu'ukjaty yë to'oxypyë ets tu'ukjaty yë yä'äypyë tyëjkëtyë jap ma ja kepy nëëwinye'epyën. Jënu'un ënäty kanaaknax yajpaatën yaa naaxwiiny, jëtu'un ijxtëm ënäty ja Tios të tuk'ëne'emyën ja Noé. Ënät ja Tios ja kepy nëëwinye'epyë ojts nän kë'ëm tyaj'ëtujknë.
17Ja nëë tuu wëxtyikxy xyëëw ojts jëtu'un y'ity. Ko ja nëë kyoompäjnë, ënät ja kepy nëëwinye'epyë näjyëtu'un pyëtë'knë, ja nëë mëpëtë'kënëp. 18Yë nëë ni'ikyë kyoom'ëtë'ëtsy ets ja kepy nëëwimye'epyë näjyëtu'un ni'ikyë pyäjt'ëtë'ëtsy. 19Ja nëë nëkooyë kyoomnë, ojts tnikoompäjta'ay ja tun kopk këjxmëtypë mëti'ipë naaxwiiny ijtëpën. 20Ko ja komnëë tyajnitujktaay ja tun kopk. Ojts ja nëëkom jyaak pety ja tëkëëk xajpk ja tëkëëk kë'ënux. 21Jëtu'un'äämpy ojts y'o'kta'atë ja ja'ayëty jënu'un ënäty yaa naaxwiiny jyuuky'atën. Näyjyëtu'un yë joon jëyujkëty ets mëti'ipë naaxkëjxy jëtijtëpën, ojts y'o'kta'atë. 22Ojts y'o'kta'atë ets kyëjxtaaytyë tu'kë'ëyë jënu'un ënäty naaxkëjxy winë y'ityën ets jënu'un jyuuky'ätyën ets xyejyën. 23Yi'iyë Noé ets mëët tu'kë'ëyë ja ja'ayëty jënu'un ënäty jap mëët yajpaatën ojts wyë'ëmtë juuky. E ja nimaypyë kutëkooytyääytyë jä'äjëty. Kutëkooytyääytyë ja naaxwiinyëtë ja'ayëty, ja jëyujkëty yujyëtypë ets mëti'ipë myox tyukye'epyën. 24Yë naaxwiinyëtë jä'ä ojts y'ity nëëpa'tkë'p mëko'px ja wëxtyikxy majk xëëw.
Kasalukuyang Napili:
Génesis 7: QUETZMIXE
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process