San Mateo 7
7
Ani peporojuzga
1‘Ani peporojuzga, ani haguã pejejuzga. 2Pe peẽ peporojuzga háicha pejejuzga jevy vaerã; ha pe medida peiporúva pende rapicha rehe, ojeporu jevy vaerã pende rehe. 3¿Mba'éicha piko rema'ẽ pe yvyra ku'ikue oĩva nde ryvy resápe rehe, ha nerema'ẽi pe yvyra poguasu nde resápe oĩva rehe? 4Terã ¿mba'éicha piko eréta nde ryvýpe: “Eheja taipe'a ndéve pe yvyra ku'i oĩva nde resápe” nde voi rereko ramo peteĩ yvyra poguasu nde resápe? 5¡Tekove rova mokõi! Eipe'a raẽna pe yvyra poguasu nde reságui, ha upéi katu ikatúta rehecha porã reipe'a haguã pe yvyra ku'i nde ryvy reságui.
6‘Ani peme'ẽ umi mba'e marangatu jaguápe, aníntemo ojere ha pene mondyryrypa, ha ani peity pende perla kuéra kure renondépe, aníntemo opyrũmba rei hese kuéra.
Pejerure, peheka ha pembota
7‘Pejerure ha oñeme'ẽ vaerã peẽme: peheka ha pejuhu vaerã, pembota okẽme ha ojepe'a vaerã peẽme. 8Pe ojerurévape oñeme'ẽ vaerã, pe ohekáva ojuhu vaerã, ha pe ombotávape ojepe'a vaerã.
9‘¿Mávapa peẽ kuérava, ta'ýra ojerure ramo pan, ome'ẽne ichupe ita? 10terã ojerure ramo pira ¿ome'ẽne ichupe mbói? 11Peẽ pene ñañáva peme'ẽkuaa ramo mba'e iporãva pende ra'y kuérape, pende Ru yvága peguáma katu ome'ẽ vaerã mba'e iporãva umi ojerurévape ichupe.
12‘Upéva rehe, opa peipotáva ojejapo pende rehe, pejapo avei peẽ pende rapicha kuéra rehe; upéicha niko he'i pe Moisés ley ha ñemoñe'ẽhára kuéra kuatiañe'ẽme.
Okẽ pychi'i
13‘Peike pe okẽ pychi'i rupi, ipýgui pe okẽ ha pe tape ohóva Aña retãme, ha heta umi upérupi oikéva. 14Pe okẽ ohóvape pe tekove ha'etévape katu ipychi'i, ha pe tape ipy'i, ha mbovy umi ojuhúva upe okẽ.
Pe yvyra máta ojekuaa mba'eichaguápa hi'a rehe
15‘Peñeñangarekóke umi ñemoñe'ẽhára japúgui, oúva pene rendápe ovecháicha, ipy'apýpe katu aguara ñarõicha. 16Hembiapokue rehe peikuaa vaerã ichupe kuéra. Ndojepo'ói parral ñuatĩ mátagui terã higo kapi'atĩgui. 17Upéicha opa yvyra porã hi'a porã, ha pe yvyra vai katu hi'a vai. 18Ndaikatúi pe yvyra porã hi'a vaívo terã pe yvyra vai hi'a porãvo. 19Opa yvyra ndahi'a porãiva oñekytĩ ha oñemombo tatápe. 20Upéicha avei peẽ peikuaa vaerã umi ñemoñe'ẽhára japúpe hembiapokue rehe.
Nda opavavéi oikéta pe yvága pegua réinope
21‘Nda opái he'íva chéve: “Che jára, che jára”, oike vaerã pe yvága pegua réinope, umi ojapóva che Ru yvága pegua rembipota mante. 22Oguahẽvo upe ára heta he'i vaerã chéve, “Che jára, che jára, nde rérape roñemoñe'ẽ va'ekue, ha nde rérape romosẽ va'ekue mba'epochy, ha nde rérape rojapo va'ekue heta milagro.” 23Upéramo ha'e vaerã ichupe kuéra: “Araka'eve ndapoikuaái va'ekue, pejei ko'águi peẽ mba'e vai apoha.”
Mokõi cimiento
24‘Upéva rehe oimeraẽva ohendúva ko'ã che ñe'ẽ, ha ojapóva hekópe, ojogua ku kuimba'e iñakãporãvape, ojogapóva ita ári. 25Ha oky, ha okakuaa umi ý syry, ha oipeju yvytu, ha ojapipa pe óga; ha upéicharamo jepe ndo'áiri, oñemboguapýgui ita ári. 26Ha opa umi ohendúva ko'ã che ñe'ẽ ha ndojapóĩva hekópe katu, ojogua ku tekove tavýpe omopu'ã va'ekue hóga yvyku'i ári; 27ha oky ha okakuaa umi ý syry, ha oipeju yvytu ha ojapipa pe óga ha ho'a oñembyaipa.
28Jesús he'ipa rire ko'ã mba'e, umi gente ohecharamo joaite pe hemimbo'e, 29oporombo'égui peteĩ oguerekóva autoridáicha, ha ndaha'éi umi escriba kuéraicha.
Kasalukuyang Napili:
San Mateo 7: BNP76
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Guaraní New Testament, Buenas Nuevas para el Paraguay © Paraguayan Bible Society, 1970.