Blasi Sturka 9
9
Gâd Noa wal lâ daukan ba
1Gâd bui Noa ra bara ai luhpia nani ra naha bîla nani na aisi yamni munan: “Luhpiam nani ailal sahwi tasba na banhki dauks.#Bla St 1.28. 2Bara daiwan nani sut tasba aiska ra bâra ba man nani mamwanra tatatwi sibri kabia, tnawira nani pâli tauki nani ba sin, tasba purara tauki daiwra nani sin sîam kabia, bara kabu ra inska nani ba sut sin man nani mihtam ra mangkan sa. 3Diara nani sut ai rayaka bri aiawi tauki ba, man nani pi raya kama dukiara paskri sa; dus mâ nani sâtka bani ba, inma kura nani ba sut sin yang bui man nani ra maikri sa. 4Sakuna wîna tala bri nani ba, man nani pima apia, kan tala ba sika upla rayaka sa bamna.#Lib 7.26-27; 17.10-14; 19.26; Kli S 12.16,23; 15.23. 5Âu, kasak pali man nani wina tâmlia, rayakam ba mana yang makabamni, daiwan nani bani wina sin makabamni. Upla ai muihni ikbia kaka, witin wina sin rayaka ba mana makabamni.
6“Ani uplika ai walka tâlia laiki ba,#Imp St 20.13.
kli upla wala mita sin witin ai tâlia laikan kabia;
kan upla ba Gâd lilka ra paskan bamna.#Bla St 1.26.
7Sakuna man nani lika sahwi ailal taki bas,
tasba ra kiamkam ailal saki bas,
bara upla ailal taki banhs.”#Bla St 1.28.
8Bara Gâd bui Noa ra bara luhpia nani ra sin aisi, win: 9“Wals, yang lâika ba man nani wal bapisna, bara man nani kiamkam nani ninara aula ba dukiara sin. 10Bara daiwan nani man wal ark watla wina bal taki banhram ba: tnawira nani, daiwan tim, daiwan wail nani, daiwan nani sut, tasba ra bâra ba wal sin daukisna. 11Yang lâika man nani wal ban kaia daukri ba, kli aihka lakamna apia: upla nani ba, daiwan nani, ba sin kli lisamra ni sauhki tikamna apia. Kli lisamra tara wala âpu kabia tasba ba sauhki tikaia wisi.” 12Bara Gâd win: “Naha sika yang lâika ban kaia ra man nani wal, bara daiwan nani wal sin daukuna tukinka ba sika: 13yang kumaduriki ba kasbrika nani ra mangkuni, bara baha ba yang tasba aiska wal lâ daukri ba tukinka kabia. 14Yang tasba purara kasbrika nani ba yarka balbia ba ra, baha tilara yang kumaduriki ba sin marikan kabia; 15bara yang lâika daukri ba kupi kraukamni, man nani wal bara daiwan nani tasba ra ba wal sin. Kli lisamra tara laya nani ba balbia apia, baha nani sut sauhki tiki ba. 16Kasbrika nani ra kumadura ba bâra kabia baha kaikamna ba ra kupi krawbia, lâika ban kaia ra daukri ba upla sut wal bara daiwan nani sut tasba ra ba wal sin.” 17Bamna Gâd Noa wal baku lâ aisi daukan: “Naha sika lâ daukri ba tukinka, upla nani sut wal, bara daiwan nani tasba ra bâra ba wal sin.”
Noa ai luhpia nani wal
18Bara Noa luhpia waitna nani, ark watla wina bal takan nani ba, naha nani kata: Sem, Cam, Jafet. Bara Cam lika Kenan aisika kan. 19Baha nani yumhpa ba sika Noa luhpia waitna nani kan, bara witin nani yumhpa ba wina tasba ba kli upla ailal takan.
20Bara Noa mahka tasba warkka ba daukan, wain nasla kum dauki mâ mangkan. 21Bara yu kum Noa wain dih bla takan, bara kwala luha taki ai watla papakni lila ba kat prawi kan. 22Cam, Kenan aisika ba, ai aisika kwala luha kan ba kaikan ba ra, witin nani taki wan, ai muihni nani wâl latara kan ba ra win. 23Bara Sem Jafet wal kwala kum brin, kwalka ba witin nani ai pahpaya ra sunan, baha ni witin nani ai aisika pura bikan. Ai aisa kwala luha ba kaikaia apia dukiara, witin nani ai ninara wapi wan ai nakra ba tnaya wala ra kaiki.
24Noa ai blaka wina rawi buan ba ra, witin tânka brin ai luhpia kau sirpika ba dîa witin ra daukan ba; 25bara win:
“¡Kenan ba lahtuban kabia!
¡Ai muihni wâl ba wina albika kau mâyara kabia!”
26Witin kau pura praki aisin:
“Dawan ba yamni pali kabia, witinka Sem Gâdka ba,
bara Kenan ba ai albika kabia.
27Jafet ra sin Gâd mita tara daukbia,
bara witin Sem tintka watla nani ra iwi kabia,
bara Kenan ai albika kabia.”
28Bara lisamra tara ba luan ningkara, Noa kau 350 mani raya iwi kan. 29Bara Noa pruan witin 950 mani alkan ba ningkara.
Kasalukuyang Napili:
Blasi Sturka 9: MSKTU
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2010 Bible Society in Nicaragua