Matye 12
12
Yeesu i cilumbu ci saba
(Mak 2.23-28; Lik 6.1-5)
1Mu ntaangu be yininaani, cilumbu ci saba, Yeesu kuvyokilë mu sisolë si singeenzë sifaliinë, i bilaanzi byaandi bisë ba mu nzalë i bëtoonë kudokulë singeenzë i bisë silya#12.1 Det 23.26.. 2Sifalisyaanu bamoni obo, bisë n'kaambë : « Talo, bunë bilaanzi byaaku bëlë mu kuvaangë linë n'kaakiitu kukandiminë cilumbu ci saba#12.2 Lub 34.21.! » 3Yeesu wusë bëvutulilë : « Beeno lusye taangë kwe linë Daviidë kuvaangë bunë kwabë nzalë, yimunë bëyabë yaandi? 4Daviidë wusë kotë mu n'zo-Nzaambi, i bayaandi bëlya mëmpa bësiilë Nzaambi? Kosuku, tokë singangë-Nzaambi, babë yi n'swa wukulya mëmpa be moomo#12.4 bëlya mëmpa : 1 Sam 21.2-7. N'swa wuveewu tokë ke singangë-Nzaambi.. 5Kaambofo, lusye taangë ko mu N'kaakë ti munë n'zo-Nzaambi, singangë-Nzaambi sin'safulaangë cilumbu ci saba i kubelë ve#12.5 Lut 28.9-10.? 6Yilukaambë fëkeeli cin'viipë ko civyokilili bunenë yi n'zo-Nzaambi. 7Ningë lube bakulë suundu mu bikumë be biibi : “Yin'tiisi bwalëkisi i yaaku ti bivakuli bi bibulu#12.7 Ose 6.6.”, nkanë lusye vaanë mbesi ko ke bangë mpeembi yi mpeeso. 8Mwaanë muutu fumu cilumbu ci saba. »
Libakëlë livolë kooko
(Mak 3.1-6; Lik 6.6-11)
9Yeesu kubotukë mbiinji be yiniina i wusë kweendë ku cizutununu cyaawu. 10Fabë libakëlë livolë kooko. Bisë n'yufulë. « N'swa wukeeli mu kubelusi cilumbu ci saba? » Bwiinji bëm'bakë, sintoondo. 11Naandi wusë bëvutulilë : « Nani mu nkoongiinu, ningë limemë limweekë like yaandi, lyaawu lyabwa mu libulu cilumbu ci saba, wun'kaambu kulitapulë? 12Buni, muutu wusye vyokilë bunenë yi limemë kwe? Mu cibilë ocyo, n'swa wukeeli wukuvangilë liboti cilumbu ci saba. » 13Oboobo, naandi wusë kaambë muutu beenë : « Nonunë kooko kwaaku. » Naandi kunonunë i kwaawu kusundilë kubelukë, buke kumesë. 14Sifalisyaanu bisë basikë i bisë fwiikë fuundu yikuvondilë Yeesu.
Ciseelu cyo Nzaambi kusoolë
15Bunë Yeesu kwe zaabi lyalyooli, naandi wusë kubotukë faawu. Mpaapë baatu bisë n'laandë i wusë belusi bakë booso. 16Kasi Yeesu, wusë bëkandiminë bëleembu kutubë nani kukeeli. 17Bwiinji linë Ezayi m'bici kutubë livangënë :
18« Tala ciseelu cyaami cinë yasoolë, cinë yizolisi.
Mu naandi yasiilë liyaanji lyaami lyooso.
Yin'tulë Ciluunzi cyaami mu naandi
i naandi wun'tendulë lufundusu ke mëloongo mooso.
19Naandi wusë n'kwambilë yi muutu ko i wusë n'losukë ko,
muutu ve wun'kuwu mbeembwaandi mu sinzilë.
20Naandi wusë m'bokënë ko liveeso lyafutëmë,
wusë n'zimi mwiindë wafufëkëtë ko,
tee faanë kun'vaninë nduunji mu n'sulëmunu,
21mëloongo mooso mën'siilë civuufu mu naandi#12.21 Ezy 42.1-4.. »
Yeesu wavutulilë bifundisi
(Mak 3.22-30; Lik 11.14-23)
22Oboobo bisë n'twalilë muutu wuvwaatu ke ciluunzi cibi, mpofo, wudukë matu i bubabë. Yeesu kum'belusi i muutu wusë tubë i wusë monë. 23Nkoongë yooso kubwa libobo i kutubë : « Owoowo mwaanë Daviidë kwe? » 24Sifalisyaanu bunë bayuwu lyaawu, bisë tubë : « Naandyoowo wun'kulilaangë biluunzi bibi mu luleendo lu Belëzebuulë#12.24 10.25., fumu biluunzi bibi! » 25Kasi Yeesu wulë zaabaangë simbalulu syaawu, wusë bëkaambë : « Losuku lwaangu lun'kabukë lwaveekë yi lwaveekë, lun'nyambëkënë. Lyosuku livulë kaambofo yosuku n'zo yin'kabukë, yisë m'podi kuziingë ko. 26Ningë Satënë, ciluunzi cibi wun'kulë ciluunzi cibi, naandi wuyinwanisi naveekë. Oboobo buni lwaangu lwaandi lum'podyooso kuzingilë? 27Ningë miinu mu luleendo lu Belëzebuulë mwa yin'kulilaangë biluunzi bibi, baanë biinu buni bën'kulilaangë biluunzi bibye? Mu lyaliili mwaawu bëm'beelë sinzoonzi siinu. 28Ningë mu Ciluunzi ci Nzaambi mwaawu yin'kulilaangë biluunzi bibi, oboobo Lwaangu lu Nzaambi lwakwisë ke beeno. »
29« Wun'viipë ve wum'podi kukotë ku n'zo muutu wuke yi viingu mu kutafë biimë byaandi ningë wusye n'vidë ntetë bikonyi ko? Oboobo yakutafë byakë byooso binë kubakisi. 30Wunë wukambusu yaami cintwaali, mbeenyaami kukeeli i wunë wun'kaambu kukucikë yaami, wun'tyamunë. 31Mu toondë lyaliili, mwa yilukambilë : mu lyosuku lisumu i mu cyosuku cifiingu muutu lumoonyi wum'bakë mënaanë, kasi wunë wun'safulë Ciluunzi ci Saantu wusë m'bakë mënaanë ko. 32Wunë wun'tubë libi mu Mwaanë muutu, wun'tambulë mënaanë. Kasi wunë wun'tubë libi mu Ciluunzi ci Saantu, mësumu maandi misë n'kobuku ko mu sintaangu tukeeli asi, kaambofo mu sintaangu si ntwaalë yikwisë. »
N'ti i mëkuundi maandi
(Lik 6.43-45)
33« Ningë, n'ti wumboti, mëkuundi maandi mëboti. Ningë n'ti wum'bi, mëkuundi maandi mëbi. Cibilë bën'zabilaangë n'ti wumboti mu mëkuundi maandi. 34Liloongu li simpili, buni lum'podi kutubilë maambu mëboti i bubaalu buke yiinu obwe? Cibilë munu wum'baasyaangë mo mëwaalë mu n'timë. 35Muutu wumboti wum'bakilaangë mëboti mu businë bwaandi buboti, i mungë bubaalu wum'bakilaangë biimë bibi, mu businë bwaandi bubi. 36Yilukaambë : cilumbu ci lufundusu, baatu ben'tubilë mu baveekë mu lyosuku libuungu libi libasikë mu munwaawu. 37Licyelikë, mu mëbuungu maaku, mwaawu bëkufundisi i wum'ba Mpeembi yi mpeeso, kaambofo lusifu. »
Lulombulu lu ciliimbu ci cimaaku
(Mak 8.11-12; Lik 11.29-32)
38Oboobo, mpooko miloonji n'kaakë yi Sifalisyaanu bëbulë mbeembu : « A Fumu, tun'vwa n'ciinzë kumonë ciliimbu ci cimaaku. » 39Naandi wusë bëvutulilë : « Baatu bë bubwayi bivaangë mëbi i bëkaambu kusulëmë ke Nzaambi, bën'loombë ciliimbu, kasi fësë bëveewu ciliimbu cin'ka ko kanuku cyo ci Zonaasë m'bici. 40Licyelikë bo bumweekë, Zonaasë kuvyosilë bilumbu bi tatu i bwiilu bu tatu mu civumu ci mbisi yinenë#12.40 Za 2.1., bo bumweekë bum'beelë Mwaanë muutu, wun'vyosilë bilumbu bi tatu i bwiilu bu tatu kusi n'toto. 41Cilumbu ci Lufundusu, basë Niniivë mba bëm'manë n'telë fë ntwaalë baatu bë bubwayi i bëbëfuundë, cibilë basë Niniivë baawu ba balulë mëvaangë bunë bëyuwu lutendululu lu Zonaasë#12.41 Niniivë : lyabë ntamë livulë linenë li Asiili ku lweeku lu liyaangë li Tiiglë. Basë Niniivë bëbalulë. Zon 3.5.. Kasi afa, fëkeeli wunë vyokili Zonaasë! 42Cilumbu ci Lufundusu, Fumu-ncyeetu yi waandë mba wum'manë n'telë fë ntwaalë baatu bë bubwayi i wubëfundisi cibilë naandi wufuminë ku mëbweeti mëvyokili cinaanu yi n'toto mu kuwu mëbuungu mëwaalë bungelë më Salomoonë#12.42 1 Mt 10.1-10.. I afa fëke wunë wuvyokili Salomoonë! »
Luvutukulu lu ciluunzi cibi
(Lik 11.24-26)
43« Bunë ciluunzi cibi cim'basikë mu muutu kulëzingilaangë, cyaawu kutaabë simbiinji siyumë, mu ke toombaangë fanë fë kuvundilë i naandi wusye bakë kuve. 44Oboobo, wutubë : “Miinu yin'vutukënë mu n'zo yinë yibasikë.” Fanë kuvutukënë, kuyitakënë mpafëlë, yikombulu i yicyemunu. 45Oboobo, cyaawu kweendë ke boongë saambwali li biluunzi bibi bivyokisi bubaalu yi cyaawu. Byaawu kukotë mu n'zo, kukalë mwaawu. Fa foofë, mënyonyi mu muutu be woowo kulutilë kudiifë yi mo mën'tetë. Boobo bwa bum'beelë yivaandi mu liloongu libi li bubwayi. »
Mamë i baanë bë nguli bë Yeesu
(Mak 3.31-35; Lik 8.19-21)
46Yeesu wulë tubangooso ke nkoongë baatu, kutuukë mamaandi i baanë yaandi bë nguli, bëtelëminë ku ngaandë i bëlëtoombë kutubënë yimunë Yeesu. 47Wun'viipë wun'kaambë : « Talo, mamaaku yimunë baanë yaaku bë nguli bëke ku ngaandë i bën'toombë kutubënë yaaku. » 48Kasi Yeesu wusë n'vutulilë : « Mamaami nani? Baanë yaami bë nguli bënani? » 49Kwataandi kooko ku nkoonzu bilaanzi byaandi, kutubë : « Mamaami naandyaawu i baanë yaami bë nguli bëbakëlë baawu aba. 50Licyelikë, wosuku wun'vaangë n'vwiilu wu Tataami wuke ku mëyilu, naandyoowo na mwaanaami nguli, mwaanaami n'cyeetu i mamaami. »
Kasalukuyang Napili:
Matye 12: NTVIL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2019, Wycliffe Bible Translators, Inc. and © Alliance Biblique du Congo. All rights reserved.