Fuɗɗoode 1
1
No Laamɗo tagiri huunde fuu
1Gilla fuɗɗoode, Laamɗo tagi kammu e leydi. 2Leydi ndiin walaano sifa, wo ndi ɓoldi. Nimre na huurunoo luggeefi. Ruuhu Laamɗo na weeyannoo dow diyeele. 3Laamɗo wi'i:
— Annoora laatoo!
De annoora laatii.
4Laamɗo tawi annoora oon na wooɗi. Ndeen o senndi annoora oon e nimre. 5O inndiri annoora oon nyalooma, nimre ndeen du, jemma. Hiiri weeti, laatii nyalaande go'aɓerde.
6Laamɗo wi'i:
— Njaayri waɗa hakkunde diyeele ɗeen faa sennda ɗe.
7Laamɗo waɗi njaayri hakkunde ndiyam ngonɗam dow e ngonɗam ley. Ɗum laatorii noon. 8O inndiri njaayri ndiin kammu. Hiiri weeti, laatii nyalaande ɗiɗaɓerde.
9Laamɗo wi'i:
— Ndiyam leyijam ɗaam hawrita nokku gooto faa leydi njoorndi ɓanga.
Ɗum laatorii noon. 10O inndiri njoorndi ndiin leydi, diyeele ɗeen du, maayo. Laamɗo tawi iɗum wooɗi.
11Laamɗo wi'i:
— Leydi funna fungooji: ɗum woni huɗo rimooho aawdi muuɗum e leɗɗe feere feere dimooje aawdi muɓɓen, lekki fuu e sii muuɗum.
Ɗum laatorii noon.
12Leydi funni huɗooji dimooji aawdi muɓɓen, huunde fuu e sii muuɗum. Leydi funni leɗɗe dimooje aawdi muɓɓen, lekki fuu e sii muuɗum. Laamɗo tawi iɗum wooɗi. 13Hiiri weeti, ɗum laatii nyalaande tataɓerde.
14Laamɗo wi'i:
— Annooraaji ngaɗa dow kammu faa ɗi cennda jemma e nyalooma. Ɗi laatoo maandeeji kollooji wakkati iidiiji, e nyalaaɗe e duuɓi. 15Annooraaji ɗiin laatoo fitillaaji faa ɗi njaynana leydi.
Ɗum laatorii noon. 16Laamɗo waɗi annooraaji ɗiɗi mawɗi, annoora ɓurɗo manngu oon laamoo nyalooma, pamaro oon du laamoo jemma. 17Laamɗo yowi ɗi dow kammu faa ɗi njaaynana leydi, 18ɗi laamoo jemma e nyalooma, de ɗi cennda nimre e annoora. O tawi iɗum wooɗi. 19Hiiri weeti, ɗum laatii nyalaande nayaɓerde.
20Laamɗo wi'i:
— Kulle buurɗe jinotooɗe keewa ley ndiyam, pooli du piira dow leydi ley njaayri kammu ndiin.
21O tagi daabaaji mawɗi ley maayo manngo e kulle buurɗe jinotooɗe ley ndiyam, huunde fuu e sii muuɗum. O tagi pooli, ngel fuu e sii muuɗum. Laamɗo tawi iɗum wooɗi. 22O barkini ɗi, o wi'i:
— Ndimee, ɓeydoɗon, keewon ley diyeele maayo. Pooli du keewa e leydi.
23Hiiri weeti, laatii nyalaande joyaɓerde.
24Laamɗo wi'i:
— Leydi wurtina kulle buurɗe, huunde fuu e sii muuɗum. Daabaaji wuro e ko ladata#1:24 Ko ladata ɗuum ina waawi laataade ko mennyata du. e kulle ladde, ngel fuu e sii muuɗum.
Ɗum laatorii noon. 25Laamɗo tagi kulle ladde, ngel fuu e sii muuɗum, daabaaji wuro, ngel fuu e sii muuɗum, ko ladata e leydi, ngel fuu e sii muuɗum. Laamɗo tawi iɗum wooɗi.
26Laamɗo wi'i:
— En taga neɗɗo e alhaali meeɗen, o nannda e meeɗen. O laamoo liƴƴi maayo e pooli piirooji e daabaaji gonɗi e leydi e ko ladata e mayri fuu.
27Laamɗo tagi neɗɗo e alhaali muuɗum. Wo e alhaali makko o tagi neɗɗo oon. Laamɗo tagi ɓe gorko e debbo.
28Laamɗo barkini ɓe, wi'i:
— Ndimee ɓeydoɗon, keewon adunaaru, ndawranon ndu. Laamoɗon liƴƴi maayo e pooli piirooji e kulle buurɗe ladooje e leydi fuu.
29Laamɗo wi'i:
— Mi hokkii on sii huɗooji dimooji aawdi muɓɓen dow leydi e leɗɗe dimooje aawdi muɓɓen fuu. Ɗuum laatanoo on nyaamdu. 30Daabaaji leydi e pooli e ko ladata ko woni dow leydi, ko foofata fuu, mi hokkii ɗum'en huɗooji e haakooji kecci laatoo nyaamdu muɓɓen.
Ɗum laatorii noon.
31Laamɗo ndaari ko golli ɗuum fuu, tawi iɗum wooɗi sanne. Hiiri weeti, laatii nyalaande jeegaɓerde.
Kasalukuyang Napili:
Fuɗɗoode 1: FBF
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© SIM International 2012, 2022