Kejadian Uram 13
13
Abram ab Lot ab bokdanmarei deyok
13:1-18
1Abram bira Mesir mutuk takloboka er ner ab, er bona ab boboka mutuk si Negeb dam binmou. Ba, Lot bibabyi ersi milibmou ura, tonkwa binmai. 2Er Abram bira bona ilinto boramunyi kuramwe. Er bona ara bisam ilinto winiramuryi, keil emas ab perak ab ababyi ilinto boramunyi kuramwe. 3Abram bira Negeb mutuk dam aryi kuboka bisik a bindoka mabman ani, berekoka o bindoka mabman ani, kibde baramwe. A baramwe ara Negeb mutuk dam aryi mabde baramwe ani, Betel mutuk dam binmou. A mutuk ara Betel mutuk kan Ai mutuk kan noutam mutuk yuma kobdob keis ol ai doamwe ai asi binmou. 4Ura, a dikum ara minob yibanmouci, Er Iya Erebdobnyi biti dama deirin keil dungna labdeiamwe dam asi binmou. A dikum binmou ura, dama deiboka Er Iya Erebdobnyi biti si weik ebmou. 5Ani, Lot bibabyi Abram bisi milibmouci, er keis ol ai aruma ab, er bisam yabwe domba toto, kambing toto, lembu toto ab ababyi boboka baramwe. 6Uca, a mutuk ara sun bitinyi nirya tonkwa neik dikum kuna kikiman kum kubmou. Ara, sun bisam yabwe ab, sun bona ab, yuk-yuk ilinto deyok aryi sun tonkwa kuna kum kubmarei.
7Ura, a kuramnyi talak ara sun bisam yabwe kalingna nang tuba kerebdandoka, obdandoka kimdaramnyi. A talak ara Kanaan yoka nang ab, Feris nang ab a mutuk akwe kuramnyi.
8Ura, Abram biryi Lot bisi ato ebmou, “Ni ab kan ab ara nun nang amse kununum. Bok, tonkwa neik dikum kuna ara kan ab ni ab, kan bisam kalingna nang ab, ni bisam kalingna nang ab ordana ara malyito ati, mutuk yuk-yuk kubdobkwanim. 9Ati, kanda a mutuk bukwe tok nirya ara kanci da wibdobdum. Kanci, ‘Siriktam bindobkwan,’ tenebminyi ura, Nira kwanimtam bindobkwan. Ani, kanda kwanimtam barominyi ura, nira siriktam bindobkwan,” ebmou. 10Ura, a talak aryok Lot er asing dirdonongkwe uca, Yordan duman asi me ilinto yibardaramwe mutuk buki bau asi asing eibmou. A mutuk ara Er Iya Erebdobnyi mutuk Eden lu tonglorande ato mutuk asi asing eibmou. Ani, a mutuk asing eibmou mutuk bol ara Mesir mutuk aryi mutuk otong lukluk erur ato mutuk nun asi, lu akwe toklobde binmou ani, Zoar mutuk dou bindoka sukmou asi asing eibmou. Er Iya Erebdobnyi biryi Sodom atei ab, Gomora atei ab uk dana kabul talak ara Lot bira ato kuamwe. 11Lot bira mutuk teleb asing eibmou deyok aryi Yordan duman dinatam-dinatam nirya wibdobmou. Ura, sun bokdanmareici, Lot bira anaboka yaletam kuboka bindobmou. 12Ba, Abram bira Kanaan mutuk a kuroramwe. Uca, Lot bira Yordan duman mutuk nirya weik atei dordaramnyi atei da kubde baramwe ani, Sodom mutuk dam bindoka iya kuramwe. 13Ba, Sodom atei ninyi ara Er Iya Erebdobnyi uram kununa kum uca, ilinto manmalirdaramnyi.
14Abram ab Lot ab sirya bokdanmarei ura, Er Iya Erebdobnyi biryi Abram bisi ato ebmou, “Kan tikmarim dikum ara me utam babyi, me youkwetam babyi, yaletam babyi, kitingbantam babyi dibkanikderum! 15Kan asing a eibmarim mutuk nirya ara kan ab kan deibdoba ab ati karebkwansin. Sunti karebsinyi ba, a mutuk nirya asi sun mutuk kibdobmunci, iya kubde binkwandum ati ebman. 16Ba, Niryi kansi mabwe ilinto karebkinyi ba, kan deibdoba ara tukwe borbosa ato kubde binkwaming. Ba, kan deibdoba ara nuksekman kumto kubkwande. Tukwe borbosa aryi nuksekman kum kurande to kan deibdoba ababyi nuksekman kumto kubkwande. 17A mutuk nirya ara kanti karebkwankin ati, a bukwe mutuk nirya yibinkirikoka dirkiringmarum!” ebmou. 18Ato ebmou ba, Abram biryi keis ol ai dobmoua daluboka bobmouci, Hebron atei mutuk bindobmou. Ura, ninyi si Mamre er mutuk dam asi co si tarbantin deyok dam bindoka ai dobmou. Ura, keil dungna laboka Iya Erebdobnyi biti dama deibmouci, a dikum kuramwe.
Kasalukuyang Napili:
Kejadian Uram 13: MTG
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
@LAI 2007 (New Testament), @LAI2022 (Old and New Testament)