luka 22
22
asa 22
ŋuɽun ŋun ŋɩki ŋeḏi yauḏa
mṯ. 26:1-5,14-16, mks. 14:1-2,10-11
1na gɩmuri gijo gɩṯo geḏi gia gun gaicɩwa gun gan gɩmuri ge ḏouwɩrico. 2na jɩsis jun jɩbuḏo na jalgaṯɩm nalbunyi galakwe gwalɽinye; gi gwune lɩḏonyo liji.
3na seiṯan əḏi ḏi yauḏa gwun gwan iskariyuṯi, na ŋu gwiro gwete gi calɩmis jun jiro di na gwuttən. 4nuwele naluməḏo jɩsis je jun jɩbuḏo na dabiṯ deḏi ajana galakwe nuliḏəḏə. 5naliŋir dugwore naluməḏəṯe nalarno, gwalḏəḏə əlŋɩrucə. 6nuəmɩnyi nubunyi lamon lun liŋir gwuliḏəḏə lun late lali liji je lutu no.
ḏigelijo ḏeḏi ḏɩṯa ḏun ḏiro gɩdo ḏeḏi yecu
mṯ. 26:17-19, mks. 14:12-16
7na lamon wila leḏi gɩmuri geḏi gia gun gaicɩwa araam laḏuge lrəmə leḏi gɩmuri ge ḏouwɩrico. 8nuwəje buṯrusŋ na yuwana nuleicɩno, wiḏɩl nyijilgico gɩmuri kani ilʼe. 9naleicɩno, galo ŋiro gaḏa gun gəmɩnyu ganaŋele? 10nuleicɩno, na ḏa nyalmaṯɩmi kamɩrɩgen, nyalobeḏeṯe gwəmɩnyəŋale gwapo gɩḏi geḏi ŋau, gwujanɩl kwu dunu gwun gwar gwunəḏi, 11nyeico gwiji gweḏi dunu no, mualɩm gwarno, dunu gwaḏa gwun gwananʼe ŋɩḏio ŋe ḏiṯa ŋeḏi gɩmuri ge ḏouwɩrico calɩmis je jinyi? 12na gwajaŋijo duno gwete gwun gwubuḏo lakwia gwun gwəṯi ŋɩdio ganu ŋe ḏiṯa. ŋɩnəwei nyalŋele muma. 13nalwele nalbuje ŋuɽuna ŋiro gi gwune ŋun ŋuməḏɩjulo, nalŋele ŋɩdio muma ŋeḏi gɩmuri ge ḏouwɩrico.
ḏiṯa gia ḏun ḏiro gɩdo ḏeḏi yecu
mṯ. 26:20-30, mks. 14:22-26, 1 kur. 11:23-25
14gwune na sa wila je ḏiṯa, naljiga duwəjo de. 15nuleicɩno, nyi gwubunyu gworki nuarno iliṯane gɩmuri keno ge ḏouwɩrico gwerre nyi gwate miḏe no, 16gi gwune nyi gweiceijɩno, nyi gwate gwanʼe minu no kəbe ŋəṯɩmi ŋele ŋeḏi elo. 17nuape kiɽuda nueico eloŋu sukran nuarno, apɩlo ŋeno nyalkenyeḏe ganu lagaloŋu; 18gi gwune nyi gweiceijɩno, nyi gwate gweyu ŋau ŋeḏi nyaɽe nyeḏi gwaɽe gwun gwiro gi ḏuɽuṯ no kəbe ŋele ŋeḏi elo ŋila. 19nuape gia nueico eloŋu sukran nubɩleṯɩnya ganu nulḏəḏə, nuleicɩno, keno ŋiro aŋɩnu yinyi yun yibieje ganu. aṯanyalarre ŋeno nyilŋaḏɩŋane. 20na dino kɩɽudo gwune nalʼe nuarno, kiɽudo keno ŋiro ŋuɽun ŋun ŋikaiilo elo ŋun ŋiya ŋuwən ŋe ŋinyi, ŋun ŋirijəje. 21namɩni eʼe, ḏi ḏeḏi gwun gwinyɩḏəḏə liji gwanagwe gi ḏiṯa; 22na ŋaɽe ŋeḏi liji ŋele gi gwune ŋuɽun ŋun ŋikaiinu, namɩni ŋɩki kwəmɩnyo gwun gwuliḏəḏə. 23naliḏeije ga naṯɩlɽoṯəḏɩjo gworo ŋɩmaga əḏi gwiro gwete lagin gwun gwar gwaɽe ŋuɽuna ŋeno.
ḏɩbuḏia ḏun ḏiro gwerkwe
24na ŋijo lagin dino ŋiro ḏɩbereḏa əḏi gwiro lagin gwiro gwubuṯano. 25nuleicɩno, lele leḏi liji lun liro ga dino ləṯi ŋelɩnya lagin, na luŋa lun ləṯi ŋelinya lagin naṯɩleico liŋir. 26namɩni ŋuɽun ŋate ŋiro dino lagalo no; namɩni gwun gwubuṯano lagalo gwaro gi gwoŋeno, namɩni gwun gwədərəḏi kɩɽelo nuro gi gwun gwaṯape ŋɩru. 27gi gwune əḏi gwiro gwubuṯano, ŋu gwun gwaji gi ḏiṯa i ŋu gwun gwaɽe ŋɩru? gwədu gwun gwijiga gi ḏiṯa na? namɩni nyi gwo kɩlɩgi ganu lagalo gi gwun gwaṯape ŋɩru. 28namɩni nyaŋa liro leno lun lɩmaṯaḏo lugwi ŋuɽun ŋe ḏɩḏeijo ḏinyi; 29na nyi gwajiḏəḏə ŋelɩnya gi gwune ḏəḏɩnyi baba gwinyi, 30kani nyaʼe nanyayu ŋele ŋinyi, na nyajiga gi jɩḏoɽ nyakɩmiḏe əriḏo ganu di na gwuttən yeḏi isreiyil.
yecu gwuməḏi ŋuɽuna ŋan ḏidonyɩḏa ḏeḏi buṯrus yecuŋ gwerre ŋuɽun ŋate ŋɩmila no
mṯ. 26:31-35, mks. 14:27-31, ywn. 13:36-38
31na gwele arno, simian, simian, eʼe, seiṯan gwubunyaɽe gwajimɩɽi elo gi ŋwon; 32namɩni nyi gwuɽoṯeḏo eloŋu gwan ŋa kani ate a ḏɩməṯo ḏuŋa ete no. namɩni ŋa, ḏa ŋa maɽuwe ŋamɩni bɩɽi lɩmagalo nanu. 33nueicɩno, gwele gwi, nyi gwəmɩnyu alawele kəbe alawele kɩrkon na gi ḏaiya. 34nuarno, nyi gwaŋeico buṯrus no, gwerre lɩgwugiɽe late lɩməri gwula no gwunanyine gwerre ŋa gwadonye ŋwamon ganu ṯəɽɩl ŋa gwilɩŋɩḏinyi.
35nuleicɩno, gwune wəjeje nate nanyanabupane gwurəḏə na jɩwɩḏe, ŋate ŋijɩn ŋədi ŋɩbɩɽaṯɩni a? naleicɩno, awe. 36nuleicɩno, namɩni gwunne gwun gwəṯi gwurəḏə ŋwuape, na gwun gwate gwəṯi kɩwiḏio no ouwɩricil ŋweḏɩla giria guŋun nueḏɩla kɩwiḏio. 37nyi gweiceijɩno, arram ŋəṯɩni lugwi ŋeno ŋun ŋulinu dino, na ŋu gwuḏuɽəḏɩnu luŋa le lun lɩki; na ŋɩdi ŋan ŋi ŋəṯɩmi. 38naleicɩno, gwele gwəri, eʼe cɩwiḏio jɩttən ceno. nuleicɩno, ŋidaḏaṯo.
jeṯisamɩni
mṯ. 26:36-46, mks. 14:32-42
39nudu nuwele gi bubruṯ gi lɩrgwom lun lan seitun; na calɩmis juŋun gwujane. 40na gwune nalṯɩni kalo nuleicɩno, uməḏɩjil eloŋu kani nyate nyəḏi ŋuɽun ŋe ḏɩḏeijo no. 41na ŋu gwuduḏi ganu lagin gala ŋiro gi ḏa gwete mawini gol ge, nuculi ga ŋwurko ŋwe nuuməḏɩjo eloŋu. 42nuarno, baba gwi, ḏa ŋa məmɩnyi əbɩri kɩɽuda keno lugwi; nalmɩni ro ŋun ŋate ŋɩbunyilnyi no, nalmɩni ro ŋun ŋɩbunyaloŋa. 43na gwiji gweḏi kanyin aŋinijo, gwubɩɽi nanu, 44na gi gwune uməḏɩnu gi ḏugwor ganu kəbe na ḏugwor auce ganu, nuuməḏɩjo eloŋu gworki na ŋwuṯeḏe bɩɽeṯeḏe ga ŋiro gi ŋwaba ŋweḏi ŋuwən ŋwun ŋwaṯɩbɩɽeṯeḏe ga kwɩnyəm. 45nudiɽo gi ḏuməḏɩjo eloŋu, nuwila gi calɩmis juŋun, nulbuje jɩḏɩro ŋuɽun ŋe ḏɩrona, 46nuleicɩno, gwudaro gəko nanyaḏɩre? diɽil nyuməḏɩjo eloŋu kani nyate nyəḏi ŋuɽun ŋe ḏɩḏeijo no.
yecu malməṯo wɽi
mṯ. 26:47-56, mks. 14:43-50, ywn. 18:2-11
47na gi gwune ju gi ḏuməḏɩjo na liji lutu na gwun gwan yauḏa gwun gwiro gwete gi calɩmis jun jiro di na gwuttən nuldərəḏɩjo kɩɽelo, nudɩka gɩṯo ḏi yecu gwumɩɽənyə. 48na yecu eicɩno, yauḏa kwe, ŋa gwiro gwəḏəḏi ŋaɽe ŋeḏi liji ḏɩmɩɽəḏo ḏe a? 49na gwune lun lɩwəɽeico ga nalaŋu ŋuɽuna ŋun ŋila nalarno, gwele, analpi kɩwiḏ ge a? 50na gwete lagin numɩɽi wainya gweḏi gwele gweḏi jɩsis nuɽə gəni ga gi ḏi ḏun ḏiro ḏiŋir. 51na yecu wɩrlijo ŋuɽuna nuleicɩno, ouwɩricɩlo ŋeno. nuḏɩmumi gəni guŋun numuli. 52na yecu eico jɩsis jun jɩbuḏo na dabiṯ deḏi ajana yeḏi dunu gweḏi elo gwun gwubuḏo, na liji lun luɽun lun lɩwiḏi lugwun no, nyaltuḏiji jɩwiḏ je na jurləlo je gi gwun gwiro gwuɽam a? 53gwune ilaṯɩje kwu dunu gweḏi elo bubruṯ gwun gwubuḏo, nya late lɩwali di ganu lugwi no. namɩni sa jalo jiro ceno na ŋele ŋeḏi girɩm.
ḏidonyɩḏa ḏeḏi buṯrus yecuŋ
mṯ. 26:57-58,69-75, mks. 14:53-54,66-72, ywn. 18:12-18,25-27
54gwune nalape nalgwuloḏa naləḏɩje kwu dunu gweḏi gwele gweḏi jɩsis. namɩni buṯrus gwujane gala gwola ganu. 55gwune naludeije igo kɩlɩgi ganu gi ḏɩgara ganu nalijiga kal gete, na buṯrus jiga kɩlɩgi ganu lagin. 56na wainy gwete gwun gwiro gwa nunŋalaḏe gi gwune juga gɩṯo kigo, nuarno, gwəmɩnyo kweno dino gwijilgwe. 57nudonye nuarno, gwa, nyi gwate gwilɩŋiḏi no. 58na ŋɩno gwɩti nuaɽu nuaŋu gwiro kaja nuarno, ŋa dino, ŋa gwiro lagin. na buṯrus arno, gwiji kwe, nyi gwate gwiro no. 59na gwune na sa ete jetɩdo ca, na gwiro kaja lɩŋe mumə nuarno, gwerkwe ganu kweno dino gwijilgwe, gi gwune gweḏi jalil gwiro. 60na buṯrus arno, gwiji kwe, nyi gwate gwiliŋiḏi ŋun ŋaraŋe no. na cou, gi gwune uməḏu na lɩgwugiɽe əri gwula. 61na gwele gwun gwiro elo wɩrla ga nuŋalaḏe ḏi buṯrus, na buṯrus aḏɩŋane ŋuɽuna ŋeḏi gwele galakwe gweicuno, gwerre lɩgwugiɽe late lɩməri gwula no, gwunanyine, ŋa gwinyidonye ŋwamon ganu ṯəɽɩl. 62nudu kɩluḏo nuəri gwula gwiji cicer.
liji lakijo yecuŋ jumo nalpi
mṯ. 26:67-68, mks. 14:65
63na ləmɩnyo lun lɩməṯi yecuŋ naṯɩlaki jumo nalpi. 64nalkɩɽɩbə jei naṯɩlpi gi jei ganu, nalɽoṯəḏɩjo galo, naleicɩno, uməḏi, əḏi gwiro gwumɩɽiḏaŋa? 65na ŋuɽun ŋutu ŋun ŋiro kaja naṯɩliŋiuməḏɩjo galo ḏɩḏenɩḏa ḏe.
yecu gwuḏuḏɩnu gi jei ganu jeḏi jɩsis jun jɩbuḏo
mṯ. 26:59-66, mks. 14:55-64, ywn. 18:19-24
66gwune na galo ro anyine na liji lun luɽun aɽuwaḏa ldu na jɩsis jun jɩbuḏo na jalgaṯɩm nalgwuloḏa kəcərio ŋagin yun yɩbuḏo, naleicɩno, 67ḏa ŋa maro kɩrisṯo, ŋwijineico. nueicɩno, ḏa nyi majineico nya late ləmɩnyi no; 68na ḏa nyi majɩɽoṯəḏɩjo na ŋate ŋiŋilɩwɩrlijo no na nya late linyikəḏə ga no. 69namɩni uro gwunnɩno ŋaɽe ŋeḏi liji ŋajiga gi ḏi ḏun ḏiro ḏiŋir ḏeḏi ŋɩma ŋeḏi elo. 70naleico wei no, ŋa gwiro ŋaɽe ŋeḏi elo a? nuleicɩno, nyaŋa larno nyi gwiro. 71nalarno, ilbunyu ŋuɽuna ŋutəno ŋada dino? gi gwune liŋə gi lulo lage ilḏiŋɩnu gi linyu luŋun.
Kasalukuyang Napili:
luka 22: OTR1966
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Nuba, Otoro New Testament
© British and Foreign Bible Society, 1966.