Like 1
1
Ebaanihi
1Baari kuna aki amabaana oteende maami ma ayiri o mpaniŋi e saabe. 2Bo atoosi maami maa mo osuumbu a baari ma amoni ebanihi e mo, bo se aduhi saabe. Bo se amakiriha ajanji a Njyami mo otooso mbari e nde. 3Ŋa kya obila o me se emoni ove, me eyiri na osaha, na opɨsa njele njele, maami aso ma ayiri me ebaanihi. Me eteende we osaangumu o yemiŋi, nkani Tyofile. 4Me esa vwa mo bu mbɨri, we oyaa mbɨri maami ma ayisihi we aki asisyele.
Obaanji atooso ekʉlihi e Jan Batise
5Ntini Erode akihi nkʉmu osi o Jude, eki na osi avwoŋi omo, nkuumi e nde Jakari a njubu Abya asi ma avwoŋi. Okari a nde Elisabete aki ma ombɨsa Arone.#1.5 Arone omakaaha osi avwoŋi onini, o ntini e Moyise aki nkʉmu a Isayele. 6Bo aso vwele aki tele o miisi a Njyami, ma anyiima ekele na esibi e Nkʉmu eso njele njele. 7Bo aki baana kali, obila Elisabete aki onguuma, bo aso vwele aki aya ekubu.
8Cuhu mo, Jakari akihi mo osa janja e nde, lempa la avwoŋi nca njo e Njyami. Jya eki cuhu ojwa a njubu e nde e janja. 9Jwa aki otiiri ma asi ma avwoŋi, bo ati owani mo oswolo nde mo onyunuŋa nca nkiina e Nkʉmu, mo ocuha vwoŋi oyombo. 10Baari a Njyami kuna aki o nji mo ovwono o ntini ma ampihi vwoŋi oyombo. 11O ŋaa, obaanji a Nkʉmu owasihi o paani e Jakari. Nde akihi mo kwoho olumi o nkiina, mpili macuha eyombo. 12Jakari omono nde, ongwo osi nde bɨla vwoho bo mini. 13Ŋa obaanji na nde ndi: «We ka mono vwoho ni Jakari, obila Njyami omiyalaha evwoniŋi e we. Okari a we Elisabete aje okʉla mwana a balaha, we aje ompa nde nkuumi e Jan. 14We aje omono oswere bo mini. Baari kuna ma aje ocaba me ekʉlihi e nde. 15O miisi a Nkʉmu, nde aje oka mvuuru onini. Nde aka aje onwa mali a ba, na mali akɨma a nkala ni. Oduduma Santi aje oluula o nde nca mwo a nguhu a nde. 16Nde aje osa bu ndi baana a Isayele avuruha na e Njyami a Nkʉmu a bo. 17Nde aje oya mva ntuma a Njyami na oduduma bɨla mpari Owobi a mbari e Njyami Eli. Mo oyeese etima ma ataara bɨla baana. Nde aje okaala etima e baari ma ali i nyiima Njyami ni. Bo ma aje ocimiŋa mva baari ma ali tele. Nde ayeese baari aka tele o miisi a Nkʉmu.» 18Jakari okaali na obaanji ndi: «Me oyaa mbɨri kari jaa jaa buni? Me okubu, okari a me se oya okuuru.» 19Obaanji okaali na nde ndi: «Me Ngabriyele, me eli o miisi a Njyami atumi me na aduha we ncya e mve. 20Ŋa we aka yalaha mbari e me ni, okoroho maami maa ma aje oya. We aje oka nkɨna tii ngo o ntini e maami maa ma aje oto.»
21Baari aso madilihi nde, akimi lebihi le Jakari nca nkiina. 22Ecuuhi e nde kwa, oya i tiha ni, bo ayaa ndi nde omimono maami a lwari nca nkiina. Nde oya owobo na bo me elyemi, nde oya nkɨna.
23Jakari omana ecuhu e nde e janja nca njo e Njyami, ovurihi njo e nde. 24Ecuhu emayira, Elisabete obiri yimi. Osi angondo ataani i cuuha o nji ni. Nde awobo nca otima a nde ndi: 25«Ŋa mono jaa e Nkʉmu amisa o me ma antini ma, nde omisa me jaa e mve, nde omicyese me kiihi esiihi me okʉru o miisi a baari.»
Obaanji atooso ekʉlihi e Jesu
26Yimi Elisabete eto angondo asyami, Njyami otumi obaanji a nde Ngabriyele Najarete, onguundu o nca Ngalili, 27mpili onjambu okaasi a nkuumi Mariya, aki okini onkiina. Ompala a Jusefe, a mo ombɨsa o nkani Davide. 28Obaanji owasihi na e nde ndi: «Swere! Mpolo e Njyami eli bɨla we, na Nkʉmu oli bɨla we se.» 29Mariya okimi, ocimiŋi ndi: «Bi ewosihi ema!» 30Obaanji okaali ndi: «We oka mono vwoho ni Mariya, mpolo e Njyami eli bɨla we. 31Mono we aje obira yimi, we okʉla mwana a balaha, we aje oluha nde nkuumi e Jesu. 32Nde aje oka mvuuru onini, ma aje ocwolo nde o Mwana Njyami a Nkara Yulu. Njyami a Nkʉmu aje ompa nde onkani mva eki ombɨsa o nde Davide. 33Nde aje okuuma o yula baari a njo e Jakobe#1.33 Njo e Jakobe omakaaha baari a Israyele., onkʉmu o nde mo oka aje owa ni.» 34Mariya okaali na obaanji ndi: «Kari eje oyira buni, me ti ekini onkiina?» 35Obaanji okaali nde ndi: «Oduduma Santi aje oya o yula we, mpari e Njyami a Nkara Yulu eje owuha we mva ojiiŋi. Kya obila o mwana a we ma aje okʉla aje oka opeende, ma aje ocwolo nde o Mwana a Njyami. 36Nkwono e we Elisabete se, ma acwolihi ma onguuma oya na yimi angondo asyami nca okubu, nde aje okʉla mwana a balaha. 37Obila Njyami okwono kali!» 38Mariya okaali ndi: «Me ojanji a Nkʉmu. Njyami osa mo osuumbu a we aduhi.» Emana obaanji oyeni nde.
Mariya akye Elisabete
39Ecuhu eyiri, Mariya oyeni asisari onguundu o yulu okuri o Jude. 40Nde onyuniŋi nca njo e Jakari, owoosi Elisabete. 41Ntini Elisabete ayuhi juuyi le Mariya, mwana ofubi nca mwo a nde, Oduduma Santi oluuli me Elisabete. 42Elisabete owʉli nkɨma nkara yulu ndi: «O yula akaasi aso, Njyami omimpa we andosoho, na mwana ali nca mwo a we se. 43Na me ŋa se mvuuru a nguhu a Nkʉmu abuuna okye? 44Obila we na owooso me ŋa mwana ofubi, osweri nca mwo a me. 45Oswere oka na we, mvuuru ayalihi maami a Nkʉmu aduhi, ma aje omono mo!»
Luumu le Mariya
46Mariya ndi:
«Oduduma a me akuusa Nkʉmu,
47otima a me oli nca oswere obila o Njyami ovusihi a me!
48Nde se omayibiha me, ojanji a nde a mvunu kali.
Ee, mo obaana o cuhu e lobi, na antini aso, baari a yula ncye aso maduha ndi me eli nca oswere,
49mo oma, Njyami a mpari omasa maami ma ave o me.
Nkuumi e nde opeende. 50Nde oli ove antini aso
mo baari ma anyiimaha nde.
51Nde amalaha onkani o nde nca mpari:
amacuura anga etima e kuuna,
52nde omabuuna ankani ma ambara a bo,
emana okuusi baari ma ali na baani.
53Nde ama mpa anga njala biila,
ocuuri anga osolo jyala onyaŋa.
54Nde aya na ayamaŋa Isayele, ojanji a nde:
nde aka limiha olaha ove o nde ni
55o mbumbu na Abraame bɨla baana ni,
mva e nde alehi ndayi na akuuru a saabe.»
56Mariya oki bɨla Elisabete angondo mbɨri atari, emana ovuruhi mpuhu e nde.
Ekʉlihi e Jan Batise
57Ntini ema to, Elisabete okʉli mwana a balaha. 58Baari ma aki paani e Elisabete bɨla nkwono e nde, ayuhi ndi Nkʉmu omisa nde ove bo mini, bo se asweri bɨla nde. 59Amana okʉla mwana ecuhu ncaami eyiri, o mfwomo asi nde sasi, bo asahi oluha nde nkuumi e taara nde Jakari. 60Ŋa nguhu a nde ndi: «Kali, nkuumi e nde eje oka Jan.» 61Bo na nde ndi: «Nkwono e we nkuumi jya kali!» 62Alabi elyemi mpili e taara mo opɨsa nkuumi e nde asaha ompa mwana. 63Jakari opɨsi otini ŋa opaanja mo oteende, oteendi ndi: «Nkuumi e nde Jan.» Bo aso aya o nca lekimi. 64O ŋiŋa Jakari oya avuruha owobo, nde oya avwono Njyami. 65Baari ma aki o paani e bo amoni vwoho, osi o Jude oso o yulu okuri, oya ewobo maami maa. 66Aso ma ayuhi maami maa, aya macimiŋa, mapɨsa abuha ndi: «Mwana yu aje oka buni?» Ŋa mpari e Nkʉmu eki bɨla nde.
Luumu le Jakari
67Oduduma Santi oluuli o Jakari a taara a mwana, oya awobo ma lengulu le Njyami ndi:
68«Leve le Nkʉmu, Njyami a Isayele
mo obila o nde ayi na ayamaŋa, na levusaha le baari a nde!
69Nde omitusaha saabe mpari evusiha saabe
nca njo e nkani Davide, ojanji a nde.
70Nde aki amabiha na otooso na kala, me enwa ma awobi a mbari e nde ma ali epeende:
71Nde ovusihi atusaha saabe o nca jyala ma anga ombangu,
na o mpari e baari ma ali na mbele e saabe.»
72Nde olahi ove o nde na akuuru a saabe,
oyibihi ondihi mo opeende le etini.
73Njyami olabi okesi na Abraame a taara#1.73 Abraame Ajife ma cwoloho o taara omakaaha nkaha a bo a kala. Bo ocwoloho ankaha a kala ma ataara. saabe,
74mo otusaha saabe nca jyala ma anga ombangu,
mo bu ndi i ma vwono nde bɨla vwoho ni,
75mo bu ndi, saabe leka tele nca opeende o
miisi a nde ecuhu eso ma lebihi le saabe.
76Jakari ovurihi oduhi ndi: «Ŋa we mwana a me, ma aje ocwolo we mo owobi a mbari e Njyami a Nkara Yulu.»
We aje ocwomo levusu le Nkʉmu, mo oselehe nde njila.
77Mo oduha se na baari a nde ndi, nde aje ovusaha bo,
na leboloho la ambiini a bo.
78«Njyami a saabe amaluula mo oduusu, nde se ove:
nde aje olehe saabe oyalala o yulu, mva ebalihi e mwi na encyere,
79mo olaha baari ma ali nca lempiibi na ojiiŋi a leku, oyalala,
mo obira saabe o njila oduusu.»
80Mwana akʉlihi, na oduduma nde se abaha mpari. Nde aki okaha nca ebiri e kayi, tii ngo cuhu e nde ayi o miisi a baari a Isayele.
Kasalukuyang Napili:
Like 1: MDT
Haylayt
Ibahagi
Paghambingin
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES