मत्ती 7
7
दूसरां पर दोस कोनी लगाणो
(लूका 6:37,38,41,42)
1“दूसरां पर दोस लगाण गी आदत ना बणावो। इंया करोगा तो परमेसर थारै पर बी दोस कोनी लगावैगो। 2क्यूंकै थारो न्याय थारै फेंसलै पर ई होवैगो। अर जे थे दूसरां गै सागै सई न्याय करोगा तो परमेसर थारो बी सई न्याय करसी। जे तूं गळत न्याय करैगो तो तेरै सागै बी इंया हो'सी। 3तूं आपगै भाई गी आंख में छोटो फूसको क्यामी देखै? पण तूं आपगी आंख में पडे़ड़ो मोटो फूसको देख। 4जद तेरी खुद गी आंख में मोटो फूसको पड़यो है तो तूं दूसरै भाई नै किंया के सकै कै मैं तेरी आंख ऊं फूसको काड़ दैयूं। 5हे पाखण्डी, पेलां आपगी आंख मू मोटो फूसको काड, फेर दूसरै गो छोटो फूसको काडी।
6कुता नै पवितर चीज ना दैयो अर सूरां आ'गै मोती ना रेड़ो। बे आंगो मोल कोनी जाणै। सूर मोतियां नै पगां में रुळा दैय अर कुता तनै'ई फाड़ खावैगा।
मांगस्यो तो मिलैगो
(लूका 11:9-13)
7परमेसर ऊं झिको कीं मांगोगा बो थानै मिलैगो। ढूंडोगा तो लादैगो अर बारनो खड़काओगा तो बो थारै खातर खोलैगो। 8क्यूंकै झिको कोई मांगै बिनै बो दैय, झिको ढूंडै बिनै बो मिलै अर झिको खड़कावै तो बिं खातर खोलै। 9थारै मू हिस्यो बाप है झिकै गो बेटो रोटी मांगै अर बो बिनै दगड़ झिला दैय। 10अर मछी मांगै तो बिनै सांप झिला दैय। इंया कोई बाप आपगै बेटै सागै कोनी करै। 11थे चाये किता बी माड़ा हो फेर बी आपगी उळाद नै आच्छी चीज देणी चावो तो थारो पिता परमेसर थारै मांगण पर थानै आच्छी चीज क्यूं कोनी देसी? 12जे थे दूसरै लोगां ऊं आपगै सागै आच्छो बरताव चावो तो थे बी बांगै सागै आच्छो बरताव करो। नेम विधान अर परमेसर गी बात बताण आळा गै द्वारा आ'ई सीख देऐड़ी है।
भीड़ो रा
13परमेसर गै राज में भीड़ै रा ऊं जाओ। पण चोड़ो रा अर खुलो रा बिनास कानी जावै। भोत सारा लोग ईं पर चालण लागरया है। 14पण झिको भीड़ो रा है बिमै चालणो ओखो है। बो रा अनन्त जीवन तांई जावै है। बिमै थोड़ा ई लोग जावै है।
जिस्यो दरखत बिस्यो ई फळ
(लूका 6:43,44,46; 13:25-27)
15झूठी बात बताण आळा ऊं बच गे रेओ। बे सुदी भेड़ बरगा है पण बे खाण आळै भेड़ियां बरगा है। 16थे बानै बांगै करमा ऊं पिछाण ल्योगा। झाड़कां गै कदी अंगूर कोनी लागै, ना कांटा गै दरखत गै कदी अंजीर लागै। 17इंयाई आच्छै दरखत गै आच्छा अर माड़ै गै माड़ा फळ लागै। 18एक आच्छो दरखत कदी माड़ो फळ कोनी ल्यावै अर ना'ई माड़ो दरखत कदी आच्छो फळ ल्यावै। 19बे सारा दरखत झिका आच्छा फळ कोनी ल्यावै बानै बाडगे आग में बाळ देसी। 20ईं तरियां थे लोग बां झूठी बात बताण आळा नै बांगै कामा ऊं पिछाणोगा।
21प्रभु प्रभु केण आळा हरेक आदमी सुरग में कोनी जावैगा। पण झिको मेरै पिता गी इच्छा पर चालै बो ई जावैगो। 22बिं न्याय गै दिन में भोत सारा लोग मेरूं पूछैगा। प्रभु मैं थारै नाम ऊं परमेसर गी बात करी, मैं थारै नाम ऊं ओपरी काडी अर मैं थारै नाम ऊं चमत्कार करया। 23जद मैं बानै केऊंगा, मैं थानै कोनी जाणूं, बुरा काम करण आळा लोगो मेरै कनूं भाज जाओ।
दो तरियां गी नींव
(लूका 6:47-49)
24झिको कोई मेरी आं बातां नै सुणगे आं पर चालैगो बो बिं बुद्धिमान आदमी बरगो होवैगो झिकै आपगो घर तकड़ी नींव पर बणायो। 25मेह बरस्यो, बाढ आई अर आंधी चाली पण बिंगो कीं कोनी बिगड़यो क्यूंकै बिंगी नींव तकड़ी ही। 26पण झिको मेरी बातां सुणगे बां पर चालै कोनी बो बिं मूरख आदमी बरगो है झिकै आपगो घर रेत गै उपर बणायो है। 27जद मेह बरस्या, बाढ आयी अर आंधी चालगे घरूं टकराई तो घर पड़गे खत्म हो'ग्यो।” 28जद यीसू ऐ बातां करण लागरयो तो लोगां नै बिंगी बात पर भोत हेरानी होयी। 29क्यूंकै बो बानै नेम विधान सिखाण आळां गै तरियां कोनी समझावंतो पण बो बानै एक हकदार गी तरियां समझावंतो।
Kasalukuyang Napili:
मत्ती 7: BGQ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023 (Active), Wycliffe Bible Translators, Inc. All rights reserved. © WIn Publishing Trust