Luk 8
8
Akasɛv agenɛv amban vɛ ɛnɛnyi Jizɔs ghɛ ayɛghɛnɛv anav mɔ vɛru uzend
1Mɔ Jizɔs abɛɛn hɔ, azend kɔ vɛ ihiye ghɛ ahiye ataanɛv kpos-kpos, itsoghun urɛhɛ usɛ ghu utorov unav Aonz. Ayɛghɛnɛv anav puwɛ ahar vɛru ghu un, 2ghɛ akasɛv agenɛv amban akos avo kɔ ajingɛjing abev ghɛ awen agen. Akasɛv hun ne vɛru Mɛri kɔ ihiye Magdala, ukwas ungwen azɛnda ajɔv atsindar tsar-umɔm kɔ ghɛ ana. 3Johana, ukwas na Chuza, ɔr utaan ungwen a ɛnɛyi itumbɛ ina Unom Hɛrɔd, ghɛ Suzana, ghɛ akasɛv agenɛv tsɛng. Amban vɛ nayi unagh ghɛ akaa agen kɔ usu avo.
Ikan ghu ɔr urɔɔn asang akaa
4Mɔ isum iyɔr tsɛng igamber ghɛ iyɔr amban vɛ duwe kɔ ahiye-ahiye vɛ va kɔ ghu Jizɔs, atuwa avo ikan ingin. 5“Ɔr ikɔrɔ aru ghi itan asang kɔ ikɔrɔ ina. Mɔ aru ghi itan asang hun, asang agen agba kɔ ihang, avor anyar aa, inon iva isang iya. 6Asang agen agba kɔ avanz, akɔr imenden, kpa imend inginmɔ ghi umuwa mɔ ijɔr iru gha. 7Asang agen agba kɔ asan amɛnd urɔng ghɛ asan kpa asan aves akond imend hun. 8Asang agen agba kɔ inya isɛ. Aves a umuwɛ asang tsɛng akwa iti-atan ghi isang umɔm ɛnmɔ vɛ rɔɔ!” Mɔ abɛɛn ghi iramen, akaa gbong na, “Ɔr ungwen angwe atogh amgban amgba.”
9Ayɛghɛnɛv anav vɛ pine itiyo ikaa ikan hun. 10Akaa avo na, “Un ne agba akan ufɔn akaa uyɛr utorov unav Aonz. Kpa kɔ iyɔr agenɛv mɛ ram ghɛ avo ghɛ akan, ɛn na,
“ ‘Kas vɛ sɛ ghi ɛnɛn, kpa vɛ ɛn gha;
kas vɛ sɛ imgba; kpa vɛ afɔ itiyo ikaa gha.’
11“Itiyo ikaa ikan hun nan: Asang hun kɛ amu ana Aonz. 12Asang angan agba ihang mɔ kɛ amban vɛ mgba urɛhɛ Aonz, ta Ijɔv ividu urɛhɛ hun kɔ asɛma, ɛn iyinga avo isima ibɛrɛn ɛn vɛ ar. 13Asang angan agba kɔ avanz kɛ amban vɛ a ɔz urɛhɛ Aonz ghɛ isighan mɔ vɛ amgba. Kpa mɔ vɛ wa iyar gha, isima ibɛrɛn ivo ishi gha mɔ akaren utar ata ghɛ avo vɛ agba. 14Asang angan agba hɔ asan kɛ amban vɛ mgba urɛhɛ Aonz, kpa mɔ vɛ yov ihang mza iyɔr umuwa, isaren utorov, ghɛ isaren umuwa uyan ihimbir avo atam avo atav gha. 15Asang angan agba kɔ inya isɛ mɔ, ghɛ amban vɛ mgba imo ina Aonz ta vɛ ber iye ukong ghɛ isima isɛ, vɛ kire isima vɛ umuwɛ atam.
Ikan ghi isav
(Mak 4.21-25)
16“Ɔr amengɛn ghi isav atɛng itiye aku gha zan ayɛr kɔ itiyo inanghɛ gha, Kpa amba amengɛn vɛ ber hɔ ijeng, ungwen agham itumbɛ imem ɛn amban amba inɔrun vɛ ɛn iyamǝn. 17Akaa angan anga uyɛr ɛr ahir iboror, akaa angan anga aku ɛr ahir gbɛngang iyɔr vɛ fɔ. 18Kɔrun ayom ɛnmɔ umbu umgban. Ɔr ungwen akor ukwagh ufɔn vɛ soor un. Ɔr ungwen akor ukwagh ufɔn gha, akan angwe ghɛ aka kpa vɛ ɔz kɔ ghu un.”
Jizɔs aram amban amba anav ukɔng
(Matiyo 12.46-50; Mak 3.31-35)
19Ne ungɔ una Jizɔs avo anomgbanɛv anav vɛ va na vɛ ɛn ana, kpa vɛ kan gha achi uweng iyɔr. 20Ɔr ugen a ɔɔr Jizɔs na, “Ungɔ uwow ghɛ anomgban avow amba atire kɔ uwen, na vɛ ɛn ghɛ awɛ.”
21Jizɔs akaa na, “ungɔ uwam avo anomgbanɛv avav kɛ amban vɛ amba imgban urɛhɛ Aonz ta amba ghi ɛrɛn mɔ.”
Jizɔs ana uzɔ ijifir imem
(Matiyo 8.23-27; Mak 4.35-41)
22Ihɔ igen Jizɔs akaa ayɛghɛnɛv anav, “Ghi hungwan ijɔr andakɔ.” Vɛ nɔr utso uhungwan andakɔ. 23Mɔ vɛ hungwan minyam mungwa Jizɔs ayav. Ne ahumbɛ ataan atah ijɔr. Ne ijɔr ihiye iyiven ghu utso, vɛru kɔ uku.
24Ayɛghɛnɛv anav vɛ za rɛr un, ukaan na, “Uwun” ijɔr ikuwa ghu ɔs!
Mɔ Jizɔs amughun kɔ minya, ana uzɔ ijifir imem Kɛsmɛ. 25Ne apine ayɛghɛnɛv anav, “Isima ibɛrɛn uyon yeh?”
Katser ayɛghɛnɛv anav shisha. Vɛ pine arend, “Kine ɔr nan? Ungwen ijifir ghɛ ijɔr imgba un!”
Jizɔs akos ɔr ungwen ijɔv iru kɔ ghɛ ana
(Matiyo 8.28-34; Mak 5.1-20)
26Jizɔs ghɛ ayɛghɛnɛv anav vɛ hungwa ghu utso kɔ Gɛrasenɛs#8.26 Gɛrasenɛs Kɔ akaa angɛrɛn agen vɛ ta na Gadara., ahiye andakɔ Galili. 27Mɔ Jizɔs aru iduwen kɔ utso, ɔr ugen kɔ ahiye ungumɔ ungwen ajingɛjing abev vɛru kɔ ana, ava kor Jizɔs. Ghɛtsa akan ɔr ungumɔ awa akond aru ihiye utsan gha, atsayi kɔ iwar.
28Mɔ a ɛnɛn ghi Jizɔs, avang agba inya hɔ avor ana, ghi kongnen ghɛ imo itarɛn, “Kine uker han ghu mwe Jizɔs, Uwan una Aonz Uhumbana? Mkor uzɔ, ka nam ichan gha!” 29Mɔ Jizɔs ana uzɔ kpa na ajingɛjing ube hun aduwe kɔ ghɛ ana. Akwa isum ajingɛjing ube hun anɔrun kɔ ana. Kas vɛ wand un ghɛ ishiriv avo ghɛ avor ungwen vɛ kɛghɛn un, kpa ghi ikɔw ajingɛjing ube hun atond ishiriv imbimɔ ahɛmba ghɛ akɛghɛnɛv un ayuz akuma kɔ vɛ tim gha.
30Jizɔs apine, “Itiye iyow ni ingi ana?”
Ajingɛjing abev hun vɛ akaa na, itiye aam na, “Tsɛng,” ɛchi ajingɛjing abev tsɛng vɛru kɔ ghɛ ana. 31Ajɔv hun akɔr uzɔ ghu un chimber-chimber na, Jizɔs aka nayi uzɔ na vɛ duwe vɛ za nɔr kɔ ichan gha.
32Igo iyar kɔ itine ugo tsɛng kpembere hen, Ajɔv hun akɔr uzɔ ghu un na ana uzɔ hin vɛ nɔr kɔ igo ingimɔ.
Ne Jizɔs ana uzɔ. 33Ajingɛjing abev hun aduwen kɔ ɔr hun vɛ nɔr kɔ igo ingimɔ, ne igo ingimɔ ihemb ghɛ ayu itaa asenen kɔ uhǝng, ne uhǝng ukwa iyi.
34Mɔ akɛghɛnɛv igo ingimɔ vɛ ɛnɛn akaa angan a ɛr, vɛ yuz vɛ akɔr ghi ɔɔrun ahiye-ghɛ ahiye amban vɛru kɔ utar ungumɔ. 35Ne iyɔr vɛ asas ghi iza ɛnɛn ukwagh hun ungwen a ɛr mɔ. Vɛ van hɔ ghɛ Jizɔs, vɛ ɛn ɔr hun ungwen ajingɛjing abev aduwe kɔ ana. Aru ghɛ atɛma hɔ avor ana Jizɔs, awa akond ahir ɔr, ghɛ tser avo. 36Amban vɛ ɛn ukwagh ungwen a ɛr vɛ ɔɔr agenɛv mɔ ɔr ne ajingɛjing abev vɛru ana akor ghɛ makun. 37Ne iyɔr amem amban vɛru kɔ utar Gɛrasenɛs vɛ kaa na Jizɔs ayov hen kɔ ade avo, itiyo ikaa ghɛ tser avo kaka.
Ne Jizɔs ahire aza nɔr utso, ne ahungwa uhǝng andakɔ ayov. 38Ɔr ungwen ajingɛjing abev aduwe kɔ ana mɔ akɔr uzɔ na un ayov urɔngu ghu un. Ne Jizɔs akaa una, ayovoyi ghɛ achiya, 39“Inga, za kɔr iyɔr avov, ɔɔr avo akaa angan Aonz a ɛr ghu uwɛ.” Ne ayovon mɔ ahiye ghi ɔɔrun kɔ adeng achiya ukwagh ungwen Jizɔs a ɛr ghɛ un.
Jizɔs arɛr uwan una Jarus ukpon ashigh akos ukwas
(Matiyo 9.18-26; Mak 5.21-43)
40Uhǝng andakɔ iyɔr tsɛng vɛ ɔz Jizɔs, mɔ vɛru kɛghɛn un. 41Ne ɔr ungwen vɛ tayi na Jarus, ungwen aru utan kɔ itumbɛ izwangnɛn Ujus ingin iru hɔ ihiye ungumɔ, ava gba hɔ avor ana Jizɔs, ikɔrun uzɔ na aza kɔ itumbɛ ina. 42Ɛchi uwan una ukwas umɔm tas, ungwen aru anyom puwɛ ahar, aru inɔngnun uku.
Mɔ Jizɔs azayi ken mɔ, isum iyɔr igamber un. 43Ukwas ugen kɔ isum iyɔro amban vɛ gamber un aru iwen avombɔ kpem anyom puwɛ ahar, Ɔr abe akos un gha. 44Ava Jizɔs kan ajime, anarɛr uvogh aper un uzɔ ikond. Kɛsmɛ mɔ avomb hun atɔnd.
45Jizɔs apine “Ka ana aperem?”
Hanamɔ ɔr avenda, ne pita akaa na, “Uwun, isum iyɔro ingi inyeren.”
46Kpa Jizɔs akaa na, “ɔr ugen aperem mfɔ, ikɔw ukosun apas aduwe kan ghɛ amwe.” 47Mɔ ukwas hun afɔ na un abe sang kɔ uyɛr gha, agɛma ikirakas ava agba inya hɔ avor ana. Isum iyɔro imgba mɔ ukwas hun aru ghi ɔɔrun ukwagh ungwen ɛr ta aper un, kpa hanagen mshiya. 48Ne akaa ghu un na, “Uwan ukwas,” “Isima ibɛrɛn iyow ghi ɛr ushiya. Za makun.”
49Mɔ aramayi ukwas ungumɔ, ɔr utom na Jarus abiye, Jarus nɛru utaan kɔ itumbɛ izwangnan Ujus. Ɔr utom una ava ɔɔr un na, “Uwan uwow ukwas akpo. Ka zayi ɔr-tɛsɛn iyɔr gha.”
50Mɔ Jizɔs amgban ukwagh ungwen ɔr utom akaa mɔ, akaa ghu Jarus na, “Ka chiyayi gha, na isima ibɛrɛn, uwan uwow ashiya.”
51Mɔ vɛ nɔr ghi itumbɛ ina Jarus, Jizɔs arumun iyɔr vɛ nɔr kɔ itumbɛ ingimɔ imin gha, Pita, Jon, Jɛm ghɛ utir urɔngu ungɔ una uwan ukwas urara ungwen akpo mɔ. 52Hanamɔ ɔr awa ishon vɛru ghi ivangnɛn. Kpa Jizɔs akaa na, “Ka vangnen gha! Akpo gha; angwe ghi iyavɛn.”
53Kpa iyɔr amban vɛru hen tsɛng mɔ vɛ sɛ un ɛchi ungune vɛ fɔ na akpo kpa. 54Ne Jizɔs atɛng un ghu uvo ata, “Uwan, mugh isa!” 55Ukpɛ ungumɔ ajingɛjing una ahire, Kɛsmɛ mɔ amugh isa! Ne Jizɔs akaa ghu avo na vɛ na un ukwagh uyan aya. 56Amaranɛv anav msaan akond avo iyɔr, kpa Jizɔs akaa ghɛ avo na vɛ ka ɔɔrɔyi ɔr ukwagh ungwen a ɛr gha.
Kasalukuyang Napili:
Luk 8: UTA
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
©️2024 Luke Initiative for Scripture Translation