मर्कुस 9
9
1पइ इसुले तिनुलाइ भुन्यो, “साँच्चि, मु तमुखि भन्नउ, याँ हुन्यामध्ये कति जना छन् जइले परमेस्वरको राज्य सक्तिसालि भइबर आया नधेक्यासम्म मद्दया आथिन्।”
इसुको अनार बदल्लियो
(मत्ति १७:१-१३; लुका ९:२८-३६)
2तइका छइ दिनपाछा इसुले पत्रुस, याकुब रे युहन्नालाइ आफुसित लइजाइबर एक उच्चा डाँणामि गया। ताँ उनु मात्तरइ थ्या, रे सिस्याले हेद्दाहेद्दाइ इसुको अनार बद्लियो। 3इसुका लत्ता इति सेता रे चम्किला भया कि यइ धर्तिमि कस्सइले धोइबर लइ यति सुकिला बनाउन् सक्दाइन्। 4तसइबेला ताँ मोसा रे एलिया धेका पण्या, रे उनु इसुसित कुराकानि अद्दाथ्या। 5पत्रुसले इसुलाइ भुन्यो, “गुरु जि, हामु लइ याँ भया निकोइ भयो। हामु याँ तिन कुणा बनाउनाउ, एक तमरि निउति, एक मोसाकि निउति, रे एक एलियाकि निउति।” 6त्यो भउतइ डराया हुनाले क्या भन्नु हो भनि पत्रुसले था पाएइन।
7तन्जेइ बादल आयो रे तिनुलाइ छोप्यो, रे बादलबटहइ एक यसो भुन्न्या आबाज आयो, “यो मेरो प्यारो चेलो हो, तमु यइको बचन सुन।” 8यसो भुन्या सुनिबर सिस्याले वल्तिरपल्तिर हेरन्ज्या त इसुलाइबाहेक अउर कस्सइलाइ लइ धेकेइन्।
9उनु डाँणाबटहइ तल्लतिर ओल्ल्याबेला इसुले सिस्यालाइ भुन्यो, “मान्सको चेलो मर्याबटहइ जिउनो नहुन्ज्यासम्म यो कुरडि कस्सइलाइ लइ जनभन्या भनिबर आग्या दियो।”
10तिनु सिस्याले यो कुरा आफना मनइन राख्यो, तर “मर्याबटहइ जिउनो हुन्या भन्या क्या हो” भनिबर एक आपसमि कुराकानि अद्दलाग्या। 11पइ तिनुले उनुलाइ यसो भनि सोध्यो, “पइल्लि एलिया आउन्पणन्छ भनिबर ब्यबस्थाका धर्म-गुरु क्यालाइ भन्नाहान्?”
12इसुले भुन्यो, “साँच्चि हो, एलिया पइल्लि आउन्या छन् रे सप्पइ कुरा अज बनाउन्या छन्। तर मान्सका चेलाले भउतइ दुःख सइबर सप्पइबटहइ त्यागिन्पड्डया छ भनिबर धर्मा किताबमि क्यालाइ लेखिया हो? 13तर मु तमुलाइ भुन्नछु, एलिया आइसक्या छन् रे उनरा बारेमि धर्मा किताबमि लेखिया अन्सार मान्सले उनुलाइ ज्या मन लाग्यो तेइ अर्यो।”
इसुले भुत लाग्या केटालाइ निको पाण्यो
(मत्ति १७:१४-२१; लुका ९:३७-४३)
14उनु अउर सिस्या भया ठउँर फर्किबर आउन्ज्या मान्सका ठुला भिडले उनुलाइ घेरिराख्याथ्यो, रे तिनुसित धर्म-गुरु बहस अद्दारया इसुले धेक्यो। 15मान्सले इसुलाइ धेकन्जेइ अचम्म मानिबर उनरा वा दगुडिबर गया रे स्वागत अर्यो। 16इसुले उनरा सिस्यालाइ सोध्यो, “तमु तिनुसित क्या कुराको बहस अद्दाछउ?”
17मान्सका भिडबटहइ एक जनाले इसुलाइ बिन्ति अद्दइ भुन्यो, “गुरु जि, मुइले मेरा चेलालाइ हजुरका वा लेया छु। भुत आत्मा लागिबर त्यो बोल्लइ सक्दइन्। 18जबइ भुतले मेरा चेलालाइ समाउन्छ, तइलाइ भुइयइनु लछाणपछाण अरन्छ, मुखबटहइ फिज निकालिबर दाणा किट्न्छ रे अइठिन्छ। मुइले हजुरका सिस्यालाइ भुत निकालि दिय भनि बिन्ति अर्या तर तिनुले सकेइन्।”
19तबइ इसुले तिनुलाइ भुन्यो, “ए अबिस्वासि पुस्ता, मु कबसम्म तमुसित रउलो? रे मुइले तमुलाइ कइलसम्म सइरनु हो? तइलाइ मेरा वाँ ल्यास्।” 20तिनुले तइ केटालाइ उनरा वाँ लेइबर आया। इसुलाइ धेकन्जेइ तइ भुत आत्माले केटालाइ घणबणाइ घुणबुणेइ पाण्यो, रे त्यो भुइयइनु लटिपटि अद्दइ फिज निकाल्ल लाग्यो।
21इसुले तइका बालाइ सोध्यो, “कइलबटहइ यइलाइ यसो भया हो?” तिनुले भुन्यो, “नानाइ छनाबटहइ हो। 22यइलाइ नास अद्दाइलाइ भुत आत्माले जइबेला-तइबेला यइलाइ आगा रे पानिनु लइ हालन्छ। हजुर तमले केइ अद्द सकन्छउ भन्या, दया अरिबर हामुलाइ साहेता अरदिय।”
23इसुले तनलाइ भुन्यो, “तमु सकन्छउ कि भनि क्यालाइ भुन्नछइ? बिस्वास अद्द्यालाइ त सप्पइ कुरा सम्भब छ।”
24यो सुनिबर केटाका बाले ठुला स्वरमि भुन्यो, “मु बिस्वास अद्दउ। मेरा कम्जोर बिस्वासलाइ बलियो बिस्वास अद्दाइलाइ साहेता अर।”
25तबइ मान्सको भिड आफुतिर आउन्नारया धेकिबर इसुले भुत आत्मालाइ हप्काउनइ यसो भुन्यो, “ए लाटो रे बइरो पाड्डया भुत, मु तुलाइ हुकुम अद्उ, तइबटहइ निकल्बर जा रे कभइलइ तइ भित्तर जनपसेइ।”
26तबइ तइ भुतले चिच्च्याउनोइ केटालाइ मुर्छा पाडिबर निकबर गयो। तइपाछा त्यो केटो त मर्या जसो भयो, सप्पइले भुन्न लाग्या, “लउ हेर केटो त मर्यो” 27तर इसुले तइको हात समाइबर तइलाइ जुणुक्क उठायो, रे त्यो उठ्यो।
28पइ जबइ इसु घरभित्तर पस्या उनरा सिस्या उनुलाइ खुसुक्क सोद्दलाग्या, “हामुले क्यालाइ तइ भुतलाइ निकाल्ल सकेइन्?”
29उनुले तिनुलाइ भुन्यो, “तसो भुत त प्रार्थनाबटहइ मात्तरइ निकल्ल सकन्छ, अउर केइ उपाय आथिन्।”
इसुले दोसर्या लइ आफना मिरत्युका बारेमि भुन्यो
(मत्ति १७:२२-२३; लुका ९:४३-४५)
30इसु रे उनरा सिस्या त्यो ठउँर छाडिबर गालिलबटहइ भइबर गया। यो कुरा कस्सइलाइ थाँ जनहउ भन्न्या उनरो इच्छा थ्यो। 31क्यालाइकि इसुले आफना सिस्यालाइ सिछ्या दिन्नाथ्या। उनुले तिनुलाइ भुन्यो, “मान्सको चेलो मान्सका हातमि सउपिन्या छ। पइ तिनुले उइलाइ माद्या छन्, तर उ मर्याबटहइ तिन दिनमि जिउनो भइबर उठ्या छ।”
32तर इसुले भुन्या यो कुरा तिनुले बुजेइन्, रे उनसित सोद्दाइलाइ लइ डराया।
सप्पइहइ ठुलो को हो?
(मत्ति १८:१-५; लुका ९:४६-४८)
33इसु रे उनरा सिस्या कफर्नहुम आयापाछा, घरइ हुन्ज्या इसुले सिस्यालाइ सोध्यो, “बाटामणा आउबेला तमु क्या कुराको बहस अद्दाथ्या?”
34तर तिनु चुप लाग्या, क्यालाइकि बाटामि तिनु “हामुमिहइ ठुलो को हो?” भनि एक अर्कामि बहस अद्दाथ्या। 35तबइ इसु बस्या, रे बारइ जना सिस्यालाइ बोलाइबर भुन्यो, “कोइ मान्स पइलो हुन्या इछ्या अरन्छ भन्या, त्यो सपहइ पछिल्लो रे सप्पइको सेबक हुनुपड्डछ।” 36तइपाछा इसुले एक नाना बालख्खलाइ तिनरा अगाडि लेइबर आया रे तइलाइ काखिमि राखिबर सिस्यालाइ भुन्यो, 37“जइले यसा नाना बालख्खमध्ये एक जनालाइ लइ मेरा नाउँमि सुइकार अरन्छ, तइले मुइलाइ सुइकार अरन्छ, रे जइले मुइलाइ सुइकार अरन्छ तइले मुइलाइ हइन, तर मुइलाइ पठाउन्याहुन्यालाइ सुइकार अरन्छ।”
38युहन्नाले उनुलाइ भुन्यो, “गुरु जि, एक जना मान्सले तमरा नाउँमि भुत निकाल्लारया हामुले धेकेउँ। हामुले तइलाइ तसो जनअरइ भनिबर रोक्या, क्यालाइकि त्यो हामुमिको हइन्।”
39तर इसुले भुन्यो, “तइलाइ जनरोक,” क्यालाइकि मेरा नाउँमि अचम्मको काम अद्याले मेरा बिरुद्वमि नरामणो बोल्या आथिन्। 40क्यालाइकि जो हामरा बिरुद्दमि आथिन्, त्यो हामरितिरइ छ। 41साँच्चि मु तमुलाइ भुन्नउ, कसइले तमुलाइ ख्रिस्टका हउ भनि मेरा नाउँमि एक गिलास पानि खानाइलाइ दिया लइ तइले आफनो इनाम गुमाउन्या आथिन्।
पाप अद्द लाउन्या मान्सलाइ चेतावनि?
(मत्ति १८:६-९; लुका १७:१-२)
42“जइले मुमि बिस्वास अद्द्या यिनु नानामध्ये एक जनालाइ लइ पाप अद्द लाउन्छ, तइका त घाटिनु एक ठुलो जिताराको ढुङो झुण्याइबर तइलाइ समुन्दरइनु फाल्दिनु निको हुन्या थ्यो। 43यदि तमरा हातले तमलाइ पाप अद्द लाउन्छ भन्या तइलाइ काटिबर फालिदिय। दुइ हात होइबर नरकका ननिभ्द्या आगाइनु जानु भुन्ना त एकइ हात होइबर कभइ नमद्या जिबन पाउनु तमरि निउति असल हुन्याछ। 44[नर्क त न किणा मद्दाहान् नत आगो निभन्छ।] 45पइ तमरा खुट्टाले तमलाइ पाप अद्द लाउन्छ भन्या तइलाइ काटिबर फालिदिय क्यालाइकि दुइ खुट्टा होइबर नरकमि फालिनु भन्ना त खुट्टा नभएइ कभइ नमद्या जिबन पाउनु तमरि निउति असल हुन्याछ। 46[नर्क त न किणाइ मद्दाहान् न त आगो निभन्छ।] 47रे तमरा आँखाले तमलाइ पाप अद्द लाउन्छ भन्या तइलाइ निकालिबर फालिदिय। क्यालाइकि दुइ आँखा भइबर नरकमि जानु भन्ना त एकइ आँखो भइबर परमेस्वरका राज्यमि पस्सु तमरि निउति असलइ हुन्या छ। 48नरकमि त न किणा मद्दाहान् न त आगोइ निभन्छ।
49“क्यालाइकि नुनले बलिदानलाइ सुद्द पाण्या जसेरि आगाले सप्पइ मान्सलाइ सुद्द पाणिन्या छ।
50“नुन असल हो, तर नुनको स्वाद गयाले त्यो क्याले नुनिलो बनाउन्या?
“तमरो जिबन नुन जसोइ नुनिलो बनाय, रे सप्पइसित मिलिबर बस।”
Kasalukuyang Napili:
मर्कुस 9: DOTY
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.