ລູກາ 1
1
ບົດໄຂເນື້ອເລື່ອງ
1ທ່ານເທໂອຟີໂລທີ່ນັບຖື #1:1 ທ່ານເທໂອຟີໂລທີ່ນັບຖື: ເປຼີຍປີນຸ໋ຍຕ່າງຊາດທີ່ໃມ໋ລະດັບການສຶກສາສູງ ເປຼີຍຜູ້ປົກຄອງທິໂຣມັນ ແລະເປຼີຍປີນຸ໋ຍຮັ່ງມີ ລາວປິດກັບໃຈເຈິະເກີດຄຣິສຕຽນ ໃມ໋ທຳຣາປິດພະຍາຍາມຂຽນກ່ຽວກັບປະຫວັດສາດເລື່ອງເຫດການຕ່າງໆ ຊຶງປິດເກີດຕຶກສະເຮິຕິຕາຕີີສີນາ. 2ຫາມາຍປິດຂຽນຕາມມາດ ຕາມທີ່ປີນຸ໋ຍເຫຼົ່ານັ້ນປິດເບົ໋າສີນາ ຕາມທີ່ຫາມາຍປິດຕາຍທິມັດທິຫາມາຍເອງເຊັດເລີ່ມຕົ້ນພັນທະກິດທິພຣະເຢຊູຄຣິດເຈົ້າ ແລະຫາມາຍກາຍເປີຼຍຜູ້ປະກາດຖ້ອຍຄຳທິພຣະເຢຊູຄຣິດເຈົ້າ. 3ດັ່ງນັ້ນ ທ່ານເທໂອຟີໂລ ຂ້າພະເຈົ້າປິດສຶກສາເລື່ອງຕຼຸບສະເນ໋ະກ່ຽວກັບພຣະເຢຊູເຈົ້າຢ່າງຮອບຄອບສະ ສະນັ້ນຂ້າພະເຈົ້າຈຶ່ງຕັດສິນໃຈທີ່ຈະຂຽນເຫດການທີ່ເປີຼຍມາດເຫຼົ່າແນັເຜີລາຍງານແກ່ທ່ານ. 4ຂ້າພະເຈົ້າກຳລັງປືຼມສິ່ງແນັກໍເຜີທ່ານຈະຈືມາດ ກ່ຽວກັບໂຕດສິ່ງທີ່ທ່ານປິດຮັບຄຳສອນສະ.
ເທວະດາໂມຍອົງເຈິະເບົ໋າການເກີດທິໂຢຮັນບັບຕິສະໂຕ
5ເຮິໄລຍະເວລາເມື່ອເຮໂຣດປິດເປີຼຍກະສັດປົກຄອງແຂງຢູດາຍ ກໍປິດໃມ໋ປະໂຣຫິດມີຣາ ໂກຼເຮິກຸ່ມທິປະໂຣຫິດອາບີຢາທີເນາະ ເຊກາຣີຢາ. ເຕຼຍທິເຫີທີເນາະວ່າ ເອລີຊາເບັດ ລາວປິດສືບເຊີສາຍເຈິະເກິດປະໂຣຫິດອາໂຣນ#1:5 ໂຣຫິດອາໂຣນ ອາໂຣນເປີຼຍຢາຍທິໂມເຊເປັນປະໂຣຫິດປີນຸ໋ຍທຳອິດທິອິດສະຣາເອນປີນຸ໋ຍຢິວໂຕດແອເປຼີຍເຊີສາຍເຈິະເກິດລາວ ເປີຼຍປະໂຣດຫິດປີນຸ໋ຍທຳອິດທິອິດສະຣາເອນ. 6ເຊກາຣີຢາ ແລະເອລີຊາເບັດໂຕດປຣຽຣ໌ປິດປຼືມຕຼໍຕາມກົດບັນຍັດທິພຣະເຈົ້າ ຫາມາຍປິດເຊີຕະເມິງຄຳສັ່ງທິພຣະເຈົ້າຢ່າງຄົບຖ້ວນ. 7ແຕ່ເອີນເຫີຢີໃມ໋ກອນ ເພາະນາງເອລີຊາເບັດເປີຼຍໝັນຢີສາມາດໃມ໋ກອນປິດ ແລະໂຕດປຣຽຣ໌ກໍກາຣະສະ.
8ໂມຍຕະໄງ ເຊກາຣີຢາກຳລັງປະຕິບັດໜ້າທີ່ທິປະໂຣຫິດໂກຼນືພຣະວິຫານທິພຣະເຈົ້າອົງພຣະຜູ້ເປັນເຈົ້າ ເພາະວ່າໄອຕໍຼພຽນເຮິໝວດທິຕົນ. 9ຕາມປະເພນີທິເອີນປະໂຣຫິດສະ ຫາມາຍປິດເລີຼກໂດຍການໃຊ້ສະຫລາກເຜີຕັດສິນໃຈວ່າກັອນຈະມູດເຕິກນືພຣະວິຫານທິອົງພຣະຜູ້ເປັນເຈົ້າເຜີຜຸເຄື່ອງຫອມ ເມື່ອເອີນປະໂຣຫິດປິດປຼືມ ເຊກາຣີຢາຈຶ່ງຕຼໍເລຼີກເນມູດເຕິກນືພຣະວິຫານທິອົງພຣະຜູ້ເປັນເຈົ້າ ເຜີຜຸເຄື່ອງຫອມຖວາຍທິແທ່ນບູຊາ. 10ເຮິຂະນະທີ່ເຊກາຣິຢາ ກຳລັງຜຸເຄື່ອງຫອມບູຊາໂກຼທິແທນບູຊາປະຊາຊົນຈຳນວນທຳຣາທີ່ໂກຼເກິດນອກ ກຳລັງພາວັນນາອະທິຖານເກິພຣະເຈົ້ານືເດີ່ນພຣະວິຫານ.
11ໃມ໋ເທວະດາໂມຍອົງທິອົງພຣະຜູ້ເປັນເຈົ້າ ປິດປາກົດແກ່ເຫີ ໂດຍເຊິ່ງໂກຼຕິນສາມາທິແທ່ນບູຊາ. 12ເມື່ອເຊກາຣີຢາປິດຕາຍເທວະດາຕົນເຢຍສະ ເຫີກໍອາສັດ ແລະໃມ໋ຄວາມໂທຼງ. 13ແຕ່ເທວະດາອົງເຢຍເບົາແກ່ເຫີວ່າ, “ເຊກາຣີຢາເອີຍ ມະໂຕຼງໂຢະ ພຣະເຈົ້າປິດຊ໋ອງຄຳພາວັນນາອະທິຖານທິໄມສະ ແລະ ເອລີຊາເບັດເຕຼຍທິໄມ ຈະເກີດກອນກະລໍມີຮາອຳໄມ ໄມຈົ່ງຕັ້ງທີເນາະອຳລາວວ່າ ໂຢຮັນ. 14ໄມຈະໃມ໋ຄວາມຊົມຊື່ນຍິນດີຢ່າງລົ້ນເຫຼີ ແລະທຳຣາຈະຍິນດີເມື່ອເຫີເກີດມາ. 15ເຫີຈະເປີຼຍຜູ້ມຶນຕາເມ໋ະນືມັດທິອົງພຣະຜູ້ເປັນເຈົ້າ ເຫີຈະຢີເຍດຕາເພຍອະງຸ່ນ ຫຼືຕາເພຍເຣງແຕ່ຢ່າງໃດ ແລະລາວຈະປີງດ້ວຍພຣະວິນຍານບໍຣິສຸດເຈົ້າເຊັດນະໂກຼນືກຼາກເມ໋ະ. 16ແລະເຫີຈະຊ່ວຍຊາວອິດສະຣາເອນມຶມຶນທຳ ເຜີກັບໃຈເກິດບາບທິຫາມາຍ ແລະນະມັດສະການພຣະເຈົ້າທິຫາມາຍເກີບ. 17ໂຢຮັນຈະເຕິກກຽມປະຊາຊົນຈຳ ອົງພຣະຜູ້ເປັນເຈົ້າດ້ວຍຣິດເດດ ແລະຣິດອຳນາດ ເປະຜູ້ທຳນວາຍເອລີຢາເຄີຍໃມ໋ ເຫີຈະໂຕຍບະເກິກອນເນຄືນດີກັນ ເຫີຈະໂຕຍປີນຸ໋ຍຢີເຊີຕາເມິງກັບເນໃມ໋ປັນຍາເປະປີນຸ໋ຍສິນທຳ ເຫີຈະຕຽມປະຊາຊົນເຜີໂຢມຮັບພຣະອົງເມື່ອພຣະອົງສະເດັດເຈິະ.”
18ເຊກາຣີຢາເບົ໋າເກິເທວະດາເຢຍວ່າ, “ເອືອຈະຈືເຫດການແນັປິດເປະເຕ? ເພາະເອືອກໍກາຣະສະ ແລະເຕຼຍທິເອືອກໍມີສະເນີ.”
19ຝ່າຍເທວະດາເພີຼບວ່າ, “ເອືອແມ່ນຄັບຣີເອນ. ຊຶ່ງເຊິ່ງໂກຼທິມັດພຣະເຈົ້າ, ພຣະເຈົ້າປິດໃຊ້ເອືອເຜີປະກາດຂ່າວເຣາະແນັເກິໄມກ່ຽວເກິກອນກາລໍທິໄມ. 20ແຕ່ບັດແນັ ໄມຢີເຊີຖ້ອຍຄຳທິເອືອ ຊຶ່ງຈະເປີຼຍມາດຕາມເວລາທີ່ກຳນົດທົວະ ຍ້ອນໄມຢີເຊີໄມຈະເປີຼຍປີນຸ໋ຍໃບ້ຢີສາມາດມາງປິດ ຈົນກວ່າຕະໄງທີ່ສິ່ງແນັຈະເກີດຕຶກ.”
21ຂະນະທີ່ສິ່ງແນັກຳລັງເກີດຕຶກ ປະຊາຊົນກຳລັງຈຳເຊກາຣີຢາໂກຼ ແລະ ປະຫລາດໃຈ ວ່າເປະເຕເຫີຈຶ່ງໃຊ້ເວລາໂຕນເປີງປົກກະຕິໂກຼນືພຣະວິຫານ. 22ເມື່ອເຫີເຍືອຍເຈິະ ເຫີກໍເບົ໋າເກິຫາມາຍຢີປິດ ດັ່ງເຢຍປະຊາຊົນຈຶ່ງສັງເກດຈືວ່າ ເຫີປິດຕາຍນິມິດໂກຼນືພຣະວິຫານ ເຫີປິດໃຊ້ຕີປືຼມເປະພາສາໃບ້ເກິຫາມາຍ ແລະນະຢີສາມາດມາງປິດ.
23ເມື່ອໂຕດກຳນົດຮັບໃຊ້ນືພຣະວິຫານສະ ເຊກາຣີຢາກໍບີງເຈິະເຮິເມີງ. 24ຫຼັງຈາກນັ້ນ ນາງເອລີຊາເບັດເຕຼຍທິເຫີປິດເຕວ ແລະນາງຢີປິດເຍືອຍເກິດສະນາມ ໂກຼຫ່າງເກິດປີນຸ໋ຍອື່ນ ເປຼີຍເວລາເສີງເກີດ. 25ນາງເບົ໋າຕຶກວ່າ, “ອົງພຣະຜູ້ເປັນເຈົ້າປິດປຼືມເນຂ້າພະເຈົ້າໃມ໋ກອນປິດ ພຣະອົງປິດໃມ໋ຄວາມສະເລິະ ຕໍ່ຂ້າພະເຈົ້າທຳເຮິເວລາແນັ ແລະພຣະອົງປິດກຳຈັດຄວາມຢີຕານອກທິຂ້ານ້ອຍນືບັນດາປີນຸ໋ຍທີ່ຢີໃມ໋ກອນ.”
ເທວະດາໂມຍອົງເຈິິະເບົ໋າມາຣີກ່ຽວກັບການເກີດທິພຣະເຢຊູເຈົ້າ
26ເມື່ອນາງເອລີຊາເບັດປິດເຕວເປຼີຍເວລາເຕຼົາເກີດສະ ພຣະເຈົ້າກໍປິດໃຊ້ເທວະດາຄັບຣີເອນ ເຈິະທີ່ແຂງຄາລີເລເຮິເມືອງໂມຍທີ່ທີເນາະ ນາຊາເຣັດ. 27ເຖິງຕາເຣປີເຣ໋າະພົມມະຈາຣີມີຣາທີເນາະມາຣີປິດໝັນເກິກາລໍມີຣາທີເນາະໂຢເຊັບເປຼີຍເຊີສາຍທິກະສັດດາວິດ. 28ຫຼັງຈາກນັ້ນ ເທວະດາປິດເຕິກເຮິສະນາມທິນາງ ແລະປິດທັກທາຍນາງແລະເບົ໋າວ່າ, “ມາຣີເອີຍພຣະເຈົ້າຊົງສະເລຼິໄມທຳ ອົງພຣະຜູ້ເປັນເຈົ້າສະຖິດໂກຼເກິໄມ.”
29ແຕ່ເມື່ອມາຣີຊ໋ອງຄຳທັກທາຍທິເທວະດາ ນາງປິດເກີດຄວາມສັບສົນ ແລະສົງໄສກ່ຽວກັບຄຳທັກທາຍເຢຍໝາຍຄວາມວ່າເປະເຕ. 30ແລ້ວເທວະດາກໍປິດເບົ໋າແກ່ນາງວ່າ, “ມາຣີເອີຍ ມະໂທຼງ ພຣະເຈົ້າຊົງສະເລຼິກະລຸນາໄມສະ. 31ຈົ່ງຕາເມິງໄມບັດເຕວ ແລະຈະເກີດກອນກາລໍມີຣາ ແລະໄມຈົ່ງຕັ້ງທີເນາະອຳກຸມມານເຢຍວ່າ ເຢຊູ. 32ກຸມມານເຢຍຈະໃມ໋ອຳນາດຕາເມ໋ະ ແລະຈະເປີຼຍທີ່ກາເລົາວ່າ ກອນທິພຣະເຈົ້າອົງຕາເມ໋ະສູງສຸດ ພຣະເຈົ້າຈະປຼືມອຳເຫີເປຼີຍກະສັດເປະກັບດາວິດບັນພຣະບຸລຸດທິເຫີ 33ແລະ ເຫີຈະປົກຄອງເຊື້ອສາຍທິຢາໂຄບຕະຫລອດໄປ ແລະອານາຈັກທິເຫີຈະຢີສິ້ນສຸດເປີຼຍຕາມາສຸບ.”
34ແລ້ວມາຣີຈຶ່ງປິດເທືອນເທວະດາວ່າ, “ຂ້ານ້ອຍນະຢີປິດຮ່ວມເພດສຳພັນເກິຜູ້ກາລໍຕາມາສຸບ ເຫດການແນັຈະເປີຼຍເຕິກປິດເປະເຕ?”
35ເທວະດາປິດເພຼີບວ່າ, “ພຣະວິນຍານບໍຣິສຸດເຈົ້າຈະສະເດັດເຈິະປຶງໄມ ແລະຣິດອຳນາດທິພຣະເຈົ້າອົົງສູງສຸດຈະຕຽບທົວະເປະເກິຫາເມົາ ສະນັ້ນ ກອນກາລໍຜູ້ບໍຣິສຸດທີ່ຈະເກີດເຢຍຈະຕຼໍກາເລົາວ່າ ກອນທິພຣະເຈົ້າ. 36ຈົ່ງຕາເມິງເອລີຊາເບັດເອ໋າະຢາຍທິໄມ ນາງກຳລັງຈະປິດກອນກາລໍມີຣາ ເຖິງວ່ານາງກາຣະສະກໍຕາມ ປີນຸ໋ຍເບົາກັນວ່າ ນາງເປີຼຍໝັນ ແຕ່ບັດແນັນາງເຕວປິດເຕຼົາເດືອນສະ. 37ດ້ວຍວ່າ, ຢີໃມ໋ສິ່ງອາເຕທີ່ພຣະເຈົ້າປຼືມຢີປິດ.”
38ມາຣີເບົາຕຶກວ່າ, “ຂ້ານ້ອຍເປີຼຍທາດຕາເຣທິອົງພຣະຜູ້ເປັນເຈົ້າ ຂໍເນເຫດການແນັເກີດເກິຂ້ານ້ອຍຕາມທີ່ທ່ານປິດເບົາເຢຍເທີ້ນ.” ແລ້ວເທວະດາກໍຈາກນາງເຕິກ.
ມາຣີເຕິກຢ້ຽມຢາມເອລີຊາເບັດ
39ຈາກນັ້ນຢີໂຕນ ມາຣີກໍເຍີ໋ຍເດີນທາງຕາເຕິກໄວ ເຕິກທີ່ເມືອງໂມຍທີ່ຕວດກວຣ໌ທິແຂງຢູດາຍ. 40ເມື່ອນາງເຈິະພຶ໋ສະນາມທິເຊກາຣີຢານາງປິດທັກທາຍນາງເອລີຊາເບັດ. 41ເມື່ອນາງເອລີຊາເບັດປິດຊ໋ອງຄຳທັກທາຍທິນາງມາຣີ ກອນເຮິກຼາກທິນາງປິດໂຕ໋ຼະ. ນາງເອລີຊາເບັດປິດປີງດ້ວຍພຣະວິນຍານບໍຣິສຸດເຈົ້າ 42ແລະນາງຈຶ່ງອາໂຣະຕຶກດ້ວຍສຽງເຣງຕໍ່ນາງມາຣີວ່າ, “ໄມປິດຮັບພອນທຳເປີງຕາເຣປີນຸ໋ຍອື່ນໆ ແລະພຣະເຈົ້າປິດອວຍພອນກອນທີ່ຈະເກີດເຈິະດ້ວຍ 43ເປະເຕເຫດການອັນຍິ່ງຕາເມ໋ະແນັເກີດຂຶ້ນເກິຂ້ານ້ອຍນໍ ຄືເບະທິອົງພຣະຜູ້ເປັນເຈົ້າທິຂ້ານ້ອຍເຕິກຢຽມຢາມຂ້ານ້ອຍ 44ຮາເລໂຢະ ເມື່ອເອືອປິດຊ໋ອງຄຳທັກທາຍທິໄມ ກອນຫານືກຼາກທິຂ້ານ້ອຍປິດໂຕຼ໋ະດ້ວຍຄວາມຍິນດີ 45ອົງພຣະຜູ້ເປັນເຈົ້າປິດອວຍພອນໄມ ເພາະວ່າໄມປິດເຊີວ່າອົງພຣະຜູ້ເປັນເຈົ້າຈະປຼືມອຳສິ່ງທີ່ພຣະອົງປິດສົ່ງສັນຍາທົວະນັ້ນຈະມ໋ອມ.”
ມາຣີຮ້ອງເພງສັນລະເສີນພຣະເຈົ້າ
46ດັ່ງນັ້ນ, ມາຣີຈຶ່ງຮ້ອງເພງສັນລະເສີນວ່າ,
“ຈິດໃຈທິຂ້ານ້ອຍເອີຍ
ຈົ່ງສັນລະເສີນອົງພຣະຜູ້ເປັນເຈົ້າ
47ແລະ ຈິດວິນຍານຂ້ານ້ອຍ
ປິດຊົມຊື່ນຍິນດີເຮິພຣະເຈົ້າ
ຜູ້ຊົງໂຜດເນຂ້ານ້ອຍປິດພົ້ນ
48ເພາະວ່າພຣະອົງປິດຊີມ໋ອງຮາເລ
ຂ້ານ້ອຍ ເຖິງວ່າຂ້ານ້ອຍເປຼີຍປີນຸ໋ຍຮັບໃຊ້ທີ່ຕໍ່າຕ້ອຍທິພຣະອົງ
ເຊັດແນັຮາເງີ້ຣປີນຸ໋ຍໂຕດສະໄໝ
ຈະກາເລົາຂ້ານ້ອຍວ່າ ທໍ່ແຫ່ງພຣະພອນ
49ເພາະວ່າພຣະເຈົ້າຜູ້ໃມ໋ອຳນາດໂຕດແອ
ປິດປຼືມສິ່ງທີ່ອັດສະຈັນສຳລັບເອືອ
ພຣະນາມທິພຣະອົງບໍຣິສຸດ,
50ພຣະອົງສຳແດງຄວາມສະເລິະ
ກໍໃມ໋ແກ່ບັນດາຜູ້ທີ່ຢຳເກງພຣະອົງ
ທັງຊົ່ວອາຍຸແນັ ແລະຊົ່ວອາຍຸນາວສືບໆໄປ.
51ເມື່ອພຣະອົງປິດປະຢອຍຕີ
ອັນໃມ໋ອຳນາດເຍືອຍເຕິກ
ປີນຸ໋ຍທີ່ຈອງຫອງແລະແຜນການ
ທິຫາມາຍກໍຕະເປິສະສາຍ.
52ພຣະອົງປິດລຶບລ້າງບັນດາຜູ້ນຳທີ່ໃມ໋ອຳນາດ
ເຍືອຍເກິດສະຖານທີທີ່ໃມ໋ອຳນາດທິຫາມາຍ
ແຕ່ພຣະອົງປິດເຢີກຊູປີນຸ໋ຍທີ່ຕໍ່າຕ້ອຍຕຶກ.
53ພຣະອົງເນປີນຸ໋ຍອຶດໂງນປີງດ້ວຍຂອງດີ
ແລະເນປີນຸ໋ຍຮັ່ງໃມ໋ຕູຕີຢີໃມ໋ມາເມ໋າະ.
54ພຣະອົງປິດຮັກສາຄຳສັນຍາທີ່ພຣະອົງ
ປິດປຼືມເກິບັນພະບຸລຸດທິສີນາ
ແລະ ປິດເຈິະຊ່ວຍເຫຼີປະຊາຊົນອິດສະຣາເອນ
ທິພຣະອົງ
55ລາວຈືຈຳທີ່ຈະສະແດງຄວາມສະເລິຕໍ່ອັບຣາຮາມ
ແລະຕໍ່ກອນເຈົາທິເຫີຕະຫລອດໄປ
ຕາມທີ່ພຣະອົງປິດຊົງສັນຍາທົວະ
ເກິບັນພຣະບຸລຸດທິສີນາ.”
56ມາຣີປິດພັກໂກຼເກິເອຣີຊາເບັດປະມານແປເກີດ ແລ້ວນາງກໍບີງເຈິະເຮິສະນາມທິຕົນ.
ເອລີຊາເບັດອຳກຳເນີດໂຢຮັນບັບຕິສະໂຕ
57ບັດແນັກໍພຶ໋ເວລາສະ ທີ່ນາງເອລີຊາເບັດຈະປິດກອນ ແລະນາງກໍເກີດກອນກາລໍມີຮາ 58ເມື່ອເພື່ອນເມີງຕາຕຽບເກິເຊີສາຍເອ໋າະຢາຍທິນາງປິດຊ໋ອງວ່າ ອົງພຣະຜູ້ເປັນເຈົ້າປິດອຳຄວາມສະເລິະແກ່ນາງມຶມຶນທຳ ຫາມາຍຕ່າງກໍຊົມຊື່ນຍິນດີເກິນາງ.
59ເມື່ອກອນກາເລດປິດຖາມຕະໃງສະ ເອີນເຫີກໍປືຼມພິທີ່ຕັດອຳກອນກາເລດ ແລະຫາມາຍກຳລັງບັດຕັ້ງທີເນາະວ່າ, ເຊກາຣີຢາ ຕາມທີເນາະທິບະ. 60ແຕ່ເບະເບົາວ່າ, “ຢີເກີນ ລາວຈະຕ້ອງໃມ໋ທີເນາະວ່າ ໂຢຮັນ.”
61ຫາມາຍຈຶ່ງເບົາແກ່ນາງວ່າ, “ແຕ່ໄມຢີໃມ໋ຍາດຕິເອ໋າະຢາຍຕາມາຣາທີ່ຕັ້ງທີເນາະນັ້ນ.” 62ແລ້ວຫາມາຍກໍໃຊ້ພາສາໄບ້ເທືອນບະທິກອນກາເລດວ່າ ເຫີຕ້ອງການຕັ້ງທີເນາະເມ໋າະອຳກອນກາລໍ.
63ແລ້ວເຊກາຣີຢາປິດອຳສັນຍານຕີເນຫາມາຍເນຈ໋ອກກະດານເຈິະ ແລ້ວເຫີຂຽນວ່າ, “ທີເນາະທິລາວແມ່ນໂຢຮັນ.” ແລ້ວໂຕດສະເນ໋ະຕ່າງກໍປະຫລາດໃຈ 64ເວລາດຽວກັນນັ້ນ ເຊກາຣີຢາກໍມາງປິດສະ ແລະ ເຫີປິດເລີ່ມຕົ້ນສັນລະເສີນພຣະເຈົ້າ. 65ເອ໋າະຢາຍແລະເພື່ອນເມີງຕາຕຽບຕ່າງກໍເກີດຄວາມໂທຼງ ແລະຂ່າວກ່ຽວກັບເຫດການເຫຼົ່າແນັ ກໍຊ່າລືເຕິກໂທຼເຂດຕວດກວຣ໌ທິແຂງຢູດາຍ. 66ເມື່ອໂຕດສະເນ໋ະປິດຊ໋ອງຂ່າວເຫຼົ່າແນັ ຕ່າງກໍພິຈາລະນານືເກີຼມວ່າແລະເຕືອນກັນວ່າ, “ກອນແນັຈະເປີຼຍເປະເຕນໍ? ເພາະເປີຼຍການຈະແຈ້ງແລ້ວວ່າ ຣິດເດດທິອົງພຣະຜູ້ເປັນເຈົ້າ ຊົງສະຖິດໂກຼເກິກອນແນັ.”
ເຊກາຣີຢາເບົ໋າຄຳທຳນວາຍ ແລະສັນເສີນພຣະເຈົ້າ
67ຝ່າຍເຊກາຣີຢາບະທິໂຢຮັນ ກໍປີງດ້ວຍພຣະວິນຍານບໍຣິສຸດເຈົ້າ ຈຶ່ງປິດທຳນວາຍວ່າ,
68“ເນສີນາສັນລະເສີນອົງພຣະຜູ້ເປັນເຈົ້າ
ຜູ້ເປຼີຍພຣະເຈົ້າທິອິດສະຣາເອນ
ພຣະອົງປິດເຈິະຊ່ວຍປະຊາຊົນທິພຣະອົງ
ແລະ ປິດປົດປ່ອຍຫາມາຍເປຼີຍອິດສະຫຼະ
69ພຣະອົງປິດອຳພຣະຜູ້ຊ່ວຍເນລອດພົ້ນທີ່ປະເສີດແກ່ສີນາ
ເຊີສາຍທິດາວິດຜູ້ຮັບໃຊ້
ທິພຣະອົງ,
70ຕາມທີ່ພຣະອົງປິດຊົງສັນຍາ
ເກິຜູ້ທຳນວາຍຜູ້ບໍຣິສຸດທິພຣະອົງ
ເຊັດໂຕນສະ.
71ເຜີພຣະອົງຈະຊ່ວຍນາເນພົ້ນຈາກສັດຕູ
ເກິດອຳນາດທິໂຕດສະເນ໋ະ
ທີ່ຢີຕານອກນາ
72ພຣະອົງປິດເບົ໋າວ່າ ພຣະອົງຈະສະແດງຄວາມສະເລິະ
ຕໍ່ບັນພະບຸລຸດ
ທິສີນາ
ແລະຊົງລະນຶກເຖິງພັນທະສັນຍາ
ອັນສັກສິດທິພຣະອົງ
73ດ້ວຍສັນຍາຢ່າງຈິງຈັງ
ຕໍ່ອັບຣາຮາມບັນພະບຸລຸດທິສີນາ
74ເຫີປິດສັນຍາວ່າຈະຊ່ວຍສີນາເນພົ້ນເກິດສັດຕູທິສີນາ
ແລະອຳສີນາຮັບໃຊ້ພຣະອົງໂດຍຢີໃມ໋ຄວາມໂທງ,
75ເຜີວ່າສີນາຈະບໍຣິສຸດແລະຊອບທຳ
ທິມັດພຣະອົງ
ຕະຫລອດຕະໄງມັງແຫ່ງຊີວິດທິສີນາ.
76ກອນກາເລດທິນາເອີຍ, ໄມຈະຕຼໍກາເລົາວ່າ,
ຜູ້ທຳນວາຍທິພຣະເຈົ້າຜູ້ສູງສຸດ.
ໄມຈະເຕິກຕິນເງີ້ຣອົງພຣະຜູ້ເປັນເຈົ້າ
ແລະຈັດຕຽມປະຊາຊົນສຳລັບການສະເດັດເຈິະ
ທິພຣະອົງ
77ໄມຈະຊ່ວຍປະຊາຊົນທິພຣະອົງ
ເນຈືວ່າ ອົງພຣະຜູ້ເປັນເຈົ້າກຳລັງສະເດັດເຈິະຊ່ວຍຫາມາຍເນພົ້ນ
ໂດຍການ ອະໄພບາບກຳ
ທິຫາມາຍ
78ຍ້ອນວ່າພຣະອົງຊົງໃມ໋ຄວາມສະເລິະ
ດ້ວຍເຫດນັ້ນພຣະເຈົ້າຊົງພຣະຜູ້ຊ່ວຍເນພົ້ນເກິດສະຫວັນເຜີເຈິະຊ່ວຍສີນາ,
79ພຣະອົງຈະໂຕຍຄວາມສະອາງເຈິະສູ່ປະຊາຊົນ
ທີ່ດຳລົງຊີວິດໂກຼນືຮາງົມ
ແລະປີນຸ໋ຍເຫຼົ່ານັ້ນທີ່ໂທຼງຄວາມເກດ
ສະນັ້ນ ພຣະອົງປຼືມສິ່ງແນັກໍເຜີໂຕຍສີນາ
ຈະດຳລົງຊີວິດຢ່າງໃມ໋ສັນຕິສຸກ.”
80ແລະ ກອນກາເລດທີເນາະໂຢຮັນເຫີກໍປິດຕາເມ໋ະຕຶກ ແລະຈິດວິນຍານກໍໃມ໋ກຳລັງທະວີຕຶກ ເຫີປິດອາໄສໂກນື ປະເຕ໋ຍຮາຣອຍຮາຣຳ ຈົນພຶ໋ຕະໄງທີ່ໂຢຮັນຈະປະກົດຈັກ ແລະເລີ່ມສັ່ງສອນປະຊາຊົນອິດສະຣາເອນ.
Kasalukuyang Napili:
ລູກາ 1: LVI
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
La vy Bible by Beyond Translation is licensed under Creative Commons Attribution-ShareAlike 4.0 License.