Apastil Nani Sturka 10
10
Pita Cornelio wal
1Sesaria tawanka ra waitna kumi bâra kan nina ba Cornelio, witin lika Rom suldiar daknika kiaptinka kata, nina Italia wina ba. 2Witin lika ai watla uplika aikuki Gâd ra sibrin luki mayuni kan. Witin sin lalah uya yaban Ju uplika umpira nani ra hilp munaia, ban sin Gâd ra ai pura suni kan. 3Yu kumi tutni 3 aklak kan ra, diara aihka kumi kaikan param pali, nahki Gâd insalka kum witin bâra kan ba kat bal diman, bara win: “¡Cornelio!” 4Bamna Cornelio sibrinkira pali insal kat ban kaiki, makabi walan: “Dawan, ¿dîa ki?” Bara insal ba bila: “Gâd bui pain kaikan man puram sunram ba, bara Ju uplika umpira nani ra sin hilp munisma ba sut. 5Bamna man waitna nani blîks Jope ra, Saiman nina wala Pita wi ba bri balaia. 6Witin ba Saiman wala daiwan taya saika dadingkra ba wal takaskisa, baha watla ba sin kabu un ra sa.”
7Baha ningkara, insal witin wal aisi kata ba mahka wan ba ra, Cornelio mita ai albika wâl winan, bara suldiar kum sin Gâd ra sibrin luki kan ba, yu bani witin wal kan ba. 8Diara nani sut takan ba maisa paki si, baha nani ba Jope ra blikan.
9Yu wala witin nani impaki pat Jope lamara balan ba ra, yu ba 12 aklak baku kan, Pita mita utla bahna ra uli wan ai pura sunaia. 10Witin plun uya pali dauki kan, mahka sin piaia luki kan. Sakuna ai pata ba kau ridi daukras kan piua ra, diara aihka kum kaikan. 11Witin kaikan kasbrika pura ba kwawan, bara kwala pîs tara baku kum, tâ walhwal wilkan naha tasba kat alahbi ikan. 12Baha kwalka bilara daiwan sât sât bâra kan, mina walhwal bri nani, piuta nani, tnawira nani sin. 13Bara bîla baikra kum walan: “¡Pita, bus, bara iki pis!”
14Sakuna Pita pana win: “Apia pali, Dawan, yang kau aima kumi sin bahmuna dukia saura tâski nani ba sât piras.” 15Bîla baikra kata ba kli aima wala ra aisin, naku walan: “Gâd mita diara klin daukan ba, man tâski wipara.”
16Naha diara na aima yumhpa mariki si, kwalka kata ba kli kasbrika purara uli wan. 17Baha diara aihka kaikan ba dukiara Pita kau ai kupia wal aisi kan ba ra, Cornelio blikan waitnika nani pat dur ra bûi banhwi kan, witin nani Saiman watla ba ani sapa makabi wali kan. 18Witin nani ai bîla baikra karna wini makabi wali kan, Saiman nina wala Pita wi ba baha watla ra takaskisa sapa.
19Sakuna Pita lika diara aihka kaikan ba dukiara kau ai kupia wal aisi kan ba ra, Spirit Holikira bila: “Kaiks, waitna yumhpa mai plikisa. 20Man mahka bûi munhtara iwi wih, baha nani wal was. Namhpa namhpa sin lukpara, kan yang mita baha waitnika nani ba blikri sa bamna.”
21Bamna Pita munhtara iwi wan, bara Cornelio mita blikan waitnika nani ra win:
—Man nani plikisma waitnika ba sika yang; ¿dîa pali dukiara man nani balram ki?
22Witin nani bila:
—Kiaptin Cornelio mita ai blikan. Witin waitna kasakkira, Gâd ra sin sibrin lukisa, Ju nani sut mita sin witin ra latwan kaikisa. Bamna Dawan insalka kumi mita witin ra win, man mai paiwbia ai watla ra wama, bara dîa dîa aisama ba witin walbia.
23Bara Pita mita waitna nani ba yan utla ra diman, tihmia sin aikuki bahara yapi lalawan. Yu wala titan, Pita bara wan muihni nani tila Jope wina sin, witin nani aikuki wan.
24Yu wala witin nani Sesaria ra diman, bahara sika Cornelio witin bîla kaiki kan ba, ai taya nani, bara ai uplika nani sin kau witin wal asla nani ba kan paiwan. 25Pita utla ra dimaia baila kan ba ra, Cornelio taki wan wal prawaia, ban ai lula kriki ai mawanra kauhi witin ra mayunan. 26Sakuna Pita mita alki buki, win:
—Minam ra bus, yang na upla, sin man wal baku.
27Witin wal ban aisi utla ra diman ba ra, kaikan upla ailal bahara asla takan kan. 28Bara Pita bila:
—Man nani pain kaikisma, Ju sertska ba lâ yaras sa, Ju uplika kum ba Ju apia uplika kum wal asla takaia, apia kaka watla ra kra dimaia. Sakuna Gâd mita ai marikan yang bui upla kumi ra saura, apia kaka tâski sin wimna apia. 29Baha mita, man nani ai paiwram ba ra, takaskras mahka balri diara kumi sin aisaras. Bamna yang walaia want sna, man nani dîa dukiara ai paiwram sapa.
30Bara Cornelio bila:
—Pat yu walhwal sa, sim naha awarka baku kan, yang waitla na ra tutni 3 aklak pura sunra dauki kapri, waitna kumi kwala ingnikira dimi yang ra latan takan. 31Bara naku ai win: ‘Cornelio, Gâd lika man puram sunra ba walan, bara ai kupia sin krawan man mita upla umpira nani ra hilp munisma ba. 32Bamna Jope tawanka ra upla blîks, Saiman nina wala Pita mâki ba bri balaia. Witin ba takaskisa Saiman wala daiwan taya saika dadingkra ba watla ra, baha watla ba kabu un ra sa.’ 33Baha mita mahka blikri man mai plikaia, bamna man aitani pali balram. Nanara yang nani sut nahara banhwisni Gâd mawanra, man ra Dawan mita dîa maikka aisama ba walaia.
Pita Cornelio watla ra aisin ba
34Bara Pita mahka aisi, win:
—Nanara kasak pali kaikisni, Gâd mapa ra upla sâtka kumi upla sât wala ba wal aihka apia sa,#Kli S 10.17. 35sakuna witin pain kulkisa ani nisanka witin ra sibrin luki bara diara pain sin dauki ba. 36Bamna Gâd bui Israel kiamka nani ra win, Jisas Kraist bâk kupia kumi lâka ba maisa pakan, witinka yawan sut wan Dawanka ba. 37Man nani sut pain kaikisma, Judia tasbaya aiska ra dîa taki ba, Galili ra pas daukan ba, tahbi daukaia lâ ba briaia sa Jan mita smalkan ba ningkara. 38Man nani kaikisma Gâd Jisas Nasaret wina bara Spirit Holikira karnika yan ba, witinka diara pain man dauki tauki kan, bara baha nani dibil karnika mununhtara pât wahwi kan ba sut rakan. Baku daukaia sip kan, Gâd lika witin wal kan bamna. 39Yang nani lika dîa dîa Jisas daukan ba witniska nani sika, Judia tasbaya aiska ra, ban Jerusalem tawanka ra sin. Baha sut ningkara, upla nani witin ba dus prihni ra pami ikan. 40Sakuna yu yumhpa ra Gâd bui witin ba pruan wina kli bukan, bara sin yang nani ra latan takan. 41Upla sut ra lika param takras kan, sakuna yang nani ra lika. Gâd mita kaina wina yang nani na bâk ai sakan, witnis kaia ba dukiara. Jisas pruan wina buan ningkara, yang nani aikuki plun piri, diara sin dih banhri. 42Bara yang nani ai blikan upla nani ra smalkaia, witnis sin aisaia, nahki Gâd mita naha Jisaska na raya nani bara pruan nani sut Wihtka mangkan sa. 43Bamna patitara piua ba wina, prapit nani sin Jisas tânka naku aisin: ‘Ya ya witin ra luki ba, ai nina karnika ba mita saurka nani sut swih tikan kabia.’
Ju apia nani Spirit Holikira brin ba
44Pita kau aisi kan ba ra, Spirit Holikira bal iwan baha nani witin ra wali nani kan ba sut ra. 45Ju lalukra nani Pita wal balan kan ba tâ iwan, Spirit Holikira ba Ju apia uplika nani ra sin yabuya ba dukiara. 46Witin nani walan, baha nani bîla sât wala nani aisi, Gâd ra sin mayuni kan. 47Baku bamna, Pita aisin:
—¿Upla sip kabia ki naha nani tahbi daukaia ba wina takaskaia, witin nani pat Spirit Holikira brin na yawan baku?
48Bara adar yan, baha nani ba Jisas Kraist nina ra tahbi daukaia. Baha ningkara, Pita ra makaban yu wiria pan witin nani wal takaskaia.
Kasalukuyang Napili:
Apastil Nani Sturka 10: MSKTU
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2010 Bible Society in Nicaragua