Apastil Nani Sturka 4
4
Pita Jan wal lâ wihtka nani mawanra
1Pita Jan wal lika kau ban upla nani ra aisi kan ba ra, prîs nani bara tempel main kaiki wihtka ba, bara sadiusi nani sut aikuki aidrubi balan. 2Witin nani sut ai kupia baiki kata, kan Pita Jan wal lika upla nani ra smalki kan, Jisas pruan wina buan tânka ba wan marikisa upla ba pruan wina kli bubia. 3Pat yu tutni kan bamna, witin nani mita Pita Jan wal ba alki silak ra mangkan, yu wala ra lâka daukaia wisi. 4Naha apastil wâl smalkanka ba wina upla manis pali kasak lukan; waitna nani baman kulkan ba 5,000 lamara kata.
5Yu wala ra Ju wihtka nani, almuk nani bara Lâ Smasmalkra nani sut Jerusalem ra asla takan. 6Baha tilara prîs wihtka tara Anás sin bâra kan, Keyapas, Jan, Alejandro bara baha prîs wihtka tara taika nani sin. 7Bamna Pita Jan wal bri bal witin nani ai mawan kat yan buan, bara makabi walan:
—¿Man nani dîa pali karnika ni, ya nina sin bri mâki naha diara nani na daukisma ki?
8Bamna Pita ba Spirit Holikira ni aibanhwan, bara baha nani ra naku win:
—Man nani lika naha uplika nani wihtka nani sma ba, bara almukka nani sin: 9yang nani ra makabi walisma, naha waitna ai sikniska wina nahki rawan sa sapa. 10Bamna man nani mamwanra param aisisna, Israel luhpia nani sut tânka na pain bribia, naha waitnika aiska rawan man nani mamwanra bûi na lika Jisas Kraist Nasaret wina ba nina karnika ra, witinka ra sika man nani dus ra sabi ikatma ba, sakuna Gâd bui witin ba pruan wina kli bukan. 11Naha Jisaska sika walpa ba, sakuna man nani utla mâmakra nani mita witin ba bahki kulkram, ban sakuna witin sika walpa kau painkira ba.#Law 118.22. 12Upla wala bâk swaki wan sakan lâka briaia ba âpu sa,#Jn 14.6. kan Gâd mita naha tasba ra nina wala kum mâki wankras sa, swaki wan sakaia ba dukiara.
13Aidrubanka wihtka nani ba mita kaikan, Pita Jan wal lika sibrin âpu kira aisi kan, bara kaikan baha nani wauhkataya uya lan takras kan, upla wala nani wal baku. Bamna tâ iwi banhwata, kan latan kaikan naha nani Jisas wal tauki kan. 14Baha purkara, skahwa waitna pain takan ba sin Pita Jan wal lamara bûi kata, bamna wihtka nani mita ai mapara diara aisaia sip apia kan. 15Kuna witin nani win aidrubanka rumka ba wina taki wabia, bara witin nani ai mânka man aisaia kan bamna. 16Bara witin nani bila:
—¿Yawan nani dîa daukbia naha waitnika nani na wal? Kan Jerusalem ra iwi uplika nani sut ba pain kaikisa, witin nani mita sain aihka pali dauki ba dukiara, bamna yawan baha mapara kunin sa sip wiras. 17Ban sakuna, naha diara na upla nani tilara kau bukaia apia ba mata, kaisa witin nani ra yawan bui sirang iki bara wip, naiwa wina kli Jisas nina mâki upla nani ra aisabia apia.
18Bamna witin nani ba paiwi karna pali naku smalki, win:
—Man nani naiwa wina kli baha Jisaska nina mâki upla nani ra aisi smalkpara pali. 19Kuna Pita Jan wal pana win:
—Man nani pali luki kaiks, Gâd mawanra aitani kabia sapa yang nani Gâd bîla walaia katna ba swi si, man nani bîlam walamna kaka. 20Bamna yang nani sip apia, diara nani kaikri ba bara walri ba sin aisaras kaia.
21Bara aidrubanka wihtka nani ba mita karna pali smalki mahka pri swin, witin nani mita nahki pât dingkaia sapa tânka sip sakras kan bamna, kan upla nani sut Gâd ra mayuni kata diara takan ba dukiara. 22Sain aihka ni rakan waitnika ba lika pat mani 40 pura bri kata.
Lalukra nani ai karnika bara kasak lukan lâka makabisa
23Pita Jan wal pri takan ba ningkara, witin nani ai pânika nani ra wih sut win, prîs tara nani bara almuk nani mita dîa witin nani ra win ba. 24Baha diara nani walan ba ra, witin nani sut Gâd ra ai pura suni, win: “Dawan, man sika kasbrika pura, tasba, kabu, dîa dîa baha bilara ba sut paskram.#Imp St 20.11; Nih 9.6; Law 146.6. 25Man sika Spirit Holikira bâk nampakan Debit bîla ra mangkram witin naku aisin ba:
‘¿Dîa kan nisan nani ba unsaban lâka bukisa,
bara upla nani sin diara bahki nani ra baman lukisa?
26Naha tasba kingka nani sin ridi taki buan,
kuntri nani wihtka tara nani sin asla takan
Dawan mapara, bara ai Kraistka mapara sin.’#Law 2.1-2.
27“Kasak, naha tawanka ra sika, Herod bara#Lk 23.7-11. Pontius Pailat wal#Mt 27.1-2; Mk 15.1; Lk 23.1; Jn 18.28-29. bara Ju apia nani ba sin, bara Israel luhpia nani aikuki asla aidruban, man nampakan holikira Jisas ba mapara,#Ais 52.13; Pil 2.7. witin ba man mita Kraist mangkram ba. 28Baku mika witin nani sut daukan, dîa man patitara piua ra lâ mangkram kata ba, diara nani takaia kan ba kat. 29Bara nanara, Dawan, kaiks witin nani sirang wan iki ba, kuna man nampakan nani ra kupia karna dauks, man smalkankam ba sibrin âpu aisaia ba dukiara. 30Man mihtam karnika ni siknis nani rakbia, bara sain aihka nani sin daukbia, man Luhpiam holikira Jisas nina ra.”
31Ai pura suni takaskan ba ra, witin nani asla taki bâra kan pliska ba nikban; bamna witin nani sut Spirit Holikira ni banhkan kan, bara sibrin âpu Gâd sturka yamni ba aisin.
Lalukra nani diara bri kan ba upla sut wal yui bri kan
32Lalukra daknika aiska ba lika ai kupia lukanka kumi baman brin kata, bamna upla kumi sin wiras kata dîa bri kan ba witin yakan ai dukia sa, sakuna diara nani sut ba witin nani sut ai dukia baku kulkan.#Ap St 2.44-45. 33Apastil nani lika karnika uya wal Dawan Jisas raiti wina buan ba dukiara witnis aisi kan, bara Gâd mita sin uya pali yamni munan kata. 34Diara luha uplika kumi sin witin nani tilara âpu kata, kan baha nani tasba sapa, utla sapa bri kan ba sut wauhi atkan. Ningkara lalahka takan ba, 35apastil nani mihta ra mangkan, bara baha lalahka ba yui brin, ya ya diara luha kan ba praiska kat. 36Baku sin witin nani ai tilara Libait kum kata nina Josep, witin ba Chipre kî dakura ra aisuban kan, bara apastil nani mita nina wala laki yan, Bernabé, (tânka ba “Maisa Nanihkra luhpia”). 37Naha waitnika mita tasba pîs kum bri kan ba wauhi atkan, bara lalahka takan ba apastil nani ra bri sal yan.
Kasalukuyang Napili:
Apastil Nani Sturka 4: MSKTU
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2010 Bible Society in Nicaragua