Apastil Nani Sturka 8
8
1Bara Saulo bâra kan, Stiben pruanka ra luki aitani tânka yabi.
Saulo mita serts ra nina bliki rausauhkan ba
Bara baha sim yua, Jerusalem ra serts bâra kan ba mapara rausauhkanka tara pali buan. Lalukra nani ban plis plis ra plapan, Judia bara Sameria tasbaya nani ra; sakuna apastil nani lika bâra kan. 2Waitna kasakkira nani mita Stiben wîna tara ba raiti ra bri si bikan, kasak sin sari taki banhwan. 3Bara Saulo lika kau ban serts ra rausauhki kan; witin utla bani ra dimi tauki kan, waitna, apia kaka mairin kra sâkbia kaka, raski saki silak ra mangkaia dukiara.#Ap St 22.4-5; 26.9-11.
Sturi yamni ba Sameria ra smalkan
4Lalukra nani plis plis ra plapan ba mita ani anira wan ba ra swaki sakan sturka yamni ba smalki kan. 5Pilip lika Sameria tawanka kumi ra wih mahka Kraist sturka upla nani ra aisi kan. 6Upla nani bal asla taki kan ba, sut lika Pilip dîa aisi kan ba kat aman wali kan, sain aihka nani dauki kan ba sin kaikan. 7Upla ailal pirit tâski bri kan ba rakan kan. Pirit tâski nani ba ai bîla baikra karna wini kira upla nani wina taki kan. Bara wakia lâwan nani bara skahwa nani sin rakan. 8Baha tâka mita baha tawanka ba lilia kan.
9Sakuna baha tawanka ra waitna kum kan nina ba Saiman, bara kaina piua ra witin lika sukia aimaki kan. Sameria uplika nani ra kasak kunin muni kan. Aisi kan witin ba upla tara kum sa. 10Upla sut, tuktan sirpi nani bara almuk nani sin, witin ra aman pali wali kan. Bara witin nani naku aisin ba: “Nahamna baha upla nani aisi ba ‘Gâd karnakira tara ba’.”
11Baku upla nani ba ai bîla wali kata, kan piua wihka wina sukia aimaki upla nani ra kunin muni kan. 12Sakuna Pilip mita Gâd King aimaki ba, Jisas Kraist sturka sin smalkanka wali kasak lukan bara sut tahbi daukan, waitna nani bara mairin nani sin. 13Baha Saimanka sin kasak lukan bara tahbi daukan, bara witin Pilip wal ban tauki kan. Witin tâ iwan pali sin taki kan baha sain nani bara wark aihka nani dauki kan ba dukiara.
14Apastil nani Jerusalem ra banhwi kan ba walan, nahki Sameria uplika nani sin sturi yamni ba brin, bamna bahara Pita bara Jan wal blikan. 15Witin nani wan ba ra, ai pura sunan, Sameria ra lalukra nani ba Spirit Holikira bribia dukiara. 16Kan baha uplika nani ra Spirit Holikira ba kau iwras kan bamna, tahbi baman daukan kan Dawan Jisas nina ra. 17Bamna Pita bara Jan wal mita baha nani purara ai mihta nani kahban, bara Spirit Holikira brin.
18Saiman kaikan apastil nani mita ai mihta nani upla nani ra kahbuya ba ra, Spirit Holikira ba bal iwi kan, bamna witin bui Pita bara Jan wal ra lalah mariki, win:
19—Yang ra sin baha karnika ba aik, bara ani ani uplika purara mihti nani kahbamna kaka, witin sin Spirit Holikira ba bribia.
20Pita bila:
—Man lalahkam ba wal pât kat wama, Gâd mita yabi dukia ba lalah ni atkaia lukisma bamna. 21Yang nani warkki na tilara, man dukiam briaia wiria sin âpu sa, kan man kupiam ba Gâd tani ra kasak apia sma bamna. 22Naha saurka na swi si Dawan ra puram suns, bara ban kra witin baha kupiam ra lukram ba swih tikbia. 23Yang kaikisni man lika kupiam tahplika ni aibanhram pali sa, bara saurka lâka mita priski mai brisa.
24Bara Saiman pana aisin:
—Man nani bui Dawan ra yang dukira puram suns, baha saurka ai wiram ba kumi sin ai takbia apia.
25Apastil nani ba witnis aisin, bara Dawan bîla sin smalkan. Ba wina witin nani Sameria tawanka sirpi nani sut ra sin swaki sakan lâka sturka ba smalkan. Baha ningkara, kli Jerusalem ra tawi wan.
Pilip bara Etiopía wina waitnika ba wal
26Naha ningkara, Dawan insalka kumi Pilip ra win: “Man bus bara waupasa tani ra was, baha yabalka Jerusalem wina Gaza ra iwi auya bâk.” Naha yabalka na lika upla iwras tasbaya ra sa. 27Pilip mahka ridi taki wan. Witin auya kan ba ra, yabal ra Etiopía kuntrika wina waitna kum wal prawan. Witin ba sin yunok kata, Etiopía kwinka Candace suliarka nani wihtka tara kum kan. Witin sin Etiopía kwinka ba lalahka main kakaira kan, bara witin na Jerusalem ra balan Gâd ra ai pura sunaia. 28Naha waitna ai tawanka mata kli ai bîla tawan ba ra, witin ai karka bilara, prapit Aiseya ulban wauhkataya ba aisi kaiki kan.
29Bara Spirit Holikira mita Pilip ra win: “Man baha karka ba lamara was.” 30Pilip plapi lamara wan bara walan, prapit Aiseya wauhkataya wina aisi kaiki kan, bara makabi walan:
—¿Man aisi kaikisma ba tânka brisma ki?
31Waitnika ba bila:
—¿Nahki sip kamna tânka briaia, tânka ai wiaia uplika ba âpu na?
Bamna witin bui Pilip ra makaban, ai waginka ra uli ai lamara iwbia. 32Ulbanka pîs witin aisi kaiki kan ba lika naku kata:
“Witin ba sîp baku ikaia pliska ra brih wan kata;
sîp luhpia bîlas baku ai tâwa âirbra ba mawanra kan,
baku sin witin ai bîla kwâki diara aisaras kan.
33Witin mâyara bawan, sakuna ai lâka ba wapni daukras.
Bamna ai kiamka ba dukiara aisaia upla âpu sa,
ai rayaka ba naha tasba wina sakan sa bamna.”#Ais 53.7-8.
34Bara Etiopía waitna ba mita Pilip ra makabi walan:
—Man pliskam ai wis, ¿naha prapitka na ya dukiara aisisa ki: witin ai dukiara, apia kaka, upla wala dukiara?
35Bara Pilip mita mahka baha Ulbanka pîs aisi kaiki kan ba wina Jisas dukiara aisin. 36Witin nani ban impaki lî bâra kan pliska kum ra balan, bara yunok ba bila:
—Lî nahara sa, ¿bara aitani kabia apia ki tahbi ai daukaia? 37[Pilip bila:
—Man kupiam aiska ni kasak lukisma kaka, man sip sma.
Bara waitnika ba bila:
—Yang kasak lukisni, Jisas Kraist ba Gâd Luhpia sa.]
38Bamna Etiopía waitnika adar yan, kar ba takaskbia, bara wâlsut kar ba wina iwan. Bahara Pilip mita tahbi daukan. 39Witin nani lî wina ulan ba ra, Dawan Spiritka mita Pilip ba brih wan, bara waitnika witin ra kli kaikras kan; sakuna witin ai âuyapah ai yabalka ra impakan. 40Pilip ai dahra walan, witin ba Azoto ra kan. Bamna witin tawan bani ra wapi, sturi yamni ba smalki ban Sesaria kat wan.
Kasalukuyang Napili:
Apastil Nani Sturka 8: MSKTU
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2010 Bible Society in Nicaragua