रोमीकु 15
15
एटाअकु के भलाई कुपे
1आबु के, जे बिसवास रे मजगुताबु, अपन सुख-सुबिधा के नानम कोवान चाही, बकिर कमजोर बिसवासकु आला सासहाव चाही। 2आबु मेसे जामे झन, एटाअकु आला भलाई लःअय आउर हुंकू आला आतमिक बढ़ाअः लःअय, हुंकू के खुस कुपे। 3#सिरिंग 69:9ख्रीस्त होः अपन सुख रेनअः धेयान काय दोहो लअः। जे लकान ची धरम पुथी रे लिखा लअः एदनाआ, “आपे के नि-निन्दाकु आला निन्दा ईङ रे हीःग नेना।” 4धरम पुथी रे जे होः लिखा लअः थिना, होना आबु आला सिकछा लःअय गी लिखा लअः एदनाआ, ची आबु के होना तरअः धीरज तेकर संतवाना भेटाव एकान, आउर नोःआँ लकान आबु अपन आसरा बनाव दोहो सकायाबु। 5आउर धीरज, आउर संतवाना एमोअ वाला परमेसर आपे के नोःआँ बराकाईत एमापे, ची ख्रीस्त ईसु आला सिकछा मोताबिक हुनी-नुई लोः मि-मन ताहिन पे।
6जेकर से आपे मि-मन केते मि-राग रे आबु आली परभु ईसु ख्रीस्त आली आपा परमेसर आला बड़ाई एकायपे।
जामेकु लःअय बेस खभाईर
7हिना लःअय, परमेसर आला महिमा लःअय जे लकान ख्रीस्त आपे के गरहन लेपेआय, हिना लकान आपे होः हुनी-नुई के गरहन कुपे। 8नोःआँ लःअय ईङ कंहड़ीईङ ची, जे वादा पुरखाकु के एम लअः थिना, होना के म-मजगुत लःअय ख्रीस्त, परमेसर आला सचाई रेनअः सबुत एमोअ लःअय खतना उनकु आली सेवक पाड़ी नेनाय। 9#2 समु 22:50; सिरिंग 18:49जेकर से एटाअ जाईतकु होः परमेसर आला दया नाम केते, हुनी आला बड़ाईये कु। जे लकान ची धरम पुथी रे लिखा लअः एदनाआ,
“नोःआँ चलते ईङ एटाअ जाईतकु ताला रे आम आला बड़ाई यींग
आउर आम आला नुमू रअः महिमा रेनअः सिरिंग सिरिंगेईंग।”
10 #
कन 32:43
धरम पुथी नोःआँ होः कंहड़ीयाय,
“ए जाईत-जाईत रिनकु जामे होड़कु, हुनी आलकु होड़ लोः रिझोअ पे।”
11 #
सिरिंग 117:1
आउर फिन
“ए जाईत-जाईत रिनकु जामे होड़कु, परभु आला इसतुती पे,
आउर ए दुनिया रिनकु जामे होड़कु, हुनी आला बड़ाई पे।”
12 #
जसा 11:10
आउर फिन इसायस कंहड़ीयाय,
“यिसै आला बंसवाईर तरअः मियांड होड़ हीःग कोआय,
आउर एटाअ जाईतकु रे रा-राईज लःअय मियांड बिरिःड कोआय,
हुनी रे गैर जाहुदी आसरा दोहो केआकु।”
13हिना लःअय परमेसर जे आसरा एमोई हेके, आपे जामा के बिसवास तरअः पुरा खुसी आउर सानती एमापे। जेकर से पबितर आतमा रेनअः समरथ तरअः आपे आला आसरा बढ़ाव सेन।
साहस ते लि-लिखा रेनअः कारन
14ए बोको बोयहा कु, ईङ खुदे आपे बारे रे पका पड़ीईंग, ची आपे होः खुदे भलाई तरअः पेरेःग तानापे आउर जामा गेयान तरअः भरल-पुराल एदान पेआ, आउर हुनी-नुई के सिखाव दाड़ीआपे। 15सेरे होः ईङ थोड़ेक बात के उ-उईहार ची लःअय आपे के मुरुक डिढ़ केते लिखा लिईङ, नोःआँ होना दया रेनअः चलते लिखा लाईङ, जे परमेसर ईङ के एमा तादिङाय। 16ची ईङ एटाअ जाईतकु लःअय ख्रीस्त ईसु आली सेवक हुयाव केते परमेसर आला बेस खभाईर रेनअः से-सेवाई पुरोहित लकानेईंग, जेकर से एटाअ जाईत, पबितर आतमा तरअः पबितर केते परमेसर लःअय ग-गरहन लकान भेंट पाड़ीयोअ कु। 17हिना लःअय परमेसर लःअय जे ईङ सेवकाई लाईङ, ईङ ख्रीस्त ईसु रे घमांड कराव सकायिंग। 18-19ईङ हिना बात रेनअः भाईर ब-बखान रअः डिढ़ दाड़ी केईंग, ईङ दोवासते ख्रीस्त एटाअ जाईतकु के हुकूम मनाअ वाला बनाव लिकुआय, नोःआँ के ख्रीस्त वचन आउर काम रेनअः दोवारा चिनहा आउर छकरित कामी आउर परमेसर आला आतमा रेनअः सवांग दोवासते कराव लःअय। जेकर से जिरोसलेम तरअः लेई केते चाईरो पखा इल्लुरिकुस पहटा जगुत ख्रीस्त आला बेस खभाईर रेनअः पुरा-पुरा परचार हुयाअः। 20ईङ आला मन रे जामा बेरा नोःआँ ठेकाना ताहिनेना ची ईङ कहियो होनाःड़े बेस खभाईर रअः काईंग परचार लआ, जे एड़े ख्रीस्त आला नुमू सुनाव चुकाव लअः थिना, जेकर से ची ईङ एटाअ होड़ आला ला लअः नेव रे अलुईंग बनाय। 21#जसा 52:15बकिर धरम पुथी रेनअः नोःआँ लिखा लअः पुपुरा नाम किनिङ,
“जेके कहियो हुनी आला बेस खभाईर का सोदोर ताना,
हिंकु नेल केआकु आउर जे काकु आयुम तादा हिंकु समझाव कोआकु।”
रोम सेनोः लःअय पौलुस आला जोजना
22 #
रोमी 1:13
हिना लःअय आपे दुबाःड़े हिजोअ लःअय घड़ी-घड़ी रोकाव लिङाकु। 23नहाअः दो नोःआँ जामा पहटा रे ईङ के बेस खभाईर सुसुनाव लःअय ठाँव ओकाःड़े होः का बंचाव ताना, आउर कयको बरीस तरअः सोंचाव दिंग ची एसपेन सेनोः बेरा आपे दुबाःड़े बोलीङ। 24ईङ के आसरा एदनाआ ची एसपेन सेनिङ हिमीन बेरा हिजोईंग होले आपे लो: भेंटोईंग, आउर आपे लो: थोड़ेक दिन ताहिनोअ रेनअः रिझ तयोम होनाःड़े सेनोः लःअय ईङ के आपे तरअः मदाईत भेटाव कोआ। 25#1 कुरि 16:1–4बकिर नहाअः दो ईङ परमेसर आलकु पबितर होड़कु आला सेवा रे जिरोसलेम तोराईङा। 26एता लःअय ची मकिदुनिया आउर अखाया रअः मंडली रिनकु होड़, जिरोसलेम रिनकु रांगे:ग तेतांग पबितर होड़कु लःअय भागीदारी रअः भेस रे दान जजावार लःअय निरनाय लअकु। 27#1 कुरि 9:11हुंकू के बेस आदा नेना, आउर हुंकू, हुंकू आलकु रिंड़दार होः हेके, जदि एटाअ जाईतकु जाहुदीकु आला आतमिक बात रे भागी नेनाकु दो हुंकू के दरकार एदनाआ ची होड़ो रेनअः घटी कामी रे होः हुंकू के सेवाकु। 28नोःआँ काम के चबा केते, आउर हुंकू के बिहरी लअः के सोंपाव केते आपे लो: भेंट केते एसपेन सेन कुईंग। 29ईङ के बिसवास एदनाआ ची जे बेरा आपे दुबाःड़े हिजोईंग हिमीन रे ख्रीस्त आला पुरा आसीस आगु केते हिजोईंग। 30ए बोकोकु, ईङ ईसु ख्रीस्त आला जे आबु आली परभु हेके आउर पबितर आतमा आला दुलार के उईहार ची केते, आपे तरअः गोहराअ तनिङ, आपे ईङ आला कठिन मेहनाईत रे ईङ लःअय परमेसर तरअः बि-बिनती लःअय गाती उयङपे। 31ची ईङ जाहुदिया रिनकु आबिसवासी कु तरअः बंचाव ताहिनोईंग, आउर ईङ आला होना सेवा जे जिरोसलेम लःअय हेके, पबितर होड़कु गरहानेकु। 32आउर ईङ रिझते आपे दुबाःड़े सोदोर केते परमेसर आला इकछा मोताबिक आपे ताला रे सथाव दाड़ींग। 33सानती रिनी परमेसर आपे लो: ताहिन। आमीन।
Kasalukuyang Napili:
रोमीकु 15: ASR
Haylayt
Kopyahin
Paghambingin
Ibahagi
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023 NLCI CC BY-NC-ND 4.0