Matyu 13
13
Yesus wai pelengon ano ke gute ka lila ser wit londo ke ina yage
(Mak 4.1-9 e Luk 8.4-8)
1Ke oklou tonari Yesus songon ninu are e la ke elim Galili ina dingen batne e iye duru dong ine. 2E osep pula pula time tiduni pulu lelei iye deka iye la dong ke bot gesa e osep tivri ke elim ina dingen batne. 3Deka iye wai pelengon ano pula e parere isak. Iye wai langane. “Gute yage ina la ser wit londo ke ila yage. 4Iye ser londo e londo leklou tiduru timunu ke ekreng e monuk time tingen londo tonari. 5E londo leklou tiduru timunu ke taklak ka isuk boto vala ka napal munu ke opmu tona e suong tinobolbol e erine tipolou kesua taklak isuk boto vala. 6Deka alo ka oklou tito wit erine suong tipolou kakrak kesua gigitno pula kovok. 7E londo leklou tiduru timunu ke omur ka galou marak tidong ine e londo tikaranga tinobolbol kovok kesua galou marak tikading isak. 8E londo leklou tiduru timunu ke taklak ka itau e tinobolbol tipolou itau e erine tiusu pula. Erine leklou tiusu otna iseklu e erine leklou tiusu otna iselme songotno e erine leklou tiusu otna buno kene.” 9Deka Yesus wai blang langane. “Langka umakaranga umoklingen pelengon ane deka umoklingen itau.”
10Mase Yesus ila disaipel time e tipmi iye langane. “Ina lange amwai pelengon ano vala alo ka amwai ke osep?” 11E Yesus koli wai ke isak langane. “Ida Tapolngon songon ngong ma ngapalongo lumu ke pelengon kukwop ka omur heven ina e ngakukwop pelengon tonari ke osep leklou. 12Osep ka tidue wan kene ma tidue wan leklou blang e urok wan pula pula tidong e osep ka aitno lisak mter urok wan kovok wan sasi boto ka tidong ke isak ma Ida Tapolngon pie ke isak. 13E ke batne langane ngawai pelengon ano ke osep. Kesua amtarsak tivati wan e dau tivati itau kovok e talsak tiklingen wan e dau tiklingen itau kovok e isak tikaranga tile ine kovok. 14E pelengon ka gute napaprangan ina Aisaia wai ine polou lokono ke isak. Iye wai langane.
‘Ma umoklingen wan aling aling e dau umeile ine kovok e ma umavati wan aling aling e dau umavati itau kovok. 15Kesua osep aitno lisak tikaranga timter itau kovok e talsak tiklingen isuk boto vala e tikading amtarsak. Lama amtarsak tivati wan e talsak tiklingen wan e aitno lisak timter itau e tiding ke ngong ka Inarak Tapolngon e ngadue isak tidong itau.’”
16“E umakaranga umavati omur e umoklingen wan e ke batne ane aitno lumu dong itau itau. 17E ngawai lokono ke umu langane. Oglou osep napaprangan ina pula e osep pula ka urok mosongon itau e osuk tiwaiki tivati wan ka umavati e tivati kovok. E tiwaiki tiklingen wan ka umoklingen e tiklingen ine kovok.”
Yesus kere pelengon ano ke gute ka lila ser wit londo
(Mak 4.13-20 e Luk 8.11-13)
18“Umoklingen pelengon ano ka gute ka la ser wit londo lana ine. 19Alo ka gute klingen omon ka la ke omur ka Ida Tapolngon plaue e iye ile ine kovok Satan me pi omon ke aitno. Gute ane eriar langka wit londo ka tiduru timunu ke ekreng. 20E wit londo ka tiduru timunu ke taklak ka isuk boto vala ka napal munu ke opmu tona isak eriar langka gute ka klingen Ida Tapolngon ila pelengon e suong due e aitno neser ine. 21E aitno dagar ine langka wan gigitno dagar ke taklak kovok. Aurou. Iye dong isuk boto vala e alo ka agegeng koke elio soulu polou ke iye batne ke Ida Tapolngon ila pelengon deka suong iye songon pelengon tonari. 22E wit londo ka tiduru timunu ke galou marak isak eriar langka gute ka klingen Ida Tapolngon ila pelengon e dau aitno kro ke wan bitna bitna ke mosongon ane e aitno itau ke mani. E elio orwo tonari tikading Ida Tapolngon ila pelengon e pelengon karanga due gute ma iye due elio itau kovok. 23E wit londo ka tiduru timunu ke taklak itau isak eriar langka gute ka klingen Ida Tapolngon ila pelengon e ile ine. E iye langka gute ka usu wan otna e leklou tipolou langka otna buno kene e leklou tipolou langka otna iselme songotno e leklou tipolou langka otna iseklu.”
Yesus wai pelengon ano ke aswei
24E Yesus wai pelengon ano silang langane. “Omur heven ka Ida Tapolngon plaue iye langka gute ka lila ser londo itau ke ila yage. 25E ke epmes kene alo ka iye munu kudung ina oul gesa me ser londo sasi ke yage wit ina blang deka iye la. 26E alo ka wit erine tipolou e isuk boto tiusu deka aswei tipolou blang. 27E gute tonari ila wokboi nating time ke iye e tiwai langane. ‘Ipem puda emser londo itau ke yage i? Ina lange aswei tipolou ke yage blang?’ 28E iye koli wai ke isak langane. ‘Ngau oul gesa due elio ane.’ Deka ila wokboi nating tipmi iye langane. ‘Amwaiki ma imala imepi e imegilgil aswei?’ 29E gute koli wai langane. ‘Aurou. Lama alo ka umepi aswei umepi wit erine blang. 30Itosongon isak orwo tidong la lama alo ka itepi wit ka anino. Alo ari ma ngawai ke osep ka tipi wit langane. “Mgo umodue aswei e umegilgil isak ma mase eiou ngen isak. Deka umodue wit sep ke lou yage ila ngangon ina ninu.”’”
Yesus wai pelengon ano ke akai mastet londo
(Mak 4.30-32 e Luk 13.18-19)
31E Yesus wai pelengon ano silang langane. “Omur ka Ida Tapolngon plaue langka mastet londo ka gute la ser isak ke ila yage. 32Mastet londo daudeng lokono e mole londo silang e dau alo ka tinobolbol tipolou omba e mole wan ka dong ke yage e tipolou langka akai. E monuk time tiuri urok onuk ke mastet tetna.”
Yesus wai pelengon ano ke yis
(Luk 13.20-21)
33E iye wai pelengon ano silang langane. “Omur ka Ida Tapolngon plaue langka yis ka apmang due sep ke dram plaua la lama plaua keniye tonari song polou omba.”
Yesus wai ke pelengon ano vala
(Mak 4.33-34)
34E Yesus wai pelengon tonari ke osep pula pula ke pelengon ano vala. E iye wai ke isak malak kovok. Aurou. Iye wai ke pelengon ano vala. 35Ma pelengon ka gute napaprangan ina kene wai polou lokono. Pelengon tonari langane.
“Ma ngawai pelengon ano ke pelengon ka oglou dong kukwop alo ka Ida Tapolngon tapol wan ka pula keniye e me ke oku ane.”
Yesus kere pelengon ano ke aswei
36Deka iye songon osep pula pula e sep ke ninu e ila disaipel time e tipmi iye langane. “Ampalongo limem ke pelengon ano ke aswei ka dong ke yage lana ine.” 37E iye koli wai langane. “Gute ka la ser londo itau iye Gute Ka Polou Langka Osep. 38Yage iye taklak ka pula keniye e londo itau isak osep ke omur ka Ida Tapolngon plaue e londo sasi isak Satan ila osep. 39E oul ka me ser londo sasi iye Satan e alo ka osep tipi wan iye alo ka taklak yagos. E osep ka tipi wan itau isak Ida Tapolngon ila ensel. 40E langka tidue e tigilgil aswei ma eiou ngen isak wan langane ma polou alo ka taklak yagos. 41Gute Ka Polou Langka Osep ma pagei ila ensel e tipi osep ka tidue osep leklou tidue elio epmes ina e tipi osep ka tidue elio epmes ina ke omur ka iye plaue. 42E tiuri isak ke eiou omba e ma osep tonari tikngis omba e tisak orsak erine pulu kesua tarna lisak doro doro lokono. 43Deka osep ka tidong itau ke Ida Tapolngon bitna ma tibublo langka oklou ke omur ka Pmarak plaue. Langka umakaranga umoklingen pelengon ane deka umoklingen itau.”
Yesus wai pelengon ano bitna bitna
44“Omur ka Ida Tapolngon plaue langka wan itau lokono ka ina klingen ombatno ka osep tikukwope ke yage. E gute silang padoe e kukwope ke omur silang deka aitno neser omba e iye la due burong ke ila wan keniye e kli yage tonari.”
45“E silang omur ka Ida Tapolngon plaue langka gute bu-rong ina ka krim bis itau ka urok klingen omba. 46E iye pado bis itau kene ka ina klingen omba lokono deka iye la due burong ke ila wan keniye e kli bis itau tonari.”
47“E silang omur ka Ida Tapolngon plaue langka omdu lodu ina ka osep tiuri ke misuon e omdu due lodu bitna bitna pula. 48E alo ka omdu bon osep tiririe la ke misuon ina dingen batne. Deka tidong e tidue lodu ka itau tisep ke kerka e titapre lodu ka sasi. 49E elio langane ma polou alo ka wan keniye yagos. Ida Tapolngon ila ensel ma time e tipi osep soulu ma tidong kap osep ka tidong itau ke Ida Tapolngon bitna kovok. 50E tiuri isak ke eiou omba e ke omur tonari osep ma tikngis omba e ma tisak orsak erine pulu kesua tarna lisak doro doro lokono.”
51Deka Yesus pmi isak langane. “Umeile ke wan ka ngawai ine kodong?” E tikoli tiwai langane. “Ee.” 52E Yesus wai ke isak langane. “Deka osep ka tile itau ke Moses ila sogongon e silang blang tile itau ke elio ka Ida Tapolngon plau osep isak langka gute ka dong ke ila ninu. Iye la ke eliang ka ila wan itau lokono dong ine e iye due wan itau ka oku ina e wan itau ka oglou ina.”
Osep Nasaret ina tipul dogur ke Yesus
(Mak 6.1-6 e Luk 4.16-30)
53E alo ka Yesus wai pelengon ano tonari yagos iye songon omur are. 54E iye la polou ke ila armok batne e nogrum parere osep ke osep Yuda ina urok duningen ina ninu. Iye parere isak e osep tidigrik e tiwai langane. “Lange ka gute ane due ilengen itau e due arit ma iye karanga due elio arit ina? 55Gute ane gute kamda otno arang. E tna angaine Maria. E ina saiver angainsak Jems e Josep e Saimon e Judas. 56E sulutno keniye tidong kap ite. Ina lange iye due ilengen e arit tonari?” 57E aitno lisak soulu ke Yesus. Deka Yesus wai ke isak langane. “Osep pula tidue anit ke gute napaprangan ina e dau osep ke ila armok batne e ke ila osua tidue anit ke iye kovok.” 58E Yesus due elio arit ina pula are kovok kesua aitno lisak dagar ke iye kovok.
Seçili Olanlar:
Matyu 13: ANT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
copyright 2003 New Tribes Mission, Sanford, FL 32771