Matyu 14
14
Jon ina metengen
(Mak 6.14-29 e Luk 3.19-20 e Luk 9.7-9)
1Alo ari gute Herot ka plau omur Galili klingen basikngen ke wan ka Yesus due. 2E iye wai ke ila osep bokongon ina langane. “Gute ane iye Jon ka paunim osep e iye poga tito ke ina denga. E ke batne langane iye due arit e karanga due elio arit ina.” 3-4Ke oglou Herot gi ina aiver Filip ila asap Herodias e aling aling Jon wai ke elio ane langane. “Elio ka omdue osuk e itau kovok.” Deka Herot wai ke osep ola ina ma tipou Jon limla e due sep ke kalabus. 5E Herot waiki mter Jon ma iye mete e dau iye due langane kovok kesua iye lim ke osep. Kesua aitno lisak mter langka Jon gute napaprangan ina. 6E alo ka tidue rogo ke oklou ka Herot tna divir iye Herodias otopmang tirie ke osep amtarsak e Herot aitno itau ine. 7E Herot wai promis dagar ma iye kar iye wansua ka iye waiki due. 8Deka Herodias sruk otopmang aitno deka iye wai ke Herot langane. “Ngawaiki suong amkar ngong Jon ka paunim osep otuk ine ke dis.” 9Herot klingen pelengon tonari e aitno soulu ine e dau iye wai ma osep ola ina tidue langane kesua iye wai promis dagar kodong e osep pula pula ka tingen kap iye tiklingen ine. 10Deka iye pagei osep ola ina ke kalabus ma tiblou Jon otuk ine. 11E tipaur Jon otuk ine sep ke dis e kare ke apmang e iye kare ke tna. 12E Jon ila disaipel time tidue pampamu ine e tiyase deka isak kla tipalongo Yesus ila ke wan ka polou.
Yesus kar ngangon ke osep 5,000
(Mak 6.31-44 e Luk 9.10-17 e Jon 6.1-13)
13Alo ka Yesus klingen omon ke Jon ina metengen iye sep ke bot e la ke omur ka dong adai vala ma iye kene vala dong are. E alo ka osep tiklingen ine tisongon armok armok e tilila tididi iye. 14E alo ka Yesus songon bot ke aki ina dingen batne iye vati osep pula pula tidong e aitno kro ke isak e iye due osep ka tipaia tipolou itau blang. 15E alo ka isuk boto epmes polou ila disaipel time e tiwai ke iye langane. “Omur ane omur adai vala e kirui kodong e oku ane ampagei osep kla ma tikaranga tikli inarak ngangon ke armok armok.” 16E Yesus koli wai langane. “Aurou. Ma isak kla kovok. Umakar inarak ngangon ke isak.” 17E tikoli tiwai langane. “Imodue ngangon pula kovok. Bret elme e lodu orwo vala tidong.” 18E Yesus wai langane. “Umapaur bret e lodu me ke ngong.” 19E Yesus wai ke osep pula pula ma tidong ke gras. Deka iye due bret elme e lodu orwo e bitna tito la ke omur heven e iye wai tenkyu ke Ida Tapolngon ine. Deka iye tuktuk isak e kar isak ke ila disaipel e tikar isak ke osep. 20E osep keniye tingen e tigot. E ila disaipel titagom bret e lodu emkil emkil e tidue sep ke kerka songotno orwo ma isak bon. 21E osep arang ka tingen ngangon inarak sasa 5,000 e apmang e agau tidong blang e tidue sasa tonari tito.
Yesus lila ke aki tona
(Mak 6.45-52 e Jon 6.16-21)
22E Yesus wai ke ila disaipel ma tisep ke bot e isak kla mgo ke iye ke aki burla. E iye waiki dong e pagei osep kla ke omur omur. 23Iye pagei osep kla kodong deka iye kene tito ke gigri ma iye wai itau ke Ida Tapolngon. Epmes polou e iye kene vala dong ke gigri. 24E alo are ila disaipel tidong mawa ke aki ina dingen batne ke bot e boitini mluke e engen ipue ma tikaranga kla itau kovok. 25E ke kotkotu lokono Yesus lila ke aki tona e polou ke isak. 26E alo ka ila disaipel tivati iye lila ke aki tona tiulou tarna lisak lokono e ansak nesik e tidaiku langane. “Wan are ano.” 27E suong Yesus wai ke isak langane. “Ngong tona ane. Aitno lumu epen e anmu nesik sakam.” 28Deka Pita koli wai langane. “Ipem Puda langka wom are amwai ke ngong ma ngalila ke wom ke aki tona.” 29E Yesus wai “omo” e Pita songon bot e lila ke aki tona e la ke Yesus. 30E alo ka Pita vati wan ka engen dagar due iye lim ine e iye nogrum duru ke aki. Deka iye daiku ke Yesus langane. “Ngau Puda omlua ngong.” 31E suong Yesus due limla la e kis Pita deka wai langane. “Wom ka aitno lugom ila dagar daudeng ina lange aitno lugom orwo ke ngong?” 32E alo ka tisep ke bot engen yagos. 33E osep ka tidong ke bot tilotuim iye e tiwai langane. “Lokono wom Ida Tapolngon Otno Arang.”
Yesus lua osep pula ka tipaia ke omur Genesaret
(Mak 6.53-56)
34Alo ka tibru aki tipolou ke omur Genesaret. 35E alo ka osep ke omur are tivati e tile Yesus polou tivai omon ke osep ke omur are e tipaur osep ka tipaia ke Yesus. 36E tikel Yesus ma iye songon isak ma limsak karanga kai molo ene vala. E osep ka pula keniye ka tikai iye tipolou itau blang.
Seçili Olanlar:
Matyu 14: ANT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
copyright 2003 New Tribes Mission, Sanford, FL 32771