MATIEE 'BƆGƲ 10
10
Zezwi yɛ -bha ɔ tiatiangwa kugbïa 'sɔ -sa
1Zezwi wɔzɩ-a ɔ 'wʋbhlinɩngwa kugbïa 'sɔ, 'n ɔ jua-a 'gba 'nyɛ wa 'yɛ nɩkpa 'jinylozuzuku -gömö kpëti, wa 'yɛ gwie -gɔpö 'bhuo göpö, 'bhë wa 'yɛ 'yɛ nɩkpa nɩmalɩɛ -gɔpö 'bhuo -sa.
2Ɔ tiatiangwa kugbïa 'sɔ -kpɔɔ nglɩ-ɛ la'a. Taka -lɔɔ nglɩ-ɩ -yɛ-a Simo, 'mɔ wa la 'yɛ-a Piɛlɩ, ɔ -dagu Adle-e, Zebedee 'gwie Zakö -yɛ Za 'sɔ. 3Filipö-ö, Batlemi-e, Toma-a, lepoo mëniköbhanyɔ Matie-e, nɩkpɛ wa la-a Alɩfee 'gu Zakö-ö, Tade. 4Simo -ɔ -wʋ la-a -ma 'bhugwiee ghayɩpangwa gla'a, 'bhë Zwida Isɩkaliɔtɩ -ɔ 'pa-a Zezwi -ma ɔ tʋngwa cɛ'ɛ 'pɛlʋ.
Zezwi yɛ ɔ tiatiangwa kugbïa 'sɔ tia
5Nɩkpa la'a kugbïa 'sɔ, 'mʋa Zezwi tia -bha. Wa -wʋ-a mö-ö ji 'le 'n ɔ jua-a 'dɩ 'mö zʋ. Ɔ nɛ naa: “A -yɛ mö a 'na-a mö nɩkpa -wa 'nɩ-a 'zwiföa glɩnɩɛ 'bhɛyɩ -nɩ. 6A 'na-a pla 'yɛ -ma Samalie dʋdʋ -gömöö -gwlɩ 'mö -nɩ. A mö -ma Izlayɛlɩɛ nɩkpa -wa 'mʋnɔ-a wliaa swɩɛ 'bhɛyɩ. 7A -yɛ mö, a 'nyɛ nɩkpa -Lagɔwɛlɩ, a nʋ: -Lagɔɔ nyininyinipɩ yɛ -kɔnyɩ nyininɩ 'bhë. 8A göpö 'lalʋlɩbhangwa wa 'yɛ 'wlala zʋ, a göpö guzungwa 'bhuo, a gala -gazɩ, a kpëti nɩkpa 'jinylozuzuku -gömö. 'Soko 'wʋ a ghlɩ -bha a 'nyɛ 'soko 'wʋ. 9A -yɛ möö ji-e, a 'na-a -su mëni -yɛ lɔlʋ 'sɔ -ma a wlui 'mö -nɩ. 10A 'na-a -su -kputu -nɩ, a 'na-a -su -banɩ 'sɔ 'sɔ -nɩ. A 'na-a -su 'sikpli -nɩ, a 'na-a -su cɛɛkapeyi -nɩ. -Wʋʋ yɛ-a, libhonʋnyɔ 'nyɛ wa nyɔ -bha 'n ɔ li -bha.
11-Glɔ -mʋɔ 'mö a -yɛ nyini, ɛ ji 'bhuguglɔ glɩnɩ, ɛ ji 'gbë glɩnɩ, a -yɛ -ma nyini-e, a 'jɩbha ngli, nɩkpɛ -ɔ bhɛlɩ-a ɔ 'kaya 'wʋ nglu a 'yɛ -bha ɔ de sɛ glɩ-ɩ, ɔ -yɛ -ma -wʋ-ɔ, ɔ kaya 'wʋ nglu, a -wʋ -bha ɔ 'ligbë'ëë 'nyize gʋ-ʋ 'le a mömöde -yɛ nyini 'bhë a 'yɛ mö. 12'Ligbë -maa 'wʋ a -yɛ pla, a nʋ -bhaa nɩkpaa de: A ghlɩ -gömöwlonɔ. 13'Ligbë la'a 'wʋɔ nɩkpa kaya 'wʋ nglu, wa ji -gömöwlonɔ ghlɩ, mʋa-a nɩya 'wʋ nglu, wa 'na -gömöwlonɔ ghlɩ. 14La a -yɛ nyini, wa nɩya 'wʋ nglu, wa nɩya 'yukwli pönɩ-ɛ, ɛ ji -glɔ glɩnɩ, ɛ ji 'ligbë glɩnɩ, a 'plɩ. A -yɛ möö ji, a gbɔtɔ a kpli yawʋɔ bhuku. -Bhaa do'o, -maa nɩkpa ji sɛ jɩblɩnɩ naa, wa -yɛ -Lagɔ 'sɔɔ nyɩdɩɛ wɛlɩ-a 'mö -bha. 15'Dɩɛ -dɩ n nyɛya-a sa'a naa, -benyido'oo -gwlɩ 'sɔ wa la-a Sodɔmö -yɛ Gomɔlʋ 'sɔɔ nɩkpaa 'jinyloli wa nʋ-a, -Lagɔɔ -zijle 'kadaa zlɩ -yɛ nyini, ɩ 'wlumö ʋ jua-a plʋnʋɔ, -glɔ -mʋ 'nɩya-a 'wʋ ngluo -nɩ-ɛ, -zijlee zlɩ gbʋ -mʋ jua-a ghlɩɛ, mʋ-ʋ ji-a 'mö 'tɛ-ɛɛ, mʋ-ʋ ji-a -gwlɩ la'a 'sɔɔ -lu 'wʋ zie.
Sa Zezwi gba-a zwɩ ɛ ji-a ɔ -lʋa zie gbʋ
16Sa wa'a la'a -ma gbïa 'gbamö wlia kwa, -sɩbha n wʋya-a la'a -ma nɩkpa gla'a tia 'le. Ɩ yɛ a -yɛ mö-ö, sa tɩmɛ ka-a 'nagö, a -ka -sɩbha 'nagö, sa 'gblɩ -ka-a dlɩwɔtɛ, a -wʋ -sɩbha. 17A möna -bha nɩkpaa de 'mö, -wʋʋ yɛ-a, -zijlitungwa wa jiya-a 'ye 'nyɛɛ, wa 'kaya 'yɛ-ɛ -ma -Lagɔbudi'i 'sɛlɩnɩ. 18Sa a glɩnɩ-ɛ na -lʋaa yɛ, -ma -gwlɩnyiningwa 'kadɩ -yɛ dʋdʋnyiningwa 'sɔɔ dlɩ'ɩ wa jiya-a kwa, wa 'kaya -zijli tunʋ. Ɩ -yɛ -sɩbha 'plɩ-ɛ, nɩkpa -wa 'nɩ-a 'zwiföa glɩnɩ, a 'yɛ -bha wa 'ji 'klʋ na gbʋ gbanɩɛ yɛ -bha. 19Wa kaya -ma -zijlitungwa dlɩ'ɩ kwa, wɛlɩ -ɩ a 'yɛ-a gba, sa a 'kɩ 'yɛ-a 'mö gbagbanɩ-ɛ do'o-o, a 'na-a nimï ɩ yɛ dlɩ -nɩ, -wʋʋ yɛ-a, -Lagɔɔ 'bhë jiya -bha -gaganɩlɩ'ɩ 'mɩ wɛlɩ ngli 'pa. 20-Ma ɩ 'mö, a 'bhï 'nɩ-ɛ 'wlumö -dɩɛ ji a 'yɛ gba, a -Tɩbha -Lagɔɔ Zuzu-u jiya-a 'mö gbanɩɛ. 21-Dagu-u ji-a -dagu zʋɔ wa 'kɔ 'lɩbha, -tɩbha 'yɛ-a ɔ 'gu zʋ wa 'kɔ 'lɩbha, 'n gwie 'yɛ-a wa -lowlengwa 'wʋ -sɔnʋ wa 'kʋa-a zʋ wa 'kʋa-a 'lɩbha. 22Na yɛ nɩkpa bhuo-o jiya-a 'jɛbhɛlɩɛ. -Ma ɩ 'mö, -ɔ -yɛ na wɛlɩ -ganɩ, ɔ nɩɩ cɛ 'mö -sa 'lɩlɩlɩ ɔ -yɛ -ma 'wʋbhlonʋbhɛyɩ nyini-e, mɔ-ɔ ji-a 'pʋɔ. 23Wa kaya gbë -mömaa 'mö 'zwɩ zia, a fitonʋ -ma -mömaa 'mö. 'Dɩɛ -dɩ n nyɛya-a naa, a 'na Izlayɛlɩɛ -gwlɩ 'bhuo 'ji bhɩa 'n Nɩkpɛɛ 'Gu 'yɛ-a ji.
24-Ɔ wa -wʋ-a -slʋnʋ 'le 'nɩ -lu -ji ɔ 'yɛ -ɔ -wʋɔ-a -slʋnʋ 'le 'wʋ zi. Nyɩgbajʋlʋ 'nɩ 'yɛ 'nglɩ -ka ɔ 'yɛ ɔ 'bhitɩbha 'wʋ zi. 25Wa bhɛlɩ wa 'yɛ -ɔ wa -wʋ-a -slʋnʋ 'le ɔ 'bhitɩbhaa swɩ köbha, wa bhɛlɩ wa 'yɛ 'yɛ nyɩgbajʋlʋ ɔ 'bhitɩbhaa swɩ köbha. Wa la la'a 'ligbëlowli Bɛlɩzebulɩ-ɛ, e 'kë zi ɔ 'ligbë'ëë nɩkpa, 'mʋa wa 'na-a 'jinylɔnglɩ 'kadɩ 'paa?
A 'na-a -ka nɩkpaa nganɔ -gömö -nɩ
26Ɩ yɛ a 'na-a -ka nɩkpaa nganɔ -gömö -nɩ, -wʋʋ yɛ-a, -ɩ la'a 'bhuo -ɩ 'zuzo-a, 'pɩ ɩ ji-a 'ylɩ -bhlʋ 'wlʋɔ, -ɩ la'a wa nʋnʋ-a 'wi 'mö, -glodu'u ɩ ji-a pönɩɛ. 27-Ɩ la'a n gbanɩ-a a de 'wi 'mö, a -sanɩɩ -glodu'u. -Ɩ la'a n 'ngungwanɩya-a, a -gbla -budie ylɩgömö a 'kɩ 'mö nylanɩ. 28-Wa la'a -wa bhɛlɩ-a wa 'yɛ nɩkpɛ 'lɩbha 'bhë -bha -gömö -wa 'nɩ-a bhɛlɩ wa 'yɛ -lu -mʋmʋ nʋ-ɔ, a 'na-a -guʋa -nɩ. A -gu -ɔ la'a -ɔ bhɛlɩ-a ɔ 'yɛ nɩkpɛ 'lɩbha 'bhë -bha -gömö ɔ 'kɔ -ma -kosu wa la-a zeyɛnɩ 'mö kwa. 29A jɩnɩ -glɩglɩgwie 'wʋ, ɩ'ɩ -lu 'ji -kaa yɛ, ɩ 'sɔ wa pa-a lɛtɛglʋ -bhlʋ 'mö 'pɛlʋ. 'Mɩ -glɩglɩgwie la'a -sɩbha, a -Tɩbha -Lagɔ nɩ -lɛ nglu 'bhë, ɩ gla'aa -bhlʋ 'nɩ bhli dʋdʋkpata'a. 30-Sɩbha a -wʋ 'yɛ-a -nɩ. Sa a 'wliyakanyuko 'bhuo -di-a 'wʋ -Lagɔ -jia. 31Ɩ yɛ a'a nganɩ -nɩ, -bha -Lagɔɔ de a ka dlɩ yɛ a zi -glɩglɩgwiee -zakpa 'kada 'wʋ. 32Ɩ yɛ, -ɔ -yɛ -bha nɩkpaa 'ji 'klʋ nʋ naa na -lɔ ɔ glɩnɩ-a nʋ-ɔ, -bha na -Tɩbha -Lagɔ -ʋ -wʋ-ɔ -ma -Lagɔtapɛ'ɛɛ 'ji 'klʋ sa'a n ji 'yɛ na-a nʋɔ naa na -lɔ -bha nʋ. 33-Bha nɩkpaa 'ji 'klʋ -ɔ -yɛ nʋ ɔ nɩ'ɩ -ji nʋ-ɔ, -bha na -Tɩbha -Lagɔ -ʋ -wʋ-ɔ -ma -Lagɔtapɛ'ɛɛ 'ji 'klʋ, sa'a n ji 'yɛ na-a gbaa naa n 'nɩɔ -ji nʋ.
Zezwie 'nglɩ 'mö nɩkpa ji-a -sɔnʋɔ
34A 'na-a 'pa dlɩ -nɩ naa nɩkpaa -ghöbhanɩ yɛ n ji-e ma'a 'pɩ 'wʋ -nɩ, nɩkpa -sla yɛ n ji -bha. 35-Wʋʋ yɛ-a, nɩkpa -wa glɩnɩ-ɛ na -lʋa, na yɛ wa -yɛ wa -lowlengwa 'sɔ 'yɛ-a -sɔnʋ, nyɩbhɛlʋgu -yɛ ɔ -tɩbha sɔ-ɔ ji-a -sɔnʋɔ, nglugu -yɛ ɔ -da 'sɔ 'yɛ-a -sɔnʋ, 36'guo 'nglɔ -yɛ 'luwlida 'sɔ 'yɛ-a -sɔnʋ. Nɩkpɛɛ jɩɛ -kosu 'jie nɩkpa ji-a ɔ tʋngwa glɩnɩɛ. 37Nɩkpɛ -ɔ -ganɩ'ɩ-a, ɔ -yɛ ɔ -tɩbha -yɛ ɔ -da 'sɔ 'jɩbha na bhla, ɔ -yɛ 'yɛ ɔ nyɩbhɛlʋgu -yɛ ɔ nglugu 'sɔ 'jɩbha na bhla, ɔ nɩ'ɩ 'wʋ -ngwa. 38-Ɔ nɩ ɔjɩɛ 'klʋkʋnʋsu -su ɔ ka'a -ganɩ, ɔ nɩ'ɩ 'wʋ -ngwa. 39-Ɔ -yɛ ɔjɩɛ 'pɩ 'wʋ gwɩ ɔ 'yɛ 'pʋɔ yɛ, cɛ'ɛ ɛ jio-a 'bhö-öö. -Ɔ -yɛ ɔjɩɛ 'pɩ 'ji 'tati na yɛ, mɔ-ɔ jiɛ-a ghlɩɛ.
Zezwi yɛ ɔ tiatiangwaa 'wʋnglugbʋ gba
40Abha na tiatiangwa, nɩkpɛ kaya 'wʋ nglu, -amö ɔ nglu-a 'wʋ. -Ɔ ka'a 'wʋ nglu, na -Tɩbha -Lagɔ -ʋ tia'a-a 'mʋ ɔ nglu 'yɛ-a 'wʋ. 41-Ɔ -yɛ -Lagɔɔ 'mögbanɩnyɔ ɔ -Lagɔwɛlɩɛ gbagba yɛ 'wʋ nglu-o, -ɩ -Lagɔɔ 'mögbanɩnyɔ ji-a ghlɩɛ 'mɩ ɔ ji-a ghlɩɛ. -Ɔ -yɛ -Lagɔɔ dlɩyawʋnanɩlie nʋnʋnyɔ -ɩ ɔ -wʋ-a nʋ 'lee yɛ 'wʋ nglu-o, -ɩ ɔ ghlɩ-a 'mɩ ɔ ji 'yɛ-a -nɩ ghlɩɛ. 42'Dɩɛ -dɩ n nyɛya -bha naa: Na -lʋa gla'aa 'kikeyi -bhlʋɔ 'bhë, sa ɔ glɩnɩ-ɛ na 'wʋbhlinɩnyɔɔ yɛ, nɩkpɛ -kɔɔ 'nyuwɔtʋɔ 'kɔpʋɔ 'bhëë 'fʋ 'nyɛ-ɛ, ɔ 'na -bha -Lagɔɔ de ɩ 'pɛnɔ 'mö bɔ.”
Seçili Olanlar:
MATIEE 'BƆGƲ 10: BNT96
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bete New Testament © Bible Society of Côte d'Ivoire 1996