MATIEE 'BƆGƲ 9
9
Zezwi yɛ 'kplakplanyɔ -bhlʋ göpö
1Zezwi -gbla-a 'gɔlʋ 'mö, ɔ -dɩ-a 'nyi 'mö, 'n ɔ ji-e -ma ɔ 'bhɛyɩ mö. 2Ɔ nyini-e -ma, nɩkpa -su 'kplakplanyɔ -bhlʋ -gbati 'wʋ 'n wa jio-a -la. Zezwi yɩlɩ-a wa -Lagɔɔ dlɩwʋkakʋ-ɔ, ɔ nɛ -bha 'kplakplanyɔ la'aa de: “Na 'gu, sulu dlɩ yɛ -na 'jinylolie gbʋ yɛ bhɩa 'bhë.” 3Zezwi gba-a sa'a, -Lagɔɔ gböö nglipangwa -wʋ la-a -bha, -ma wa dlɩa zɔmö wa nɛ: “Nɩkpɛ -la -Lagɔ ɔ -wʋ-a ngli nyimanɩ 'le.” 4-Ɩ wa -wʋ-a dlɩ 'wʋ 'pa 'le Zezwi jɩblɩnɩɩ-a, ɔ nɛ naa: “'Manɩɛ yɛ a pa-a -sa 'jinylɔswɩ'ɩ dlɩ 'nɩ? 5N 'yɛ 'kplakplanyɔɔ de nʋ naa, -na 'jinylolie gbʋ yɛ bhɩa 'bhë, n 'yɛ 'yɛ ɔ de nʋ naa, -sɔ 'wʋ -n 'yɛ namö nʋ-ɔ, -ɩ la'a 'sɔɔ gla'a -mɩɛ gbagbʋ-ʋ jɔnʋ-a 'wʋ 'nɩ? 6A 'yɛ sɛ jɩblɩnɩ naa Nɩkpɛɛ 'Gu ka 'gba -gömö ɔ 'yɛ ma'a dʋdʋkpata -gömö 'jinylolie gbʋ bhɩaa yɛ-ɛ, 'kplakplanyɔ, -nmö n nyɛ-a 'dɩ, -sɔ 'wʋ 'libhï -na -gbatʋ 'wʋ -n 'yɛ 'ligbë'ë mö.” 7Zezwi gba-a sa'a tɔngʋ, 'kplakplanyɔ la'a -sɔ-a 'wʋ 'n ɔ ji-a 'ligbë'ë mö. 8Nɩkpa -wa su la-a -bha yɩlɩ-a -ɩ la'a, ngli-i mönʋa -bha, 'n wa ji-a -Lagɔɔ 'nglɩ 'ghlimanɩ, sa ʋ 'nyɛ-a 'pɩnɩkpa -saa 'gbaa yɛ.
Zezwi yɛ Matie wɔzɩ ɔ -nyɔɔ 'yɛ 'wʋ -bhlinɩɛ yɛ
9Zezwi 'bhö-ö -bha, ɔ-ɔ 'plɩ 'le 'n ɔ ji-a lepoo mëniköbhanyɔ -bhlʋ yɩlɩ, ɔ nglɩ-ɩ -yɛ-a Matie, ɔ glɩ -ma lepopɛnɩbudu'u, Zezwi yɩlɩɔ-a, ɔ nɛ: “Matie, ji'i 'bɩ.” Ɔ gba-a sa'a ɔ de, Matie -sɔ-a 'wʋ 'n ɔ jio-a 'bɩ mö.
10'N Zezwi ji-e -ma Matiee 'ligbë'ë li kwla'a mö. Ɔ nyini-e ma, 'n lepoo mëniköbhangwa -yɛ 'jinylolie nʋnʋngwa 'sɔ ji-a ji, wa -nyʋa 'sɔ 'yɛ debhlʋ linɩɛ yɛ. 11Wa-a li 'le falizɩɛ yɩlɩɔ-a, wa nɛ -bha Zezwie 'wʋbhlinɩngwaa de naa: “'Manɩɛ yɛ a 'bhitɩbha -yɛ lepoo mëniköbhangwa -yɛ 'jinylolie nʋnʋngwa 'sɔ -wʋ-a debhlʋ linɩ 'le 'nɩ?” 12Zezwi 'nʋɩ-a, 'n ɔ jua-a 'nine 'panɩ. Ɔ nɛ naa: “-Ɔ -ja-a, mɔ-ɔ 'nɩ mö -dɔtʋlʋa 'mö, guzunyɔ mö-a -dɔtʋlʋa 'mö. 13-Ma -Lagɔwɛlɩɛ 'bɔgʋ 'mö, wɛlɩköbhë -Lagɔ gba-a naa:
Nɩmaa bʋbɔnʋbʋbɔnʋɛ -yɛ ngazɩdlɩkakʋ 'sɔɔ gla'a,
ngazɩdlɩkakʋ n 'jɩbha -bha,
a jɩblɩnɩ a zɔmö.
-Wʋʋ yɛ-a, nɩkpa -wa pa-a dlɩ naa -bha -Lagɔɔ 'ji 'klʋ 'mö wa slɛnɩ -bha, wa yɛ n'n-n ji, 'jinylolie nʋngwaa yɛ n ji -bha.”
Zezwi yɛ lɔlɔsʋgbʋ gba
14'Ylɩ -bhlʋ, Za Badizɩɛ 'wʋbhlinɩngwa ghlɩ-ɛ -bha Zezwi 'n wa jio-a ngli 'jɩbha. Wa nɛ naa: “'Manɩɛ yɛ -a -yɛ -nɩ falizɩɛ 'sɔ -wʋ-a lɔlɔ -sʋ 'le 'bhë 'n -na -nɩ 'wʋbhlinɩngwa 'nɩ 'sʋ-a lɔlɔ 'nɩ?” 15Zezwi nɛ -bha wa de naa: “Nɩkpɛ -yɛ 'nglɔ kwa, ɔ 'tʋalɩbhangwa -kɔɔ 'wʋ 'bhli 'le -wʋ-ɔ, nglʋkwanyɔ la'a jua-a -bhla 'gbamö -wʋ wa ji lɔlɔ 'sʋ? 'Bhëbhë, wa 'na lɔlɔ 'sʋ. 'Ylɩ -bhlʋ ji ji la nglʋkwanyɔ 'na 'kʋa-a 'gbamö -wʋ, -bhaa do'o wa ji lɔlɔ 'sʋ.” 16Zezwi nɛ 'yɛ naa: “Wa'a 'kplanɩ -bana -sakasaa -fle 'ji -yʋkʋpɩa -lile. Wa -kaa -bha 'kplanɩ-ɛ, wʋlɔ -bana -sakasa ji-a tenyi, 'n -fle 'yɛ-a 'ghlimanɩ. 17Wa'a palɩ 'yɛ -ma 'kplabhï -sakasɩ 'mö nʋ -lulu, wa -kʋʋ -ma palɩ-ɛ, wʋlɔ 'kplabhï wʋlɔ -bha, 'n nʋ 'suluo-a yɛ 'n 'kplabhï nyimonʋ-a 'ji. Wʋ yɛ wa palɩ-a nʋ -lulu -ma 'kplabhï -lili 'mö 'n ɩ'ɩ nyimɔnʋ-a 'ji.”
Zezwi yɛ -jɛlɩbhanglɔ -bhlʋ göpö, ɔ yɛ 'yɛ 'gu -bhlʋ tlɩ la-a gala
18Zezwi-e -bhla wa de gba 'le 'n 'zwiföaa 'kadɔ -bhlʋ ji-a ji, ɔ 'pa-a -bha ɔ dlɩ'ɩ -kokomunigbö glu ɔ nɛ naa: “Nyininyɔ, -sɩka'a -sɩka'a na 'gu tlɩ -bha, n -bhiamö yawʋ ji -n 'kɔ cɛ -gömö zʋ, ɔ 'yɛ galɔ.” 19Zezwi -yɛ ɔ 'wʋbhlinɩngwa 'sɔ -sɔ-a 'wʋ, 'n wa -yɛ nɩkpɛ la'a 'sɔ ji-a mö.
20Wa-a mö 'le, 'nglɔ -bhlʋ -ɔ -jɛ -sa la-a 'ylʋbö kugbïa 'sɔ 'mö ghlanɩ-ɛ -ma Zezwi nimï, 'n ɔ ji-a ɔ -banaa kle cɛ zʋ. 21-Wʋʋ yɛ ɔ zʋa-a cɛ, ɔ nɛ -ma ɔ dlɩ zɔmö naa: “N -yɛ ɔ -banaa 'fʋ cɛ zʋ n ji 'pʋ.” 22Zezwi 'bhɩlɔ-a 'mö ɔ yɩlɩɔ-a, ɔ nɛ -bha ɔ de naa: “Na 'gu, sulu dlɩ yɛ, -na -Lagɔɔ dlɩwʋkakʋ -kamö pua 'bhë.” -Bha -gaganɩlɩ'ɩ 'n nglɔ la'a ji-a 'pʋ.
23Zezwi nyini-e -ma 'zwiföaa 'kadɔ la'aa 'ligbë'ë, ɔ yɩlɩ-a 'lʋgbʋdongwa -wa -wʋ-a bhlɩ 'le -yɛ -wa su-o -bha 'sɔ-ɔ, ɔ nɛ: 24“A 'pa ajɩ nimï, 'gu 'nɩ-ɛ tlɩ, ngɔmö 'le ɔ -wʋ -bha.” Ɔ gba-a -sɩbha, 'n wa jio-a gla palɩ. 25Nɩkpa 'bhuo -sɔnʋ-a 'ji 'bhë, -buduköbhë -aa 'mö 'guo -gazɛ pö la-a, Zezwi pla-a -ma, 'n ɔ ji-a ɔ kɔtɩkpa sɛ köbha, 'n 'gu ji-a 'wʋ -sɔ. 26'N ɩ 'dɩ ji-e -maa -gwlɩ 'bhuoo yawʋ 'ji bhɩa.
Zezwi yɛ 'lɔkpɔlɔkpɔngwa 'sɔ göpö
27Zezwi 'bhö-ö -bha, ɔ-ɔ mö 'le 'n 'lɔkpɔlɔkpɔngwa 'sɔ jio-a 'bɩ bhlinɩ. Wa -wʋɔ 'mö nylanɩ 'le wa nɛ: “Davidɩɛ 'Gu, yɩlɩ -aa ngazɩklʋ.” 28'Lɔkpɔlɔkpɔngwa la'a 'sɔ -ganɩ Zezwi, 'n ɔ ji-e -ma 'ligbë'ë nyini. Wa nyini-e -bha ɔ yawʋ 'n ɔ jua-a ngli 'jɩbha naa: “A kɩ dlɩ 'wʋ naa n bhɛlɩ n 'kaya göpö 'nɩ-ɩ?” Wa nɛ: “Nyininyɔ, -a kɩ dlɩ 'wʋ.” 29'N Zezwi ji-a wa 'jie cɛ zʋ. Ɔ nɛ: “Sa a dlɩwʋkakʋ -wʋ-a, ɩ 'wlenɩ -sɩbha a de 'wʋ.” 30Ɔ gba-a sa'a tɔngʋ, 'n wa 'jie ji-a 'kaluo. 'N ɔ jua 'mö-a 'yukwlie 'tɩtlɩ naa: “-Bɛ 'na-a jɩblɩnɩ -ɩ plɩ-ɛ la'aa sɛ 'lɩlɩlɩ -nɩ.” 31Ɔ gba-a sa'a 'bhë, wa 'wlʋ-a 'pɩ tɔngʋ ɔ 'nglɩ wa bia-a -ma -gwlɩ yawʋ yɛ.
Zezwi yɛ 'jinylozuzukoo -gömökanyɔ glɩnɩ-a bhobho göpö
32Zezwi -yɛ ɔ 'wʋbhlinɩngwa 'sɔ 'yɛ möö mö, 'n wa jio-a 'jinylozuzukuo -gömökanyɔ -ɔ glɩnɩ-a bhobho -la. 33Zezwi kpëtio-a 'ma 'jinylozuzuko -gömö, 'n nɩkpɛ la'a ji-a gbʋ -dɩ, -wa bhuo-o su la-a -bha ngli-i mönʋa -bha. Wa nɛ: “-A -yɛ la 'wlʋ ma'a Izlayɛlɩɛ dʋdʋ -gömö, -aa -lɛ -bhla -ɩ la'a yɩlɩ.” 34Falizɩɛ -nɩ wa nɛ: “'Jinylozuzukuo 'bhitɩbha zʋɔ-a ɔ 'gba -gömö, wʋ yɛ ɔ kpëti-a nɩkpa 'jinylozuzuku -gömö.”
Sa nɩkpa -bhï-a Zezwi ngazɩ'ɩ
35-Ma 'bhugugwlɩ -yɛ 'kwlagwlɩ 'bhuo 'sɔɔ -gömö -ma Zezwi 'plɩnɩ-a 'n ɔ panɩ-ɛ -maa -Lagɔbudi'i -Lagɔwɛlɩ ngli, 'tɩtɩɛ -tɩtɩ -ɩ gba-a -Lagɔɔ nyininyinipɩɛ gbʋ 'n ɔ biɩ -bha. 'N ɔ göpö-a guzungwa -yɛ nɩmalɩkangwa 'bhuo 'sɔ. 36Zezwi yɩlɩ-a nɩkpa -wa ji-e -bha ɔ yawʋ, wa 'bɩmö ngazɩ 'lɩbhɔ-a tenyi. -Wʋʋ yɛ-a, yʋlɔ wa yʋlɔ la -bha 'n 'kwa jua 'yɛ-a yawʋ tlɩnɩ, -n -kʋa yɩlɩ wa -bhlee wlia -mɩ 'nɩ ngokʋnyɔ -ka mɩ. 37Ɩ yɛ 'n Zezwi ji-a ɔ 'wʋbhlinɩngwa 'dɩ 'nyɛ, ɔ nɛ: “'Sɩkalagblɛɛ 'kadɛ -bha 'n ɛ ji-a zalɩ, 'bhë ɛ 'wʋɔ libhonʋngwa 'nɩ -zu. 38Ɩ yɛ a 'pa 'lagblɛlowli -bɛlɩ, ɔ 'yɛ -ma ɔ 'lagblɛ'ɛ libhonʋngwa -mʋmʋa kwa.”
Seçili Olanlar:
MATIEE 'BƆGƲ 9: BNT96
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bete New Testament © Bible Society of Côte d'Ivoire 1996