MALƖKÖÖ 'BƆGƲ 13
13
Zezwi yɛ -Lagɔbudu 'kadʋɔ sɛyɩlagbʋ gba
1Zezwi -yɛ ɔ 'wʋbhlinɩngwa 'sɔ 'wlʋ-ɔ -ma -Lagɔbudu 'kadʋ 'mö-ö, wa gla'aa nɩkpɛ -bhlʋ nɛ -bha ɔ de naa: “-Abhitɩbha, yɩlɩ -lɛ -budi -la -yɛ ɩ 'sɩbhanɩtɩkpa 'sɔ, 'jinanɔɔ -mʋ-ɔ 'mö-ö -sa 'nɩ?” 2Zezwi nɛ naa: “-Budi 'kadɩ -n jɩnɩ-ɛ -la 'wʋ-ɔ, wla wa ji-a ɩ 'bhuo, ɩ tɩkpeyie 'bhë 'na glu tʋ-ʋ.”
3Wa 'bhö-ö -bha, 'n Zezwi -yɛ ɔ 'wʋbhlinɩngwa gla'aa nɩkpa -mʋna 'sɔ ji-e -ma olivieswie -gɔgɔgbʋ 'klʋ mö. Piɛlɩ-ɛ, Za-a, Zakö-ö, Adle-e, mʋa-a -sɩbha. Wa glɩ-ɛ -ma -gɔgɔgbʋ la'a 'klʋ yɛ, -Lagɔbudu 'kadʋ wa gö-a 'ji. Yawʋdolɩ'ɩ, 'n wa ji-a Zezwi ngli 'jɩbha, naa: 4“-Abhitɩbha, -ɩɩ gbʋ -n gba-a -la, -zlɩmɩ ɩ ji-a 'wʋ 'wlenɩɛ 'nɩ? Ɩ -yɛ 'wʋ 'wlenɩɛ ji sa -a jiɩ-a 'mö jɩblɩjɩblɩnɩɛ 'nɩ?”
5Zezwi nɛ -bha wa de naa: “A möna 'mö, nɩkpa jiya-a yʋlʋ nʋ. 6-Wʋʋ yɛ-a, nɩkpaa -bɛ ji-a jie, wa 'yɛ-a na 'nglɩ -su, wa 'yɛ-a nʋ naa, Puanyɔ -ɔ -Lagɔ -sa-a -bha 'mɔ wa glɩnɩ-a nʋ. 'N wa 'yɛ-a nɩkpaa -bɛ yʋlʋ nʋ. 7-Bhaa do'o, a -yɛ tʋɩ -ɩ wa -wʋ-a gwɩ 'le -yɛ -ɩ ji-a 'gwɩɔ 'sɔɔ wɛlɩ 'nʋ-ɔ, dlɩ 'na-a wlɔnʋya 'mö -nɩ. -Wʋʋ yɛ-a, 'mɩ -ɩ la'a mɩ-ɩ ji-a -lɛ 'yu -gaa tɛnyɩ 'bhë, ɛ 'na -bha -gaganɩlɩ'ɩ 'pɩɛ sɛyɩlade glɩnɩ. 8Nɩkpa tʋ wa ji-a gwɩɛ, dʋdʋ -mʋmʋɔ -gömöö nɩkpa -yɛ -mʋmʋɔ -gömöö nɩkpa 'sɔ 'yɛ-a 'ji gëgënɩ, wa 'yɛ-a tʋ gwɩ. -Ma dʋdʋɩɛ -bɛ -gömö dʋdʋkpata ji-e -ma tɛlɩɛ, -ma dʋdʋɩ -mɩmɩɛ -gömö ngɔmʋ 'yɛ-a -ma ji. 'Mɩ -ɩ la'a 'bhuo, yʋlɔyʋlʋ 'kadʋ -ʋ ji-a jie ʋ tɛnɩde -bhla.
Zezwi yɛ -Lagɔgwiee 'zwɩziagbʋ gba
9Abha na -lʋa, a pö ajɩ 'wʋ a 'yɛ -bha glɩ. -Wʋʋ yɛ-a, -zijlitungwa wa jiya-a 'ye 'nyɛɛ, wa 'kaya-a -ma -Lagɔbudi'i kwa wa 'kaya-a 'sɛlɩ. Sa a glɩnɩ-ɛ na -lʋaa yɛ, -ma -gwlɩnyiningwa -yɛ dʋdʋnyiningwa 'kadɩ 'sɔ dlɩ'ɩ wa jiya-a 'nɩgbanɩɛ, wa 'kaya-a -zijli tunʋ. 'Mɩ -ɩ la'a sa'a 'bhuo kaya ghlɩ 'le -wʋ-ɔ, -bha a ji-a -Lagɔwɛlɩ gbanɩɛ. 10-Ma -gwlɩ 'bhuo -gömö, wa 'na -ma -Lagɔɔ 'tɩtɩɛ -tɩtɩ bia 'bhë, 'n 'pɩ 'yɛ-a 'lili'i sɛ yɩla. 11Wa kaya -ma -zijlitungwa dlɩ'ɩ kwa, wɛlɩ a 'yɛ-a gba, a 'na-a nimï ɩ yɛ dlɩ -nɩ, wɛlɩ -ɩ -Lagɔ jiya-a -bha -gaganɩlɩ'ɩ ngli 'paa a gbɩ. -Wʋʋ yɛ-a, a 'bhï abha 'nɩ-ɛ gbaa ji, Zuzu Wlawla-a jiya-a 'mö gbanɩɛ. 12-Bhaa do'o, -dagwie ji-a wajɩɛ -dagwie -ma nɩkpa cɛ'ɛ 'pɛlʋ 'paa, wa 'kʋa 'lɩbha wa 'yɛ tlɩ. -Sɩbha -lowlengwa -mʋmʋa ji-a wajɩɛ gwie -wa glɩnɩ-ɛ na -lʋa 'pɛlʋ 'paa. Gwie -mʋmʋa 'yɛ 'yɛ-a wajɩɛ -lowlengwa 'mö 'bhɩlɔnʋ, wa 'kʋa-a wa 'nglɩ 'mö 'lɩbha, wa 'yɛ-a tlɩ. 13Na yɛ nɩkpa 'bhuo jiya-a 'jɛbhɛlɩɛ. 'Bhë -ma yʋlɔyʋlʋɛ la'a 'mö, -ɔ -yɛ -ma dlɩ nyʋnanɩ, 'pɩɛ 'bhlonʋde -yɛ nyini, mɔ-ɔ ji-a 'pʋɔ.
Zezwi yɛ yʋlɔyʋlʋɛ -ɛ ji-a jiee gbʋ gba
14-Ɔ wa la-a zagblɩkanyɔ, -ɔ nyimanɩ-a -li 'bhuo 'ji, la ɔ 'na la-a glɩ, a -yɛ -bha ɔ glɩglɩlɩ yɩlɩ-ɛ, zɔmö ɩ ka -bha, wʋ yɛ -ɔ -kɩɩ zɛlɩ 'le -wʋ ɔ möna-a 'mö ɔ 'kɩ 'mö 'nʋ. -Bhaa do'o, -wa -yɛ -ma Zwidee -gwlɩ -gömö -wʋ, wa fito wa 'yɛ -ma -gɔgɔgbɩ 'klʋ -gunʋ. 15-Ɔ -yɛ -bha ɔ 'ligbë'ë glɩ -bha -yɛ nyini, ɔ 'na-a pla -ma ɔ -budu'u, ɔ 'na-a 'libhï ɔ -li 'wʋ -nɩ, ɔ fito 'gamö. 16-Ɔ -yɛ 'yɛ -ma ɔ 'lagblɛ'ɛ -wʋ -bha -yɛ nyini, ɔ 'na-a mö -ma glɔ'ɔ ɔ lokwi 'wʋ -libhï kwla'a -nɩ, ɔ fito 'gamö. 17-Bhaa zlɩa la'a 'mö, nɩkplagangwlɩ -yɛ 'gwiee cɛɛkangwlɩ 'sɔɔ gbʋ ngazɩ'ɩ ʋ ji-a -bhïë tenyi. 18A 'pa -Lagɔ -bɛlɩ 'mɩ -ɩ la'a ji-e wotlokojido'o jinɩ. 19-Wʋʋ yɛ-a, -bhaa zlɩa la'aa 'mö, zwɩ 'kadɛ -ɛ ji-a nɩkpa zie 'na 'wʋpalɩleyi -ka. -Lagɔ -yɛ la 'pɩ sɛ -la -sɩbhaa 'zwɩ 'nɩ-ɛ -bhla nɩkpa zi. 'Mɛ zwɩ la'a -yɛ 'plɩ-ɛ, ɛ 'wlʋnʋleyi 'na ji. 20Nyininyɔ -Lagɔ 'nɩ-ɛ 'jɩbha nɩkpa 'bhuo 'yɛ sɛ yɩlaa yɛ ʋ ji-a 'mɩ 'zwɩzizlɩa la'a 'wʋ -sanɩɛ. Nɩkpa ʋ -sa-a -bhaa yɛ ʋ jiɩ-e -sɩbha 'wʋ -sanɩɛ. 'N ɛ nɩ la -sɩbha glɩnɩ-ɛ, nɩkpa 'bhuo sɛ wa 'jɩla yɩla. 21-Bhaa do'o, nɩkpɛ -yɛ nʋ naa, Puanyɔ -ɔ -Lagɔ -sa-a -bha mɔ-ɔ la'a, -mʋmɔ -yɛ 'yɛ nʋ naa, mɔ-ɔ -wʋ-ɔ -ma nʋ-ɔ, a 'na-a lɩ 'dɩ -nɩ. 22-Wʋʋ yɛ-a, nɩkpaa -bɛ ji-a jie, wa 'yɛ-a nʋ naa, Puanyɔ -ɔ -Lagɔ -sa-a -bha 'mɔ wa glɩnɩ-a nʋ, -mɩlado'o -Lagɔ 'nʋa-a -bha -sa. -Mʋmʋa 'yɛ-a nʋ naa -Lagɔɔ 'mögbanɩngwa wa glɩnɩ -bha nʋ, -mɩlado'o -Lagɔ 'nʋa-a tia. Bhatɩɛ -bɛ wa ji-a nɛ nʋɔ, 'n wa 'yɛ-a nɩkpaa -bɛ dlʋa. -Lie -bɛ wa ji-a 'mö jɩlaa wa 'yɛ -Lagɔɔ -lʋaa 'bhï dlʋaa yɛ. 23Ɩ yɛ a pö ajɩ 'wʋ a 'yɛ -bha glɩ, n kaya 'dɩ -sanɩ 'gamö 'bhë.
Zezwi yɛ ɔ nimïjigbʋ gba
24-Ma ɩ 'mö, 'mɩ 'zwɩziylɩ-a la'a ɩ -yɛ 'plɩ 'bhë, 'ylʋzalʋ ji-a 'ji julumanɩɛ, 'cʋ 'na-a 'mö lɩ 'sɔ. 25-Zɛlɩ 'yɛ-ɛ -ma ghayɩ 'bhö-ö ɩ 'yɛ-a bhli. 'N -ma -Lagɔtapɛ'ɛɛ 'mötɛnɩli 'bhuo 'yɛ-a 'mö gbʋgbɔ. 26-Mɩ la'a 'bhuo -yɛ 'plɩ 'bhë-ë, -Lagɔtapɛ ji-a ngo walɩɛ, -bha Nɩkpɛɛ 'Gu ji-e -ma ghayɩ 'bhönɩɛ, ɔ -su ɔ 'mötɛnɔ 'kadʋ -yɛ ɔ 'ghlinɔ 'kadʋ 'sɔ, nɩkpa 'bhuo 'kɔ-a yɩlɩ. 27Ɔ -yɛ ji-e, -Lagɔzuzuku ɔ ji-a dʋdʋkpataa këti 'bhuoo -gömö tia, ɩ 'yɛ ɔ -lʋa 'bhuo 'wlu 'titanɩ.
Zezwi yɛ figösuo 'ji palɩ
28-Ɩ la'a figösuo wɛlɩ slʋnʋya-a, a 'nʋɩ 'jinanɩswɩ'ɩ 'mö. Su la'a -yɛ tɔpɔ 'le -wʋ-ɔ, a -ji sɛ naa gude -wʋ-a nyini 'le. 29-Sɩbha na wɛlɩ -wʋ-a 'gamö. A -yɛ 'mɩ -li la'a 'bhuoo 'wʋwlenɩde yɩlɩ 'le -wʋ-ɔ, a jɩblɩnɩ sɛ naa, Nɩkpɛɛ 'Guo jijide -wʋ-a nyini 'le. 30'Dɩɛ -dɩ n nyɛya-a naa, -zɩnɩ'ɩɛ nɩkpa -wa -bhlɩ-ɛ la'a, wa 'bhuo 'na tlɩ, 'n wa nɩ -lɛ -ɩ la'a 'bhuo yɩlɩ 'bhë. 31-Lagɔtapɛ -yɛ dʋdʋkpata 'sɔ sɛ ɩ ji-a yɩla, na nglie wɛlɩ 'na sɛ yɩla 'lɩlɩlɩ.
32Zlɩɛ -mɛɛ 'mö ɩ ji jinɩɛ, -bɛ 'nɩɛ -ji, -Lagɔzuzukuo 'bhï 'nɩɛ -ji, -Lagɔɔ 'Guo 'bhë 'nɩɛ -ji. Na -Tɩbha -Lagɔ -bhlʋ tɩ-ɩ -jie -bha. 33Ɩ yɛ a 'na-a ngɔmö -nɩ, a pö ajɩ 'wʋ. -Wʋʋ yɛ-a, la -bha ji nyininɩɛ a'a -bha -ji. 34Sa nɩkpɛ -yɛ la'a lowlu'u möö ji, 'n ɔ tɩ-a ɔ nyɩgbajʋlʋɩ ɔ 'ligbë yawʋ, 'n ɔ dlinʋa-a -bhlʋ -bhlʋ libho cɛ, 'n ɔ zʋ-a 'ligbëë ngokʋnyɔ 'dɩ 'mö naa, ɔ pö ɔjɩ 'wʋ ɔ 'yɛ 'jinanɩswɩ'ɩ 'ligbë ngo -kʋ-ɔ, 35a pö -sɩbha ajɩ 'wʋ a 'yɛ -bha glɩ. -Wʋʋ yɛ-a, la 'ligbëlowli ji nimï jinɩɛ a'a -bha -ji. -Dudoo oo, dʋdʋnyɩdɩ oo, -kɔkɔbhɛlɩɛ gbʋnʋde oo, zlɩgö oo, a'a -sɩbha -ji. 36Ɔ -yɛ 'möbhulolɩ'ɩ ji ɔ jiya-a ngɔmöngɔmölɩ'ɩ ghlɩ. 37'Dɩ n wʋya-a la'a 'mö zʋ 'le, nɩkpa 'bhuoo -li -bha. A pö ajɩ 'wʋ a 'yɛ -bha glɩ.”
Seçili Olanlar:
MALƖKÖÖ 'BƆGƲ 13: BNT96
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bete New Testament © Bible Society of Côte d'Ivoire 1996