MALƖKÖÖ 'BƆGƲ 14
14
'Zwiföa yɛ Zezwie 'dɩ zʋ
1'Zwiföaa pɩpɩ -ɛɛ 'bhlibhlido'o wa dlɩ bhlinɩ-ɛ -ma Ezipötɩɛ gïyikwlaa 'möwlʋde, 'n -Lagɔ ji-a wa 'wʋkpɩanɩgwie -gömö 'plɩnɩ, 'n wa ji-a yawʋ bhɩa-a, -ɛɛ 'bhlibhlido'o wa li-a 'fʋlo -ʋ 'nɩ-a 'pluplungakpɩ 'mö -ka-a, ɛ 'ylɩ 'sɔ tʋ-ʋ -bha, -Lagɔbʋbɔngwaa 'bhitɩbhangwa -yɛ -Lagɔɔ gböö nglipangwa 'sɔ, sa wa 'yɛ-a 'mö zʋzʋnʋ wa 'yɛ Zezwi 'wi 'mö köbha, wa 'kɔ 'lɩbha, 'n wa ji-e -sɩbha 'nama. 2Wa nɛ naa: “-A -kɔɔ köbhaa ji-e, ɛ 'na-a glɩnɩ 'pɩpɩ -nyɩdɩ -nɩ, nɩkpa -bebe -kɩɩ yɩlɩ wa -jiya-a jɔ 'wʋ -sanɩ.”
'Nglɔ -bhlʋ yɛ Zezwi palɩfɛ 'wliyawʋ palɩ
3-Bhaa do'o, Zezwi-e -ma Betanie 'gbë 'mö, nɩkpɛ wa la-a Simo, -ɔ 'lalʋ 'lɩbha la-aa 'ligbë'ë, ɔ-ɔ li 'le, 'n 'nglɔ -bhlʋ jio-o -ma ghlɩ. Palɩfɛ -ɛɛ pɛlʋ-ʋ 'tɛ-a tenyi, -ɛ pa-a nglɛɛ nglɛ, wa la-a nadɩ, nglɔ la'a -su ɛ 'kpla. Ɔ nyini-e -bha Zezwi yawʋ ɔ -dɩ-a kpla la'a 'pë ngo'o, 'n ɔ jio-a palɩfɛ 'wliyawʋ sulu. 4'Nglɔ nʋ-ɔ -sɩbha, -wa -wʋ la-a -bha, 'kalɛ ɩ palɩ-a wa gla'aa -mʋmʋa 'mlɩ, wa nɛ: “Palɩfɛ -ɛɛ pɛlʋ-ʋ 'tɛ-ɛ -sa, 'manɩɛ yɛ ɔ 'kɛ-ɛ -sa 'ji nyimanɩ 'nɩ? 5Wa bhɛlɩ wa 'kɛ la 'ylʋba -bhlʋɔ swɩɛ 'pɛnɩmëni 'mö 'pɛlʋ 'pa, wa 'yɛ 'mɛ mëni 'pʋangwa 'nyɛ.” 'N wa ji-a nglɔ la'a yʋlʋ yawʋ 'panɩ. 6Zezwi nɛ naa: “'Manɩɛ yɛ a -wʋɔ bhe yʋlʋa 'le 'nɩ? A -sɔɔ cɛ yawʋ, -lie -li ɔ nʋ'ʋ-a 'ji. 7-Mʋa -yɛ-a 'pʋangwa-a, wa wʋya gla'a 'kɔmʋʋ, la a -yɛ 'jɩbhanɩ a jua -bha -lie -li 'ji nʋnʋ. -Amöö -nɩ-ɛ, n 'na 'kaya na-a gla'a -wʋ 'kɔmʋʋ. 8N -yɛ tlɩ sa wa ji-e na -gazɛ palɩfɛ 'paa, 'bhë wa 'kɛ zʋ 'mɩ ɔ nʋ-ɔ -la. -Ɩ ɔ bhɛlɩ la-a -nɩ-ɛ, 'mɩ ɔ nʋ-ɔ -la. 9'Dɩɛ -dɩ n nyɛya-a naa, de 'bhuo ma wa ji-a na 'tɩtɩɛ -tɩtɩ biaa mö-ö, -lie -li nglɔ la'a nʋ-ɔ la'a, wa dlɩ-ɩ ji-a ɔ de bhlinɩɛ wa 'yɛ ɩ 'dɩ -sa.”
Zwida 'jɩbha ɔ 'yɛ Zezwi -ma ɔ tʋngwa cɛ'ɛ 'pɛlʋ 'pa
10-Mɩ la'a 'plɩ-a 'bhë, Zwida Isɩkaliɔtɩ, -ɔ glɩnɩ la-a Zezwie 'wʋbhlinɩngwa kugbïa 'sɔɔ gla'aa -bhlʋ, ɔ -sɔ-a 'wʋ 'n ɔ ji-e -ma -Lagɔbʋbɔngwaa 'bhitɩbhangwa ghlɩ ɔ 'kʋa Zezwi cɛ'ɛ 'pɛlʋ 'paa yɛ. 11Wa 'bhuo 'mʋna-a 'lɩbhʋa -bha. Wa nɛ ɔ -kɩɩ nʋ, mëni wa jio-a 'nyɛɛ. Tɛnɩ-a 'mö -bha, sa ɔ 'yɛ-a 'mö zʋzʋnʋ ɔ 'kʋa Zezwi cɛ'ɛ 'pɛlʋ 'pa, 'mɩ ɔ 'nama-a 'mö -bha.
Zezwie 'wʋbhlinɩngwa yɛ gïyikwlaa 'möwlʋpɩpɩɛ -li göganɩ
12Pɩpɩ -ɛɛ 'bhlibhlido'o wa li-a 'fʋlo -ʋ 'nɩ-a 'pluplungakpɩ 'mö -ka, -ɛɛ taka zlɩ 'mö wa lɩbha-a 'bhlangɔgbɔtɩ 'n wa linɩ-a debhlʋ, -ɛ wa la-a gïyikwlaa 'möwlʋpɩpɩ ɛ de nyini-a, 'n Zezwie 'wʋbhlinɩngwa jio-a ngli 'jɩbha naa: “Nyininyɔ, la -n 'jɩbha-a -a 'yɛ gïyikwlaa 'möwlʋpɩpɩɛ lili pinɩɛ mö 'nɩ?” 13'N ɔ ji-a wa gla'aa nɩkpa 'sɔ tia, ɔ nɛ -bha wa de naa: “A mö -ma Zelwizalɛmö. A -yɛ 'gbë 'mö pla tɔngʋ, nɩkpɛ -bhlʋ -su 'nyulaki 'n a -nyɔɔ 'yɛ-a gbënɩ. A 'namɔ 'bɩ, 'ligbë -aa 'wʋ ɔ ji-a pla, a plaa -bha. 14A gba sa'a -bha 'ligbëlowlie de naa: -Abhitɩbha nɛ -buduköbhë -aa 'mö ɔ -yɛ ɔ 'wʋbhlinɩngwa 'sɔ ji-a gïyikwlaa 'möwlʋpɩpɩ 'bhlinɩɛ wa 'yɛ debhlʋ linɩ la a -wʋ-a 'nɩ? 15A -yɛ -sɩbha gba-a, -ma ɔ -buduo ghayɩ, ɔ jiya -buduköbhë 'kada -bhlʋ de -slʋnʋ, -ma a 'mö 'göganɩɔ 'jinanɩswɩ'ɩ. A -yɛ 'pɩpɩɛ lili pi, -ma a jiɩ-a sɛ zʋɔ.” 16Wa mö-a, saa 'bhë Zezwi gbɩ la-a 'tɩ -sɩbha wa ghlɩɩ -bha. 'N wa ji-a gïyikwlaa 'möwlʋpɩpɩɛ lili pi.
Zezwi -yɛ ɔ 'wʋbhlinɩngwa 'sɔ yɛ gïyikwlaa 'möwlʋpɩpɩɛ lili li
17-Dudo'o nyini-a, 'n Zezwi -yɛ ɔ 'wʋbhlinɩngwa kugbïa 'sɔ -kpɔ 'sɔ ji-a debhlʋ linɩɛ mö. 18Wa-a li 'le, Zezwi nɛ naa: “'Dɩɛ -dɩ n nyɛya-a sa'a naa, a gla'aa nɩkpɛ -bhlʋ n -nyɔɔ -wʋ-ɔ la'a debhlʋ linɩ 'le mɔ-ɔ ji'i-e -ma na tʋngwa cɛ'ɛ 'pɛlʋ 'paa.” 19Ɔ gba-a sa'a, wa 'bhuo -kpö kalɛ-ɛ 'lɩbhʋa -bha. 'N wa jio-a -bhlʋ -bhlʋ ngli 'jɩbha naa: “-Abhitɩbha, -amö-a 'nɩ-ɩ?” 20Zezwi nɛ -bha wa de naa: “A kugbïa 'sɔɔ gla'aa -bhlʋ n -nyɔɔ -wʋ-ɔ la'a -dakɔ -bhlʋ 'mö cɛ -gömö fafanɩ 'le mɔ -bha. 21-Ɩ 'cɛlɩɔ la-a -ma -Lagɔwɛlɩɛ 'bɔgʋ 'mö Nɩkpɛɛ 'Guo yɛ, 'wʋ ɩ ji-a 'wlenɩɛ. -Ma ɩ 'mö, nɩkpɛ -ɔ jio-a 'pɛlʋ 'paa ɔ nʋ ngazɩli, 'mɔ nɩkpɛ la'a nɩ la 'pɩ 'wʋ ji, mɩ-ɩ -ga la-a ɔ de cɛ.”
Zezwi yɛ -Lagɔlulu sɛ -la
22Wa-a li 'le, Zezwi 'libhï-a 'fʋloko 'wʋ, ɔ bhalɩ-a a yɛ -Lagɔ-ɔ, 'n ɔ jia-a 'mö -dɩdɩnɩ 'n ɔ jua-a 'ye 'nyɛ. Ɔ nɛ: “-Ʋ la'a na ku -bha, a 'libhïʋ 'wʋ a 'yɛ li.” 23'N ɔ ji 'yɛ-a dwivɛkɔpʋ 'wʋ 'libhï, ɔ bhalɩ-a ʋ yɛ -Lagɔ-ɔ, 'n ɔ jua-a 'ye 'nyɛ, 'n wa 'bhuo ji-a 'nɩma. 24Ɔ nɛ naa: “Dwivɛ la'a, na dlu -ʋ ji-a nɩkpa -bebee 'wlumö sɛ 'suluo, -Lagɔ -yɛ nɩkpa 'sɔ 'yɛ -ghöbhanɩ mʋ -bha. 25'Dɩɛ -dɩ n 'nyɛya-a naa, tɛnɩ-a 'mö la'a -zɩkazɩnɩ'ɩ, n 'na-a 'mö nʋ -mʋmʋ-ʋ 'nɩma 'sɔ, 'n ɛ nɩ -ma -Lagɔɔ nyininyinipɩ 'wʋ glɩnɩ, -ma n ji-a nʋ -lulu 'nɩmanɩɛ.”
Zezwi nɛ ɔ -jijigbʋ Piɛlɩ ji-a 'mö kpɛnɩɛ
26'N wa ji-a -Lagɔɔ bhlɩnɩlʋɩ bhlɩ. Wa bhɩa-a 'ji, 'n wa ji-e -ma olivieswie -gɔgɔgbʋ 'klʋ mö. 27Wa-a mö 'le, Zezwi nɛ -bha wa de naa: “Abha na -lʋa, a 'bhuo, -gömö a ji'i-a -zɩnɩ'ɩ panɩɛ. -Wʋʋ yɛ-a, sa'a ɩ 'cɛlɩɔ-ɔ sa'a -ma -Lagɔwɛlɩɛ 'bɔgʋ 'mö naa:
-Lagɔ nɛ naa:
Wliaa ngokʋnyɔ n ji-a 'lɩbhaa wlia 'yɛ -dɩdɩnɩ.
28N -yɛ tlɩ n -yɛ glu 'wlʋ 'bhë-ë, -ma Galilee -gwlɩ yawʋ n ji-a 'yu 'plɩɛ.” 29Zezwi gba-a -sɩbha, Piɛlɩ nɛ -bha ɔ de naa: “-Mʋabha 'bhuo -kamö -gömö panɩ-ɛ, -amöö -nɩ, n 'na -kamö na-a -gömö panɩ 'lɩlɩlɩ.” 30Zezwi nɛ naa: “'Dɩɛ -dɩ n -nyɛmö-ö sa'a naa, -zɩnɩ'ɩɛ dʋdʋɔ 'bhë, bhla -kɔkɔbhɛlʋ 'yɛ 'wʋ 'sɔ gbʋnʋɔ mö, -n yɛ 'wʋ ta na -jijigbʋ 'mö kpɛnɩ.” 31'N Piɛlɩ jiɩ-a ngli nyʋnanɩ naa: “ N 'na -na -jijigbʋ 'mö kpɛnɩ 'lɩlɩlɩ. Ɛ ji tlɩtlɩɛ 'bhë glɩnɩ, n -nyɛmö 'sɔ -a 'yɛ-a tlɩ.” -Ɩ Piɛlɩ gba-a la'a 'mɩ -mʋabha 'bhuo gba-a 'gamö.
Zezwi yɛ -ɩ la'a -ɩ jio-a ghlɩɛ yɛ -Lagɔ -bɛlɩ 'pa
32De -bhlʋ, la wa la-a Gɛsɩmani wa nyini-e -bha, Zezwi nɛ -bha ɔ 'wʋbhlinɩngwaa de naa: “A glɩ la'a yɛ, n 'yɛ -Lagɔ -bɛlɩ -pa kwla'a mö.” 33'N ɔ ji-a wa gla'aa nɩkpa ta 'wʋ 'libhï, Piɛlɩ-ɛ, Zakö-ö 'bhë Za. Ɔ -nyʋa 'sɔ-ɔ mö 'le, -ɩ jio-a ghlɩɛ yɛ nganɔ -wʋɔ -gömö ji 'le, 'n ɔ dlɩ -wʋ-a -kɔngʋ, ɩ yɛ ɔ nɛ naa: 34“Kalɛ-ɛ wʋ'ʋ-a tlɩtlɩswɩ'ɩ 'lɩbha 'le, na dibhë 'jɩbha a 'yɛ -ma do. A glɩ la'a yɛ a 'na-a ngɔmö -nɩ.” 35Ɔ 'bhʋa-a yawʋ ɔ nyini-e -bha 'yude -sɛ, 'n ɔ ji-e -bha dʋdʋkpata'a 'wlu glu 'pa, 'n ɔ ji-a -Lagɔ -bɛlɩ 'pa naa, ʋ -yɛ nglu, zwɩ 'kadɛ -ɛ jio-a zie, -ɛɛ de-e -wʋ-a nyini 'le, ʋ 'pa -bha ɛ de nimï. 36Ɔ nɛ naa: “-Atʋ -Lagɔ -nmö bhɛlɩ-a -li 'bhuo, ɩ yɛ dlukalʋ n ji-e la'a möna, 'pʋ -bha na yawʋ nimï. Mɩ -bha 'bhë-ë, -ɩ -n 'jɩbha-a ɩ tʋnʋ 'wlu, na -li 'na-a tʋnʋ 'wlu -nɩ.”
37Ɔ bhɩa-a 'ji, ɔ mö-ö -bha ɔ 'wʋbhlinɩngwa yawʋ nimï-ë, wa-a ngɔmö 'le, 'n ɔ jua-a -bha ghlɩ. Ɔ nɛ -bha Piɛlɩɛ de naa: “Simo, ngɔmö 'le -n -wʋ-a? -N 'yɛ -ga 'glie -bhlʋɔ 'bhëë 'fʋ -kamö -gömö 'plɩnɩ -n 'nɩɩ bhɛlɩ? 38A 'na-a ngɔmö -nɩ. A 'pa -Lagɔ -bɛlɩ a ji-e -mapapɩɛ 'mö bhlinɩ a ji-e 'jinyloli nʋ. -Wʋʋ yɛ-a, nɩkpɛɛ dlɩ nyini -bha -kpöön 'bhë, ɔ kuo nglinyuno yɛ ɔ'ɔ 'mö 'tɛ-ɛ.” 39Ɔ 'pa-a ɔjɩ nimï 'sɔ, sa ɔ 'pa la-a takado'o -Lagɔ -bɛlɩ, 'n ɔ ji-e -sɩbha -bɛlɩ 'pa 'sɔ. 40Ɔ bhɩa-a ji, ɔ mö-ö -bha wa yawʋ nimï-ë, wa-a 'yɛ ngɔmö 'le 'sɔ, 'n ɔ jua-a -bha ghlɩ. Wa 'jiee 'wʋwɔlʋ yɛ, ɔ 'jɩbhʋa-a ngli-e, -mɩɛ 'bhë wa 'yɛ -gömö -sa wa 'nɩɩ -ji. 41'N ɔ ji-a tado'o ɔjɩ nimï 'pa, ɔ 'yɛ -Lagɔ -bɛlɩ 'paa yɛ. Ɔ ji 'yɛ-a nimï-ë, wa-a ngɔmö 'le, ɔ nɛ: “Nyɛpɛnyɛpɛlibho a ka-a 'n a -wʋ-a ngɔmö 'lee 'nyizee? Ɩ -ga-a 'mö cɛ, a yie, Nɩkpɛɛ 'Guo de yɛ nyini 'bhë, -ma 'jinylolie nʋnʋngwa cɛ'ɛ wa jio-o la'a 'pɛlʋ 'paa. 42A -sɔ 'wʋ -a 'yɛ mö, -ɔ pa'a-a 'pɛlʋ-ɔ ji 'le.”
Wa yɛ Zezwi köbha
43Zezwi ka wɛlɩ la'a ngli tɔngʋ, Zwida -ɔ glɩnɩ-a ɔ 'wʋbhlinɩngwa kugbïa 'sɔɔ gla'aa -bhlʋ -ganɩ nɩkpaa -zakpa 'yu, 'n wa ji-e -bha ghlanɩ. 'Mʋa nɩkpa la'a -su 'ligbla -yɛ -pɛ 'sɔ. -Lagɔbʋbɔngwaa 'bhitɩbhangwa-a, -Lagɔɔ gböö nglipangwa -yɛ 'zwiföaa nɩkpazɔgblʋɩ sɔ-ɔ tua la-a -sɩbha. 44Zwida -nyʋa 'yɛ möö ji-e, 'dɩ ɔ 'nyʋa-a naa: “-A -yɛ -ma nyini-e, nɩkpɛ la'a n ji-a 'wʋ bhlie mɔ -bha. A köbhɔ a nyɔnʋɔ cɛ a -nyɔɔ 'yɛ mö.” 45Wa nyini-e -ma, Zwida nyini-e -bha Zezwi yawʋ, ɔ nɛ: “-Abhitɩbha!” 'N ɔ jio-a 'wʋ bhli. 46Ɔ bhlio-a 'wʋ-ɔ, nɩkpa ɔ -nyʋa namö la-a, 'n wa ji-a Zezwi köbha. 47Wa gbloo-a 'wʋ tɔngʋ, ɔ yawʋɔ nɩkpɛ -bhlʋ 'libhï-a ɔ 'ligblɛ 'wʋ, 'n ɔ ji-a -Lagɔbʋbɔnyɔ 'kadɔɔ nyɩgbajʋlʋ 'yukwli 'wlu -dɩ.
48'N Zezwi ji-a -wa köbhɔ la-a ngli 'jɩbha, ɔ nɛ naa: “'Kulɩbhanyɔ n glɩnɩ-a 'n a wʋ'ʋ-a köbha kwla'a ji 'le, 'n a -su-a 'ligbla -yɛ -pɛ 'sɔɔ? 49Zlɩa 'bhuo 'mö, n nyɛya 'sɔ-ɔ -ma -Lagɔbudu 'kadʋ 'mö, 'n n panɩ-ɛ -ma -Lagɔwɛlɩ ngli, a nɩ'ɩ-ɛ -ma köbhanɩ. -Ma ɩ 'mö, -ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö 'yɛ 'wʋ 'wlenɩɛ yɛ ɩ 'plɩ-ɛ -sɩbha.” 50Ɔ gba-a sa'a, ɔ 'wʋbhlinɩngwa 'bhuo -bha wa tɩɔ-a, 'n wa ji-a fito. 51Wa -yɛ Zezwi -wʋ-a mö 'le, nyɩgbɔtagu -bhlʋ -ganɩɔ, ɔ ka lokwie 'nyize 'mö. 'N wa jio 'yɛ-a -nɩ köbha. 52Ɔ 'wlʋ-a ɔ lokwi 'mö, ɔ 'dɩɔ-ɔ wlu, 'n ɔ ji-a fito.
Wa yɛ Zezwi -ma 'zwiföaa -zijlitungwa 'kadɩ dlɩ'ɩ kwa
53Wa -su Zezwi 'n wa jio-o -ma -Lagɔbʋbɔnyɔ 'kadɔɔ 'ligbë'ë kwa. -Ma la'a -Lagɔbʋbɔngwaa 'bhitɩbhangwa-a, 'zwiföaa nɩkpazɔgblʋɩ -yɛ -Lagɔɔ gböö nglipangwa 'sɔ, 'n wa 'bhuo ji-e -ma 'wlu 'titanɩ. 54Wa -yɛ Zezwi -wʋ-a mö 'le, Piɛlɩ -ga -ma wa nimïnimï, 'n wa ji-a -nɩ -ma -Lagɔbʋbɔnyɔ 'kadɔɔ 'ligbë'ë nyini. Ɔ planʋa-a 'bɩ-ɛ, 'n ɔ ji-e -ma -kʋkwaa ngokʋngwa -wa -wʋ la-a -kosu 'wʋlɔ 'lee nyɩdɩ sɛ glɩ-ɩ.
55-Lagɔbʋbɔngwaa 'bhitɩbhangwa -yɛ 'zwiföaa -zijlitungwa 'kadɩ 'bhuo 'sɔ, wɛlɩ -ɩ 'yɛ-a Zezwi gbʋ köbha wa 'kɔ 'lɩbha ɔ 'yɛ tlɩ, 'mɩ wa -wʋ la-a 'nama 'le 'bhë wa 'nɩɩ-ɩ ghlɩ. 56-Wʋʋ yɛ-a, nɩkpaa -bɛ kwa-a Zezwi gbʋ 'wʋ yuo wa -dɩnɩɔ-a yawʋ, wa 'mösanɩwɛlɩ 'nɩ 'wlʋnʋ. 57-Mʋmʋa -sɔ-a 'wʋ, 'n wa jio-a yuoyuowɛlɩköbhë la'a -gömö 'pa, wa nɛ naa: 58“Nɩkpɛ -la nɛ naa, -Lagɔbudu 'kadʋ -ʋ nɩkpa 'sɩbha la-a, wla ɔ jiʋ -bha, -ʋ nɩkpa 'nɩ-a 'sɩbha, ɔ 'kʋ -bha 'ylɩ ta 'mö ʋ 'bhle 'wʋ 'nɩgbanɩ. Ɔ -wɩɩ gba 'le 'n -a jiɩ-a 'nʋ.” 59-Ma -ɩ la'a 'bhïë 'mö, wa wɛlɩ 'nɩ 'yɛ 'wlʋnʋ 'sɔ.
60Wa gba-a sa'a, -Lagɔbʋbɔnyɔ 'kadɔ 'nɩgbönɩ-ɛ -bha nɩkpa nyɩdɩ ghayɩ, 'n ɔ ji-a Zezwi ngli 'jɩbha, ɔ nɛ naa: “Sa -n gba-a 'nɩ? Gbʋ wa -wʋmö-ö -la 'wʋ kwa 'le -nn ʋ -gömösawɛlɩ -ka 'nɩ-ɩ?” 61Ɔ 'jɩbhɔ-ɔ sa'a ngli-e, Zezwi ngo ɔ zʋ-a yɛ, ɔ'ɔ -lɛ gbʋ -dɩ. 'N ɔ jio 'yɛ-a ngli 'jɩbha 'sɔ, ɔ nɛ naa: “Puanyɔ -ɔ -Lagɔ -sa-a -bha, nɩkpa 'bhuoo bʋbɔ -Lagɔɔ Gu -n glɩnɩ-a 'nɩ-ɩ?” 62Zezwi nɛ: “Nn, 'mɔ n glɩnɩ -bha. Sa'a n gba 'mö-ö sa'a naa: -Ma 'mötɛnɩ -Lagɔɔ linɩkpɛsɔ pɩa 'bɩ a ji-a Nɩkpɛɛ 'Guo glɩglɩlɔ yɩlɩɛ. A jɩnɩɔ 'yɛ 'wʋ, 'n ɔ 'yɛ-a gbiluko -gömö jinɩ.” 63Zezwi gba-a sa'a, 'n -Lagɔbʋbɔnyɔ 'kadɔ ji-a yʋlʋɔ yɛ ɔjɩɛ 'mökabanɩ 'mö ghla. Ɔ nɛ naa: “'Manɩɛ yɛ -a 'yɛ 'mö-a nɩkpa -wa 'kɔ-a gbʋ köbha 'nama 'sɔ 'nɩ? 64Sa ɔ nyimanɩ-a -Lagɔ ngli 'mɩ a 'bhï 'nʋ-ɔ -la, ɩ yɛ sa a gba-a 'nɩ?” 'N wa 'bhuo ji-a ɔ 'lɩbhalɩbhagbʋ nglu naa, -ɩ ɔ nʋ-a ɩ -lowli bhɛlɩ ɔ 'yɛ tlɩ.
65'N wa gla'aa nɩkpa -mʋmʋa ji-a Zezwi -dlɛ 'klʋ ngwla. Wa gɔ-a 'klʋ, wa -wʋɔ kobhï 'pa 'le, 'n wa nʋ-a: “Nʋ -Lagɔɔ 'mögbanɩnyɔɔ -li, -ɔ -pamö-a cɛ -dɩɔ 'nglɩ.” -Kʋkwaa ngokʋngwa gbloo-a 'wʋ, 'n wa jio-a 'yukwlie wla.
Piɛlɩ nɛ ɔ'ɔ Zezwi -ji
66La wa -wʋ-ɔ -sɩbha Zezwi 'zwɩ zia 'le, Piɛlɩ glɩ la -ma 'ligbëë zɔmö. 'N -Lagɔbʋbɔnyɔ 'kadɔɔ nyɩgbajʋlʋnglɔ ji-a ji. 67Piɛlɩ-ɛ -kosu 'wʋlɔ 'le 'n ɔ jio-a yɩlɩ. Ɔ jɩlɔ-a -daan, ɔ nɛ -bha ɔ de naa: “-Nmö la'a, Nazalɛtɩɛ Zezwi -n -nyɔɔ -bhlinɩ la 'yɛ-ɛ -na 'wʋ!” 68'N Piɛlɩ ji-a kpɛnɩ ɔ nɛ: “N 'nɩɔ -ji. Gbʋ -ʋʋ bhë -n -wʋ-ɔ -la gba 'le n 'nʋ 'mö -nganɩ.” 'Gamö, ɔ -sɔ-a 'wʋ, 'n ɔ ji-e -bha -kʋkwa ngo'o 'nɩgbö kwla'a mö, -bha -gaganɩlɩ'ɩ, 'n -kɔkɔbhɛlʋ ji-a gbʋ. 69Nyɩgbajʋlʋnglɔ la'a yɩlɩɔ-a 'sɔ, ɔ nɛ -bha nɩkpa -wa -wʋ la-a -bhaa de naa: “Nɩkpɛ -la Zezwie 'wʋbhlinɩnyɔ -bha.” 70Ɔ gba-a -sɩbha, 'n Piɛlɩ ji 'yɛ-a kpɛnɩ 'sɔ. 'Bie -lɛ gwlɛ-a 'mö -sɛ, nɩkpa -wa -wʋ la-a -bha nɛ -bha Piɛlɩɛ de naa: “'Dɛdɛɛ -n glɩnɩ-a Zezwie 'wʋbhlinɩnyɔ, -wʋʋ yɛ-a, Galilee -gwlɩ yawʋɔ nɩkpɛ -n glɩnɩ -bha.” 71'N Piɛlɩ ji-a zlugo, 'n ɔ ji-a ɔjɩ gwie zʋ. Ɔ nɛ: “'Lɩlɩlɩ, nɩkpɛ -ɔɔ gbʋ a -wʋ-ɔ -la gba 'le, n 'nɩɔ -ji.” 72Piɛlɩ ka wɛlɩ la'a ngli, 'n -kɔkɔbhɛlʋ ji-a 'sɔdo'o gbʋ. Wɛlɩ Zezwi gba la-a ɔ de naa: “Bhla -kɔkɔbhɛlʋ 'yɛ 'wʋ 'sɔ gbʋnʋɔ mö, -n yɛ 'wʋ ta na -jijigbʋ 'mö kpɛnɩ-ɛ,” 'n ɔ dlɩ ji-e -bha ɩ de bhlinɩ. Ɔ 'pɩ-a dlɩ 'wʋ 'n ɔ ji-a wi.
Seçili Olanlar:
MALƖKÖÖ 'BƆGƲ 14: BNT96
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bete New Testament © Bible Society of Côte d'Ivoire 1996