TADPADBO 2
2
Mose Tu Manabo
1Haichiubo ken-ga, Levi kiphiu gasu mai khatniu paky phiu gasu maipui khattu majang lungde, 2#Tk 7.20; Heb 11.23.paniu panah piumai khat manade. Paniu lungbo ngena hai ngaoboga wiju mibo jengniu paniu patu chahiu sum baikhang sude. 3Chiudi paniu patu bai ngamlak miboga, chalimniu thiubo khatdi tatamniu tadui ngutmakra tailubo takuk khat khoilujiu, siga ngena situ majikhai lujiu, chapiubang kubibo bam singgiu mungga khai mide. 4Ngena chipui siniu degu padralo chiubo pabam khatga chaplujiu phui bamme.
5Chawang nahpui siniu tadui nkhiu raleng, pavang puidungtu maluang lujiu sibo singgiu mung gase tadkiu sude. Paniu chapiujiuga takukse ngaoboga, sise lura pavang khattu langkhaide. 6Chawang nahpui siniu lepad phuiboga ngena situ ngaolude. Ngena siniu kapsuboga, palung kheng ngamlak mide. Sichiu paniu din-e, “Haise Hebrew mai nah bam talakge.”
7Siga pachipui siniu pakhuga maniu-e, “Iniu tadlujiu ngena haitu naleng alu khaira Hebrew maipui khattu kukhai bima?”
8Paniu paokakge, “Yo, chalungsajiu kam khailo.” Siga aliumaina siniu tadlujiu ngena puisiak situ puiwang bide. 9Chawang nahpui siniu maipui khugase din-e, “Haibo ngena haitu lulujiu aleng alu khailo, Iniu naphijeng pine.” Sichiujiu paniu ngena situ ponlujiu patu makuat sude. 10#Tk 7.21.Pasai, ngenase mawikhangjiu dikhang miboga, paniu patu chawang nahpui khuga puiwang mide, sichiujiu paniu ngena situ panahsiak kumjiu makuat sude. Paniu paronna haichiu din-e, “Iniu patu taduijiu gasu jupadbo-e, siniu pazan hai Iniu Mose#2.10: Mose: Hebrew ladga “jupadbo” chiubo-e. chiu kurabo-e.
Mose Niu Midia Lam Paktadbo
11 #
Tk 7.23-28. #Heb 11.24.Mose niu tingkhang suboga, pamai Hebrew maidungtu phuira tadpad sude, siga paliutu dejiukha kam mathad bamlo chiubo paniu ngaode. Egypt mai khatniu Mose maisiak, Hebrew mai khattu kamshat bambo katang paniu ngaode. 12Mose niu awajiu phuiboga, mai khat niudi patu ngaomakge chiubo silujiu, paniu Egypt maipiu tuse kamshat lujiu paphawse nbuijiuga baikhai mide. 13Pasaibo naise paniu tadpad lanboga Hebrew mai khangnia n-gi bamniubo ngaode. Paniu kamaobo piu khuga din-e, “Nangniu dekamjiu nasingna Hebrew maitu adapbam jiulo?”
14Sibo piu siniu paokakge, “Natu saoniu aliugu mawangpao maksai ladjanpao leng kamkhai jiulo? Nangniu danai Egypt maipiutu kamshat mibo kumjiu, atudi kamshat mira chiujiu ma?” Siga Mose pingmide khatdi paronna haichiu dinsude, “Iniu kam mibose maidungniu simide.” 15-16#Tk 7.29; Heb 11.27.Degu padmilo chiubo chawangniu siluboga, Mose tu kamshat mira kamsude, siga Mose niu Midia lam paktad lujiu siga ga lungmide.
Naikhat, Mose niu akhun khat mungga ntao bamboga, Midia maidunggu singku Jethro nahpui khang chinnia kiulujiu paliu piugu kamidung nai milydung leng tadui thuakra wangde. 17Chiudi mily khuanmai khangsianiu wanglujiu Jethro nahpuidung situ hathon sude. Siga Mose niu tadlujiu paliutu nkha khaijiu paliu khaoruidungtu tadui pi thikhai bide. 18Paliuniu paliu piu khuga malan wangboga, paniu paliu khuga maniu-e, “Dekamjiu thainai naliu wang maji kin jiulo?”
19Paliuniu paokakge, “Egypt maipiu khatniu aliutu mily khuanmaidung khugasu nkha khai bijiu, khatdi paniu aliuleng tadui thuak khaijiu, aliu khaoruidungdi tadui thilubo gasu-e.”
20Paniu panahpuidung khuga maniu-e, “Pah dega bamlo? Dekamjiu naliuniu patu siga pibam diakmi jiulo? Tadlujiu patu kuwang katiu pitiu khailo.”
21Sichiujiu Mose niu siga lungra palung chap mide, siga Jethro niu panahpui Zipporah tu panao leng pikhaide, 22paniu panah piumai khat lungkhai-e. Siga Mose niu paronna haichiu din-e, “Haibo kadihga I sangdiumai khatle, siniu pazan leng Gershon#2.22: Gershom: Hebrew ladga “sangdiumai” chiubo-e. chiu kune.
23Tingkum wajiukha sailam Egypt mai wangpiuse shai mide, chiudi Israel maidungra kavang lunlungga lungjiu kap-kiambose palun bamme, sichiujiu nkha khaira khengsude, Paliuniu kapbo khuanse Tingwang niu chiukhaide. 24#Chab 15.13,14.Sichiu paliugu magenthiu chariubo khuanse Tingwang niu chiuluboga paniu Abraham, Isaac khatdi Jacob paliu khuga ladriat khaibose maningtao khaide. 25Paniu Israel maidunggu kavang thiubo lunlungse ngaolujiu paliuleng manang khai bide.#2.25: manang khai bide: maksai paliu khuga pazu lenkhai bide chiubo-e.
Поточний вибір:
TADPADBO 2: LIANBSI
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.