GÉNESIS 39
39
Potifarpa warminwan Josewan
1Joseta Egiptoman apajtinku, uj egipcio Potifar nisqa payta rantikorqa ismaelitasmanta. Potifarqa karqa Egipto reypa guardianmanta oficialnin, capitannintaj. 2Señorqa Josewampuni kasharqa. Chayrayku egipcio patronnimpapi kashajtin tukuy imapi allin rerqa. 3Patronnenqa repararqa Señor paywampuni kasqanta, chayrayku tukuy imapi allin risqanta. 4Ajinamanta Joseqa patronninwan mayta munachikorqa. Chaymantaqa Potifar, payta yanapanampaj Joseta churarqa mayordomomanta tukuy imasninmanta, wasimpi kajkunamantawan pay cuentayoj kanampaj. 5Potifarqa, wasinta tukuy imasninta ima Joseta churarqa qhawanampaj. Señorqa chay kutimantapacha bendicerqa Potifarta Josenejta; chayrayku wasimpitaj, jinallataj chajrasnimpis. 6Ajinata Potifarqa tukuy imasninta Josej makisninman saqerqa; chayrayku payqa manaña ima ruwanasninmantapis allinta dakojchu; imatachus mikhunallanmanta llakikoj. Joseqa k'acha wayna, sumajtaj karqa. 7Chayrayku Potifarpa warmin qhepa p'unchaykunaman munapayarqa, ujkutitaj, jamuy noqawan puñusun, nisqa.
8Josetaj mana munasqachu, nerqataj: Patronneyqa niwan noqa tukuy imasninmanta cuentayoj kanayta, noqa kaypi kashajteyqa mana imamantapis llakikunanchu tiyan. 9Kay wasipeqa mana pipis imata ruwananchu tiyan, manachayqa noqalla cuentayoj kani. Chayrayku patronneyqa niwan tukuy imasninmanta dueño jina kanayta, qanllamanta mana ima ruwanaychu tiyan, imaraykuchus qanqa warmin kanki, chayrayku. Ajinaqa, imaynatataj noqa ruwasaj kasqa chay millaytari, juchallikusajtaj Diospa contrantari?
10Ajinata chay warmeqa sapa p'unchay parlapayaj paywan puñunanta yuyaspa, payllawan ima ratopis kananta munaspa; Josetaj mana uyarejllapis tukojchu. 11-12Uj p'unchaytaj Joseqa wasiman yaykusqa, imachá ruwanasnin karqa chayta ruwaj. Mana ima runapis chaynejpi kajta rikuspataj, warmeqa Joseta p'achanmanta jap'iykorqa puñuna, nispa. Josetaj ch'urkirakuspa, p'achanta lluch'ukuspataj warmej makinman saqerpariytawan jawaman ayqekorqa. 13-14Warmitaj makimpi p'acha jap'irisqa rikukuspa, jinapi k'aki qhepakuspataj, waj kamachisninta wajyarqa, nispa: Qankuna yachankichej, qosay hebreota pusamun noqanchejmanta alqochakunawanchejpaj. Noqa wasipi kashajtiy yaykumun, noqawantaj puñuyta munan; chayrayku jatunmanta qhaparikuni. 15Paytaj tukuy kallpaywan jatunmanta qhaparejta rikuwaspa, jawaman ima jina ayqen, p'achan tukuyta saqerparispa, nispa.
16Chaymanta chay warmeqa Josej p'achanta jinapi jallch'arqa qosan chayamunankama. 17Chayamojtintaj kikillantataj Potifarman willarqa, nispa: Chay hebreo kamachi pusamusqaykeqa cuartoyman yaykumun noqawan puñuyta munaspa, honrayta t'akawayta munaspa. 18Jatunmanta tukuy kallpaywan qhaparejtiytaj uj ima jina jawaman ayqen, p'achan tukuyta kayman saqerparispa. 19Ajinata kamachiykeqa noqata ruwawan. Jinamanta Potifarqa Josepaj maytapuni phiñakorqa, chay jinata warmin willajtin. 20-21Chaymanta Potifarqa Joseta jap'iytawan carcelman churacherqa, maypichus reypa presosnin kasharqanku chayman. José carcelpi kashajtimpis, Señorqa paywampuni karqa, tukuy imapi payta khuyaspa. Jinamanta Joseqa carcelta qhawajkunaj kurajninwanñataj munachikorqa. 22Chayrayku chay runaqa Joseta saqerqa carcelpi presosta qhawananta. Jinamanta payqa carcelpi tukuy imata sumajta kamacherqa, imaschus chay ukhupi ruwakoj chaykunapi. 23Chayrayku carcelta qhawaj runaqa mana imamanta dakojchu José cuentayoj kashajtin, imaraykuchus Señor paywan kasharqa tukuy ima ruwasqasnimpi allin rinampaj.
Поточний вибір:
GÉNESIS 39: QCHSB
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Qheshwa Biblia DC © Sociedades Bíblicas Unidas, 1986.