If you would like a copy of this version please contact info@davaraudiobibles.org.

Lambya First Bible © The Word for the World International. Lambya First Audio Bible ℗ 2025, Davar Partners International.

Lambya First Bible

Lambya - 2015 MWI (NT) Drama

The copyright is jointly and equally held by:
©️ The Bible Society of Malawi, 2014
©️ The Word for the World International, 2014

Pisiku limo Ilyakutuzya u Yesu akadumusannyanga mumaghunda agha ngano. Abamanyili bache izala yikabalema, po bakanda pakupulula imitu iya ngano nukulya. Bo aba Falisayi bennya zinizi, bakamubuzya u Yesu bakati, “Ennya, abamanyili bako bakubomba zizyo zititikiziwe pakubombiwa Pisiku Ilyakutuzya?” U Yesu akamula akati, “Nkimba mutabelengitepo zizyo u Devedi na bantu bache bakabomba pakabalilo kako bakaba nizala, loli batakaba ni chakulya nachimo? Akinjila mu Nyumba iya Chala nukulya ichibama chicho chikabikiwa kwa Chala ukuti chibanje chakwiyipa. Ukuyana ni Ndaghilo zyitu, umuputi mwene weyuyo itikiziwe pakulya ichibama chila. Loli u Devedi akalya nukubapako abantu bache. Pamo mutabelengite mu Ndaghilo izya Mozesi ukuti Isiku ni siku Ilyakutuzya abaputi mu Nyumba iya Chala bakunangannya Indaghilo, loli batakuba ninongwa? Nkubabuzya ukuti pamo chilipo chimo ichapamwanya nkani ukuchila Inyumba iya Chala. Amasimbo ghakuti, ‘Ichisa cho chicho nkulonda, chite ichakwiyipa icha vinyamana awe!’ Nanti mwachimenye chicho amazyu agha ghakung'anamula ngali mutabanenite abantu babo batanangite ukuti bambibi. Pakuti u Mwana uwa Muntu we Mwene uwa Isiku Ilyakutuzya.”


U Yesu akepapo pabuzilo bula nukwinjila munyumba iyakwiputilamo. Mulamula mukabamo umuntu uwa nyobe indemazu. Abantu bamo palapala bakalondagha pakumwagha u Yesu ni chifukwa ichakumupelela inongwa, po bakamulalusya bakati, “Nkimba Indaghilo izya Mozesi zikwitikizya pakupozya Pisiku Ilyakutuzya?”
U Yesu akabamula akati, “Nkimba wewenu umuntu yuyo ing'ozi yache yiwile muchibanka ichibizu Pisiku Ilyakutuzya, atakuyifumyamo? Buli nu muntu, yuyo wapamwanya ukuchila ing'ozi? Po Indaghilo zyitu zikutwitikizya pakubomba ichintu ichiza Pisiku Ilyakutuzya.” Po akamubuzya umuntu yula akati, “Gholosya inyobe yako.” Akayigholosya inyobe yache, po yikaba sona akiza ngati iyinji. Loli aba Falisayi bakepamo nukubuka kuzi pakwivwana namumo bangamughoghela u Yesu.

Bo u Yesu azimanya izi, akepapo pabuzilo bula. Abantu abinji bakamukonka, po akabapozya ababine bosi, nukubasoka ukuti batakamufumusyanje. Akabomba zinizi pakukwanilisya zizyo u Chala akanenela mu mulaghuzi u Yesaya ukuti,
“Uyu we mubombi wane, yuyo namusala
imughanite, sona umoyo wane ghuhobokite nkani nawe.
Nkwiza pakubika Umuzimu wane papache
akwiza pakubufumusya ubwanaloli ubwa Chala
pakasi pabantu aba inko zyosi.
Atakwiza pakudalika pamo ukukolomoka,
nayumo umuntu
yuyo akwiza pakwivwa izyu lyache mumisebo.
Ulutete lulo lunyonganite atakwiza pakulupyola,
pamo ukuzimya ichikoka ichakusuka,
mupaka papo ennya ukuti ubwanaloli bwabombiwa.
Abantu aba inko zyosi bakwiza pakusubila mumwache.”


Abantu bamo bakiza kwa Yesu nu muntu umufwamaso nu chinunu pachifukwa ichakuti akaba nu muzimu umubibi. U Yesu akamupozya umuntu yula, po akanda pakunena nu kwennya. Abantu bosi bala bakaswigha nkani na zizyo u Yesu akabomba. Bakalalusya bakati, “Nkimba uyu angaba Mwana uwa Devedi?”
Loli bo aba Falisayi bivwa zinizi, bakamula bakati, “Amaka ghabo aghakwefesezya imizimu imibibi ghate gha muntu yumo, loli gha Belezebuli usongo uwa mizimu imibibi.”
U Yesu akazimanya inyinong'ono zyabo, po akababuzya akati, “Nanti ubumwene bwasambukilana bwenebwene, ubumwene bula butangendelela, sona nanti abantu aba mukaya, pamo abamunyumba basambukilana benebene, akaya kala pamo inyumba yila yitangendelela. Nanti akabukatila koka kakulwa na kanji mubumwene ubwa Satana, ichi chikung'anamula ukuti chigabinkanite kale mutubukatila. Nanti abantu abamunyumba yoka basambukilana, inyumba yila yitangendelela. Amwe mukuti ane nkwefya imizimu imibibi pachifukwa ichakuti u Belezebuli weyuyo akumpa amaka, po nkimba wewenu akubapa abamanyili binyu amaka aghakwefesezya imizimu imibibi? Polelo imbombo izya bamanyili binyu zyo zikulanjizya pabuzelu ukuti amwe mwananga! Loli nanti ane nkwefya imizimu imibibi na maka agha Muzimu uwa Chala, kokuti chikulanjizya ukuti u Chala ikazizye kale Ubumwene bwache pakasi papinyu.
“Nayumo umuntu yuyo angapankula inyumba iya muntu uwamaka nukusenda ivintu vyache vyosi, pene papo amupinya tasi umuntu uwamaka yula, po angasenda vyosi vivyo akulonda.
“Umuntu wesi yuyo akudalinkana nane, kokuti mulwani wane, sona umuntu wesi yuyo atakunyavwa pakubungannya, kokuti akunyampannya. Nkubabuzya ukuti abantu bangahobokeliwa imbibi zyabo zyosi na mazyu amabibi ghagho bakunena. Loli umuntu wesi yuyo akumusamula u Muzimu Umuzelu atakwiza pakuhobokeliwa nalumolumo. Umuntu wesi yuyo akumunenela u Mwana uwa Muntu ivintu ivibibi, akwiza pakuhobokeliwa. Loli umuntu wesi yuyo akumunenela u Muzimu Umuzelu ivintu ivibibi atakwiza pakuhobokeliwa nalumolumo ukwandila pakabalilo aka mupaka pakabalilo kako kakwiza.”


“Nanti mukuti, ‘Ikwi ili lyiza,’ kokuti ivikomwa vyache vyope vyiza. Nanti mukuti, ‘Ikwi ili libibi,’ kokuti ivikomwa vyache vyope vibibi. Ikwi likumanyikwa ni vikomwa vyache vivyo likwela. Amwe mwe bana aba njoka, munganena bulibuli ubwiza, bo mwe babibi? Pakuti umulomo ghukunena vivyo vyizuye mumoyo. Umuntu umwiza akunena ivintu ivyiza vivyo asungite mumoyo wache, wepe umuntu umubibi akunena ivintu ivibibi vivyo asungite mumoyo wache. Loli nkubabuzya ukuti pisiku lilyo u Chala akwiza pakubalonga abantu, abantu bakwiza pakulongiwa pachifukwa icha lizyu lyosi ibibi lilyo banena. U Chala akwiza pakukunena ukuti we mwiza pamo we mubibi pakubombezya amazyu ghagho wanena.”


Abamanyisi bamo aba Ndaghilo naba Falisayi bamo bakamubuzya u Yesu bakati, “Wee Mumanyisi, tukulonda tukwennye ukubomba ichiswigho.”
U Yesu akabamula akati, “Abantu abankulilo iyi babibi na basita lusubilo, bakulonda ichiswigho? Awe, loli ichiswigho chene chicho bakwiza pakuchennya, cho chiswigho icha mulaghuzi u Yona. U Yona akikala amasiku matatu mulwanda ulwa swi inkulu, umwakuyana bulo, wepe u Mwana uwa Muntu akwiza pakwikala mukasi mwitope amasiku matatu umusanya nu busiku. Pisiku lilyo u Chala akwiza pakubalonga abantu abankulilo iyi, abantu aba mu Ninive bakwiza pakuzyuka kubufwe nukubasusya amwe pachifukwa ichakuti bakapinduka nukuzileka imbibi zyabo bo bivwa u Yona akulumbilila. Ilelo nkubabuzya ukuti pano pali ichintu chimo ichikulu ukuchila u Yona. Pisiku lilyo u Chala akwiza pakubalonga abantu abankulilo iyi, u mwene umukolo uwamu Sheba akwiza pakuzyuka kubufwe nukubasusya amwe pakuti akenda ukufuma muchisu icha kukwabo pakwivwa ubumanyisi ubwa mahala ubwa Mwene u Solomoni. Ilelo nkubabuzya ukuti pano pali ichintu chimo ichikulu ukuchila u Solomoni.


“Bo umuzimu umubibi ghukwepamo mumuntu, ghukwendakwenda muchisu ichumizu pakulonda ubuzilo ubwakutuzyapo. Nanti ghutakubwagha bumo, ghukunena ukuti, ‘Nkunyokela sona kunyumba yane.’ Po ghukunyokela nukuyagha inyumba yila yite nako kamo mukasi, sona yiswepite nukuyaniziwa akiza. Po ghukubuka kuzi nukusenda iyinji seveni yiyo mibibi nkani ukughuchila uwene, po yikwiza nukwikala mulamula. Pabumalilo akabele aka muntu yula kakuba kabibi ukuchila mumo akabela pakwanda. Ichi cho chicho chikwiza pakubombiwa pakasi pabantu ababibi abankulilo iyi.”


Bo u Yesu achili akunena na bantu bala, unyina na bawamwabo bakafika. Bakimilila kuzi, bakalondagha pakunena nawe. Umuntu yumo akamubuzya u Yesu akati, “Unyoko na bawamwinyu bali kuzi bakulonda pakunena nawe.” U Yesu akamwamula akati, “Nkimba umayi wane wewenu? Nkimba abawamwitu bo bawenu?” Akasonta abamanyili bache nukuti, “Umayi wane na bawamwitu bo aba. Pakuti umuntu wesi yuyo akubomba zizyo Utata wane uwakumwanya akulonda, we wamwitu, we muyemba wane, sona we mayi wane.”

سنیں Matayi 12