Izere - 2006 WBT (NT) Drama

Kadiding tá fa karak, yong ágbang átsi ne ásho̱n cice̱r nyim. Á ta nye ibo̱ro̱ng nong á ta fe̱r aYeso. Iyong á tú rosom, á tá tseng'e nufe aBilatus, a tá nye agwo̱mna.
Nizen aYahuza aya a tá re̱p aYeso tá fok ye an te̱n aYeso amok riku, yong a nye riye̱ riwe. A tú bun nufe ágbang atsi ne áko̱k kasho̱o̱n ame nong a ta su ku no̱o̱k ba itso̱m azurfa iso̱k itaar á tá tsang a ku no̱o̱k. Ne a fe̱ ye, “Mi nye rine̱n. Mi tá no̱o̱k aner aya sang a tá nye rine̱n baꞌ.”
Atsi'me ne ásho̱n'e fe̱ be wu ye, “Akye̱ ti daam yir azong a? Iyong nye kudaam wan.”
Ayong aYahuza nyosong itso̱m'e kaye̱e̱r agbang kutu kuya Adakunom iben a tá wuruk. A tá se te kudun nuto̱.
Agbang atsi'me sok itso̱m'e ne á fe̱ ye, “I se gye̱r a ta sak itso̱m na kaye̱e̱r ingme̱ yir ife kutu kuya Adakunom iben baꞌ, kamok itso̱m na nye itso̱m naso̱k.” Iyong á nye ibo̱ro̱ng nong á tá sok itso̱m'e á tin shan karo̱ á tin no̱k nadonong nong a tin ne̱se̱k áner aya a ta nye atsen. Kamok anong ne a yis karo̱'me kyo̱o̱rna ye, “Iwe̱ng naso̱k.” Be anong ne a shining ike̱ng Irimiya aner kuzarap tá fe̱ shining a tá fe̱ ye, “A sok itso̱m azurfa iso̱k itaar. Itso̱m áner Isarela tin karang ni wu. Á sok á tin shan karo̱ á tin no̱k nadonong, kyo̱ndi Agwo̱m Ágwo̱m tá fe̱ be mi.”


Nizen iya aYeso tá se nunyeseng nasho̱o̱n agwo̱mna'me yong a tú ku rip ye, “Wan ne i nye agwo̱m aner aYahuda a?”
Ne aYeso fe̱ be wu ye, “Wan ne wan fe̱ anong.”
Nizen ágbang atsi ne áko̱k kasho̱o̱n tá fe̱ ike̱re̱ ame be wu ko aYeso ti sak kanu baꞌ. Ayong aBilatus fe̱ be wu ye, “Wan fok ike̱re̱ á tin fe̱ natoon wan aꞌa?” Amma aYeso tú sak ko'me baꞌ, ma agwo̱mna'me te zhing.


To̱, izen aPasova tá fa nye, i nye izen iya agwo̱mna tan me̱ ne a turung aner akak a tá se ni itso̱m aya ánerawe ta shim. Nizen iyong, ba be aner akak a tú ku ren dide̱ng a ta se ni itso̱m, a tú ku yis ye, aBarabas. Áner aYahuda'me tá fa nyim ne aBilatus ku rip ba ye, “Angan ne yin shim yin mi ta ka tun yin'e e̱? aBarabas ka aYeso aya a tú ku yis ye aKiristi e̱?” Kamok wu ren tseng tseng ye kamok rishishim ne á be̱ be aYeso nufu.
Nizen aBilatus tá se nusonong natoon itsik amok, yong abining wu tom kutom nufu ye, “Kam be itak aner na sang a tá nye rine̱n baꞌ, kamok mi so̱ risam nashirim ni nabos natoon wu.”
To̱, ágbang atsi ame ne ásho̱n'e whap ánerawe'me ye á ra fe̱ ye, a ra won aBarabas nong a ta fe̱r aYeso.
Agwo̱mna'me bun a fe̱ be ba ye, “Angan kaye̱e̱r áner afa na ne yin shim yin mi ta ka won yin'e e̱?”
Iyong áner'e fe̱ ye, “aBarabas.”
Ne aBilatus fe̱ be ba ye, “To̱, mi ta nye ane̱ be aYeso a tú ku yis ye, aKiristi e̱?”
Cice̱r ba fe̱ ye, “A ku tigak.”
Ne aBilatus fe̱ ye, “Kamok akye̱ e̱? A nye rine̱n akye̱ e̱?” Ánerawe bun a te barang kutasak ingya ye, “A ku tigak.”
aBilatus tá di sang ba shishing kuto̱ro̱ng ba baꞌ, ne á bun á shim á ta dorok be riwo̱ng, yong a bo̱ ashi a tin kusu ibo̱k wu nasho̱o̱n ba ne a fe̱ ye, “Ibo̱k'i kuso̱k, naso̱k aner na se rice mi baꞌ. Yin tà fok yin'e.”
Iyong ánerawe'me cice̱r fe̱ ye, “Ei, won naso̱k wu tuse natoon ace yir, yir be inoon yir.”
Ayong a tu won ba aBarabas, ne a whereng aYeso ne a ku no̱o̱k ba nong á ta su ku tigak.


Nama anong ásozha aBilatus'e sok aYeso nong á ta tseng'e kaye̱e̱r kugbang aBilatus'e nong a tin tusung rigwo̱m ásozha natoon wu. Ne á ku turung ares, a tú ku te ko kukak kuseng kuri kufe agwo̱m. Á kunung ikiritsan nong á tú ku te'me rice kyo̱ndi ribong rigwo̱m. Á tú ku no̱o̱k ishe̱n a tá yiir nubo̱k ne á ma nye gung nasho̱o̱n wu ne á nye be wu kye̱re̱ ne a fe̱ ye, “Dazha, agwo̱m áner aYahuda.” Ne á ku tang ace̱ ne á ni shan ishe̱n ame nufu. Á yiir ku tsosok mo rice. Nama á tá nye be wu kye̱re̱ ne á tun kukpiin kuseng ame ne á bun ku te ares wu. A ma tseng be wu, á ta su ku tigak.


Á ta se be itseng be aYeso ame, ne á yin be aner aSirin akak a tú ku yis ye, aSiman, a tú ku te agap a tá cer kukon kutigak aYeso'me. Á tseng naro̱ kakak a tá yis ye, aGolgota (i ta sor karo̱ áho̱karo̱k ace). Á no̱o̱k aYeso'me ashi anap a tin kare̱ be ike̱ng ikak i ta rereng, amma aYeso tá fa fok, a gaar kuso̱'me. Nama a tá tigak aYeso'me, á ti nye kukasa be kubarak ikiriwhe̱r natoon ares'e ne á kasap. Ne á sosok kaben nong á tu ku tor. Nabas rice wu, a ti nye izibir kuri rine̱n a tá ye, “AYU NE A NYE AYESO, AGWO̱M ÁNER AYAHUDA.” A tigak ágbang akpatang akak afa mak be wu, azining nabas kubo̱k riya ne azining nabas kubo̱k rimen. Áfe a tá gosok niren yiir fe̱ kye̱re̱ be wu, ne á zim rice, ne á fe̱ ye, “Wan afe i tana yirik agbang kutu kuya Adakunom iben ne i bun i no̱k kaye̱e̱r inom itaar, shesh rice wan'e. Ke wan nye Igon Adakunom, to̱, ne i tiik kaben.”
Anong ne ágbang atsi be áfe kubo̱so̱p itsi ne ásho̱n fe̱ be wu kye̱re̱. “A shesh ákak, amma ko a kyem a shesh rice wu baꞌ. Ke wu ne a nye agwo̱m áner Isarela, a ra tiik kaben nong yir tin no̱o̱k yir katsak ni wu. A ti fe̱re̱ng na Adakunom. Won Adakunom'me tu ku shesh. Wu fe̱ ye wu nye Igon Adakunom.” Anong ne ágbang akpatang aya a tú ku tigak ba mak be wu fe̱ kye̱re̱ gip.


Kum natite kunom, kaben cice̱r te whi ma nabas itso̱m itaar. Nabas itso̱m itaar aYeso tá kuto̱ naza ye, “Eloi, Eloi, lama sabatani?” I ta sor ye, “Adakunom mi, Adakunom mi, akye̱ sak wan tin won kpe̱de̱ng ana e̱?”
Áner ákak kaye̱e̱r aya a tá se nunyeseng azong tá fa fok ike̱ng iya a tá fe̱ yong á fe̱ ye, “Aner na yis Iliya.”
Ayong akak kaye̱e̱r ba tseng gbashak, nong a ta se sok asoso, a tin bo̱ akpukpak ashi a ta rosom nanu kuse̱ a ta nabak aYeso'me nong a ta so̱. Ne ákak ba fe̱ ye, “Ku won yin tá di yir ka Iliya tà be̱ a tú ku shesh'e.”
Ayong aYeso bun a tá kuto̱ naza ife afa gbak, ne a ko̱ro̱k isong wu ife igang'e.
Nizen iyong alaple aya a ta se kaye̱e̱r agbang kutu kuya Adakunom iben wor a sarak natite kpak ma kaben. Kaben zuur ne ata tasak. Are̱k karak ne áya a tá tsang á kus á tá nye azhe̱l'e bun á dorok be kutser, á wuruk kaye̱e̱r are̱k ba. Nama aYeso tá dorok nure̱k, á tseng kaye̱e̱r kuwo̱p kuzhe̱l'e, ánerawe whe̱re̱ tú di ba anyisi be anyisi.
Nizen ako̱k kasho̱o̱n ásozha ne ribir aya a ta se mak be wu ni itor aYeso tá fok kaben ta zuur ne ike̱re̱ cice̱r i tá nye, á fok inyim dide̱ng yong á fe̱ ye, “Katsak'e aner na nye Igon Adakunom.”
Ányining akak whe̱r a tá tsang a kuus aYeso'me kum na aGalili se azong, á tin sak riye̱ ni wu. Á nyeseng gugo̱k nong á tu ku ye̱re̱k. Kaye̱e̱r ba ákak nye aMarya aMagadaliya, be aMarya anyining aYakub be aYusufu, ne anyining inoon aZabedi.


Kawheshirim tá fa nye, yong arum akak, a tú ku yis ye aYusufu, aner Arimatiya, a tá nye alimazhiri aYeso gip. A tseng nufe aBilatus, a tá su ku rip kukom aYeso'me, yong aBilatus'e shim a tú ku no̱o̱k. Ayong aYusufu sok kukom aYeso'me, a tá kunung be kures kukan kufas. Ne a se ne̱r nure̱k wu kufas kuya wu tá nye nafar kuta. Ne a tosom agbang kuta a ti whe̱e̱n kanu kure̱k'e a ta tseng. aMarya aMagadaliya ne aMarya afe afa'me se nusonong azong, ne á ye̱re̱k kure̱k'e.

Kaya katson'e nama kunom kunye kanye̱k kunom Asabar, ágbang atsi ne áner aFarisi tseng nufe aBilatus. Á tá fe̱ be wu ye, “Kunom ra be rigwo̱m, yir ru yiring yir be ike̱ng aner abo̱o̱s ame tá fe̱ kum ne a rusek be kutser ye nama inom itaar a ta bun a dorok be kutser. Kamok anong, sak a ta se tor kure̱k'e ma kuko̱s kutaar fan álimazhiri wu bu se tun kukom'e nitsang nong á ta fe̱ ye a dorok nure̱k. Abo̱o̱s afe igang'e na ta risik ne a nar afe ime̱se̱ng'e.”
aBilatus fe̱ be ba ye, “Bo̱ yin ásozha ta tseng yin ta se nye yin ike̱ng ife yin tana kyem i nye yin.” Iyong á tseng á ta se tor kure̱k'e, ne á ni te izizo̱ nong a ta ren ka akak ra kuta'me, ne á ni sak ásozha nong á ta tor karo̱'me.

سنیں aMatiyu 27