Kinga: Ʉtesitamentɨ Ʉmpya mu nzovele jya Kɨkɨnga (New Testament+)

Ʉtesitamentɨ Ʉmpya mu nzovele jya Kɨkɨnga

Wʉ ʉYɨɨsʉ alɨweene ɨlipʉga ɨlyo ɨlya vaanu, akatoga navo kʉ kɨdugala, akataama. Wʉ ataamile, avakongi va mwene vakiitsa kʉ mwene, ʉYɨɨsʉ akatengʉla ʉkʉvamanyiisa akata,
“Vagatalʉsu ʉwʉ vɨmanyile ʉkʉta vagatsu mu numbula,
manya ʉLʉdeeva lwa Kʉkyanya lwa veene.
Vagatalʉsu ʉwʉ valɨ nʉ lʉsʉsʉvalo,
manya ʉNgʉlʉve alavatseesa.
Vagatalʉsu ʉwʉ vadeke,
manya ʉNgʉlʉve alavapa ɨkɨlʉnga kyoni.
Vagatalʉsu ʉwʉ valɨ nɨ nzala nɨ kyʉmɨlwa kya kʉvomba itsa vʉgolosu,
manya ʉNgʉlʉve alaviigusa.
Vagatalʉsu ʉwʉ vikʉvakolela ɨkɨsa avange,
manya ʉNgʉlʉve alavakolela ɨkɨsa naveene.
Vagatalʉsu ʉwʉ valɨ nɨ numbula mbalasu,
manya valambona ʉNgʉlʉve.
Vagatalʉsu ʉwʉ visajania avaanu,
manya ʉNgʉlʉve alavavɨɨka vave vaana va mwene.
Vagatalʉsu ʉwʉ vikʉvɨlwa kʉ nongwa jya kʉvomba itsa vʉgolosu,
manya ʉLʉdeeva lwa Kʉkyanya lwa veene.
“Mulɨ vagatalʉsu ʉnyie ɨngave avaanu vikʉvadʉka, vikʉvapelela ʉvʉkʉvɨlwa nʉ kʉvanwangʼila ʉvʉviivi ʉvʉlɨ pongosu kʉ nongwa jyane. Hekelagi nʉ kʉhovoka, manya ʉNgʉlʉve avavɨɨkye ʉlʉhombo ʉlʉlʉti kʉkyanya, ʉlwakʉva vʉle vʉle wʉ vaavavombye avanyamalago ʉwʉ vaalongwe pavʉlongolo paanyie.


“Ʉnyie mulɨ mwinyo gwa kɨlʉnga. Lɨno gʉngave gʉnangiike, ndeeti, kʉlɨ kɨɨnu ɨkiweesa ʉkʉkilivula ikange ʉlʉnogo lwa gwene? Apo jisiita ʉkʉva nʉ lʉnogo ikange. Ʉmwinyo ʉgwa gwiva gwa kʉtaagwa kʉnzi, gʉkadwagwe na vaanu.
“Ʉnyie mulɨ lʉmuli lwa kɨlʉnga. Ʉvʉtsenge ʉvʉtsengilwe pakyanya pa kɨdugala, navuweesa ʉkʉsihama. Ikange, avaanu navipamba ɨnyaale nʉ kʉgubikila nɨ kɨtʉndʉ, apeene vikʉjɨvɨɨka pakyanya pa kɨdʉlɨkɨlo kya nyaale pakʉta ɨvamulikilage avaanu vooni ʉwʉ valɨ mu nyumba. Vʉvʉle vʉle nalʉ lʉmuli lwinyo lʉnogye lumulikage kʉ vaanu pakʉta vave vikʉtsivona imbombo tsiinyo inonu, vanʼginiage ʉDadajiinyo ʉvɨ alɨ kʉkyanya.

“Muleke ʉkʉsaaga ʉkʉta nditsile kwita ndɨhetse indagɨlo tsa Moose, evo ʉgwʉ gatsowaagwa na vanyamalago. Baako, nanditsili kwita ndɨhetse, apeene kuvɨɨka tsivombeke itso tsyoni itsitsovilwe. Tsa jɨlweli, ndikʉvavʉʉla ʉkʉta ʉkʉsikila ʉnsɨkɨ ʉpwʉ ʉvʉtandaatse nɨ kɨlʉnga silahega, navʉkʉli ʉvʉvɨge nʉvʉpamato ʉvʉdebe ʉwa ndagɨlo pange ɨsopelo ɨndebe mamato ɨjɨlahega ʉkʉsika ʉpwʉ tsyoni tsilavombeka. Ʉmuunu ʉvaveetsaga ʉvɨ ibeda ʉlʉlagɨlo lʉpamato mu ndagɨlo itso ndalʉve lʉdebe, iita ʉkʉvamanyiisa avange ʉkʉta naveene vatsibede, ʉjwa vɨ mwene alatsowa ʉkʉta vɨ nʼdebe mu Lʉdeeva lwa Kʉkyanya. Apeene ʉmuunu ʉvaveetsaga ʉvɨ ikʉtsikonga nʉ kʉvamanyiisa avange ʉkʉta naveene vavombage ewo, ʉjwa vɨ mwene alatsowa ʉkʉta vɨ mbaha mu Lʉdeeva lwa Kʉkyanya. Ndikʉvavʉʉla ʉkʉta ɨngave ʉvʉgolosu wiinyo navulʉtɨɨlɨla ʉvʉgolosu wa Vafalisayo nʉ wa vamanyisi va ndagɨlo, namuliingile lʉsiku mu Lʉdeeva lwa Kʉkyanya.


“Mupʉliike ʉkʉta avaanu va katale vaavʉʉlilwe ʉkʉta, ‘Ʉlabudaga,’ nʉ kʉta ‘ʉmuunu ʉvaveetsaga ʉvɨ ibuda, anogye ahɨgwe.’ Lɨno ʉne ndikʉvavʉʉla ʉkʉta ʉmuunu ʉvaveetsaga ʉvɨ ikʉmbiipila ʉlʉkololwe, anogye ʉkʉhɨgwa. Ikange, ʉmuunu ʉvaveetsaga ʉvɨ ikʉnʼdʉka ʉlʉkololwe iita intsimu, anogye ahɨgwe pa lʉlʉndamano. Ikange, ʉmuunu ʉvaveetsaga ʉvɨ ikʉnʼdʉka ʉlʉkololwe iita mpelwa, anogye ʉkʉtaagwa mu mwoto gwa sikutsooni!
“Lola, ʉngave ʉlɨ pa kʉhʉmya isyavʉpe pa kɨteekelelo, lɨno vukʉmbʉhɨtsa ʉkʉta ʉlʉkololwo alɨ nʉ lʉviipo nʉʉve, sileke taasi isyavʉpe isyo pa kɨteekelelo, bɨha ʉkasajane taasi nʉ lʉkololwo ʉlya. Pwʉ wiitse kuhʉmya isyavʉpe syako isyo.
“Ikange, angave ʉndʉgʉ vaako ibɨha kukʉkʉhɨlɨka kʉ mmɨgi, ngʼaningʼaani ʉnʼdoove pakʉta musajane wʉ mulɨ mu nzɨla. Ʉngaleke ʉkʉvomba ewo, ʉmuunu ʉjwa ikʉkʉvɨɨka mu sivoko sya mmɨgi. Pwʉ ʉmwene ikʉkʉtaaga mu kɨkʉngwa. Tsa jɨlweli, ndikʉkʉvʉʉla ʉkʉta nʉkahʉme mu nʼgati ʉmwa ʉkʉsikila ʉpwʉ wimala ʉkʉhomba ʉntsigilo gwoni!

“Mupʉliike ʉlʉlagɨlo ʉlwita, ‘Ʉlaligupaga.’ Lɨno ʉne ndikʉvavʉʉla ndiita ʉmuunu ʉvaveetsaga ʉvɨ ikʉndola ʉnʼdala kʉ vʉpʉmu wa vʉligu, iveetsaga amalile ʉkʉligupa nave mu numbula jya mwene. Lɨno ɨngave ɨliiho lyako lya kʉndyo likʉkʉpelela ʉvombe imbiivi, lyomokole nʉ kʉlɨtaaga, manya lʉnonu ʉkʉjatsa kɨpamato mu sipagɨka sya mmana gwako, ʉkʉlʉtɨɨlɨla nʉ kʉtsitaagwa kʉ mwoto gwa sikutsooni ʉmmana gwako gwoni. Ikange, ɨngave ɨkɨvoko kyako kya kʉndyo kikʉkʉpelela ʉvombe imbiivi, dumula nʉ kʉtaaga, manya lʉnonu ʉkʉjatsa kɨpamato mu sipagɨka sya mmana gwako, ʉkʉlʉtɨɨlɨla nʉ kʉtsitaagwa kʉ mwoto gwa sikutsooni ʉmmana gwako gwoni.


“Ikange, mupʉliike ʉlʉlagɨlo ʉlwita, ‘Ʉmuunu ʉvaveetsaga ʉvɨ ikʉndeka ʉnʼdala, ampeetsage ɨkalata ɨjya kʉndeka.’ Lɨno ʉne ndikʉvavʉʉla ʉkʉta ʉmuunu ʉvaveetsaga ʉvɨ ikʉndeka ʉnʼdala, ʉvɨ navombili ʉvʉligu, ikʉmpela ʉnʼdala va mwene ave ndigu. Ikange, najyʉ muunu ʉvaveetsaga ʉvɨ itegʉla ʉnʼdala ʉvɨ alekilwe nʉ nʼgoosi, pwʉ namwene iligupa.

“Mupʉliike ʉkʉta avaanu va katale vaavʉʉlilwe ʉkʉta, ‘Mungave mukɨjyɨga pamiiho ga Ntwa ʉNgʉlʉve, mulagelaga ʉkʉnanga ikange. Apeene muvombage ndʉwʉ mukɨjyɨgile.’ Lɨno ʉne ndikʉvavʉʉla ndiita mulɨjyɨgaga lʉsiku, pange kwɨjyɨgɨla kʉkyanya, manya ɨkyo kyʉ kɨtaamilo kya Ngʉlʉve, evo mulɨjyɨgɨlaga kʉ kɨlʉnga, manya pwʉ peene ʉNgʉlʉve ivɨɨka isilʉnde sya mwene. Pange mulɨjyɨgɨlaga kʉ vʉtsenge ʉwa Yelusalemu, manya wʉ vʉtsenge wa Nkʉlʉdeeva ʉNdʉti. Ikange, mulɨjyɨgɨlaga kʉ mitwe giinyo, manya namuweesa ʉkʉhambʉla nalʉ lʉjwɨlɨ lʉpamato lwa nzwɨlɨ tsiinyo lʉve lʉvalasu evo lʉtiitu. Mungave mukwɨdɨka ɨkɨɨnu muteetsage eena, evo mungave mubeela ɨkɨɨnu muteetsage baako, manya gooni ʉgwʉ gilʉtɨɨlɨla paago, gihʉma kʉ ntavangwa ʉlya.


“Mupʉliike ʉlʉlagɨlo ʉlwita, ‘Ɨliiho kʉ liiho nɨ liino kʉ liino.’ Lɨno ʉne ndikʉvavʉʉla ʉkʉta mulekage ʉkwɨmɨlanila na vaanu avikʉvavombela imbiivi. Apeene ɨngave ʉmuunu akʉtovile ʉlʉtseetse lwa kʉndyo, inʼgalamulile nʉ lwa kʉngʼɨgɨ. Ikange, ɨngave ʉmuunu akʉhɨliike pa vʉhɨgi kʉ vʉsumbe wa kʉpoka ɨkanzo jyako, indeke atoole nalɨ likoti. Ikange, ɨngave ʉmuunu akwʉmɨɨliitse ʉkʉpɨmba ʉntsigo gwa mwene ʉvʉtale wa kilomita mamato, ʉve pɨmba ʉntsigo ʉgwa ʉvʉtale wa kilomita ivɨlɨ. Ikange, ɨngave ʉmuunu ikʉkʉdoova ɨkɨɨnu, impe. Ikange, ɨngave ʉmuunu inogwa ʉkʉkopa, ʉleke ʉkʉmʼbeelela.


“Mupʉliike ikange ʉlʉlagɨlo ʉlwita, ‘Ʉnʼganage ʉnnino, nʉ kʉnsʉʉla ʉndʉgʉ vaako.’ Lɨno ʉne ndikʉvavʉʉla ʉkʉta muvaganage avalʉgʉ viinyo. Ikange, muvadoovelage kwa Ngʉlʉve vooni ʉwʉ vikʉvapelela ʉvʉkʉvɨlwa. Apo mwiva vaana va Dadajiinyo ʉvɨ alɨ kʉkyanya, manya ʉmwene ivɨɨka ʉlʉtsʉva lʉvalage kʉ vaanu aviipa na vavejangi. Ikange, ivɨɨka ɨsula jɨtimage kʉ vagolosu nakʉ kʉ vatulanongwa. Mungave mukʉvagana valya veene ʉwʉ vikʉvagana ʉnyie, pwʉ veeni avasaane ʉnyie? Ndeeti, avasangʉtsi va songo naveene navikʉvagana valya veene ʉwʉ vikʉvagana aveene? Ikange, mungave mukʉvasaamusa avalʉkololwinyo veene mwiva muvomba kɨki ɨkya kʉlʉtɨɨlɨla? Lola, nʉ wʉ navikʉmwɨdɨka ʉNgʉlʉve naveene vivomba vʉvʉle vʉle! Pwʉ muveetsage vagolosu ndʉwʉ ʉDadajiinyo ʉvɨ alɨ kʉkyanya inʼgolosu.

سنیں Mataayo 5