These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᒋ ᑕᐤ ᓇᐸᐤ ᓂᑯᑎᒪᔅ ᐊ ᐃᓯᓂᐧᑲᓱᑦ, ᐸᕆᓯ ᒋ ᐃᑎᐳᐤ ᑭᔭ ᐊᐅᑯᓐ ᐊᓐ ᐸᐃᒄ ᑲ ᓂᑲᓂᔅᑯᐛᑦ ᒍᐤ ᐃᔪᐛ᙮ ᐸᐃᒂᐤ ᒪᒃ ᐊ ᑎᐱᔅᑲᔨᒡ ᒋ ᓂᑐᐛᐱᒪᐤ ᒋᓴᓴ ᐊᑯ ᒂ ᐃᑕᑦ, “ᒋᔅᑯᑎᒪᒐᓱᐤ, ᒋ ᒋᔅᒐᔨᒥᑎᓇᓐ ᒋᔾ ᒋᔅᑯᑎᒪᒐᓱᐤ ᐊᒋ ᐸᒋ ᐃᑎᓴᐅᔅᒃ ᒋᓴᒪᓂᑐᐤ᙮ ᐛᔅ ᓇᒪ ᐊᐛᓐ ᒋᑭ ᒋ ᐃᑐᑎᒻ ᐊᓂᔭ ᒪᒥᔅᑲᒡ ᐃᑐᐅᓇ ᒋᔾ ᑲ ᐃᑐᑎᒥᓐ ᐊᑲ ᐎᒋᐃᑯᒐ ᒋᓴᒪᓂᑐᐛ᙮”

ᒋᓴᔅ ᒂ ᐃᑕᑦ, “ᑯᐃᔅᒄ ᒋ ᐎᑎᒪᑎᓐ, ᓇᒪ ᐊᐛᓐ ᒋᑭ ᒋ ᐛᐸᑎᒺᐤ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᐸᑐᔅ ᒥᓐ ᐱᒪᑎᓯᒐ᙮”
ᐊᑯ ᓂᑯᑎᒪᔅ ᒂ ᐃᑕᑦ, “ᑕᓐᑕ ᒥᓐ ᒐᒋ ᐅᒋ ᐱᒪᑎᓯᑦ ᐊᐛᓐ ᓴᔅ ᐊᒋ ᐃᓯ ᓂᑕᐅᒋᑦ ? ᓇᒪ ᒥᓐ ᒋᑭ ᒋ ᐱᒐᐛᐤ ᐅᑲᐎᔭ ᐅᔅᐱᔭᔨᒡ ᒥᓐ ᒐᒋ ᐱᒪᑎᓯᑦ᙮”
ᒋᓴᔅ ᒂ ᐃᑕᑦ, “ᑯᐃᔅᒄ ᒋ ᐎᑎᒪᑎᓐ, ᓇᒪ ᐊᐛᓐ ᒋᑭ ᒋ ᐱᒐᐤ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ ᐸᑐᔅ ᓂᐱᒡ ᑭᔭ ᐊᒐᐧᑯᐅᓂᒡ ᐅᒋ ᐱᒪᑎᓯᒐ᙮ ᒥᓯᐛ ᒋᓂᒋᐃᑯᓄᐅᒡ ᐊ ᑕᒡ ᔅᒋ ᐅᒋ ᐊᔭᓇᓄᐤ ᐅ ᐎᔭᔅ ᐱᒪᑎᓯᐅᓐ᙮ ᒥᒄ ᒪᒃ ᑲ ᐸᔭᒋᓯᑦ ᐊᒐᐧᒄ ᐊ ᑕᑦ ᐅᒋ ᐊᑯᑕ ᐛᒋ ᐊᔭᔭᐧᒄ ᐊᒐᐧᒄ ᐱᒪᑎᓯᐅᓐ᙮ ᐊᑲᐎᔾ ᒪᒥᔅᑲᑕᔨᑎᒥᐃᑯᐤ ᐅ ᐊ ᐃᑎᑕᓐ ᐊ ᓂᑐᐛᔨᑕᑯᓯᔨᓐ ᒥᓐ ᒐᒋ ᐱᒪᑎᓯᔨᓐ᙮ ᐊ ᔪᑎᒡ, ᒥᒄ ᐊᓐᑕ ᐛ ᐃᓯ ᔪᑎᒡ ᐊᑯᑕ ᐊ ᐃᓯ ᔪᑎᒡ᙮ ᐸᑕᑯᓐ ᐊ ᔪᑎᒡ ᓇᒪ ᒥᒄ ᒋᔅᒐᔨᑕᑯᓐ ᑕᓐᑕ ᐊᓐ ᐛᒋᐱᔨᒡ ᑭᔭ ᑕᓐᑕ ᐊ ᐃᔅᐱᔨᒡ ᐊᓐ ᐊ ᔪᑎᒡ᙮ ᐊᐅᑯᓐ ᒪᒃ ᒧᔭᒻ ᐊ ᐃᓯᓇᑯᓯᑦ ᑲ ᐸᔭᒋᓯᑦ ᐊᒐᐧᒄ, ᓇᒪ ᒋ ᒋᔅᒐᔨᒪᓄᐤ ᐊᐛᔪᐛ ᒥᓐ ᒐ ᒥᔭᑦ ᐱᒪᑎᓯᐅᓂᔪᐤ᙮”
ᓂᑯᑎᒪᔅ ᒪᒃ ᒋ ᐃᑕᐤ, “ᑕᓐᑕ ᒪᒃ ᒐᒋ ᐅᒋ ᐃᔅᐱᔨᒡ ᐅ ?”
ᐊᑯ ᒋᓴᔅ ᒂ ᐃᑕᑦ, “ᒋᔾ ᐊᐅᒄ ᐸᐃᒄ ᑲ ᒋᔅᑕᔨᒪᑭᓄᐅᑦ ᒋᔅᑯᑎᒪᒐᓱᐤ ᐅᑕ ᐃᔅᕋᐃᓕᒡ, ᐃᔭᐱᒡ ᐊ ᓇᒪ ᒋ ᓂᔅᑐᑐᐅᓐ ᐅ ᑲ ᐃᔅᒋᔄᔭᓐ ? ᑯᐃᔅᒄ ᒋ ᐎᑎᒪᑎᓐ᙮ ᓂᑦ ᐊᔨᒧᑕᓇᓐ ᑕᓐ ᐊ ᐃᓯ ᒋᔅᒐᔨᑎᒪᒡ ᑭᔭ ᑕᓐ ᑲ ᐃᓯ ᐛᐸᑎᒪᒡ ᓇᒪ ᒪᒃ ᐃᔭᐱᒡ ᐛᐛᒡ ᐸᐃᒄ ᒋ ᐎ ᑕᑈᑐᐅᓇᓐ᙮ ᓇᒪ ᒋ ᑕᑈᑐᐅᓇᐛᐤ ᐊ ᐎᑎᒪᑎᑯᒡ ᑕᓐ ᐊ ᐃᔅᐱᔨᒡ ᐅᑕ ᐊᔅᒋᒡ᙮ ᑕᓐᑕ ᒪᒃ ᒐᒋ ᐅᒋ ᑕᑈᑎᒪᒄ ᐎᑎᒪᑎᑯᒐ ᑕᓐ ᐊ ᐃᑕᔨᑕᒂᒡ ᐊᓐᑕ ᒋᒋᒋᓯᑯᒡ ? ᓇᒪ ᒪᒃ ᐊᐛᓐ ᐅᒋ ᐅᐱᔪᐤ ᒋᒋᒋᓯᑯᒡ ᐃᔅ ᒥᒄ ᐃᔪᐤ ᐅᑯᓯᓴᓐ ᒋᒋᒋᓯᑯᒡ ᑲ ᐅᑐᑕᑦ᙮”


ᒧᔭᒻ ᐊᓂᔭ ᑲ ᐃᑎᑦ ᒧᓱᔅ ᒪᒂᒡ ᐸᐧᑯᑎᔅᑭᒥᑲᒡ ᑲ ᑕᒡ ᑲ ᒋᑭᒺᐊᑦ ᒋᓇᐱᑯᐧᑲᓇ ᒥᔅᑎᑯᒡ ᒥᓯᐛ ᐊᐛᔪᐛ ᒐᒋ ᐛᐱᒪᔨᒋ, ᐊᐅᑯᓐ ᒧᔭᒻ ᒐ ᐃᑐᑐᐛᑭᓄᐅᑦ ᐃᔪᐤ ᐅᑯᓯᓴᓐ᙮ ᐊᑯ ᒪᒃ ᒥᓯᐛ ᐊᐛᓐ ᑲ ᑕᑈᔭᔨᒪᑦ ᒐ ᐊᔭᑦ ᑲᒋᒡ ᐱᒪᑎᓯᐅᓂᔪᐤ᙮
ᐛᔅ ᒋᓴᒪᓂᑐᐤ ᐊ ᐃᔅᐱᔅ ᒋ ᓴᒋᐊᑦ ᒥᓯᐛ ᐊᐛᔪᐛ ᐅᑕ ᐊᔅᒋᒡ ᒋ ᒥᔨᐛᐤ ᑲ ᐸᐃᑯᓯᔨᒋ ᐅᑯᓴ, ᒥᓯᐛ ᐊᐛᔪᐛ ᑲ ᑕᑈᔭᔨᒪᔨᒋ ᒐ ᐊᑲ ᒋ ᓂᓱᐅᓇᑎᓯᔨᒋ ᒪᒃ ᒐᒋ ᐊᔭᔨᒋ ᑲᒋᒡ ᐱᒪᑎᓯᐅᓂᔪᐤ᙮ ᐛᔅ ᒋᓴᒪᓂᑐᐤ ᒋ ᐸᒋ ᐃᑎᓴᐛᐤ ᐅᑯᓴ ᐅᑕ ᐊᔅᒋᒡ ᒐᒋ ᐱᒪᒋᐊᔨᒋ ᐊᐛᔪᐛ ᓇᒪ ᐎ ᒐᒋ ᐸᒋ ᓂᓱᐅᓇᒋᒪᔨᒋ᙮
ᐊᓐ ᒪᒃ ᐊᐛᓐ ᒐ ᑕᑈᔭᔨᒪᒂ ᐅᑯᓯᓯᒪᐛ ᓇᒪ ᒋᑭ ᐅᒋ ᓂᓱᐅᓇᒋᒪᑭᓄᐤ, ᐊᓐ ᒪᒃ ᐊᐛᓐ ᒐ ᐊᑲ ᑕᑈᔭᔨᒪᒂ ᓴᔅ ᓂᓱᐅᓇᒋᒪᑭᓄᐤ ᐛᔅ ᓇᒪ ᑕᑈᔭᔨᒪᐤ ᐊᓂᔭ ᒋᓴᒪᓂᑐᐛ ᑲ ᐸᐃᑯᓯᔨᒋ ᐅᑯᓯᔪᐛ᙮ ᐛᔅᑕᐅᓐ ᒋ ᐸᒋ ᐱᔅᑎᓇᑭᓄᐤ ᐅᑕ ᐊᔅᒋᒡ ᒥᒄ ᒪᒃ ᐃᐛᒃ ᒋ ᐃᑕᔨᑎᒧᒡ ᐊᐛᓐᒋ ᐅᓂᑎᐱᔅᒋᓯᐅᓂᒡ ᒐᒋ ᐃᓯ ᐱᒪᑎᓯᒡ ᐃᔅᐱᔅ ᐎ ᐛᔅᑕᐅᓂᒡ ᒐᒋ ᐃᓯ ᐱᒪᑎᓯᒡ, ᐛᔅ ᒋ ᒥᒐᑎᓯᐅᒡ᙮ ᐊᔪᐅᒄ ᒪᒃ ᐅᔭ ᒐ ᐅᒋ ᑎᐸᔅᑯᓇᑭᓄᐎᒡ᙮ ᐊᓐ ᒪᒃ ᐊᐛᓐ ᑲ ᒥᒐᑎᓯᑦ ᐛᐧᑲᑎᒻ ᐊᓂᔭ ᐛᔅᑕᐅᓂᔪᐤ ᓇᒪ ᐎ ᓇᑎᒻ ᐛᔅ ᓇᒪ ᓂᑐᐛᔨᑎᒻ ᒐᒋ ᓄᑯᓂᔨᒡ ᐅᒥᒐᑎᓯᐅᓐ ᐊᓐᑕ ᐊ ᐛᔅᑕᔨᒡ᙮ ᒥᒄ ᒪᒃ ᐊᓐ ᐊᐛᓐ ᑕᑈᐅᓂᒡ ᑲ ᐃᓯ ᐱᒪᑎᓯᑦ ᐊᓐᑕ ᐊ ᐛᔅᑕᔨᒡ ᑕᐤ ᑭᔭ ᐊ ᓄᑯᓂᔨᒡ ᑕᓐ ᐊ ᐃᓯ ᓂᓇᐃᑐᐛᑦ ᒋᓴᒪᓂᑐᐛ᙮

ᐊᓐᑕ ᒍᑎᔭ ᐊᔅᒋᒡ ᒋ ᐃᑐᑕᐤ ᒋᓴᔅ ᐅᒋᔅᒋᓄᐊᒧᐛᑭᓐ ᐊ ᐎᒐᐅᑯᑦ᙮ ᐊᑯᑕ ᐊᓐᑕ ᑲ ᑕᒡ, ᒋᓴᔅ ᒪᒃ ᒋ ᓯᑲᐃᑕᒐᐤ᙮ ᑭᔭ ᐎᔾ ᒠᓐ ᒋ ᓯᑲᐃᑕᒐᐤ ᐊᓐᑕ ᐊᐃᓄᓐ, ᓇᒪ ᐛᔪᐤ ᐊᓐᑕ ᐅᒋ ᓴᓕᒥᒡ ᐛᔅ ᓇᔅᒡ ᒋ ᒥᓴᔪᐤ ᓂᐱᔪᐤ ᐊᓐᑕ᙮ ᒧᔅ ᒋ ᓂᑐᐛᐱᒥᑯᐤ ᐊᐛᔪᐛ ᐊ ᓂᑐᐛᔨᑎᒥᔨᒋ ᒐᒋ ᓯᑲᐃᑐᐛᑦ, ᒋ ᓯᑲᐃᑐᐛᐤ ᒪᒃ᙮ ᐊᐅᒄ ᐅᔭ ᑲ ᐃᑎᑦ ᒠᓐ ᐊᔅᒄ ᐊᑲ ᐅᒋ ᒪᑯᓇᑭᓄᐅᑦ᙮
ᐱᔅᒐ ᒪᒃ ᐊᓂᔭᔪᐛ ᒠᓐ ᐅᒋᔅᒋᓄᐊᒧᐛᑭᓇ ᑭᔭ ᑯᑎᑭᒡ ᒍᐤ ᐃᔪᒡ ᒋ ᒥᒋᐱᔪᒡ ᐊ ᐊᔨᒧᑕᒡ ᐊᔭᒥᐊᐅ ᐸᔭᒋᐃᐛᐅᓂᔪᐤ᙮ ᒋ ᓂᑐᐛᐱᒪᐅᒡ ᒠᓇ ᐊᑯ ᒂ ᐃᑕᒡ, “ᒋᔅᑯᑎᒪᒐᓱᐤ, ᐊᓐ ᓇᐸᐤ ᑕᐱᔅᑯᓐ ᑲ ᑕᔭᒄ ᐊᓐᑕ ᐛᐱᓄᑕᒡ ᐊᓐ ᒠᕐᑕᓐ ᓯᐱᔾ, ᐊᓐ ᑲ ᐊᔨᒧᒥᑦ, ᐊᓄᒡ ᑭᔭ ᐎᔾ ᓯᑲᐃᑕᒐᐤ ᑭᔭ ᒥᓯᐛ ᐊᐛᔪᐛ ᓂᑐᐛᐱᒥᑯᐤ᙮”
ᒠᓐ ᒪᒃ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᓇᒪ ᐊᐛᓐ ᒋᑭ ᒋ ᐃᑐᑎᒻ ᒐᒂᔪᐤ ᐸᑐᔅ ᒋᓴᒪᓂᑐᐛ ᐃᑕᔨᒥᑯᒐ ᒐᒋ ᐃᑐᑕᐧᒃ᙮ ᒋᔨᐛᐤ ᒪᒃ ᔅᒋ ᐸᑐᐅᓇᐛᐤ ᐅ ᑲ ᐃᔅᒋᔄᔭᓐ, ‘ᓇᒪᔭᐤ ᓂᔾ ᐊᓐ ᙭ ᒥᒄ ᒪᒃ ᓂᒋ ᐸᒋ ᓂᑲᓂᑎᓯᐅᑯᓐ ᓂᔾ ᒐᒋ ᐊᔨᒧᒥᒃ᙮’ ᒧᔭᒻ ᐅᔅᒋᓂᐳᐛᓐ ᐎᔾ ᑎᐸᔨᒪᐤ ᐊᓂᔭ ᐅᔅᒋᐃᔎᐛ᙮ ᐊᓂᔭ ᒪᒃ ᐅᐎᒐᐛᑭᓇ ᐊᓐ ᐅᔅᒋᓂᐳᐛᓐ, ᐊᓂᔭ ᑲ ᐎᒋᐃᐛᔨᒋ ᐊᓱᐛᐱᒥᑯᐤ ᒐ ᐃᔅᐱᔅ ᑎᑯᓯᐧᒃ ᑭᔭ ᒥᔽᔨᑎᒥᔪᐛ ᐃᔅᐱ ᐱᔭᑕᑯᑦ᙮ ᐊᐅᑯᓐ ᒪᒃ ᒧᔭᒻ ᑭᔭ ᓂᔾ ᐊ ᐃᔅᐱᔅ ᒥᔽᔨᑎᒪᓐ ᓴᔅ ᐊ ᑕᑦ ᐊᓐ ᑲ ᐸᒋ ᐃᑎᓴᐅᑯᑦ ᒋᓴᒪᓂᑐᐛ᙮ ᐃᑕᔨᑕᑯᓂᔪᐤ ᒪᒃ ᐎᔾ ᐊᑐᐎᔅ ᒐᒋ ᐊᑎ ᒋᔅᑕᔨᒪᑭᓄᐅᑦ ᐊᑯ ᓂᔾ ᐊᔭᔅᒃ ᒐ ᐊᑲ ᒋ ᐃᔅᐱᔅ ᒋᔅᑕᔨᒥᑯᔭᓐ᙮”

ᐛᔅ ᐊᓐ ᐃᔅᐱᒥᒡ ᑲ ᐅᑐᑕᑦ ᐊᐅᒄ ᐊᓐ ᐊᑐᐎᔅ ᐊ ᐃᔅᐸᔨᑕᑯᓯᑦ᙮ ᐊᓐ ᐊᔅᒋᒡ ᑲ ᐅᒋᑦ, ᐊᔅᒋᒡ ᐃᓯ ᐱᒪᑎᓯᐤ, ᑭᔭ ᐊᔅᒋᔪᐤ ᐊᔨᒧᑎᒻ᙮ ᐊᓐ ᐊᐛᓐ ᒋᒋᒋᓯᑯᒡ ᑲ ᐅᒋᑦ ᐎᔾ ᓇᔅᒡ ᐃᔅᐸᔨᑕᑯᓱᐤ᙮ ᐎᑎᒻ ᑕᓐ ᑲ ᐃᓯ ᐛᐸᑕᐧᒃ ᑭᔭ ᑕᓐ ᑲ ᐃᓯ ᐸᑕᐧᒃ ᐊᓐᑕ ᒋᒋᒋᓯᑯᒡ ᒥᒄ ᒪᒃ ᓇᒪ ᐊᐛᔪᐛ ᑕᑈᑕᑯᐤ᙮ ᐊᓐ ᐊᐛᓐ ᑲ ᐅᑎᓂᒺᑦ ᑕᓐ ᐊ ᐃᔅᒋᔄᔨᒋ ᐊᑯᑕ ᐊ ᓄᑯᓂᔨᒡ ᐊ ᑕᑈᑕᐧᒃ ᒋᓴᒪᓂᑐᐛ ᐊ ᑕᑈᐅᒐᔨᑕᑯᓯᔨᒋ᙮ ᐊᓐ ᑲ ᐸᒋ ᐃᑎᓴᐅᑯᑦ ᒋᓴᒪᓂᑐᐛ ᐃᔅᒋᔄᐤ ᑕᓐ ᐊ ᐃᓯ ᒥᔨᑯᑦ ᒋᓴᒪᓂᑐᐛ ᒐᒋ ᐃᔅᒋᔄᑦ ᑭᔭ ᓇᔅᒡ ᐱᒋᔅᑲᑯᐤ ᒋᓴᒪᓂᑐᐛ ᐅᑦ ᐊᒐᐧᑯᔪᐛ᙮ ᐅᑕᐎᒪᐤ ᓴᒋᐊᐤ ᐅᑯᓯᓯᒪᐛ᙮ ᒋ ᒥᔭᐤ ᒥᓯᐛ ᒐᒂᔪᐤ ᒐᒋ ᐎᓱᑎᒥᔨᒋ᙮ ᐊᓐ ᒪᒃ ᐊᐛᓐ ᑲ ᑕᑈᔭᔨᒪᑦ ᐅᑯᓯᓯᒪᐛ ᐊᔭᐤ ᑲᒋᒡ ᐱᒪᑎᓯᐅᓂᔪᐤ, ᐊᑯ ᐊᓐ ᐊᐛᓐ ᐊᑲ ᓂᓇᐃᑐᐛᑦ ᐅᑯᓯᓯᒪᐛ ᓇᒪ ᒋᑭ ᐅᒋ ᐊᔭᐤ ᑲᒋᒡ ᐱᒪᑎᓯᐅᓂᔪᐤ᙮ ᒋᓴᒪᓂᑐᐛ ᐅᑦ ᐊᐧᑯᔪᐛᓱᐅᓂᔪᐤ ᒋᑭ ᒪᑎᑯᔅᑲᑯᐤ᙮

سنیں ᒠᓐ 3