Nugunu - 2017 CABTAL (NT) Drama

Kɔ́ɔ Befelisiéŋe bɔ́ ɔ́bɔmɔ́ ŋgoyáamɔ́ ya goŋaá Yésusu a lɛ́ na gɛca gá behúúní, a yumeninye tɔ́nɔ gɛca gá batɔ a dómba Sáŋa. Mammana, Yésusu moatɛ́ moatɛ a dɛ mbáa lɛ a yumeninye batɔ, behúúní bɛ́hɛ́ bɔ́ɔ bá mbaá lɔmɔ́ bá yumeninye. Aŋa Yésusu a mbɔɔ́ ɔ́bɔ́ bɔ́ɔbɔ batɔ bá mbaá lɛ bá gálagala go busío bɛ́hɛ́, gɛ́hɛ́ go úlukie naá Yudée a báá gundé naá Gelilée. Go go ɛ́da hɔ́ɔ, a mba lɛ́ a háanana go báca Samalɛ́ɛ. Nɔ́ɔnɔ gɔ́ɔ ɛ ɛ́damɔ́ bola naá tɛ́sɔnɔ mmue ya Samalɛ́ɛ yɛ́ɛyɛ bá dɔ́ŋɔnɔmɔ́ bá amɔ́ Sɛkáalɛ, mekúígíi na gɛyɛŋɛ gá cí gɛ́ɛgɛ Yɔ́kɔbɔ a mbaá lɔmɔ́ fáalú ohaŋa bɛhɛ́ Yósɛbɛ. Hɔ́ɔ há nobɛ́láa nɔ́ɔnɔ Yɔ́kɔbɔ a mbaá dímé nó lɔ́mɔ́. Gɛdɔmbɔ gá oŋɛndɔ gɛ́ á gumbéné Yésusu, gɛ́hɛ́ go báfɛnɛga naá boayá bá nobɛ́láa, bó mba lɛ́ gɛcamɛna gá tólóbóo.
Okɔ́dɔ ba Básamalɛtɛ́ŋɛ go úle a báá bolá go go nco dɛ́ga. Yésusu go mo oyana a amɔ́: «Páamɔ́ miimpo mbónyo.» Gɛcamɛna moánɛ, behúúní bɛ́hɛ́ bá mba lɛ́ ɛ́dáalú naá tɛ́sɔnɔ go go ɛ́da go ɔ́ndɔ manyáanya. Okɔ́dɔ mɔ́ɔnyɔ go mo gundie a amɔ́: «Nɛɛ́nɛ maamɔ́ɔ ba Beyúdene, yɔmɔ́ɔ ba Básamalɛtɛ́ŋɛ, o lɔ́mɔ́ ba go ŋgɔŋɛnɔ miimpo má go bónyo o?» Mammana, Beyúdene na Básamalɛtɛ́ŋɛ bá dɛ ɔyɔ́ɔ émmué. Yésusu go mo gundie a amɔ́: «Aáŋa gɔ́ɔ go íyimenemú pááná ya Asaŋa o báá gɔnɔ́ go íyime mɔtɔ mɔ́ɔnyɔ a go ɔŋɔnɔmɔ́ miimpo, gásɛ́ maamɔ́ɔ mɔ́ɔ o mo ɔŋɛnɔmɔ́, mɔ́ɔ a lɛ go go fáa gɛkɔ́sɔ gá miimpo.» Okɔ́dɔ go mo oyana a amɔ́: «Ogɔ́nɔ́ɔ, o do báá akɛ́ na boóma bá go dɛ́ga kɔ́ɔ, gó gɔnɔ gunde nobɛ́láa nɔ́nɔ́ɔ nó lɔ́mɔ́ findímí; áhanɛ́ɛ gɔ́ɔ o gaá ná gɔ́lɔ́ mammana ya miimpo o? Yɔ́kɔbɔ, isée kɔ́nɔ́ ba biisée bɛ́cɔ́ mɔ́ɔ a mbaá có díméné nobɛ́láa nɔ́ɔnɔ, mɔ́ɔ moatɛ́ a báá bónyó miimpo má nɔ́, tɔ́nɔ bahaŋa bɛ́hɛ́ na bidúgé bɛ́hɛ́. O fege go amɔ́ maamɔ́ɔ o mo dómbana o?» Yésusu go mo gundie a amɔ́: «Mɔtɔ uŋkimée mɔ́ɔnyɔ a bónyononomú miimpo máama a ŋga gɔnɔ́ bɛa inyúidi; kanɛ́ mɔtɔ mɔ́ɔnyɔ a ŋgaá bónyó miimpo máama yɔmɔ́ɔ ka ŋgaá mo fáá a dɛ ŋgá gɔnɔ bɛa inyúidi akɛ́ go buisí; miimpo máama ka ŋgaá mo fáá má ŋgɛ ɛ́yá nobɛ́láa ná gɛɔyɔ gá kanɛ mesúge nɔ́ɔnɔ nó déndelemú naá mɔ́ nnyɔ́dɔ na bogaaga.» Okɔ́dɔ a amɔ́ gɛ́hɛ́ aá: «Ogɔ́nɔ́ɔ, páamɔ́ miimpo moánɛ goŋaá cɛ gɔnɔ́ bɛa inyúidi gó gɔnɔ gunde, cɛ gɔnɔ́ go úle háalá go go nco dɛ́ga.» Yésusu go mo oyana a amɔ́: «Ɛ́dá dɔ́ŋɛnɔ onɔ́mɛ bahɔ, o nco gunde.» Okɔ́dɔ go mo gundie a amɔ́: «Cɛ báá na onɔ́mɛ.» Yésusu a amɔ́ gɛ́hɛ́ aá: «Go oya mammana go amɔ́: “Cɛ báá na onɔ́mɛ”; o lɛ́ bɛanáná bɛanáná banɔ́mɛ bátáanɔ súge, kɔ́ɔ mɔtɔ mɔ́ɔnyɔ o lɔ́mɔ́ nɛhɛ́ godɔ́ɔdɔ a dɛ báá onɔ́mɛ bahɔ. Naá pɛ́ yɛ́ɛyɔ go ó oyɛ́dá mammana.» Okɔ́dɔ go mo oyana a amɔ́: «Ogɔ́nɔ́ɔ, ŋgɛ́nana goŋaá o lɛ́ mbúsí ya Asaŋa mmue. Biisée kɔ́nɔ́ɔ bá biisée bɛ́cɔ́ bá mba búlúgényée Asaŋa naá ogɔndɔ yɔ́ɔyɔ, gɔ́ɔ bɛɛnyɔ́ɔ Beyúdene no lɔ́mɔ́ no amɔ́ hoóma háaha bá sɛmɛgananamɔ́ go búlugenye Asaŋa há lɔ́mɔ́ naá Yolósalɛmɛ.» Yésusu a amɔ́ gɛ́hɛ́ aá: «Olímínyóo bɔ́ɔbɔ ko oyanɛnamɔ́. Gɛcamɛna gɛ́ úlene gɛ́ɛgɛ no ná búlugenyemú Baaba caá akɛ́ naá ogɔndɔ yɔ́ɔyɔ, caá akɛ́ naá Yolósalɛmɛ. Bɛɛnyɔ́ɔ no búlugenye bɔ́ɔbɔ no lɔ́mɔ́ no do íyíménée, bɛɛcɔ́ɔ dɛ búlugenye bɔ́ɔbɔ dɛ íyimenemú, goakɛ́ Asaŋa a dómbanamɔ́ gɛ́cɔ́ Beyúdene go go sódio batɔ. Kanɛ́ gɛcamɛna gɛ́ úlene, gɛ́ moatɛ́ gɛ́ ná lɛ́ hɔ́ɔ, gɛ́ɛgɛ mammana sá boolímínyí sɛ́ ŋgaá búlúgényée Baaba naá Giliíli na naá mammana. Obɔɔ́ moánɛ kanɛ́ bɔ́ɔ bá lɔ́mɔ́ báaba Baaba a fúmbemú. Asaŋa a lɛ́ Giliíli, boóma bɔ́ɔ batɔ báaba bá mo búlugenyemú bá háananamɔ́ go mo búlugenye naá Giliíli na naá mammana.» Okɔ́dɔ go mo gundie a amɔ́: «Ŋgíyimene caá Mesíi mɔ́ɔnyɔ bá gɔnɔmɔ́ mo dɔ́ŋɔnɔ bá amɔ́ Kilítusu u úlene. Gɔ́ɔgɔ a nú úlemú, a ná có falonanɛna boóma buiménénée.» Yésusu a amɔ́ gɛ́hɛ́ aá: «Ndɔ́mɔ́ mɔ́ɔ, yɔmɔ́ɔ mɔ́ɔnyɔ ko gálagalamɔ́.»
Hɔ́ɔlɔ́ gɔ́ɔ behúúní bá Yésusu bá ncomɔ́ gunde. Gáábɔ́ go ɛ́da go békúke goŋaá oya ŋkanɔ́ na okɔ́dɔ; kanɛ́ mɔ́ɔnyɔ ba ŋaá a guú úhúné a mɔ́: «O lɛ́galɛga ŋkádɛ o?» ɛ́na lí «Go oyamɔ́ ŋkanɔ́ nɛhɛ́ goakɛ́ o?» a dɛ báá. Gɔ́ɔ okɔ́dɔ a síemú a báá dɛ́ɛ́ná iséní hɛ́hɛ́ hɔ́ɔlɔ́, go gunde naá tɛ́sɔnɔ, a amɔ́ gá batɔ a amɔ́: «Úlé nɔnɔ ncó no ɛ́na mɔtɔ mɔ́ɔnyɔ a ŋgoyanamɔ́ boóma buimée bɔ́ɔbɔ ŋgaá ná ŋanánáa. A dɛ gaá bɛ́ɛ́mbá Mesíi dɔ́gɔ́ o?» Batɔ go kúluguge naá tɛ́sɔnɔ go úle anáa Yésusu a mbaá lɛ.
Naá gɛcamɛna gɛ́ɛgɔ, behúúní bá bósógolonyo Yésusu bá amɔ́: «Eléébi, kɔ́ɔ o do nyáá boóma o!» Kanɛ́ mɔ́ɔ go bó oyana a amɔ́: «Mbɛanana goŋaá nnyáa manyáanya máama no lɔ́mɔ́ no do íyíménée.» Naá dogálɔ dɔ́ɔdɔ, behúúní go ɛ́da go bágálɛnagalɛna bá amɔ́: «Mɔtɔ a báa nco mo fáa manyáanya lí?» Yésusu go bó oyana a amɔ́: «Manyáanya mámɛ má lɔ́mɔ́ goŋaá ŋŋanana ndɛ́ga ya mɔ́ɔnyɔ a mbaá tómá, kunde nyɔgɔnɔ buelí bɔ́ɔbɔ a mbaá ncoóo púmú. Ábɔ, no do oyáa bɛɛnyɔ́ɔ moatɛ́ moatɛ́ no amɔ́ bó á síéné ɛfɛ́ inni go masáŋa o? Kanɛ́ yɔmɔ́ɔ ŋgaá nyó oyáná caá: Fedígínyée nɔnɔ oŋgíso no ɛ́na aŋa ntɛ́mɛ́ sɛ́ báá ná manɛ́ go gunde loógodogodo go masáŋa! Godɔ́ɔdɔ, uséŋí a ná lɛ́ go bɛanana bɛsoɛná bɛ́hɛ́, a gunde a bándɛna bɛsamɔ́ go gɛɔyɔ gá kanɛ mesúge; nɔ́ɔnɔ gɔ́ɔ mɔ́ɔnyɔ a gónamɔ́ na mɔ́ɔnyɔ a sáŋamɔ́ bá békelenyemú olɔŋɔ. Háalá gɔ́ɔ ncaba yɛ́ɛyɛ ɛ lɔ́mɔ́ mammana, yɛ oya yɛ amɔ́: “Mɔ́ɔnyɔ a góna, uncodío a sáŋa.” Ndɛ́ nyó dómáalú go masáŋa anáa no lɔ́mɔ́ kanɛ go gɔ́lɔ gɛdɔmbɔ; bóncodío bá mba gɔ́lɔ́nɔ́ɔ gɛdɔmbɔ, bɛɛnyɔ́ɔ no á ncó dáŋaba go giukú gábɔ́.»
Gɛca gá Básamalɛtɛ́ŋɛ gɛ́ɛgɛ naá tɛ́sɔnɔ yɛ́ɛyɔ go ága odɛ́má yábɔ́ naá Yésusu go dogálɔ dá okɔ́dɔ dɔ́ɔdɔ a mboó oyɛ́dá a amɔ́: «A á ŋgoyáná boóma buimée bɔ́ɔbɔ ŋgaá ná ŋanánáa.» Go boóma moánɛ gɔ́ɔ aŋa Básamalɛtɛ́ŋɛ bá mbaá ncó bola anáa Yésusu a mbaá lɛ, go mo bósógolidio goŋaá a lɔbɛnɔ nabɔ́. Gɔ́ɔ a ŋamɔ́ hɔ́ɔ medúgú máandɛ́.
Kɔ́ɔ gɛcɛcá gá batɔ gíncodío gɔnɔ́ gɛ́ ágamɔ́ odɛ́má yábɔ́ naá Yésusu go busío bá dogálɔ dɛ́hɛ́ dá moatɛ́ moatɛ, bó oyanɛna okɔ́dɔ bá amɔ́: «Bó do báá gɔnɔ́ goana go gooya gáhɔ gɔ́ɔ dɛ ágamɔ́ odɛ́má yɛ́cɔ́ naá mɔ́ɔ, dɛ á mo bɔ́ɔ́bɛ́nɔ́ bɛɛcɔ́ɔ moatɛ́ moatɛ, gɔ́ɔ dɛ íyimemú mammana goŋaá a lɛ́ Uféŋí ba batɔ.»


Naá nnyimé ya medúgú máandɛ́, Yésusu go úlukie naá hoóma hɔ́ɔhɔ, a báá gundé naá Gelilée. A mba ŋá a báá go oyɛda mɔ́ɔ moatɛ́ a amɔ́: «Mbúsí ya Asaŋa ɛ dɛ báá na ufíno naá gɛdɔŋɔ gɛ́hɛ́ gá mbíényée.» Aŋa gɔ́ɔgɔ Yésusu a mbaá bolá naá Gelilée, batɔ báaba hɔ́ɔ bá mba mo gɔ́lɔ́ bese, goakɛ́ bɔ́ɔ tɔ́nɔ bá mbɛ ɛ́dá gibíné gá Pásɛ́ka ya Beyúdene naá Yolósalɛmɛ, bá bɛ́ɛ ɛ́ná buimée bɔ́ɔbɔ Yésusu a mbaá ŋanánáa hɔ́ɔ.
Yésusu go nco gunde kanɛ́ naá Kána gɛayáa gá Gelilée anáa a mbaá ŋaáa goŋaá miimpo má ɛ́ya mɔgɛ́bɔ. Ogɔ́nɔ́ɔ ummue ba bisimbi ba ufuŋe a mba lɛ́ hɔ́ɔ, mɔ́ɔnyɔ ohaŋa bɛhɛ́ a mbaá lɛ a nóma naá tɛ́sɔnɔ ya Kapɛlɛnahɔ́mɛ. Aŋa a mbɔɔ́ ɔ́bɔ́ goŋaá Yɛ́susu u úlúkíe naá Yudée, a báá bolá naá Gelilée, gɛ́hɛ́ go ɛ́da mo huenye; go ɛ́da go mo bósógolonyo goŋaá ɛ ɛ́da naá Kapɛlɛnahɔ́mɛ go go éŋugie ohaŋa bɛhɛ́ mɔ́ɔnyɔ a mbaá lɛ a kɔlɔgɔgɔnɔ na nigúe. Yésusu go mo oyana a amɔ́: «Aáŋa no do ɛ́ná bieninye bá gobékúke na bɛsɛɔ, no do ná bóso go ága odɛ́má yɛ́nyɔ́ kanɛ́ o?» Uyogóní ba ufuŋe go mo gundie a amɔ́: «Daadáa, gɔsɔ́ naá yɔmɔ́ nnyaŋá otóotoɛ ya goŋaá moɔnɔ́ bamɛ a gúe.» Yésusu a amɔ́ gɛ́hɛ́ aá: «Gundé naá mamɔ́ nnyaŋá, ohaŋa bahɔ a báá go éŋuge.» Mɔtɔ mɔ́ɔnyɔ go oliminyo nogálɔ nɔ́ɔnɔ Yésusu a mbaá mo oyáná, gɛ́hɛ́ go biene pɛ́. A gá lɛ́ go pɛ́, boyogóní bɛ́hɛ́ go nco mo gólio bá amɔ́ gɛ́hɛ́ aá: «Ohaŋa bahɔ a báa go éŋuge!» A báá lɛ gó bó úhune kasɛ́á gigúlí a báá né éŋúgé, gɔ́ɔ bá mo gundiemú bá amɔ́: «Bó á ná lɔmɔ́ iyó go gigúlí gímmue naá nnyimé ya tólóbóo gɔ́ɔ nnyɔ́dɔ yɛhɛ́ yɛ á ná fuugé.» Isée go lɛnca goŋaá bó mbaá lɛ naá gigúlí gímmue eé gímmue gɔ́ɔgɔ Yésusu a mbaá mo oyáná a amɔ́: «Ohaŋa bahɔ a báá go éŋuge.» Gó bayɛga hɔ́ɔlɔ, gɛ́hɛ́ go ága odɛ́má yɛ́hɛ́ naá Yésusu, mɔ́ɔ na ncíbo yɛhɛ́ ya batɔ kɛ́. Gieninye gá go békúke gá gáandɛ́ɛ gɛ́ɛgɛ Yésusu a mbaá ŋaáa naá Gelilée gɛ́gɛ́ɛ, aŋa a mbɛɛ́ ɛ́da go úlukie naá Yudée.

سنیں Sáŋa 4