Kalinga, Tanudan: SA UGUD APUDYUS (New Testament)

Sa Ugud Apudyus

Sa naḵwaan da sadi, ḵalibulibu da tagu we nadagup ḵan Jesus woḵ magusgusdan da suḵin da udum. Pun ummunae tinuttuduwan Jesus da disipuluna woḵ ḵanana, “Ummanyu ta adi ḵayu maalisan atte yeast da Pharisee te ḵapappailada! Ḵad da losane mitataḻu ḵan adipun maigammu sinsadi, maigammuda ya mipaḵaawat atte umali ye aḻgaw. Pun da imbagayu si giḵbot, maigammuda si aḻgaw ya da iyyagapaapyu'd daḻom, miwaḻagawagda ta dongngon da adu we tagu.”


Pinagatupan Jesus woḵ ḵanana, “Annaya bos ibagaḵ ḵan diḵayu we susunudḵu, adiyu isipog da angongat atta long-agyu te sadi patinggan ni ḵabooḻanda. Yaḵon aḵ Apudyus oḵyan isipogyu. Te maḵwa ḵaanona angosyu ḵad ḵaḻabbongana bose angitop-aḻ ḵan diḵayu'd infiernu. Annaya ibagaḵ ḵan diḵayu, siya abus aḵ isipogyu! Annaya oḵyan sosomḵonyu, taḵon ay nu naippun ḵon patog da tilin, adimpun Apudyus maliwatan ossaan ḵan dida. Maguḻaman diḵayu we tagu we igammuna belang da buuḵyu. Pun adi ḵayu umogyat te napatpatog ḵayu'ḵ adayu we tagu nu da pigae tilin.”


Pinagatupan os Jesus woḵ ḵanana ḵan dida, “Annaya ibagaḵ ḵan diḵayu, ngaimane amigbig ḵan saḵon si sinagung da tagu, Saḵone Abeng Di Tagu bigbigoḵ os atte sinagung da anghel Apudyus. Ḵad ngaimane amuḵlit ḵan saḵon si sinagung da tagu, puḵlitaḵ os si sinagung da anghel Apudyus.
“Sa osa bos, nu awad an-ugud aḵ lawweng mipanggob ḵan saḵone Abeng Di Tagu, maḵwae pakawanon Apudyus. Yaḵon sa an-ugud aḵ lawweng mipanggob si Ispiritu Santu, adimpun Apudyus maḵwae pakawanon.
“Ḵad nu iyoy diḵayu idaḻum atta sinagoga baḵon nu da papangat ya da awad da ḵaḻabbonganda, adi ḵayu ambinsaw atta isongbatyu ya da ibagayu. Te sa sadi ye oras, ipaigammun ni Ispiritu Santu da ugudonyu.”

Pune sadi, inninggaw osae nidoga'tta ummamdane tagu we ḵanana ḵan Jesus, “Mistulu, ibagam ud ḵan sunudḵu ta ittona da billayḵu'tta laḵsunni.”
Yaḵon ḵanan Jesus, “Awad ḵamman ḵaḻabbongaḵ aḵ angilintog ḵan diḵayu we duwa'tta laḵsunyu?” Ḵanana'tta losane tagu, “Ummanyu ta adi ḵayu masulisug ya maḵabasuḻ si ḵamommod atta ḵuḵuwan da buḻunyu. Te sa biyag daḵampun aḵ mibatay atta ḵuḵuwa, taḵon ay nu ngai ḵinabaḵnang taḵu.”
Pun ḵanan Jesus we nangipani, “Inninggaw baḵnange nan-apit aḵ amod, woḵ ḵanana si somsomoḵna, ‘Ngai nin ay ḵooḵ? Te potog da aḻangḵu'ḵ angipomponaḵ atta apitḵu.’ Unipun ḵanana, ‘Ay ḵaḵna gay ḵooḵ! Baḵasoḵ ay da aḻangḵu ta padaḵoḻoḵ dida ta lamog da ḵuḵuwaḵ ya da apitḵu. Ḵad nu magangputda, ḵanaḵ si long-agḵu we pianaḵ! Te amoamod inapitḵu ḵad masawaḻ si pigae tawon ya umillongaḵ ḵan iggaḵe angaangan ḵan uminuinum ya allaylayadaḵ!’
“Yaḵon ḵanan Apudyus, ‘Dong-ogḵa! Sinsadi ye labi, matoyḵa! Pun ngai ḵamman anginḵuwa'tta sadi ye pinomponnu?’ ”
Pun ḵanan Jesus we nangiyanungus, “Ḵaḵnat maḵwa'tta tagu we amompon aḵ binaḵnang atta long-agda yaḵon adidapun ipatog da banage ibelang Apudyus aḵ ampatog.”


Ḵanan Jesus atta disipuluna, “Pun annaya ibagaḵ ḵan diḵayu, adi ḵayu ambinsaw mipanggob si biyagyu, da ḵanonyu, baḵon nu mipanggob atta long-agyu ya da iḵabotyu. Te napatpatog biyagyu nu sa maḵan ya napatpatog da long-agyu nu da silup. Sosomḵonyu da sissiwit. Adidapun ammuḻa baḵon nu an-ani ya naippun aḻangda yaḵon paḵanan Apudyus dida. Maguḻa ḵayu mane napatpatog nu da sissiwit! Sa osa bos, lamogyu ḵamman paanduwon da biyagyu'ḵ sin-orasan gapu'tte bimbinsawyu? Nu adi ḵayu maḵaḵwa si aḵite banag, ippun patog ni ambinsawanyu mipanggob atta udume banage isun da ḵasapuḻanyu.
“Ilanyu ḵad inon da tabbaḵe dumaḵoḻ, adidapun anḵewaaḻ ya an-aboḻ. Yaḵon annaya ibagaḵ ḵan diḵayu, taḵon ay aḵ Ari Solomon we ḵabaḵnangan, naippun silupna'ḵ nabaḻbaḻu nu sa osa'tta annae tabbaḵ. Pun nu ḵaḵnat itton Apudyus we binaḻun da lumune matagu sinsadi ya appigat miballuda si apuy, aaddi ye ittona bos da silupe ḵasapuḻanyu. Diḵayu ḵad, ngaipa aḵit pammatiyu? Ḵad adiyu oḵyan ḵuttuḵuttumon ḵatti nu lamogyu ḵanonyu ḵan inumonyu baḵon nu adi ḵayu ambinsaw. Te ḵaḵnat singsington da losane tagu we adipun angigammu ḵan Apudyus. Yaḵon ḵan diḵayu, iniiggammun Apudyus we Amayu da ḵasapuḻanyu. Yaḵon unaonyu ḵuttuḵuttumon ampangatan Apudyus woḵ ittona da ḵasapuḻanyu.
“Adi ḵayu maḵimut, taḵon ay nu aḵit ḵayu we disipuluḵ te aḵ Apudyus we Ama taḵu allaylayade nanomsomoḵe midoga ḵayu si ampangatana. Pun inginayu da ḵuḵuwayu ta ittonyu'tta ḵapus. Te nu ḵoonyu ḵaḵna, isuyun amompon aḵ binaḵnang ad langite annat atta pitaḵayu we adipun maaminan aḵ pilaḵ ya ippun angaḵaw ḵan anadail. Te sa igaw da binaḵnangyu, sadi bos igaw ni somsomoḵyu.”

Pinagatupan Jesus woḵ ḵanana, “Ansasaggana ḵayu oḵyane isun da sammilu we anguuwway si apudae ummoy naḵakasar. Ansisillupda ya tinongganda da silawe anguuway ta buḵatandae dagus onob nu mipauli ya anḵugḵug. Pian da sammilu we naḵasagana nu dumatong apuda taḵon ay nu gawallabi baḵon nu madam-an taḻun. Ibagaḵ ḵan diḵayu ḵatuttuwaan, pasantan ni apuda silupna'tte pallos ya patuḵduwona dida ta siya allusnu ḵan dida.
“Annaya sosomḵonyu, nu igammun ni simboḻoy orase dumaḵngan ni aḵḵawan, adipun masuyop yaḵon guguwaḻdaana ta adin ni aḵḵawan lonḵon. Pun ḵasapuḻane naḵasagana ḵayu te dumatong Abeng Di Tagu si orase adiyupun namnamaon.”


Ḵanan Peter, “Apu, abus ḵani ḵamman aḵ angibag-am si sadi ye pani baḵon nu da losane tagu?”
Summongbat aḵ Jesus woḵ ḵananae nangipani, “Sa mataḻgodan ḵan nalainge sammilu, siya dinutuḵan ni apuna'ḵ angayyuwan atta doganae sammilu. Siya angitod si ḵanon da buḻunna si ustu we timpu. Pian sadi ye sammilu nu dumatong apuna ya odasanae annae ḵoona da losane imbilinna. Ibagaḵ ḵan diḵayu ḵatuttuwaan, sa sanae ambaḻu we sammilu, ipangatun ni apuna saadna ya siya angayyuwan atta losane ḵuḵuwana. Yaḵon ḵanan ni sadi ye sammilu si long-agna, ‘Adipun masapae dumatong apuḵ.’ Ḵad isaḻadnae allamboḵ atta doganae sammilu ḵan maḵaḵan ya maḵain-inum atta bartekero. Madanatong apun ni sadi ye sammilu si aḻgawe adinapun namnamaon ya sa orase adinapun igammu. Dusaonae ustu ya idogana si igaw da tagu we adipun amati.”
“Ibagaḵ ḵan diḵayu ḵatuttuwaan, sa sammilu we igammuna pion ni apuna paḵwa ya adipun ansagana baḵon nu tuttuwaon pionae maḵwa, andagson dusana. Yaḵon sa sammilu we adinapun igammu imbilin ni apuna nu ḵoona lawweng, aḵit dusana. Sa tagu we naittan aḵ adu, adu bos namnamaonae maḻpu ḵan siya. Ḵad sa tagu we nitaḻgodan ni ad-adu, ad-adu bos ḵodawonda ḵan siya.”


Ḵanan Jesus, “Gapu'tte ummaliyaḵ sina'd luta, ḵuwison Apudyus da losane tagu. Pioḵ oḵyane nisaḻad! Yaḵon umunae ampaḵapaḵaḻamaḵ ya amod dadauyḵu inggana'ḵ magangput. Sa somsomoḵyu ḵad ain ummaliyaḵ ta palin-awaoḵ maḵabuḻbuḻunan da tagu'tta udum sina'd luta? Daḵampun, annaya ibagaḵ ḵan diḵayu te sa ummaliyaḵ, ansisinaan ḵan ansusubogan da tagu. Te inggana sinsadi, ambibinnusuḻ da tagu gapu'tte pammatida ḵan saḵon. Nu lima da simbaḻyan, sumullagi da tuḻu'tta duwa ya da duwa sumullagida'tta tuḻu. Ḵad da an-aama ḵan an-iina an-asisullagida, isun os da anḵatḵatuganga.”


Pun ḵanan os Jesus atta ummamdane tagu, “Nu ilanyu libuu we maḻpu si ayonan init, ḵananyu we ‘Umudan’ ya ummudan. Ḵad nu giḵnaonyu bibbide maḻpu'd daya, ḵananyu we ‘Maligat’ ḵad naligat. Ngaipayu ḵamman mailasin da sinyal ni luta ḵan langit ya ippun igammuyu'tta sinyal Apudyus we mipanggob ḵan saḵon? Ḵapappaila ḵayu!”


Pinagatupan Jesus woḵ ḵanana, “Ummanyu ḵappos ḵuttuḵuttumon da ustu we ḵoonyu. Nu awad angidaḻum ḵan siḵa, daguse maḵaaligluḵa ḵan siya si daanyu miduuman si korti. Te nu adim ḵoon, ipuḻangna siḵa'tte ḵuwis ḵad indalisna bos siḵa'tta guwaḻda ya mibaḻudḵa. Annaya ibagaḵ ḵan siḵa, adiḵapun mapuḵayan atte babaḻḻudan inggana'ḵ aminom bayadan da ḵasapuḻane mabayadan.”

سنیں Luke 12