Kejadian 12 سے مشہور بائبلی آیات

شئیر

Aku pacangan maulah juriat ikam manjadi suku nang ganal, mambarkahi ikam wan jua maulah ngaran ikam dikatahui wan dihurmati urang banyak. Malalui ikam, Aku pacangan mambarkahi urang lain jua. Aku pacangan mambarkahi urang-urang nang baik lawan ikam. Sadangkan, nang jahat lawan ikam, pacangan Kukutuk. Wan malalui ikam samunyaan suku-suku di bumi pacangan Kubarkahi” ujar Allah bapirman lawan Abram.

“Tinggalakan haja banua ikam, rumah kuitan ikam wan dangsanak-dangsanak ikam. Tulak ja ka banua nang pacang Kutuduhakan lawan ikam.

Abram maasi lawan napa nang disuruhakan Allah. Tulak ai sidin matan kuta Haran, baampah ka banua Kanaꞌan. Dibawa sidin bininya, nang bangaran Sarai, wan kamanakannya nang bangaran Lot. Dibawa sidin jua samunyaan harta banda, binatang-binatang inguannya, wan sasuruhan-sasuruhan nang sidin kulihi wayah di kuta Haran. Lalu sampaian ai bubuhannya di banua Kanaꞌan. Wayah itu, sidin baumur pitung puluh lima tahun.

Allah manampaiakan diri-Nya lawan Abram. “Banua Kanaꞌan ini pacangan Kubariakan gasan juriat ikam” ujar Allah bapirman ka Abram. Lalu Abram manyusun batu manjadi mija wadah mambanam binatang kurban gasan mahurmati Allah nang sudah manampaiakan diri-Nya lawan sidin.