Lucas 3 سے مشہور بائبلی آیات

شئیر

Tej kyb'aj b'yan kykyaqil xjal tuj a' tu'n Juan, ax ikx te Jesús o b'yan tu'n Juan; ex matoq in na'n Jesús Dios, jaqet ttzi kya'j, ex ku'tz Xewb'aj Xjan tuj kya'j, ul tib'aj Jesús, ik ke'yin ik tza'n paloma, ex tzaj q'ajt Dios tuj kya'j ex tma: —Aya Nk'wa'le k'ujla'nxixa wu'ne; in chin tzalaje ti'ja.

Ex xi tma'n Juan kye kykyaqil xjal: —Axix tok aqine in che b'yane wu'ne tuj a'; ex tzul juntl mas nim tipumal nwitze, aju minti' woklene tu'n tel npaju'ne taq'al t-xajab'; oktzun che b'yale tu'n tu'n Xewb'aj Xjan ex tu'n q'aq'.

Kyb'inchame b'a'n, tu'ntzun tke'yinjtz qa otoq tz'ajtz ti'j kyanmiye, ex mi'n che ok tene q'malte tuj kyanmiye kyja': Tiyjil Abraham qo'ye; ex kxel nma'ne kyeye, jaku b'ant tu'n Dios tu'n kyok qe ab'j lu te tiyjil Abraham.

Aju siwb'il k'uxb'il ya ma kanun t-xe tlok' tze'; kyja'tzun tkyaqil tze' minti' in tq'o'n twitz b'a'n, kjawil tx'emit, ex k'okex q'ot tuj q'aq', chi Juan kye.

Ex Juan pakb'al tu'ntzun tjapun aju yol tz'ib'an tuj tu'jil Isaías aju t-sanjel Dios, chi kyja': In jaw tq'ajq'ajel twi' jun xjal tuj lugar minti' kynajb'il xjal tuj, in tma'n: Kyb'inchame tb'e Qman; kyb'inchame jun tb'e jiqun ti'j. Tkyaqil tq'ab' xaq ok che nojsetel, tkyaqil witz ex tal witz chq'ajlaj che kyjel; qe b'e ẍo'k kyi'j che xel jiqumet, ex qe b'e busl kyuj che b'ajel tz'umset; ex kykyaqil xjal k'okel kyke'yin aju kolb'il in tzaj tq'o'n Dios, chi Isaías.