Mateu 6 سے مشہور بائبلی آیات

شئیر

Mbwenye sakani pakutoma Umambo wa Mulungu na kulungama kwace. Pyonsene ipi munadza kapithimizirwa.

Mphapo lekani kudzudzumika na ntsiku ya mangwana, thangwi ntsiku ya mangwana ina pyayo. Ntsiku na ntsiku ina kuipa kwayo.”

“Na thangwi eneyi Ine ndisakupangani kuti: Lekani kunentseka na makhaliro anu pa thangwi ya pinafuna imwe kudya, peno na pinafuna imwe kumwa. Peno na manungo anu pa thangwi ya pinafuna imwe kubvala. Imwe nkhabe kupidziwa kuti moyo wanu na cakudya, cikulu ndi moyo wanu? Peno manungo anu na cakubvala, cikulu ndi manungo anu?

Mbwenye iwe ungafuna kuphembera, pita n'nyumba mwako, funga citseko cako, mbuphembera kuna Baba wako anakhonda kuoneka. Na tenepo, Baba wako anaona pinacita iwe n'cibiso-biso, anakupasa m'bairo wako.

Na tenepo, musatongwa kuphembera tenepa: “Baba wathu, muli kudzulu, dzina yanu mbikhale na mbiri. Umambo wanu mbudze kuna ife. Pinafuna imwe mbapicitwe, pantsi pano ninga kudzulu.

Tipaseni cakudya cathu ntsiku na ntsiku.

Tilekerereni madawi athu ninga ifembo tinalekerera andzathu madawi awo.

Lekani kutisiya mbatigwa n'kudawa, mbwenye tipulumuseni mwa kuipa, [thangwi Umambo ndi wanu, na mphambvu, na mbiri yakukhaliratu. Ameni.]

Thangwi mungalekerera andzanu madawi awo, Baba wanu wa kudzulu anakulekereranimbo.

Lang'anani mbalame za kudzulu. Nkhabe kubzala, nkhabe kubvuna pontho nkhabe koya n'pikwa. Mbwenye Baba wanu ali kudzulu ali kuzipasa cakudya. Imwe nkhabe funika pikulu kakamwe kupiringana mbalame?

“Lekani kukoya mpfuma zanu pa dziko ino panagumanika maberethi na furuju mbazifudza, pontho na panagumanika mambava mbaziba. Mbwenye koyani mpfuma zanu kudzulu kunakhonda kugumanika ucenje na furuju mbazifudza, peno mambava mbaswa mbaziba. Thangwi panagumanika mpfuma yanu, penepo ndipo panagumanikambo ntima wanu.”

“Nkhabe munthu anakwanisa kuphatira basa ambuya awiri. Thangwi unaida m'bodzi mbufuna unango, peno unalemedza m'bodzi mbupwaza unango. Apo lekani kuphatira basa Mulungu, uku mbamuphatira pontho kobiri.

Lang'anani, ngakhala Mulungu asabvazika tenepa maluwa a n'tsanga, anacita kuti lero alipo, mangwana asaponyiwa pa moto, ndiye tani kuna imwe, anthu a cikhulupiro cing'ono?

Mbwenye iwe, ungapasa cinthu nyakucherenga, cita kuti manja ako a nkono wa bzere akhonde kudziwa pinacita nkono wa madyo, toera pinthu pidabulusa iwe pikhonde dziwika na anthu. Thangwi Baba wako asadziwa pyakubisala. Na tenepo, Iye anakupasa m'bairo.”

“Mungacita udidi, lekani kucita toera kusimbwa na anthu. Thangwi mungacita tenepo, nkhabe kudza kapaswabve m'bairo na Baba wanu wa kudzulu.

“Mungapimana cakudya toera kuphembera, lekani kupangisa nkhope ya kutsukwala ninga anthu a uthambi, anaphinduza nkhope zawo toera kupangisa kuli anthu onsene, kuti asapimana cakudya. Ndimo mwene ndisakupangani kuti, anthu enewa, atambira kale m'bairo wawo. Mbwenye iwe, ungapimana cakudya toera kuphembera, samba nkhope, mbusapula pyadidi tsisi yako, toera ukhonde kupangisa kuna anthu kuti usapimana cakudya, mbwenye kuna Baba wako anakhonda kuoneka. Na tenepo, Baba wako anaona pyonsene pyakubisala, anakupasa m'bairo.”