Zlr 2
2
Mandəfáŋa fitik
1Mantsa ya kɗiŋta Lazglafta ta magaftá luwa nda haɗik, nda skwiha ma həŋ demdem. 2Ta sagha fitik baɗu mandəfáŋ, kɗiŋ kɗa Lazglafta ta inda slnaha ni. Ka mbiʼi tsi ta vgha ni baɗu mandəfáŋ ma slənaha maga tsi demdem. 3Mantsa tama, ka tfanaghatá Lazglafta ta wi ta fitik baɗu mandəfáŋ, ka fatá tsi nda ghuɓa, kabga baɗu tsa fitik ya mbiʼa tsi ta vgha ma slnaha demdem zlagigiŋ tsi. 4Wya ká rusa (nzakway) ta ghəŋa luwa nda haɗik ma zlagigiŋtá həŋ.
Skwi ta maguta ma Gam ma Aden
Ma fitika zlagigiŋta Yawe, Lazglafta ta haɗik nda luwa, 5haɗ skwi dər kuzlel ta haɗik karaku wa. Haɗ dər kuzuŋ ta ɗyafta ta ma mtak guli wa, kabga ta nza a Yawe, Lazglafta ta imi ta haɗik karaku wu, haɗ mndu ŋa həvay guli wa. 6Ka Zlagaptá wuninik ma haɗik ka dzədzəɓatá inda ghəŋa haɗik.
7Ka tsaftá Yawe, Lazglafta ta mndu nda gəninika haɗik, ka vuslanamtá tsi ta hafu nda ma htsiŋ, kəl mndu#2:7 Nda gwaɗa Ibru, mndu na tsaya Adamu, haɗik guli na Adamuwah ya. ka zlraftá nzakway nda hafu. 8Ka payaftá Yawe, Lazglafta ta ŋərma Gam ma haɗika Aden nda ma mndəra luwa. Hada, ka famtá tsi ta tsa mndu tsaf tsi ya. 9Ka ɗayanaftá Yawe, Lazglafta ta inda mndəra fuha kavghakavgha ma haɗik. Tsa fuha ya ná, ta taɗaku iri tida, zɗə ka zay yakwa taŋ guli. Ma takataka tsa gam ya, mamu fwa hafu, nda fwa snaŋtá skwi ɗina nda ghwaɗaka skwi.
10Mamu zala ta sabi ma haɗika Aden ka dzədzəɓa tsa gam ya. Daga hada, ka tavaptá tsi ka zlərma fwaɗ. 11Hga tsa taŋtaŋa zlərma ya, Pisuŋ. Tsa zala ya ta waftá inda haɗika Havila. Ma tsa haɗik ya ta slanaghata lu ta dasu. 12Tsa dasu ma tsa haɗik ya, vərɗa ni ya. Hada guli ta slanaghata lu ta sana mandaɓaya urdi, mamu mndərga pala uniks guli. 13Hga tsa mahisa zlərma ya, Gihuŋ. Tsa zala ya ta wanaftá inda haɗika Kus.#2:13 Hidakel si ta hga lu taŋtaŋ. Na Kus hadna nana, guram nda Zlr 10:8-10 ya ta hgə lu ka Babila. Nghanaŋ a ta haɗikha ta waftá Itiyupi nda Sudaŋ ta hgə lu ka Kus ma inda halata defteri wa. 14Hga tsa mahkəna zlərma ya ná, Tigres. Tsa zala ya ta laghwi nda ma mndəra haɗika Asur. Hga tsa mafwaɗa zlərma ya guli, Yufratis ya.
15Ka klaftá Yawe, Lazglafta ta mndu ka famta ma gama Aden ŋa həvay nda ya ŋa nghay. 16Ka mnanaftá Yawe, Lazglafta ta mndu kazlay na: « Laviŋ lava ka ta za inda yakwa dər wati ma fu ma gam. 17Ama yakwa ya fwa snaŋta skwi ɗina nda ghwaɗaka skwi ya, yaha ka da zay. Baɗ da zuta ka ta yakwa tsa fu ya, dzaʼa mtay ka ta mtaku. »
18Tahula tsa, ka Yawe, Lazglafta ma ghəŋa ni mantsa: « Ra a ka nzakwa mndu turtukwa ni wu, dzaʼa maganava maga yu ta mnda səla manda tsatsi ŋa kataŋta, » kaʼa. 19Ka tsaftá Yawe, Lazglafta nda haɗik ta inda nimtak, nda zarakha nda ɗyakha, ka tskadaghatá tsi da mndu ŋa nghay ni ka waká mndu dzaʼa tsatsanaftá hgu ta həŋ. Tsa hgu dzaʼa tsanafta mndu ta dər wati ya, tsaya dzaʼa nzakway ka hga ni. 20Mantsa, ka tsatsanaftá mndu ta hgu ta inda rini, nda zarakha nda ɗyakha ta luwa nda nimtak demdem. Mataba taŋ, slanagha a ta mndu səla manda tsatsi ŋa kataŋta wa. 21Mantsa tama, ka fanaghatá Yawe, Lazglafta ta mghama hani ta mndu, ka dziŋtá hani tsek. Ka klaʼatá tsi ta dzidzala mndu turtuk, ka nuʼamtá tsi ta tsa vli ya nda sluʼuvgha. 22Nda tsa dzidzal kla a Yawe, Lazglafta ma mndu ya, ka baftá tsi ta marakw. Tahula bafta ni ta tsa marakw ya, ka klaftá tsi ka klədanaghatá mndu.
23Kəʼa ka mndu ná, « Yawaa! Ndana tama, ya wana ya ta nzakway ka ghudzif ma ghudzifha ɗa, ka sluʼuvgha ma sluʼuvgha ɗa, marakw#2:23 Marakw na: Tsaya Isa nda gwaɗa Ibru. dzaʼa hga lu, kabga tsagap ma zgun#2:23 Zgun na: Tsaya Is nda gwaɗa Ibru. lu, » kaʼa. 24Tsaya dzaʼa kəl zgun ka zlaŋtá da ni nda ma ni ka laghwi ndiʼanavatá vgha ta markwa taŋ, ŋa nzakwa taŋ ka sluʼuvgha turtuk. 25Ka fərdiʼu nzata nzakwa taŋ his his i zgun nda markwa taŋ, sna a həŋ tahula wa.
موجودہ انتخاب:
Zlr 2: xed
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc. All rights reserved.