Rukasi 10
10
Mõrijõ rijõ tè Jesu omonooka wayvu mojenuarà kõ remẽwarà
1Aja paire ãmõ 'ary pè Jesu opyteporo wemimonotarà kõ mõ. 70 rõmõ omowaite imono kõ.#10.1 Maevo 70, maevo 72. Mõrijõ rijõ tè omono kõ wenone kyty, too ãmãtè Jerusarẽ pijarà rupi iko kupa. Ajawyi ãmõ taa taa kõ rupi omono kõ wenone rupi. 2Kee e'i imogeta kõ imono:
– Ãwitõ aresity ipopa remẽ, age'e pupe tè japo'o kuwa mijã. Ajamã'ẽ pe'ĩpe'ĩgà tè oposikotà ee mãe kõ noy'ãi temitãgwerà po'oa. Ãwĩvo ve mõa'ãrõwã Janejare'e posikoa jane kõ põ'õ mè. Pe'ĩpe'ĩ tè oposikotà Janejare'e ayvu mojenua rè iko kupa ajamã'ẽ, e'i. Ajame peporegeta Janejare'e pè tomuu oposikotà mãe rã kõ, a'evo ve koo rè oposikotà mãe kõ jaokwaità koo jarà kõ pè ipi, ãwĩvo tookwai kõ imono kõ, e'i.#Mat. 9.37-38 3Pekwa age'e eayvu rupi. Pepota katu mãe kõ gyty rõwã poromonotà ajamã'ẽ, e'i. Napenesa tari mãe kõ pytery pè tè poromonotà. Ãwitõ kaneiru jamono jawarà ojãrõ mãe kõ gyty remẽ, ojãrõ kuwa kaneiru rè jawarà. Ãwĩvotà penereko kupa, e'i Jesu ijupe kõ.#Mat. 10.16
4Kee e'i jẽ ijupe kõ:
– Agyvotè pekwa eayvu rupi peo remẽ, e'i. Ajawyi karakuri rena naperaa'ãi. Ãmõ, penepãnakõ. Ãmõ, sãtaja rekovijarà mõ naperaa'ãi ve rõnõ. Ãmõ, ava mõ rè pemã'ẽ pee ku'a pè remẽ, tapepyta e'ã rã'ĩ ipomoviru kõ, tapepuku e'ã peo. 5Ãmẽ tetã jarà mõ sõ, “Pepyta epyri”, e'i peupe remẽ, tapepyta ipyri ãmẽ. Kee pejẽ ãmẽ ijupe: “Owaray tapeiko. Tapepiryvypy katu peiko. Janejare'e tapemory penereko”, pejẽ ijupe kõ, e'i. 6Ãmẽ ipiryvypy mã'ẽ mõ sikaepo a'e remẽ, oryvaytà peayvukwerà renu ãmẽ. Oiketà peayvukwerà ipy'a kõ pupe ãmẽ. Na'evoi remẽ, ãmẽ ava jẽ rõwã naovaoryi peayvukwerà rè remẽ, ojivyrĩtà peupe ãmẽ peayvukwerà, e'i. 7Ãmõ, pe'ĩ tetã wyry pè kõrijõ pepytatà, ajaate a'e taa pe wyi pejisyry ky'y remẽ. Nikatu'ãi ãmõ ãmõ kõ retã pè peo peo remẽ ipi, e'i. Ãmõ, tetã jarà revejẽ tapejimi'u. Emi'õ kõ pe'u te'ĩte ãmẽ. Ãwitõ oposiko mã'ẽ jamoepy ipi, ãwĩvo ve penemi'õ rã eayvu mojenua repy rõmõtà peupe.#1Kor. 9.14; 1Tim. 5.18 8Ãmõ taa mõ pè pevãe remẽ, tetã jarà kõ orytà pene ãmẽ. “Pepyta kuwa aã ike oremõropãrà mõ mijẽ”, e'i sõ pejẽ remẽ, “hoõ” pejẽ ãmẽ. A'e pè pepyta ãmẽ ijayvu kõ rupi. Moma'e omoẽ tape'u remẽ, pe'u ãmẽ emime'ẽgwerà kõ. 9A'e taa wãnà mõ itekorã sõ remẽ, pemokatu kõ ãmẽ eayvukasia rupi. Ãmõ, evãea rã emojenu ijupe kõ. “Ke'ĩ Janejare'e ojikuwaokatà Jõvijã wasu rõmõ pepytery pè”, pejẽ imojenu a'e taa wãnà kõ pè. 10Ajamã'ẽ ãmõ taa pè pevãe remẽ, naory'ãi pene kupa. A'evo sõ remẽ, napepyta'ãi a'e pè ãmẽ. Pejisyry ãmẽ peo. Ajamã'ẽ pejisyry e'ãve tapekwa taa rape rupi, kee javo: 11“Nivoi Janejare'e pè aã taa wãnà kõ”, pejẽtà ijupe kõ. “Ajawyi oresãtaja rè yvy ku'ikwerà ojipy mã'ẽ orotyveità ity penovake, nivoi peikoa mojikuwaparà mõ”, pejẽtà. “Ajamã'ẽ kee tapekuwa. Janejare'e ojikuwa ipe Jõvijã wasu rõmõ pepytery pè. Ajamã'ẽ napepotari”, pejẽtà ity kõ peo, e'i Jesu imono kõ.#Mat. 10.7-14; Mak. 6.8-11; Ruk. 9.3-5; 10.10-11; J.K.R. 13.51
12E'i jẽ Jesu imono kõ:
– Ajaa maekwerà rè kee a'e pejẽ. Kãramõ Janejare'e pirujẽ okãjãma maekwerà kõ omomoeratà. Omoe'yi kõtà ekoawerà kõ rupi katu. A'evo remẽ ayvu noenu tari maekwerà kõ omomorijautà. Ãmẽ peayvu noenu tari maekwerà kõ ywesõ ojimomorijauvaytà, Sotoma taa pè opa maekwerà kõ wyi.#10.12 Karamoe remẽ Janejare'e omoma Sotoma wãnà kõ tata wasu pè jimo'yjẽ, ijaiwererà kõ rewarà mõ. Jinõ. 19.24-28; Mat. 10.15; 11.24 A'e kõ pè ywesõ ipojytà ãmẽ, e'i.
Jesu “mokoi” e'i noerovijari mãe kõ pè remẽwarà
(Mateusi 11.20-24)
13E'i jẽ Jesu ijupe kõ:
– Mokoi Korasĩ taa wãnà kõ! Mokoi teve Petesaita taa wãnà kõ! Pepõ'õ mè ywesõ ainõ mãrãnà jikuwa e'ã kõ Janejare'e kasia rupi erokwa mijã. Ajamã'ẽ napeenui 'ete eayvu peiko. Janejare'e reminõ rè pemã'ẽ ipe. Peitypypyipaoka kuwasi peaiwererà ijupe ãmẽ mijã. Ekasia amojisaoka sõ Juteu rõwã mãe kõ pyterà rupi remẽ, “aje” e'i kuwa eayvu pè kupa mijã. Tiru wãnà kõ a'evo kuwa mijã. Ãmõ, Sitõ wãnà kõ a'evo kuwa mijã. Jypy remeve ojimosĩoka kuwa weko aiwerà rè kupa mijã. Ojimome'u kuwa Janejare'e rovake waiwererà rè itypypyipaoka ijupe kupa mijã. Ãmẽ wãgyoa mojikuwapa mõ yvyu wapy kuwa kupa mijã. Tumujukwerà 'aryvo wapy kuwa kupa mijã. Ãmõ, tanemu 'aryvo. “Ma'e, janeaiwererà oityokatà põ Janejare'e janewyi?” e'i kuwa wãgyo mõ kupa mijã.#Isa. 23.1-18 14Ajawyi kee a'e pejẽ. Kãramõ Janejare'e poromoe'yi remẽ, pejẽ ywesõ pemomorijauokatà iwyi kõ, Sitõ wãnà kõ wyi, Tiru wãnà kõ wyi.
15– Mokoi a'e teve pejẽ, Kapanão wãnà kõ pè. Pejimoe'e teywete pekupa ipi. “Janejare'e pyri jaẽtà jaa”, pejẽ tite peiko. Niĩ, na'evo'ãi peiko. Jimomorijau wasua rena kyty tè peotà. Mokoi! Age'e pemotee ekojẽ kuwasi peneko mijã, e'i Jesu.#Isa. 14.13-15
16Ãmẽ e'i jẽ wemimonokwerà kõ pè:
– Eayvu mojenuarà rõmõ peo remẽ, ãmõgwerà “aje” e'ità penemimojenukwerà pè. Ãmõgwerà “aje” ne'i'ãi. “Aje” e'i peupe remẽ, “aje” e'i tary ve eupe. Ãwĩvo ve “aje” ne'i neupe remẽ, eupe ve “aje” ne'i'ãi. Papa pè teve “aje” ne'i'ãi, Emuuarerà tè a'e rewarà mõ, e'i Jesu ijupe kõ imono kõ.
17Oo ãmẽ kupa, a'e 70 mãe kõ. Ajaire sa'u ojivy uu kupa. Oryvay ojivy uu ovãe Jesu pè kupa. Kee e'i ijupe kupa:
– Oremo'earà, ikatuay oroo neayvu rupi oroiko, e'i kupa. Ãjãg kõ ve tesõ neayvukasia rupi ojisyrypa oo. Opoi wemijatarà kõ wyi oẽ oo oo, e'i kupa.
18Ãmẽ e'i Jesu ijupe kõ:
– Aje, e'i. Amã'ẽ Satanasi rè, yva pupe wyi okui remẽ. Nojimokasi'ãi. Tõpã vera vo 'ejẽ tesõ apy'awarà mõ okui uu, e'i. 19Ije poromokasioka tapeayvukasi tapeẽ ãjãgaiwerà kõ 'arà kyty, e'i. Ãmõ, ãpãmai 'arà kyty peẽ kuwa teve eayvukasia rupi, e'i. Ajawyi moma'e jẽ rõwã oẽtà pe'arà kyty penereko ai, e'i.#Jĩg. 91.13 20Ajamã'ẽ ãjãg kõ 'arà kyty peiko rewarà mõ rõwã penory kuwa ipi, e'i. Ma'e rewarà mõ ywesõ penory kuwa. Penerà ojikusiwapa yva pupe [Janejare'e pyri peiko karuarutà mãe kõ rõmõ] rewarà mõ tè penory kuwa.#J.Jim. 3.5 A'e rè ywesõ kuwa penory mijã, e'i.
Jesu oryvay wemimo'ekwerà kõ rè remẽwarà
(Mateusi 11.25-27; 13.16-17)
21Ãmẽ a'e remẽ Jesu oryvay Uu rè. Janejare'e 'Ãg revejẽ oryvay ee. Uu pè oporegeta. Kee e'i:
– Oromoe'e tesõ, Papa! Ene, yva jarà rõmõ neiko. Ãmõ, yvy jarà rõmõ neiko teve. Ikatuay mã'ẽ ene wyi nerewarà nemojikuwaoka ipi. Ovote ojimotekokuwavay ywe'e tite mãe kõ pè rõwã nerekoa nemojikuwaoka ipi. Notekokuwa ywe'ei mãe kõ pè tè nemojikuwaoka ipi. A'evo tè neiko ipi. Neremimota rupi tẽ tesõ moko ere ipi, e'i ijupe.
22Aepo e'i paire, kee e'i ojapyaka upa mãe kõ pè:
– Pirujẽ Papa ome'ẽ epo pè, eayvukasiay rõmõ taiko, e'i. Wekoa ve omojikuwaokapa teve eupe. A'e kõrijõ tè ekuwa katu Wa'yry rõmõ ipi, e'i. Ãwĩvo ve ije rõmõ'ĩte akuwa katu Papa, Ta'yry rõmõ. Ãmõ, amojikuwaoka ijupe mãe kõ ve okuwa ky'y, e'i Jesu.#Juw. 3.35; 10.15
23Ajaire ojirova wemimo'ekwerà kõ pè tè oporegeta. Kee e'i ijupe kõ:
– Pejẽ penea te'e pè pemã'ẽ ekasia rè, mãrãnà jikuwa e'ã rè. Ajawyi pejẽ ypy ãmõ kõ wyi pepiryvypy penory katu jome peiko ipi, e'i. 24Kee a'età pejẽ age'e. Janejare'e ayvu mojenuarà karamoewarà kõ: “Amã'ẽ kuwasi ee mijã!” e'i epe penemimã'ẽgwerà rè kupa. Jõvijãgwerà kõ ve aepo e'i epe ijupe. Ijatyray aepo e'i epe mãe kõ. Peneminuwerà pè ve: “Aenu kuwasi mijã!” e'i epe kupa. Na'evoi ajamã'ẽ a'e kõ ekoi. Age'e tè katu ãwĩvo peiko, e'i Jesu wemimo'ekwerà kõ pè.
Samaria wãnà rè tè Jesu poromosã'ãga remẽwarà
25Ajaire ãmõ 'ary pè tãmõ Moisesi remikusiwarerà rè poromo'e mã'ẽ mõ e'i oupe: “Jesu tamoãkwa'ã”, e'i tite. Ajawyi oo Jesu resa. Kee e'i ijupe:
– Poromo'earà, manyvo kuwa põkõ aiko, kãramõ Janejare'e pyri taa aiko karuaru? e'i ijupe.
26Ãmẽ Jesu wayvuapi:
– Nekuwapa Janejare'e ayvukwerà jikusiwarerà. Manyvo e'i põkõ ijayvukwerà tereenu? Manyvo ere põ ene aepo jaa renu? e'i Jesu ijupe.
27Ãmẽ Moisesi remikusiwarerà rè poromo'e mã'ẽ kee e'i:
– Õ'õ, aje akuwa. Kee jaa: “Janejare'e nerõvijã ywete rõmõ ekoi. A'e eauvay ereko ipi, e'i. Nepy'a pupe eau. Ãmõ, ne'ãg pupe eau. Ãmõ, nekasia pè eau. Ãmõ, netekokuwaa pupe eau teve ipi”, e'i. Ãmõ, “Nepyriwarà kõ eau ve. Ãwĩ tãwĩ nejiau, ãwĩvo ve tereau kõ”, e'i mã'ẽ,#J.K.R. 19.18 e'i Jesu pè.
28Ãmẽ Jesu e'i:
– Ikatuay aepo ere. Ãwĩvoa rupi katu eiko ãmẽ, tereiko karuaru neiko awi, e'i ijupe.#Mat. 22.35-40; Mak. 12.28-34
29Ajamã'ẽ poromo'earà “õ'õ aje” ne'i, ojipijarĩtà rewarà mõ. Kee e'i kõrijõ tè:
– Ava pè põkõ epyriwarà jaa tè? e'i.
30Ãmẽ Jesu e'i ijupe:
– Age'e amovytà ayvu mõ tereenu. Ãwĩ tãwĩ ãmõ 'ary pè kwaima'e mõ Jerusarẽ taa pe wyi ojisyry okwa. Juteu mõ tè a'e. Ootà Jeriko taa kyty mijã. Ãmẽ oo iko remẽ, a'e pè ovãe imona mãe kõ pè. Opyy inõpã nõpã kupa. Oyruekyi kupa. Werywete ojuka oo kupa. 31Ãmẽ jakatu sikaepo Janejare'e pè oporegeta mã'ẽ mõ oo akypy rupi iko. Ãmẽ a'e omã'ẽ imona mã'ẽ remijaraiwerà rè remẽ, soõ, omago kõrijõ oo. 32Ameve sikaepo Revi jeapyrerà mõ oo ve akypy rupi iko. [Janejare'e moe'ea retã mè oposiko mã'ẽ mõ teve a'e.] Omã'ẽ ee remẽ, ivo teve a'e. Omago kõrijõ teve oo. 33Ãmẽ 'ary pè ve sikaepo ãmõ kwaima'e oo ve iko akypy rupi kõ. Juteu rõwã a'e. Samaria wãnà mõ tè.#10.33 Juteu kõ nojimoryi Samaria wãnà kõ rè ipi. [A'e kavaru rupi oo iko.] A'e imona mã'ẽ remijaraiwerà rè omã'ẽ remẽ, ijãgyoay ee omãjã. Oporijauesa tesõ. 34Ãmẽ oo ipyri remẽ, oky'a'o imaramawerà moma'eyva kawerà pupe. Aja paire opõanõ mijẽ uvary aisiriri mã'ẽ pupe. Ajaire ookwa okwa ky'y, kamisa pupe. Ajaire omovy eraa weima kavaru ape 'aryvo. Weraa myta'ypa mõ pè erovãe. A'e pè ovãe remẽ opõanõ mijẽ erovãe. Oja'a kõ'ẽ ee. 35Ajaire kõ'ẽma mẽ karakuri moeta ome'ẽ myta'ypa jarà pè ity oo. Mõrijõ ome'ẽ tekoua rã repy mõ. Kee e'i ime'ẽ: “Ajeapytà aa age'e. Ajamã'ẽ aã kwaima'e aitytà rã'ĩte ike aa. Eja'a ikõ erapykyre kyty ee nẽ”, e'i. “Aã ikõ eau ereko ipi nẽ”, e'i. “Ãmẽ ajaire ajivy mijẽ akwa aã rupi remẽ, ame'ẽ tarà mijẽ karakuri mõ neupe. Mapejõ põ nemoepy nejupa mã'ẽ amojivytà ãmẽ neupe”, e'i ijupe ity oo.
36Awyjepa aepo Jesu omome'u maekwerà. Ajaire e'i poromo'e mã'ẽ pè:
– Neenu aepo amome'u ene? Mã põ moapy kwaima'e kõ okwa remẽ opyriwarà vo wereko imona mã'ẽ remijaraiwerà? e'i.
37Ãmẽ jẽ poromo'e mã'ẽ kee e'i:
– Poroporijauesa mã'ẽ tè, e'i.
Ãmẽ Jesu e'i poromo'e mã'ẽ pè:
– I'ete. Ãwitõ poroporijauesa mã'ẽ vo tereiko, e'i ijupe.
Mata ojimo'eai mosikoa rè remẽwarà
38Ajaire Jesu kõ oo oẽ taa kõ rupi Jerusarẽ pijarà rupi ipi. Ajawyi taa mõ pè ovãe ajaire. [Petãnia eu a'e taa rerà pè.] Ãmẽ a'e pè wãivĩ mõ kee e'i Jesu pè:
– Ejo eike oreretã wyry pè orepyri ejimiwa, e'i ijupe.
Mata eu a'e wãivĩ pè. Ãmẽ “hoõ” e'i Jesu ijupe ãmẽ. Oike etã wyry pè wapy ãmẽ. 39Mata kypy'yry ve a'e pè tui upa, Maria eu ijupe mã'ẽ. A'e uu Jesu pyri wapy upa. Ojapyaka Jesu oporegeta remẽ upa. Ipiryvypy katu tesõ ikypy'yry.#Juw. 11.1 40Tykerà ãmẽ mosikoa kõ rè tè ojimo'eai iko. Ajaate uu Jesu kyty oporegeta. Kee e'i ijupe:
– Erõvijã Jesu, manyvo põ ekypy'yry nepãtavõi 'ete mosikoa rè, penemi'õ rã rè? Emã'ẽ. Ije kwerygà age'e aposiko ajupa. Ajawyi, “Ekwa nerykerà terepãtavõ”, ere ijupe, e'i epe Mata Jesu pè.
41-42Ãmẽ aepo rè kee e'i Jesu ijupe:
– Mata! Kee a'età neupe. Manore põ nejipy'amopirai neiko? Iteetejẽ mã'ẽ rè nejimo'eai tite. Ajamã'ẽ nãwĩvo'ãi kuwasi mijã. Ãwitõ nekypy'yry ikatuay mã'ẽ rè oja'a. Ava jẽ rõwã wekyi kuwa iwyi mã'ẽ rè tè oja'a. Ãwĩvo ve kuwasi ene mijã, e'i Jesu imotekokuwa.
موجودہ انتخاب:
Rukasi 10: oymNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Wycliffe Bible Translators, Inc. All rights reserved.