San Juan 3
3
Jesús la ko Nicodemo
1Kjuákꞌe ijnko nkexro kuènté ti sin fariseo, mé kuékꞌin Nicodemo. Jehe chꞌan mé ijnko nkexro imá tjetoan kuènté ti sin Israel. 2A̱ndá ijnko tie kjuichréhe̱ chꞌan ti chꞌin Jesús, la ndáchro chꞌan:
―Maestro, ó noheni kixin Díos ichrꞌán ti jaha kixin tsjákohéni kixin ti jehya Díos chrókjuakꞌeko ijnko chojni, la xitjahya chrókjuasin sin kjuaxroan ijié éxi ti kjuaxroan tjáko̱xián.
3Ndá kjuáte̱he chꞌin Jesús, ndáchro:
―Ijnko nkehe chaxín tso̱tjo̱nka kixin ti nkexro tsokjíehya ni̱xién la xitjahya tsꞌixehen ti itjen Díos tꞌe̱to̱an.
4A̱ndá chꞌin Nicodemo kjuanchankí, ndáchro:
―Ó tádana, ¿xá nkexrín chrókokjìna ni̱xién ínaá? ¿Á na̱xa̱ jína chrókꞌuíxa̱ha̱n tse̱e na̱ná ndá chrókokjìna ní?
5Ndá kjuáte̱he chꞌin Jesús, ndáchro:
―Ijnko nkehe chaxín tso̱tjo̱nka. Jehó ti nkexro tsíkokjíexín ìnta̱ la ko tsíkokjíexín Ncha̱kuén Díos, mé jína tsꞌixehen sin ti itjen Díos tꞌe̱to̱an. 6Ti ó ijnko ixjan tsꞌaxrjeníxin itꞌé la ko ìñé la jehó chojni chjasintajni ó. A̱ndá ti nkexro tsokjíexín Ncha̱kuén Díos, mé tsꞌóna xje̱en Díos. 7Chrakonhña kixin ti nkehe xrja̱nká kixin: “Kaín chojni la ticháxi̱n tsokjíhi ni̱xién ínaá.” 8Éxi ti xri̱nto̱ chjéhe, la kjónté tihín tꞌatsínka, la noahña nketí kui̱xi̱n la ko noahña nketí sátsji, mé xi̱kaha ti nkexro tsokjíexín Ncha̱kuén Díos.
9Ndá xíkjanchankí chꞌin Nicodemo, ndáchro:
―¿Xá nkexrín chrókóhen tíhi?
10Ndá kjuáte̱he chꞌin Jesús, ndáchro:
―¿Jaha ijnko maestro imá tꞌe̱to̱an ti nación Israel, ndá na̱xa̱ tiénxinhña tíhi ní? 11Chaxín ndáxrja̱n kixin jeheni la chrónkani ti nkehe noheni la ko ti nkehe tꞌikoni, kjánchó jahara titekákonhñara. 12Ti nkehe ndáxrja̱n la kuènté chjasintajni ó la kjónté titekákonhñara. ¿Ndá nkexrín chrókiénxinra ti chrónixja ti nkehe kuènté nka̱jní? 13Ninkexró kjui̱hya nkaya nka̱jní. Jehó ti Xje̱en Díos kꞌóna chojni kjuákꞌe ntiha la ko ntiha kui̱xi̱n. 14#Nm. 21:9.*Éxi chꞌin Moisés, ti kꞌuíxin ti sin israelita nte̱je̱, la jehe chꞌan kjuíchꞌéna chꞌan ijnko konche chika kjua̱kꞌe̱nka̱ni chꞌan ijnko inta, ndá komá sin la kꞌuénhña sin, mé xi̱kaha tso̱hen ti Xje̱en Díos kꞌóna chojni, ticháxi̱n tsjakꞌenkáni chꞌan ijnko ntacruz, 15kixin kaín ti nkexro tsitekaon ti jehe chꞌan la tsaá sin, tsochónta sin kjuachón nkochríxín.
Díos imá tjue̱he ti chojni chjasintajni
16’Díos imá tjue̱he ti chojni chjasintajni la kjuajon chꞌan ti nkoko̱axón Xje̱en chꞌan, kixin kaín ti nkexro tsitekaon ti Xje̱en chꞌan la tsꞌitjáñahña sin, tsochónta sin kjuachón nkochríxín. 17Díos la chrꞌánhña ti Xje̱en ntihi chjasintajni kixin sinchekjasóte chꞌan chojni. Náhí. Ichrꞌán chꞌan ti Xje̱en chꞌan chjasintajni kixin tsaáxin kaín chojni.
18’Ti nkexro tsitekaon ti Xje̱en Díos la tsjasótehya sin. A̱ndá kaín ti sin tsitekakonhña, mé tsjasóte sin kixin kuitekakuenhña sin ti nkoko̱axón Xje̱en Díos. 19Mé xi̱kaha Díos sinchekjasóte chꞌan ti jehe sin nkochríxín, kixin ó ikui ti nkexro tsꞌinkaséñaxín chjasintajni, la kjónté xi̱kaha la a̱ntsí kóxríhi̱n sin ti sítie. A̱ndá ti tꞌinkaséña la náhí, kixin tjinkakonhña sin tsíto̱he sin ti nkehe jínahña tjejóchꞌe sin. 20Kaín ti nkexro ichꞌe ti nkehe jínahña la tóxrìe̱nhña chrókóchjina ti tꞌinkaséña kixin tjinkakonhña sin tso̱noxín ti nkehe jínahña ichꞌe sin. 21A̱ndá ti nkexro tjejónchexiteyá ti nkehe jína la chéhe̱ sin tóchjinehe sin ti xrohi kuènté Díos kixin tja̱ko̱xi̱n sin kixin Díos tjetsjehe kixin chaxín jína nchexiteyá sin.
Juan Bautista chrónka kuènté chꞌin Jesús
22Ndá chrꞌéxi̱n chꞌin Jesús la ko ti sin kꞌuájiko chꞌan la sákjuí sin Judea. Ntiha kꞌuejó sin iso ña̱o la kui̱ki̱te chꞌin Jesús iso chojni. 23Kja̱xin chꞌin Juan kjuákꞌe ti chjasin Enón chjinaxón ti chjasin Salim, la mé ntiha kui̱ki̱te chꞌan chojni kixin ntiha la yeé ìnta̱ sítji. La itsjé sin kóchjina sin la kuikite sin. 24#Mt. 14:3; Mr. 6:17; Lc. 3:19, 20.*Mé xi̱kaha kóhen ti na̱xa̱ kjuákꞌechjinahña chꞌin Juan.
25A̱ndá ti sin kꞌuájiko chꞌin Juan la ko ti sin judío mé ikjo kícho sin kixin nkexrín a̱ntsí jína chrókótjuáxin chojni. 26A̱ndá ti sin kꞌuájiko chꞌin Juan sákjuichréhe̱ sin chꞌan, la ndáchro sin:
―Maestro, ti nkexro kjuákꞌeko̱a ti tóhe nda̱río Jordán, ti nkexro tsíchro̱nka nkexrín itjen, la ijie itjen chꞌan ti̱ki̱te chꞌan chojni la ko kaín chojni chréhe̱ sin ti jehe chꞌan ―ichro sin.
27Ndá ndáchro chꞌin Juan:
―Xrokjuahya ichꞌe chojni ixra̱ ti tjajonhña Díos kjuachaxin. 28#Jn. 1:20.*Ó kuihínra ndoá kꞌuéxrja̱nka kixin janhña ti Cristo. Janhan la jehó kꞌuíto̱nxián nti̱a kixin tso̱xrja̱nka kixin ó itsi ti nkexro a. 29Éxi ijnko nkexro tso̱te̱he la takja ti ichjién. A̱ndá ti nkexro tꞌiton la chéhe̱ tjetihin nixja ti nkexro tꞌiton, tso̱te̱he. Mé xi̱kaha imá chàna kixin xi̱kaha itsjé chojni tóchjinehe sin ti chꞌin Jesús. 30A̱ndá jehe chꞌan ticháxi̱n a̱ntsí tsꞌe̱to̱an chꞌan, a̱ndá janhan la kanhñó.
Ti nkexro kui̱xi̱n nkaya nka̱jní
31’Ti nkexro kui̱xi̱n nkaya nka̱jní mé kaín nkehe tꞌe̱tue̱hen. Ijnko chojni chjasintajni mé jehó ti nkehe kuènté chjasintajni ó chronka. A̱ndá ti nkexro kui̱xi̱n nkaya nka̱jní la kaín nkehe tꞌe̱tue̱hen. 32Jehe chꞌan mé chrónka chꞌan ti nkehe tsíkꞌikon chꞌan la ko ti nkehe tsíkihin chꞌan, kjánchó ninkexró titekakonhña ti nkehe chronka chꞌan. 33A̱ndá ti nkojín nkexro tsitekaon ti nkehe chronka chꞌan mé xi̱kaha tja̱ko̱xi̱n sin kixin chaxín ndoá ti nkehe chrónka Díos. 34Kixin ti nkexro ichrꞌán Díos, mé nixja itén Díos kixin kꞌuáyéhe̱ chꞌan kaín kjuachaxin kuènté Ncha̱kuén Díos.
35 #
Mt. 11:27; Lc. 10:22. *’Itꞌéni Díos mé imá tjue̱he chꞌan ti Xje̱en chꞌan, mé xi̱kaha tsichjéhe chꞌan kjuachaxin kixin tsꞌe̱tue̱hen chꞌan kaín nkehe. 36Ti nkexro tsitekaon ti Xje̱en Díos mé tsochónta sin ti kjuachón nkochríxín. A̱ndá ti nkexro tsitekakuenhña ti Xje̱en Díos mé tsochóntahya sin ti kjuachón nkochríxín. Ti nkexro xi̱kaha tsitekakonhña mé sinchekjasóte Díos nkochríxín.
موجودہ انتخاب:
San Juan 3: poeNTplus
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2016, Wycliffe Bible Translators, Inc. All rights reserved.