San Mateo 17
17
^Ndanama Jesús
1Ra saa kuu ndiyaꞌa i̱ñu̱ kii, saa ndakiꞌin Jesús ra Pedro, xiꞌin ra Jacobo, xiꞌin ra Juan ñani suvi ra Jacobo, ndixaꞌan ndia xiꞌin ra iin xiki sukun. 2Ra ikan ndanama ra xini ndia; ra nuu ra, ra iin taxa taxa nduu ña, iin ta kuꞌva taxa ñuꞌu, ra tikoto ña ndixi ra, ra iin yeyeꞌe nduu ña, iin ta kuꞌva ndii te kaꞌñu saa nduu ña. 3Saa ra tuꞌva ndituvi va ra Moisés, xiꞌin ra Elías, ra xaꞌa ndia ndatuꞌun ndia xiꞌin Jesús ndita ndia. 4Ra saa ndikaꞌan ra Pedro xiꞌin Jesús kachi ra saa:
―Tata Maestro, tiaa ni vaꞌa ña ndee yo yoꞌo vichin. Tu kuni kun ra na savaꞌa ndi uni veꞌe tuvíxi̱n vali: iin ña koo veꞌe yoꞌo, ra iin ña koo veꞌe ra Moisés, ra iin ña koo veꞌe ra Elías ―*kachi ra xiꞌin Jesús.
5Ra nani saa kuu ra Pedro kaꞌan ra xiꞌin Jesús, saa ra nduxinu va viko ña yeꞌe ni ra ndasi ña sata ndia; ra tiañu viko kan tiaku tachi Ndioxi ña ndikaꞌan ra kachi ra saa:
―Ra yoꞌo kuvi seꞌe yu, ra kuꞌvi ni ini yu xini yu ra, ra kusii ni ini yu xiꞌin ra, ra na kandixa ndo ña kaꞌan ra xiꞌin ndo ―kachi Ndioxi xiꞌin ndia.
6Ra te xini soꞌo ndia itaꞌan xiꞌin Jesús tuꞌun yoꞌo, saa ra ndakusiti ndia, ra ndia nuu ñuꞌu nduxinu nuu ndia, saa chi ndiyuꞌvi ni ndia. 7Ra saa kuyachi Jesús nuu ndee ndia, ra nditiandiaa ndaꞌa ra sata ndia, ra ndikaꞌan ra xiꞌin ndia kachi ra saa:
―Ndakuita ndo ra kuayüꞌvi ndo ―kachi ra xiꞌin ndia.
8Ra te ndakundita ndia, ra ndia nii ka yuvi köo ndixini ndia, ra ndia sa indaa mituꞌun va Jesús ndichi xini ndia.
9Ra saa te nandiko ndia vaxi nuu ndia iku kan, ra saa ndikaꞌan Jesús xiꞌin ndia kachi ra saa:
―Ndia nii na ndatüꞌun ndo xiꞌin xaꞌa ña xini ndo yoꞌo, chi ndia te na ndatiaku yuꞌu, ra xaa yoꞌo, vi ke kuvi ndatuꞌun ndo xiꞌin na xaꞌa ña ―kachi Jesús xiꞌin ndia.
10Ra saa nindakatuꞌun ndia itaꞌan xiꞌin ra ra kachi ndia saa:
―Tata, ¿nichuun kaꞌan ndia maestro ndia sañaꞌa ndiayu Ndioxi ña ndakoo ra Moisés, ña xiꞌna ka va ra Elías kuvi ra xiniñuꞌu kunuu kixi? ―kachi ndia xiꞌin Jesús.
11Saa ndakuiin Jesús kachi ra saa xiꞌin ndia:
―Ña ndixa ke, xiꞌna ka va ra Elías kuvi ra kunuu kixi, ra sanduvi ra takundiꞌi ña xiniñuꞌu kunduvi va. 12Ra na kundaa ini ndo, chi ra Elías, ra xa kixi va ra, ndi su ndindaküni na ra, chi xa na ña kuni mii na xiꞌin va ra. Ra mii saa ke sa tu na xiꞌin yuꞌu ra xaa yoꞌo va, chi sandoꞌo ni tu na yuꞌu va ―kachi Jesús xiꞌin ndia.
13Ra saa kundaa ini ndia itaꞌan xiꞌin Jesús, ña kaꞌan ra xaꞌa ra Juan ra sakuchi yuvi va.
Sandaꞌa Jesús iin ra loꞌo tiin tachi ndivaꞌa
14Ra te xaa ndia nuu ndee yuvi kan, saa ra ndikun ndixaa iin tiaa xikusiti ra nuu Jesús, ra ndikaꞌan ra kachi ra saa:
15―Tata, kundaꞌvi ini kuni seꞌe loꞌo yu, chi ra xiꞌi yiꞌi kuvi ra, ra ndoꞌo ni ra xa ña; ra nii ndiäꞌvi ichi ^kita ra nuꞌu, ra saa tu nuu tiakuii va. 16Ña kan ke ndiaka yu ra xaa ra xiꞌin yu nuu ndia itaꞌan xiꞌin kun, ndi su ndikuchüun ndia ña sandaꞌa ndia ra, Tata ―kachi ra xiꞌin Jesús.
17Ra saa ndakuiin Jesús kachi ra saa xiꞌin ndia itaꞌan xiꞌin ra:
―¿Nichuun ndaku ni ini ndo? ¿Ra ni va yuvi kuvi ndo ña xïin ndo kandixa ndo? ¿Ra a iin ndisaa kii va ke koo yu xiꞌin ndo tuvi ndo? Kundiëe ka ini yu nuu ndo. Naꞌa ndo xiꞌin ra loꞌo ñaa yoꞌo ―kachi ra xiꞌin ndia.
18Ra saa xaꞌndia Jesús chiñu nuu tachi ndivaꞌa kan, ña na ^saña ña ra loꞌo kan, saa ra saña ndixa va ña ra, ra ndikun nduvaꞌa va ra.
19Ra te ndiꞌi, saa nindakatuꞌun siin ndia itaꞌan xiꞌin Jesús, kachi ndia saa:
―Tata, ¿nichuun ndikuchüun ndi tava ndi tachi ndivaꞌa kan? ―*kachi ndia xiꞌin ra.
20Saa ndakuiin Jesús kachi ra saa xiꞌin ndia.
―Xaꞌa ña kuëe kandixa ndo Ndioxi va ke ndikuchüun ndo tava ndo ña. Ra ña ndixa kaꞌan yu xiꞌin ndo, chi tu ña kandixa ndo ra na koo ña ta kuꞌva iyoo iin ndikin loꞌo itun mostaza, saa ra kuvi va kaꞌan ndo xiꞌin iku kaa, kachi ndo saa: “Sakutiaꞌa mii kun, ra kuaꞌan ndakundichi kun inka xiyo”, kachi ndo xiꞌin ña, saa ra, saa sa ndixa va ña. Saa chi köo ña uꞌvi tu na kandixa ndo. 21Ndi su tachi ndivaꞌa, ra kuëe saa koo kee ña, chi xiniñuꞌu kaꞌan ni ndo xiꞌin Ndioxi, ra koo suꞌun ndo ña küxi ndo, ra saa ke kuchuun ndo ña tava ndo ña ―kachi Jesús xiꞌin ndia itaꞌan xiꞌin ra.
Ichi uvi kaꞌan Jesús ña kuvi ra
22Ra saa kuu Jesús xika ra kuaꞌan ra xiꞌin ndia itaꞌan xiꞌin ra chi Galilea, ra saa ndikaꞌan ra xiꞌin ndia kachi ra saa:
―Yuꞌu ra xaa yoꞌo, ra ndataxi na yuꞌu ndaꞌa na sáa̱̱ ini xini yuꞌu. 23Ra kaꞌni na yuꞌu, ndi su kii uni ndatiaku va yu ―kachi ra xiꞌin ndia.
Ra ta kundaa ini ndia tuꞌun yoꞌo saa ra xaꞌa kusuchi ka vi ini ndia.
Xuꞌun ña chaꞌvi na ñuu ndaꞌa veꞌe ñuꞌu
24Ra te ndixaa Jesús ñuu Capernaum xiꞌin ndia itaꞌan xiꞌin ra, ra saa ndixaa ndia kaya xuꞌun ña kuaꞌan veꞌe ñuꞌu ra ndindakatuꞌun ndia ra Pedro kachi ndia saa:
―¿A chaꞌvi ra Tata Maestro kun xuꞌun ña kaya kuaꞌan veꞌe ñuꞌu? ―kachi ndia xiꞌin ra.
25Saa ndakuiin ra Pedro kachi ra saa xiꞌin ndia:
―Chaꞌvi va ra ña ―kachi ra.
Ra te ndikiꞌvi ra Pedro veꞌe, ra xiꞌna ka va mii Jesús ndikaꞌan xiꞌin ra kachi ra saa:
―¿Ndixa tuvi yoꞌo, Pedro? ¿Yoo nuu ke kiꞌin na xaꞌndia chiñu nuu ña yuuvi yoꞌo xuꞌun: nuu na ñuu na, a nuu na kee inka ñuu va? ―kachi Jesús xiꞌin ra.
26Saa ndakuiin ra Pedro kachi ra saa:
―Nuu na inka ñuu va ke kiꞌin na ña ―kachi ra.
Ra saa ndikaꞌan ka Jesús kachi ra saa:
―Saa ra, mii na ñuu, na xiꞌin suvi, ra chäꞌvi vi na kan tu saa. 27Ndi su ña na säa na xiꞌin yo, ra kuaꞌan yuꞌu mini kan ra tava kun tiaka, ra ri nuu vaꞌa tava kun xiꞌin kàà tiku kun kuvi ri kuña kun yuꞌu, ra ikan ndikaa iin xuꞌun kàà ndakiꞌin kun, ra ña kan ke chaꞌvi kun nuu yuꞌu xiꞌin nuu mii kun ―kachi Jesús xiꞌin ra Pedro.
موجودہ انتخاب:
San Mateo 17: mxvNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2017, Wycliffe Bible Translators, Inc. All rights reserved