Matthew 4
4
Jesus kaa kakwechihaakanuut chechii wanituutahk
Mark 1.12, 13; Luke 4.1-13
1Ekw Kaa payehchisiyich Ahchaahkwa kaa ituhtahiikut Jesus anite pakwaatiskamikaahch chechii kakwechihiikuyich machimanituu. 2Iskutak maak nemitanuu chiishikaauh kaye nemitanuu tipiskaauh anit kaa ihtaat ekaa miichisut Jesus, chii siiweyuu. 3Ekw machimanituu kaa pechi nituwaapamikut, ekw kaa itikut, “Taapwe aahch e aawane Chishemanituu Ukusisa, iishich uchii asiniich chechii aaihkunaautwaau.”
4Mikw maak Jesus chii nishkweushiheu e itaat, “Chishemanituu utayimuwin itashteu,
Namui mikw aaihkunaau e muwaat chika chii uhchi pimaatisiyuu awen, aniyuu misiwe taan kaa itwet Chishemanituu anite utayimuwinihch eukw aniyuu mikw chechii pimaachihiikut.”
5Ekw machimanituu kaa ituhtahaat Jesus anite Jerusalemihch, ekw kaa iskwaahtawiihtahaat aniyuu chisheayimiheukamikuyuu anite maauch e ishpaanaayich kaa ituhtahaat. 6Ekw kaa itaat, “Taapwe Chishemanituu Weukusiitutaaskwe, aamikwaashkuhtih. Wesh itashteu Chishemanituu utayimuwinihch,
Chishemanituu chika itashuwaateu utenchilamh chechii miyunaanaakachihiiskwaau, enchilich chika tahkunikuch ekaa mechim che uhchi aahkuhtataayin chisit asiniihch.”
7Jesus maak chii iteu, “Mikw maak itashteu kaye Chishemanituu utayimuwinihch,
Namui chipaa uhchi kakwechihaau Utipeyihchikeu Chichishemanituum.”
8Ekw miin kaa wii kakwechihaat machimanituu aniyuu Jesus kaa ituhtahaat anite naashch e ishpaanaayich wachiyuu, kaa waapahtiyaat misiwe chisheuchimaawinh utah aschiihch kaa ihtakuniyikwaauh kaye taan e ishi ihtakuniyich miisitisiiwiniyuu anite. 9Ekw kaa itaat, “Misiwe chika miitin uu pechi niipiskuupiyine e ihtaayaan e nuuchiishtuwiyin.”
10Mikw maak Jesus chii nishkweushiheu e itaat, “Chiya machimanituu, maachiih iiches nete. Itashteu Chishemanituu utayimuwinihch,
Mikw Utipeyihchikeu Chichishemanituumiwaau nuuchiishtuwaahkw kaye mikw wiya atushkuwaahkw.”
11Chek maak machimanituu kaa nakataat aniyuu Jesus, ekw enchilh kaa utihtikut che wiichihiikut.
Jesus kaa chihchipayihtaat e kacheskwet Galileehch
Mark 1.14, 15; Luke 4.14, 15
12Iskutak Jesus kaa pehtahk John e chii maakunaakanuyich, anite Galilee aschiihch chii ituhteu. 13Ekw anite Nazareth kaa uhchi chistuhtet. Ekw anite Capernaum kaa ishinihkaateyich ihtaawiniyuu, anite Galilee saakahiikanihch kaa ihtakuniyich ekute kaa nituu wiichit, anite Zebulun ekw maak Naphtali kaa ishinihkaateyikwaauh aschiih. 14Iskutak maak anite kaa wiichit Jesus ekw kaa ispayiniyich aniyaa uchischiwehiichesuu Isaiah kaa itwet,
15Nituhtamukw chiyawaau anite Zebulun kaye Naphtali aschiihch kaa ihtaayekw, kaye chiyawaau yaaiskanuu kaa wiichiyekw nete ishi chihchikamiihch ekw maak chiyawaau kwestehchekaam Jordan siipiihch kaa wiichiyekw. Nituhtamukw kaye chiyawaau Galileehch kaa wiichiyekw, anite waachitwaau ekaa Jewa kaa itiskaanesitwaau iinuuch. 16Aat wanitipiskusiiwinihch e ishi pimaatisiitwaau chitiiniimuwaauch chii waapahtamuch e mista waashteyich. Mekwaach kaa ihtaatwaau anite e ukaashteyaayich anite e ihtakuniyich nipuwiniyuu, chii utihtihukuuch waashtewiniyuu.
17Ekut maak kaa chihchipayihtaat Jesus e kacheschimaat aniyuu iinuu e itaat, “Kweskaatisiikw, nakatamukw chimachihtwaawinawaauh wesh shaash peshunaakun kihchikiishikw chisheuchimaawin.”
Aniyuuh niishtam chischinuhamuwaakanh kaa wiishaamaat Jesus
Mark 1.16-20; Luke 5.1-11
18Mekwaach maak Jesus e pimuhtet anite yaayeu aniyuu Galilee saakahiikaniyuu, chii waapameu niishu naapeu e wiichiiniihtuyich e nuutameseyich, eukw aniyuu Simon Peter kaa ishinihkaataat ekw maak aniyuu wiichiiniyuuh Andrew, e nuutameseyich anite saakahiikanihch ahiipii e aapachihaayich. 19Ekw Jesus kaa itaat, “Aashtamukw pechi wiicheuk, chika ihtuutaatinaawaau iinuuch chechii pitahuyaayekw muyaam e ishi pitahuyaayekw namesach.” 20Tiiwehch maak chii nakateuch utahiipiiwaau ekw kaa ati wiichewaatwaau Jesus.
21Miin maak chii ati chistuhteu Jesus, ekw miin kaa waapamaat niishu naapeu e wiichiiniihtuyich, James ekw maak John, Zebedee ukusiyuuh. Anite utuutiihch chii ihtaayuuh kaye aniyuu uhtaawiyuu, e weshtuutuwaatwaau utahiipiiwaau. Jesus kaa wiishaamaat, 22tiiwehch maak chii nakatamuch aniyuu utuutuwaau kaye aniyuu uhtaawaau, ekw kaa ati wiichewaatwaau aniyuu Jesus.
Jesus kaa ishi kacheskwet kaye kaa miinuwaachihaat kaa aahkusiyich
Luke 6.17-19
23Jesus maak misiwe anite Galilee e ishpishaayich chii ituhteu e chiskutamaachet anite Jewa ayimiheukamikuhch, e waawiihtahk miywaachimuwiniyuu Chishemanituu uchisheuchimaawiniyuu e aayimuutahk, kaye e miinuwaachihaat nanaahkuu aweyuuh misiwe nanaahkuu itaaspinewiniyuu e ayaayich. 24Chii tipaachimaakanuu maak misiwe anite Syriahch, ekw maak awenichii kaa peshuwaatwaau misiwe aniyuuh kaa aahkusiitwaauh anite kaa ihtaayich, nanaahkuu itaaspinewiniyuu kaa ayaayich, kaye aweyuu machiahchaahkwa kaa piihchishkaakuyich, kaye aniyuuh kaa uchipitikuyich kaye aniyuu ekaa kaa nisitusiyich. Misiwe maak chii miinuwaachiheu Jesus uyuu aweyuu kaa peshuwaakanuyich. 25Mihchetu maak aweyuu chii papaawiicheukuu Jesus, anite Galileehch kaye anite kaa mitaahtuhkwaau ihtaawinh kaa ishinihkaateyich, kaye anite Jerusalemihch, Judeahch kaye maak kaye anite kwestehchekaam Jordan siipiihch kaa ihtaayich.
موجودہ انتخاب:
Matthew 4: crjrNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.