Матфейица бицараб Рохалил хабар 4
4
4 бетӏер
Илбисалъ хӏалбихьула Гӏиса къосинавизе
1Цинги гьеб Рухӏалъ Гӏиса гӏицӏаб авлахъалде вачана. Илбисалъ хӏалбихьана гьев къосинавизе кӏвелародайилан. 2Гьенив кӏикъого къоялъ ва кӏикъого сордоялъ кӏал ккун вукӏарав Гӏиса ахирги вакъана. 3Бачӏун илбисалъ абуна гьесда:
– Мун Аллагьасул Вас ватани, чадазде сверайилан амру гьабе гьал ганчӏазе.
4Гьелъие жаваб гьабун, Гӏисаца абуна:
– Тӏехьалда хъван буго: «Цохӏо чадица гуребин чиясе чӏаголъи кьезе бугеб, Аллагьасдасан бачӏараб щибаб рагӏиялъин».
5Цинги Мукъадасаб шагьар Иерусалималде вачун, илбисалъ Гӏиса Мукъадасаб Рукъалъул сиялда тӏад лъола. 6Гьелъ абула:
– Мун Аллагьасул Вас ватани, гъоркье кӏанцӏе! Тӏехьалда хъван бугелъул: «Аллагьас малаикзабазе дур рахъалъ амру гьабун буго» ва: «Гьез мун кодов ккун восила, ганчӏидацин дур хӏетӏе тункичӏого букӏине».
7Гӏисаца абуна:
– «Дурго Бетӏергьан Аллагьасул хӏалбихьуге!» – янги хъван буго Тӏехьалда.
8Гьанже илбисалъ Гӏиса цӏакъго борхатаб мегӏералъул тӏогьиве вачуна ва дуниялалъул киналго пачалихъалги ва гьезул кинабго кӏодолъи-къудратги бихьизабула гьесда.
9Цинги Гӏисада абула гьелъ:
– Гьаб кинабго дуе кьела дица, бетӏер къулун дуца дие сужда гьабуни.
10Гӏисаца гьелда абула:
– Тӏагӏа дида цебеса, шайтӏан! Тӏехьалда хъван буго: «Цохӏо Аллагьасе – дурго Бетӏергьанасе – гурони сужда гьабуге. Цохӏо Гьесие гьабе гӏибадат!»
11Гьебмехалъ илбисалъ Гӏиса живго тола. Гьале малаикзаби рачӏана гьесие хъулухъалъе.
Галилеялда Гӏисал вагӏза-насихӏат
12Яхӏя гвандинив тӏамун вугилан рагӏидал, Гӏиса Галилеялде ана. 13Амма Назареталда чӏечӏо гьев. Забулонил ва Нафталимил ракьалда, Галилеялъул ралъдал рагӏалда бугеб Капернаум шагьаралде ун, гьенив чӏана. 14Гьеб гьедин ккана Ишая аварагасда Аллагьас абураб гьадинаб калима ритӏухълъизе:
15«Забулонил ракь ва Нафталимил ракь!
Ралъдахъе унаго нухда бугеб ракь!
Иордан гӏурул доб рахъалда бугеб ракь!
Галилея – цогидал халкъазул ракь!
16Бецӏлъуда букӏараб нужер халкъалъе гвангъараб нур загьирлъана,
нужер улкаялда хвалил рагӏдукь рукӏаразе рогьалил бакъ баккана».
17Гьелдаса хадуб халкъалъе вагӏза-насихӏат гьабизе байбихьана Гӏисаца.
– Нуж кантӏе, Аллагьасде русса! – ян абулеб букӏана гьес. – Зобалазул Парччахӏлъиялъул заман тӏаде гӏунтӏун бугебин!
Гӏисал тӏоцересел муридал
18Галилеялъул ралъдал рагӏалдасан унаго, Гӏисада вихьана ччугӏие гьин рехулев кӏиго вац: Пётр#4:18 Пётр – грек мацӏалда «кьуру» абураб магӏна буго гьеб рагӏул. абун гьес тӏокӏцӏар лъурав Симонги гьесулго вац Андрейги. Гьел рукӏана ччугӏихъаби.
19– Дида цадахъ рилълъа, – ян абуна гьезда Гӏисаца. – Дица нуж лъугьинарила гӏадамал кколел ччугӏихъабилъун.
20Гьенибго гьинги тун, гьебсагӏат гьел Гӏисада цадахъ уна.
21Гьениса унаго кӏиго чи вихьана гьесда. Гьел рукӏана Зебедайил вас Якъубги гьесулго вац Иоаннги. Жидерго эмен Зебедайгун цадахъ лъугьун ччугӏа кквезе гьин къачӏалел рукӏана гьел росода тӏад. Дида цадахъ рилълъайилан ахӏана гьездеги Гӏисаца. 22Росода тӏад эменги вукӏаралъув тун, гьебсагӏатго гьелги ана Гӏисада цадахъ.
Тӏолабго Галилеялда хьвадулев вукӏана Гӏиса
23Цинги гьев хьвадана тӏолабго Галилеялда: гьезул синагогабазда гӏадамазе вагӏза-насихӏат гьабулаан, Зобалазул Парччахӏлъиялъул хӏакъалъулъ Рохалил хабар лъазабулаан, кинабго унта-щокълъиялдаса гӏадамал сахлъизарулаан. 24Тӏолабго Сириялда тӏибитӏана гьесул цӏар. Гьесухъе рачун рачӏунаан унтуца гӏазаб кьолеб бугелги, шайтӏабаца ккуралги, унти бачӏунелги, палижалъ ккуралги, – батӏи-батӏияб гӏузру бугел гӏемерал гӏадамал. Гьел киналго сахлъизаруна Гӏисаца. 25Гьесда хадур рачӏунел рукӏана Галилеялдасаги, Анцӏшагьаралдасаги, Иерусалималдасаги, Ягьудиялдаса ва Иордан гӏурул добаб рахъалдаса цӏакъ гӏемерал гӏадамал.
موجودہ انتخاب:
Матфейица бицараб Рохалил хабар 4: AvrNT
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Библия таржама гьабиялъул институт Москва 2008