Matíó Nifínínə́
Nifínínə́
Matíó a ka báá wɔmɔtɛ́ ətíə́ yɛ niómo na báfandɛ́ nɛ́ bɔkɔ́nɛna bá Yə́susu kilísitusu. A ka bá mɔkɔtabɛtásɛ ubusíə́ ɔbɔ́á Yə́susu a wɛɛ́ya ɛ́lɛ́ákɛ́na. A ka báá Mɔyútɛnɛ, a bɔsɔ́kɔ́ Bɛyútɛnɛ bɛ́kɔ́lɔmɔkɔna tɔ́na ɔ ikúílí a ndɔ hiítə tilə.
A ka ínə́kiniə ɔ ɔwayɛ́ hiəfulə ɔwá, Yə́susu a lɛa wɛ́ɛ́yɛ́ ɔwá Huɛlɛ́ a ná bílíhə́níə́ ɔ bikúílí ɔbɛ́á bɛ́ ná tɔ́mbáká ɔ bɔnɔŋɔ bɔ́ Bɛyútɛnɛ, wɛ́ɛ́yɛ́ ɔwá a ŋɔ bəə́bu nuəkəniə. Ɔwɔŋgɔkɔnɔ mafana ɔ hiəfulə hɛ́ nɛtɔana nɛ́ buɔnɔ́, Matíó a ndɔ ínə́niə ɔwá, á Yə́susu á ná bikimə úndúsíníə́ ɔbɛ́á bɛ́ɛ́yɛ́ bɛtambá bɛ́ ndɔ fə́mə́ləniə. Wɛɛ́ya a lɛ́á Kilísitusu, á Mɔná wa Huɛlɛ́ ɔwá a lɛ́á ɔ buɔmɔ́ (16.16).
Ɔ tɔ́mbákɛna na nɛ́áyɛ́á nibíbíə́nə na bɔ́áyɛ́á bɔlɔ́matɔ́ bukimə, Matíó a ndɔ ínə́niə ɛ́sɛ́á Yɔhánɛsɛ a ná wɛɛ́ya nɛsɔa índíə́, nəníə́ Sátana a ná wɛɛ́ya kɔsɔ́na. A ka kɛndaka ɔ Yəlúsalɛma yikimə, ɔ Kalɛ́lɛa ɛlɔ́áyɛ́ Ɛtambá yɛ́ Huɛlɛ́ uhúlə́ nɔŋɔna, a ná bilúkunə nɔŋɔ́nákɛ́ná yatɛ́ yɛ́ lɛ́á nɛmanɛna nɛ́ Huɛlɛ́, a bɛnákɛnákɛ niŋəsəkiə (8.16). Əlimə yɛ ikúílí, nəníə́ Bɛyútɛnɛ bá ná wɛɛ́ya halɛ́na, bá ná wɛɛ́ya hánɛ́na ɔ bamanɛna bá Lɔ́ma ɔkɛaka ɔwá bá wɛɛ́ya kə́lə́sə́kíə́. Ɔ tifəkə, a ná hɔ́kɛ́ná ɛ́sɛ́á bá ná wɛɛ́ya ɔ́mɔ́kɛ́na ɔ ɔmbásá, a ná wəə, a ná hɔŋɔ́á ɔ ətíə́ yɛ bəwə́nú.
Bɛkɛ́tɛ bɛ́ ɔnjɔmɔ bɛ́ híihi hiəfulə
Náana bɛkɔa bɛ́ híihi hiəfulə bɛ́ lɛ́á tɛ́kɛ́nátɔ.
Bisə́kúlúlúnə́ na nibíbíə́nə nɛ́ Yə́susu (1-2).
Nɛsɔa na makɔsɔnana má Yə́susu (3-4).
Hiŋgəyə́ ɔ ɔmáá ɔmbáŋá (5-7).
Bisə́mə́tə́ bɛ́ Yə́susu (8-9).
Bɔndaka bɔ́ bɔkɔ́nɛna (10).
Ɛŋgamɔ́ na bááyɛ́ ɔbá bá ndɔ Yə́susu ɛ́ŋɛ́mana (11-12).
Ɔŋana wɔ́ Nɛmanɛna nɛ́ Nɔɔ́mɛná (13).
Yə́susu ɔ ɛŋgamɔ́ na Bɛfalísia (14-17).
Yatɛ́ yɛ́ lɛ́á mɔkɔ́nɛna (18).
Yə́susu a nɔ́ hɔalɛna ɔ Kalɛ́lɛa ɔ wákaka ɔ Yəlúsalɛma (19-23).
Ɛmɔ́kɛ́, nyɛmbɛ́ na nɛhɔŋɔa nɛ́ Yə́susu (26-28).
موجودہ انتخاب:
Matíó Nifínínə́: tvu
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2019, CABTAL