ମାତିଉ 2
2
ପୁର୍ବ ଦେସ୍ତି ପଣ୍ତିତ୍କୁ
1ହେରୋଦ୍ ରାଜା ସାସନ୍ ସମୟତୁ ଜିହୁଦା ରାଜିଦି ବେତଲିହିମ୍ ଗାଡ଼୍ତୁ ଜିସୁ ଜନମ୍ଆତାନ୍ । ତେନି ସାଣେକ୍ ସମୟ୍ ୱେନ୍କା ପୁର୍ବ ଦେସ୍ତି ଏସଲୋକ୍ ସୁକେଙ୍ଗ୍ ସୁଡ଼୍ଜି ୱେର୍ନିକାର୍ ଜିରୁସାଲମ୍ତୁ ୱାତାର୍ । 2ମାରି ୱାର୍ ୱେନ୍ବାତାର୍, “ଏମେ କଡ଼ ଜିହୁଦିର୍ ରାଜା ଆଦେଙ୍ଗ୍ ଜନମ୍ ଆତାମାନାନ୍, ୱାନ୍ ଏମେ ? ପୁର୍ବ ଦେସ୍ତୁ ୱାନି ସୁକା ସୁଡ଼୍ଜି ୱାନିଙ୍ଗ୍ ମାଡ଼ିସ୍କିଦେଙ୍ଗ୍ ମାପ୍ ୱାତାମାନାପ୍ ।”
3ୱାରି ଇୟା ମାଟା ୱେନ୍ଞ୍ଜି ରାଜା ହେରୋଦ ମାରି ଜିରୁସାଲାମ୍ତି ୱିଜେରେ ଲୋକୁ ନାଣ୍ତ କାବାଆତାର୍ । 4ହେରୋଦ ୱିଜେରେ ପେରି ଜାଜକର୍ ମାରି ଦାର୍ମୁଗୁରୁରିଙ୍ଗ୍ କୁକ୍ସି ୱାରିଙ୍ଗ୍ ୱେନ୍ବାତାନ୍, “ମସିହ ଆମାକାନ୍କି କ୍ରିସ୍ତ ଆମାନ୍ ଜନମ୍ ଆନାନ୍ ?”
5ୱାର୍ ଇର୍ହାର୍, ଜିହୁଦା ରାଜିଦି ବେତଲିହିମ୍ତୁ । ଇୟା ବିସୟ୍ତାନ୍ ଅରେନ୍ ବାବବାଦି ରାସ୍ତାମାନାନ୍ ।
6ଜିହୁଦା ରାଜିଦି ବେତଲିହିମ୍,
ଜିହୁଦାଦି ପେରି ଗାଡ଼ାକା ଲୋଇ ନିନ୍ ଇସ୍ରିକିନ୍ଦା ସିଲେ,
ନିବାଣ୍କୁ ଅରେନ୍ ନେତା ୱାନାନ୍,
ଇରିଙ୍ଗ୍ ନା ଇସ୍ରାଏଲ୍ ଲୋକାଙ୍ଗ୍ ସାଲାକିନାନ୍ ।
7ଇକା ୱେନ୍ଞ୍ଜି ହେରୋଦ ପୁର୍ବଦେସ୍ତାନ୍ ୱାତି ମାର୍ଇୱାରିଙ୍ଗ୍ ଉଣ୍ତ୍ରି ମାର୍କ୍ସି ୱାର୍ଗିନିସାନି କୁଟୁମ୍ତୁ କୁକିସ୍ କିଜି ଟିକ୍ ଆମା ସମୟ୍ତୁ ସୁକା ସତାମାର୍ହାନ୍, ୱାରି ମାଣ୍କୁ ୱେନ୍ବାତାନ୍ । 8ୱେନ୍କା ୱାରିଙ୍ଗ୍ ବେତଲିହିମ୍ ଗାଡ଼୍କୁ ପୋକ୍ସି ଇର୍ହାନ୍, “ସାନ୍ଡ୍ରୁ, ଆୟା କଡ଼ଦିଙ୍ଗ୍ ନେଗେନ୍କିଜି ପୟ୍ଦୁ ମାରି ୱାନିଙ୍ଗ୍ ପୟ୍ତିଙ୍ଗ୍ ନାଙ୍ଗିଁ ୱେର୍ତୁ, ନାନ୍ ବା ସଲ୍ସି ୱାନିଙ୍ଗ୍ ମାଡ଼ିସ୍କିନା ।”
9ସୁକେଙ୍ଗ୍ ସୁଣିକାର୍ ରାଜାଦି ମାଟା ୱେନ୍ଜି ଆୟା ବାଡି ଡ଼ିସ୍ସି ମାରିଡ଼େସି ୱାରି ସନି ସାରିଦୁ ସନିୱାଲେ, ୱେଡ଼ା ସନି ତରିଟି ବାଦଡ଼୍ତୁ ସୁଡ଼ୁତିମାର୍ଇ ଆୟା ସୁକା ମାରିଡ଼େସି ତରାତାତ୍ । 10ସୁକାଦିଙ୍ଗ୍ ସୁଡ଼୍ଜି ୱାରି ଏସା ୱେଡ଼ିକା ଏସା ୱେଡ଼ିକା ଆଜି ନିଙ୍ଗିଁତାର୍ ୱାର୍ ୱାରି ଆଗ୍ଡ଼ି ଆଗ୍ଡ଼ି ବୁଲାଜି ସୁକା କଡ଼ ମାର୍ଇ ଇଲୁ ମୁସ୍କୁ ତେବାତାତ୍ । 11ୱାର୍ ଆୟା ଇଲୁ ଲୋଇ ଡ଼ୁଗିତାର୍ ମାରି କଡ଼ଦିଙ୍ଗ୍ ଆଇସି ମରିୟମ୍ତି ୱାଲେ ସୁଡ଼୍ଜି ମେଣ୍ତେଙ୍ଗ୍ଗଟ୍କିଜି ୱାନିଙ୍ଗ୍ ମାଡ଼ିସ୍କିତାର୍ ମାରି ଅର୍ସେ ତାତିମାର୍ଇ ବାଙ୍ଗାଁରାମ୍, କୁନ୍ଦୁରୁ ନି ବାସ୍ନା ନିୟୁ ସପ୍ସି ୱାନିଙ୍ଗ୍ ଦାନ୍ ସିତାର୍ ।
12ଇୟା ୱେନ୍କା ୱାର୍ ଆଇ ଉଣ୍ତ୍ରି ସାରି ସିଜି ନିଜେଦି ଦେସ୍ତୁ ସର୍ହାର୍ । ଇରିଙ୍ଗ୍ ହେରୋଦଦି ଲାକ୍ତୁ ଡ଼େସି ସଲ୍ଇ ଉଣ୍ତିଙ୍ଗ୍ ମାପୁରୁ ୱାରିଙ୍ଗ୍ ଲବେରୁ ଆଦେସ୍ ସିତାମାର୍ହାନ୍ ।
ମିସର୍ ଦେସ୍ତୁ ଉରୁକ୍ତାର୍
13ସୁକେଙ୍ଗ୍ସୁଣିକାର୍ ସର୍ଇ ୱେନ୍କା ମାପୁରୁଦି ଦୁତ୍ ଜୋସେପତିଙ୍ଗ୍ ଲବେରୁ ତରାଇଆଜି ଇର୍ହାତ୍, “ହେରୋଦ କଡ଼ଦିଙ୍ଗ୍ କାତ୍ତେଙ୍ଗ୍ ପୟ୍ନାନ୍ । ଆଦେଙ୍ଗ୍ ନିଙ୍ଗିଁଆ, କଡ଼ଦିଙ୍ଗ୍ ନି ୱାନି ଆଇସିଙ୍ଗ୍ ଅସି ମିସର୍ ଦେସ୍ତୁ ଉରୁକ୍ତୁ । ଆୟା ବାଡି ନାନ୍ ଡ଼ିସ୍ତେଙ୍ଗ୍ଁ ଇନ୍ଇ ସାନ୍ଦି ଆବେ ତେବାଦୁ ।”
14ଜୋସେପ୍ ନିଙ୍ଗିଁଜି କଡ଼ ନି ୱାନି ଆଇସିଙ୍ଗ୍ ଅସି ଆୟାନାଡ଼ା ମିସର୍ତୁ ସନ୍ଡ଼୍ରେଙ୍ଗ୍ ସତାର୍ । 15ହେରୋଦଦି ସାନି ସାନ୍ଦି ଆବେ ୱାର୍ ତେବାତାର୍ । ଇୟାୱିଜୁ ଗଟାନି ମାଣ୍କୁ ବାବବାଦିଦି ମାଣାନ୍ ପ୍ରବୁଦି ମାଟା ସତ୍ ଆତାତ୍ । ୱାନ୍ ଇର୍ଆ ମାର୍ହାନ୍, “ନା ମାରିନ୍ତିଙ୍ଗ୍ ନାନ୍ ମିସର୍ ଦେସ୍ତାନ୍ କୁକ୍ତା ତାତା ।”
କଡ଼ରିଙ୍ଗ୍ କାତ୍ନିକା
16ପୁର୍ବ ଦେସ୍ତାନ୍ ୱାତିମାନି ସୁକେଙ୍ଗ୍ସୁଣିକାର୍ ୱାନିଙ୍ଗ୍ ବାଣ୍ତିସ୍କିଜି ସର୍ହାମାନାର୍ ନେସ୍ସି, ହେରୋଦ ରିସାଆତାନ୍ ମାରି ବେତଲିହିମ୍ ନି ତାନି ଲାକ୍ତୁରି ରାଜିଆଙ୍ଗାଁ ମାନି ଦୁଇ ବାର୍ସୁ ନି ତାନେଙ୍ଗ୍ ଉଣା ବାର୍ସେକ୍ତି ୱିଜେରେ କଡ଼ରିଙ୍ଗ୍ କାତ୍ତେଙ୍ଗ୍ ଇଜି ଆଦେସ୍ ସିତାନ୍ । ସୁକା ସତିମାର୍ଇ ୱେଡ଼ା ବିସୟ୍ତାନ୍ ସୁକେଙ୍ଗ୍ସୁଣିୱାରିମାଣ୍କୁ ୱାନ୍ ଆମାକା ୱେର୍ହାମାର୍ହାନ୍, ଆୟା ଇସାବ୍ତାନ୍ ୱାନ୍ କଡ଼ରି ବାର୍ସୁଦି ଜଗ୍ ତିଆର୍ କିତାମାର୍ହାନ୍ ।
17ନାସ୍ତିୱାଲେ ଜିରିମିୟ ବାବବାଦି ମାଣାନ୍ ରାସ୍ତିମାର୍ଇ ଇୟା ବାକ୍ୟ ସତ୍ ଆତାତ୍ ।
18“ରାମା ଗାଡ଼୍ତୁ ଆଉଲି ୱାଜିନାତ୍,
ତାନି ଦୁକ୍ତୁ ଆଡ଼୍ବାନି ବଲ୍ ।
ରାହେଲ୍ ତାନି କଡ଼ରି ଉଣ୍ତିଙ୍ଗ୍ ଆଡ୍ବାଜିନାତ୍;
ତାନେଙ୍ଗ୍ ଏଣ୍ତେସ୍ ନାନି ବାସାଦାନ୍ ସୁକ୍ ସିଦେଙ୍ଗ୍ ଆଏଜିନାତ୍,
ଇରିଙ୍ଗ୍ ୱାର୍ ୱିଜେରେ ସାତାର୍ ।”
ମିସର ଦେସ୍ତାନ୍ ଡ଼େସିୱାନିକା
19ହେରୋଦଦି ସାତି ୱେନ୍କା ପ୍ରବୁଦି ଦୁତ୍ ମିସର୍ତୁ ଜୋସେପତିଙ୍ଗ୍ ଲବେରୁ ତରାଇଆଜି ଇର୍ହାତ୍, 20“ନିଙ୍ଗିଁଆ, କଡ଼ଦିଙ୍ଗ୍ ନି ୱାନି ଆଇସିଙ୍ଗ୍ ଆସ୍ସି ଇସ୍ରାଏଲ୍ ଦେସ୍ତୁ ଡ଼େସି ସାଙ୍ଗ୍ଆ । ଇରିଙ୍ଗ୍ ଏର୍ ୱାନି ଜିବନ୍ ଅତେଙ୍ଗ୍ ବଦାକିଜିମାର୍ହାର୍, ୱାର୍ ସାତାର୍ ।” 21ଆବେଟ୍ ଜୋସେପ୍ ନିଙ୍ଗିଁଜି କଡ଼ ନି ମରିୟମ୍ତିଙ୍ଗ୍ ଆସ୍ସି ଇସ୍ରାଏଲ୍ ଦେସ୍ତୁ ଡ଼େସି ସର୍ହାନ୍ ।
22ମାତର୍ ହେରୋଦଦି ୱେନ୍କା ୱାନି ମାରିସି ଆର୍କିଲାୟ, ଜିହୁଦାଦି ରାଜା ଆତାମାନାନ୍ ୱେନ୍ଞ୍ଜି ୱାନ୍ ଗାଲିଲି ସନ୍ଡ଼୍ରେଙ୍ଗ୍ ତିଲାତାର୍ । 23#ମାର୍କ ୧:୨୪; ଲୁକ ୨:୩୯; ଜୋହନ ୧:୪୫.ମାତର୍ ଲବେରୁ ମାଟା ୱେନ୍ଞ୍ଜି ୱାନ୍ ଗାଲିଲି ରାଜିଦୁ ସର୍ହାନ୍, ମାରି ନାଜରିତ ଦର୍ତି ଗାଡ଼୍ତୁ ଇଲୁ କିଜି ତେବାତାନ୍ । ଆବେଟ୍ ବାବବାଦିରି ମାଣାନ୍ ରାସାତି ଉଣ୍ତ୍ରିବାକ୍ୟ ସତ୍ ଆତାତ୍ । “ୱାନ୍ ନାଜରିୟତିୟ ଇଜି ୱେଙ୍ଗ୍ଁନାନ୍ ।”
موجودہ انتخاب:
ମାତିଉ 2: NTKoo20
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020