Lukasə 13
13
Fɛ́d Nə́ á Mə́m Təpɔŋ Əwɨ, kɨ Nə́ Kwûə
1Á nə ḿbə́ əghâ yi wɨ́ lə́, pɨ pətsə́ pó chîə aliʼ yi wɨ́ ə́fiʼtə̂ Yeso ndzaŋ Payilɛlə a kə jwítə nə́ pɨ pə́ Galili pətsə́ əghâ ándó pó nə ńtə́ nə̈ ə́fɛ̂ akáŋə́sê. 2Yeso a kwěe ághɔ́b ńgə́ “Nə́ kwaŋ ńgə́ pə́ kə jwítə pɨ pə́ Galili pɨ́d pɨ nə́ jɨ́d jɨ əsêndú lə́ ńté ńgə́ pó nə ńgɛlə̂ təpɔŋ ńtsɛ pətsə́ pɨ pə́ Galili?” 3Ngá, mäŋ fiʼtə̂ áwɨ́ ńgə́ mbɔʼ nə́ chî kwúblə á mə́m təpɔŋ əwɨ pô, nə́ yǐ ńkə́ ńkwúkə ándó pó nə ńkwúkə nə́ lə̂. 4Nə kwaŋ ńgə́ pətsə́ pə́ ntsɔb nəfeemə́ a Silɔm páʼ asagə́ ndɛ̂ a kə kəmnə̂ ńgwǔ nə pó ńjwítə ághɔ́b lə, pó ghɛd lə́ a təpɔŋ ńtsɛɛlə̂ a ŋwu ntsəm páʼ a chî nə́ a Jɛlusalɛm? 5Ngá, mäŋ fiʼtə̂ áwɨ́ ńgə́ mbɔʼ nə́ chî fɛ́lə á mə́m təpɔŋ əwɨ pô, nə yǐ ńkə́ ńkwúkə ándó pó nə ńkwúkə nə́ lə̂.
Atséebə́nə́múʼ Ńté Atǐə Fig yə tə Zə́mə
6Yeso a tíʼ ńtséebə atséebə́nə́múʼ zəənə́ á mbô pó ńgə́, “ŋwu tsə̌ a kə láʼ ḿbǐə atǐə figə á nkáʼ yə́, əghâ ətsəm əghâ tsəm a yǐəə ńnáŋə, atǐə fig zə́ á pə́ ńkě zə́m pô. 7A tíʼ ə́sóŋə á mbô ŋwu páʼ a nə̈ faʼ nə́ a nkáʼ yí wə́ ńgə́ ‘Lɛ̌ ngoʼ teelə́ əghâ nə́ páʼ maŋ kə nə́ ńgyǐəə ńnáŋə fígə á atǐə nə́ ḿbə́ ńdáʼ ńkě táʼə ata ə́wɨ́ jɨ́ pô. Á chígə́ ńtsəŋə̂ ají ndəsê lə́ ńté akə̂? Kə́ʼə ájɨ́d ḿmaʼə̂ ndəsê.’ 8Ŋwu wə́ páʼ ä faʼ nə́ a nkáʼ yí lə́ a pə ńkwěe yí ńgə́ ‘Tǎ, pɨ ḿmɛdtə̂ ájɨ́d nə́ táʼ ngoʼə́, maŋ yǐ taʼ nətɛ́n yí ə́líblə ńnéŋə sɔləfâ ə́wə́. 9Mbɔʼ a yǒ ḿbə́ a ngoʼ ńdzə́m, á pɔŋə̂. Ńkə́ ńchî zə́m pô, gho kə́ʼ ḿmaʼə̂ əsê.’ ”
Yeso a Tsóʼə Kɔ́ŋə́sê Məngyě yitsə̌ Alěláʼə́sê
10A nə ńdáʼ ḿbə́ alěláʼə́sê yitsə̌, Yeso a tə ńdzéʼkə á mə́m Ndɛ̂sê Pəjus. 11Məngyě yitsə́ a kə chî ə́wɨ́ páʼ ajwiə təpɔŋə a kə ghɛd nə́ a ghɔ nə ngoʼ ntsɔb nəfeemə́. A nə ńgɔ tə ŋ́ŋɔ́dnə ńkě kwíʼnə ńchî mbɔʼ a pɨ ə́shǐ mbɨ əjǐ pô. 12Ndzaŋ Yeso a kə jɨ́ nə yí lə́, ə́fóŋə yí ə́sóŋ nə́ yí ńgə́ “Pə́ tsóʼə á gho á mə́m aghoonə́ azô zə̂!” 13ńnoŋkə̂ mbô míə a ndu yə́, tsɔʼə əghâ yi wɨ́ a lǒo ə́shǐ mbɨ əjǐ ńtíʼə ńgóʼkə əsê.
14Nətû nə́ kə chî nə́ a ndɛ̂sê pəjusə nə́ kə záŋ ndě lɛ tətətə, ńgə́ Yeso a tsóʼə ŋwunə alěláʼə́sê. Ńtíʼ ə́sóŋ nə ŋwu ntsəmə a kə chî nə́ aliʼ yi wɨ́ ńgə́, “Əlě pɛ́n ntogə́ ə́ chî nə́ ə́wə́ á mə́ faʼ nə́, lə́ələ́ pə ńgə́ ŋwu ntsəmə a yǐ nə́ əlě pɨ́d pə́, pə́ tsóʼə yə́, kɔ a yǐəə pə́ alěláʼsê!”
15Mmaʼmbîə a kwěe yí ə́sóŋ ńgə́ “pɨ ngaŋmə́fɨg! pɨ pətsə́ nə́ kə̈ ńkyagə̂ məfwɔŋ mɨ́, kɨ mənjakásə mɨ́ a akad pó, ńdɔgə̂ ńgɛnə̂ nkǐ, ə́fɛ̂ nkǐ nə́ pó alěláʼə́sê. 16Əghâ nə, lɛ̌ mɔ́ Ablaam páʼ Satanə a kə kwúd nə́ məŋkɛd nə́ ngoʼ məghə́m mɛ́n nəfeemə́; mbɔʼ pə́ kě yə́ alěláʼsê kyagtə̂?” 17Akwe yə á nə ńgɛd əshɨ́ ə́ kó ngaŋkə́pa əjí tsɔʼə ətsəm, apuʼə ŋwu ntsəmə a kə chî nə́ aliʼ yi wɨ́ a pə́ ńkɔŋtə̂ ńté əkɨʼnəmə́nu páʼ Yeso a kə̈ ghɛd nə́.
Atséebə́nə́múʼ ńté Mbaŋ Fɔ́lə́sə
(Mat 13.31, 32; Mag 4.30-32)
18Yeso a tíʼ ḿbítə ńgə́ “Anuə Nəfoonə Əsê a chî lə́ ándó akə̂? maŋ chîə á mə́ fiʼkə̂ nə́ ájɨ́d lɛ nə́ akə̂? 19A chî lə́ ándó mbaŋ fɔ́lə́sə páʼ ŋwunə a kə lɔg nə ḿbǐə a nkáʼ yə́, wə́ələ́ a kɔ́ʼ ńtíʼ ḿbə́ atǐ, pəsə́ŋ pə́ tíʼ ńkwúd mənka mɔ́b nə məntá míə.”
20Yeso a kə ḿbɨ ḿbítə ńgə́, “mbɔʼ maŋ fiʼə̂ anuə nəfoonə əsê lə́ nə́ akə̂? 21Á chî lə ándó mbê apá páʼ məngyě a lɔg nə́ ńnéŋə á mə́mə atsɛ̂káŋə flǎa, wə́ələ́ a nyinə̂ á mə́m flǎa yi wɨ́ tsɔʼə ntsəm ńtíʼ ńgɛd wə́ələ́ á kɔ́ʼə.”
Mɔ́kə́nyaŋ Ntsǒndɛ̂
(Mat 7.13, 14, 21-23)
22Yeso a kə tíʼə ńdaŋə̂ á mə́m pətɔ̂ŋ pópə əláʼ ńdzéʼkə ńtsóolə ńgɛnə̂ Jɛlusalɛmə. 23Ŋwu tsə̌ a pítə yí ńgə́ “Mmaʼmbî, lə́ yǒ chwád tsɔʼə pɔ́ pə́ ntaʼlə pɨ?” Yeso a kwěe ághɔ́b ńgə́, 24“Ghɛd nə́ anuə atsəmə á mə́ jɨ nə́ ńgə́ nə́ kwú nə́ mɔ́ kə́nyaŋ ntsǒndɛ̂, Mäŋ fiʼtə̂ áwɨ́ ńgə́ pɨ pipə nɨ́ nə́ pə́ yǒ chwa ndúmə mə́ kwú nə́, ə́ pə́ kě jɨ́ pô. 25Mbɔʼ ngaŋ ndɛ̂ a laŋ tə ńdǒ əsê ńgwuʼnə̂ ntsǒndɛ̂, nə́ tə́əmə apeŋ ńtíʼə ḿbóʼtə ntsǒndɛ̈ ḿbóʼmbô ə́sóŋə ńgə́ ‘Mmaʼmbî, ŋáʼ ntsǒndɛ̂ á mbô pəgə́.’ A yǐ kwěe ńgə́, maŋ kě áwɨ́ jî pô, ńkě nəfɛdnə́ jɨ́ kə́ ńjî pô. 26Nə́ tíʼ ə́sóŋ ńgə́ ‘Pɛn kə̈ jînə ńkə́ ńnônə, gho kə̈ ńdzéʼkə á aláʼ pəgə́!’ 27A kə́ ḿbɨ ńkwěe áwɨ́ ńgə́, Maŋ kě áwɨ́ jî po, ńkě nəfɛdnə́ jɨ́ kə́ ńjî pô: lǒo nə́ a əshî maŋə ngaŋə́ghɛlə təpɔŋ.”
28“Pɨ yǒ kyéŋə ə́ zoŋə̂ kɔ́lə na mbɨ əzɨ əghâ ándó nə yǒ nə́ ńdzə́ənə Ablaam pó Azigə nə́ Jekɔbə, ḿbá məntúmə́sê mətsəm pó chîə á mə́mə anuə nəfoonə əsê, pə́ pə́ ḿmyaʼə̂ áwə́ənə́ apeŋə́. 29Pɨ pó yǒ fɛ́lə á ndú mə́numə sáʼ nə́ ə́wə́, ə́fɛ́lə a məkɔʼnə́, ə́fɛ́lə a mətoŋə́, ə́ yǐ ə́ lɔg əliʼ əpóobə́ aliʼə́ dina á mə́mə anuə nəfoonə əsê. 30Lə́ nkwâmbiə a yǒ tíʼ ngaŋndzəmə, ngaŋndzəmə a tíʼ nkwâmbiə.”
Yeso a Fɨnə̂ Ńté Jɛlusalɛmə
(Mat 23.37-39)
31Tsɔʼə əghâ yi wɨ́, Pəfalasi pətsə́ pə́ yǐ ə́sóŋ nə́ Yeso ńgə́ “fɛ́d ńgɛnə̂ a gho aliʼə́ ndaʼə, ńté ńgə́ Ɛlɔdə a tə́ ńdoonə̂ á mə́ jwítə nə́ a gho.”
32Yeso a kwěe ághɔ́b ńgə́, “Ghɛn nə́ fiʼtə̂ yə́, a túg nə́ ajíə ndzə̌lə ándó antsɔb lə́ ńgə́ maŋ yǐ kəm pɛ̌sê ə́ kə́ tsóʼ pɨ ə́sɛ̂n pó ngwɛʼə́ á tə́ ńkoʼ əlě teelə́ maŋ məgtə̂ afaʼə mə. 33Lə́ maŋ chîə á mə́ tə́ nə́ ghɛnə̂ ə́sɛ̂n pó ngwɛʼə́ nə́ əlě yǐ, ńté ńgə́ a kě koʼnə̂ á mə́ jwítə nə ntûsê aliʼə́ ndaʼ tə ńdéʼtə á Jɛlusalɛm pô.”
34“Pɨ pə́ Jɛlusalɛm, pɨ pə́ Jɛlusalɛm! pɨ nə ńjwítə məntúmə́sê ḿbɨ ńtə́mtə pɨ páʼ Əsê a tú nə́ á mbô pɨ nə́ məngɔʼə! Lə́ ngǎ ə́shíʼə́ maŋ táŋnə á mə́ kyeetə̂ nə́ pɔ́ pɨ́ táʼə aliʼə́ ándó mɛ́ ngə́bə ä kyeetə̂ pɔ́ pí nə́ mbab míə, nə pə́ ńkě kɔŋ pô! 35Əghâ nə́, pə yǐ myaʼə̂ áwə́ənə́. Mäŋ fiʼtə̂ áwɨ́ ńgə́ nə́ kě mə yǐ pɨ jɨ́ pô tə ńdéʼtə nə́ sóŋ ńgə́ ‘Mbwɔ́dnə ə́ chîə á mbô ŋwu páʼ a yǐ nə́ nə́ əlɛ́n Mmaʼmbîə.’ ”
موجودہ انتخاب:
Lukasə 13: azo
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in