Tobit 14
14
1Che' bajche' iliyi tsa' ujti it'añ jiñi Tobit cha'añ mi' ik'äybeñ iñuklel Lak Yum.
Kojixbä ixik'ojel jiñi Tobit ti' tojlel iyalobil
2Che' tsa' käñ sajti iwut jiñi Tobit añ jaxto cha'p'ejl ichäñk'al ija'bilel (62). Che' tsa' cha' k'oti iwut, tsi' itaja ka'bäl ichu'bä añ, tsa' kaji ichäñ p'uñtañob ipi'älob p'ump'uño'bä. Che' ja'el tsi' ichäñ ch'ujutesa Lak Ch'ujutat yik'ot tsi' ichäñ tsiktesäbe iñuklel. Tsa' chämi jiñi Tobit ti' ñäch'tälel, che' añix lajchänp'ejl iwäkk'al (112) ija'bilel, tsa' ich'ujul mukuyob ya' ti tejklum Nínive.
3Che' läk'älix cha'añ mi' chämel, tsi' päyä tilel iyalobil ik'aba' Tobías, tsa' kaji isu'beñ ili tik'ojeltak:
«Kalobil, päyä majlel jiñi awalobilob, 4kuku awik'otob ya' ti tejklum Media; ñumeñ uts'at mi' ikaj awajñel ya'i, mach lajalik ya' ti Asiria mi che'ik ya' ti tejklum Babilonia. Mach akäy aña'tañ chuki tsi' iyälä Lak Ch'ujutat che' tsi' itsiktesa jiñi x-alt'añ Nahum chuki mi' ikaj iyujtel ti' tojlel Nínive. Kujiläch cha'añ muk'äch ikajel ik'otel k'iñilel cha'añ mi' its'äktäyel pejtelel chuki tsa'bä isu'bu Lak Yum ti' tojlel x-altañob. Ma'añik mi' kajel iñusañ mi jump'ejlik it'añ tsa'bä iwäñ su'bu ti' tojlel iyumäñtel Asiria yik'ot ti' tojlel itejklum Nínive.
»Pejtelel jiñi israelitajob chumulo'bä ti ilumal Israel mi' ikaj ichojkelob lok'el ya' ti ilumal yik'ot mi' ikajel ipäjyelob majlel ti yañtakbä yumäñtel. Jiñi t'ojolbä lak lumal mi' ikaj ti jisäñtel: Jiñi Jerusalén yik'ot Samaria jochol mi kaj ikäytäl, ixku jiñi ch'ujulbä ajñibäl icha'añ Lak Yum mi' ikaj ipulob yik'ot jejmeñ mi' kaj ikäytäl ti ojlil k'iñ.
5»Ixku Lak Yum mi' kaj icha' p'uñtañob israelitajob yik'ot mi' ikaj icha' päyob majlel ya' ti ilumal. Che' mi' ik'otel iyorajlel bajche' albil icha'añ Lak Yum, jiñi Ch'ujulbä ajñibäl mi' ikaj icha' wa'chokoñtel. Awilañ, mach lajalik it'ojlel mi' ikaj ikälel bajche' ñaxambä.
»Che' ñumeñix k'iñ, che'äch bajche' tsi' itsiktesayob x-alt'añob, jiñi israelitajob mi' ikajel isujtelob ti' ilumal, che' jiñi mi' ikaj icha' wa'chokoñob jiñi Ch'ujulbä ajñibäl yik'ot jiñi tejklum Jerusalén mi' ikaj icha' ak'eñtel pejtelel it'ojlel.
6»Pejtelel jiñi tejklumtak ti' joytälel pañämil mi ikaj ikäyob jiñi kuybilo'bä ti ch'ujul tsa'bä icha'leyob lot ti' u'yaj t'añ ti' tojlelob. Che' jiñi mi ikaj icha' käñob yik'ot mi ikaj ich'ujutesañob Lak Ch'ujutat bajche' yumäl ti uts'at, yik'ot mi ikaj ich'ujutesañob ti jump'ejljach ipusik'alob.
7»Ti jiñbä k'iñ, pejtelel jiñi israelitajob tsa'bä itajayob ikoltäñtel, mi' kaj icha' sujtel ich'ujbiñob Lak Yum. Mi ikaj imuch'k'iñob ibä ti Jerusalén ilumal Abraham, ya'i xuk'ulob mi ikajelob ti chumtäl ti' pejtelel k'iñ. Lak Yum mi icha' ak'eñob ilumal. Majki ti isujm mi' ik'uxbiñob Lak Yum ti' pejtelel ipusik'al mi' kaj itajob itijikñäyel. Jixku xmulilob yik'ot xjoñtolilob mi ikaj ichojkelob lok'el ya' ti lum.
8-9»Jiñ cha'añ wäle, jkalobil, mi jk'ajtibeñet jatet yik'ot jiñi awalobilob la' ich'ujbiñob Lak Yum ti' pejtelel la' apusik'al, yik'ot la' imelob chuki mi imulañ Lak Yum. Käñtesañla jiñi la' awalobilob imelob chuki tojbä yik'ot la' it'oxob ichu'bä añ ti' tojlel p'ump'uño'bä. Su'beñla cha'añ ma'añik mi' täts'ob lok'el ibä ti' tojlel Lak Ch'ujutat yik'ot la' ich'ujutesañob ti' pejtelel ip'ätälel yik'ot ti' pejtelel k'iñ.
»Jkalobil, ti jiñbä k'iñ che' mi ichämel jiñi aña' che' tsa'ix amuku ti kt'ejl, lok'eñix majlel ila ti tejklum Nínive. ¡Mach achäñ ñusañix ak'älel ilayi! Ila, ti ili tejklum añ ka'bäl joñtolil yik'ot lotiñtel, mij k'el ma'añik majki mi' iñop.
10»Jatet awujil bajche' jiñi Nadab tsi' muku jiñi kichak' Ajicar che' kuxulto, cha'añ jiñäch imajañ tat. Kome jiñi Ajicar pejtelel k'iñ tsi' yäk'ä chuki añ icha'añ ti' tojlel jiñi p'ump'uño'bä, Lak Yum tsi' lok'sa ya' baki mukul, kañal iwut tsi' k'ele bajche' jiñi Lak Yum tsi' yäk'e itoj imul jiñi Nadab che' tsi' choko majlel ti chämel ya' baki ma'añik ijilibal. 11K'ajtesañ acha'añ bajche' jiñi Lak Ch'ujutat mi ich'ujutesañ majki mu'bä ikoltañ jiñi p'ump'uño'bä, ixku mi iyäk'eñ itoj imul ti chämel jiñi xjoñtolo'bä. Joñoñ mik su'beñetla cha'añ ma'añik mi' ñajäyel la' cha'añ pejtelel chuki tsa'bä ksu'beyetla. Ixku joñoñ, mik ña'tañ cha'añ muk'ix kaj kchämel».
Che' jiñi tsa' iñolchokoyob ti iwäyib, ya'i tsa' chämi. Ti wi'il tsa' mujki ti iñuklel.
Tobías tsa' majli ti chumtäl yik'ot iñi'tatob
12Che' bakibä k'iñ tsa' chämi Ana, iña' Tobías, ili tsa' majli imuk ti' t'ejl jiñi Tobit. Ti wi'il, tsa' majli yik'ot Sara iyijñam k'älä ti tejklum Media. Ya'i tsa' käleyob ti chumtäl ya' ti tejklum ti Ecbatana, temel yik'ot Ragüel iñi'tat.
13Cha'añ weñ ñoxobix jiñi Ragüel yik'ot Edna, Tobías tsi' käñta iñi'tatob, tsi' ipäsä ik'uxbiya ti tojlelob. Che' tsa'ix chämiyob, tsi' imukuyob ya' ti Ecbatana, yik'ot tsa' laj ochi ti' tojlel pejtelel ichu'bä añ iñi'tat, che' bajche' tsa' ilaj ch'ämä ichu'bä añ icha'añ itat Tobit.
14-15Che' maxto chämeñik, tsi' k'ele bajche' jiñi tejklum Nínive tsa' jisäñti ti' ik'äb Ciaxares, yumälbä ti Media, tsi' ik'ele bajche' tsa' käjchiyob majlel jiñi xchumtälob ya' ti jiñi tejklum. Che' jiñi tsi' ich'ujutesa Lak Ch'ujutat cha'añ tsi' k'ele bajche' tsa' iyäk'e itoj imul jiñi asiriojob yik'ot ninivitajob, yik'ot tsa' itijikñesa ipusik'al cha'añ tsa' ik'ele pejtelel iliyi che' maxto chämik.
Weñ k'ux tsi' ubiñti jiñi Tobías che' kuxulto, che' tsa' k'oti yorajlel ichämel, añ wäklujump'ejl iwukk'al (117) ija'bilel.
موجودہ انتخاب:
Tobit 14: CholDc
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Biblia Chol de estudio con DC- Derechos reservados por SBM